شينحۋا اگەنتتىگىنىڭ حاربيننەن بەرگەن حابارى (ءتىلشى چي حۇڭشين). 2013 - جىلى 11 - ايدىڭ 6 - كۇنى سول كەزدە حيلۇڭجياڭ ولكەسى باۋچيڭ اۋداندىق ساياسي كەڭەستىڭ ورىنباسار ءتوراعاسى، قوسىمشا وسى زامانعى اۋىل شارۋاشىلىعى عىلىم - تەحنيكاسىنان ۇلگى كورسەتۋ باقشا رايونىن باسقارۋ كوميتەتىنىڭ مەڭگەرۋشىسى مىندەتىن وتەيتىن يۇي حايحى قىزمەت ۇستىندە تۇتقيىل ناۋقاستانىپ، ەمدەۋ ءونىم بەرمەي، قايتىس بولدى، ول سول كەزدە نەبارى 51 جاستا ەدى. يۇي حايحىنىڭ قىزمەت ورنى ءجيى اۋىسىپ تۇرعانىمەن، ونىڭ بار ىنتا - پەيىلىمەن حالىق ءۇشىن ىستەۋدەي ەلىمجان سۇيىسپەنشىلىگى ەشقاشان وزگەرگەن ەمەس.
يۇي حايحى، 1962 - جىلى ءبىر ديقان وتباسىندا ءومىر ەسىگىن اشقان. قىزمەتكە قاتىناسقاننان كەيىن، يۇي حايحى باستان - اياق اۋىل شارۋاشىلىعى، اۋىل - قىستاق، شارۋالار قىزمەتى سالاسىندا كاسىبىن قۇرمەتتەپ ايانباي ەڭبەك ەتىپ، نەشە ون جىلدى ءبىر كۇنگىدەي وتكىزدى. ورتان جىلىكتىڭ باسى ولەتتەنگەلى ۇزاق جىل بولعان ول اقساڭداپ جۇرەتىن، ءبىراق ونىڭ وسى بەينەسى ونىمەن ارالاسقانداردىڭ جۇرەگىنەن وشكەن ەمەس.
باۋچيڭ اۋدانى لۇڭتوۋ اۋىلىنىڭ ورىنباسار اۋىل باستىعى مىندەتىن وتەگەن كەزىندە، بۇقارانىڭ ءونىمدى، كىرىستى ارتتىرۋى ءۇشىن، ول ساپالى اتباس بۇرشاق سورتى ”153“ ەگۋدى جالپىلاستىرۋدى سىناپ كوردى. تۋ باستا، ديقاندار بۇنداي سورتتى مويىنداي قويعان جوق، يۇي حايحى ءوزى باستاپ تۇقىم بازاسىن قۇرىپ، ءۇي - ءۇيدى ارالاپ، بۇقارانى اۋىلدا اشىلعان باۋلۋ كلاسىنا قاتىناسۋعا ۇسىنىس ەتتى. ءىشىنارا بۇقارانىڭ كەلەكەسىنە شىداپ وتىرىپ، اتىز - اتىزعا ىشكەرىلەپ بارىپ، تەحنيكالىق جەتەكشىلىك جۇرگىزىپ، اقىرى تاڭداۋلى سورتتى ەگۋدى جالپىلاستىردى. استىقتان الاتىن ءونىم كوبەيسە، ديقانداردىڭ كىرىسى ارتادى، ”153“ كۇزدە كوپ ديقاننىڭ قولىنا ”التىن كەرپىش“ ۇستاتتى. چيشيڭپاۋ قالاشىعىندا قالاشىق باستىعى، پارتكوم شۋجيى مىندەتىن ارقالاعان كەزىندە، ول شارۋالاردى ەكونوميكالىق ونىمدىلىگى جاقسى داقىلدار ەگۋگە باستاماشىلدىقپەن جەتەكتەپ، مىڭداعان وتباسىنىڭ اۋقاتتانۋ جولىنا تۇسۋىنە مۇمكىندىك جاسادى.
يۇي حايحى ءوزىن ۇنەمى ديقاننىڭ ۇلىمىن دەپ وتىراتىن، شارۋالارعا العىس ايتۋىم، شارۋالاردىڭ جاقسىلىعىن وتەۋىم، شارۋالارعا كومەكتەسۋىم كەرەك دەۋشى ەدى. مەيلى قايسى قىزمەت ورنىندا بولسىن، ول بارىندە تاڭنىڭ اتۋىنان كۇننىڭ باتۋىنا دەيىن باس كوتەرمەي قاجىرلىلىقپەن ىستەپ، اقىرىندا قىزمەت مىندەتىن ويداعىداي تىندىراتىن. ول باۋچيڭ اۋدانىنىڭ وسى زامانعى اۋىل شارۋاشىلىعىنداعى ءورىس اشۋشى جانە نەگىزىن قالاۋشى. اۋىل شارۋاشىلىعى كاسىپ سالالارىنىڭ كولەم قالىپتاستىرۋى ءۇشىن، يۇي حايحى قاجىماي - تالماي اۋىل شارۋاشىلىعى عىلىم - تەحنيكاسىنان ۇلگى كورسەتۋ باقشا رايونىن جەتىلدىرىپ، دەمەپ، ىلگەرىندى - كەيىندى ءار تۇردەگى 30 باقشا رايونىن قۇرۋعا جەتەكشىلىك ەتتى. ول ءوز قولىمەن جوبالاپ قۇرعان فاڭشىڭ وسى زامانعى اۋىل شارۋاشىلىعىنان ۇلگى كورسەتۋ باقشا رايونى بۇكىل ولكەدەگى وسى زامانعى اۋىل شارۋاشىلىعىنىڭ ءبىر تۋىنا اينالدى.
يۇي حايحى قاربالاس كەزدەرىندە ءبىر ۋاققى ىستىق استىڭ ءوزىن جەۋگە ۇلگىرمەيتىن، ۇزاق جىل ناۋقاس مەڭدەتكەن ول قىزمەت بارىسىندا ۇنەمى ءوڭى بوزارىپ، ماڭدايىندا بۇرشاق - بۇرشاق تەر تامشىلارى جىپىرلايتىن. قاسىنداعىلار ونى شيپاحاناعا بارۋعا قۋزاسا، ول ۇنەمى:”قازىر قىزمەت ەڭ قىسىلتاياڭ كەزدە تۇر، وسى قاربالاستىق اياقتاعان سوڭ بارىپ تەكسەرىلسەم دە كەش ەمەس“ دەيتىن.
2013 - جىلى ومىردەن اتتانارىنا ءبىر اپتا قالعان كەزدە، ول ناۋقاسى جانىنا باتىپ، قاتتى اۋىرىپ جۇرسە دە توزىمدىلىكپەن قىزمەت ورنىنان تاپجىلمادى. كوز جۇماردان ءبىر كۇن بۇرىن، ول، اۋەلى، ءبىر توپ ادامدى باستاپ باقشا رايونىندا قىزمەت تەكسەرىپ جۇرگەن كەزدە قاتتى اۋىرادى. ول بايقاتپاي كەڭسەسىنە قايتىپ اۋىرعاندى باساتىن دارىدەن ەكى تال جەپ، از - كەم رەتتەلگەن سوڭ، دەرەۋ قىزمەت ورنىنا قايتادى. تىنىسى توقتاۋدان ءبىر ساعات بۇرىن، ول ءالى دە قىزمەتكە قاجەتتى جازبا ماتەريالدى وڭدەپ وتىرعان ەدى. شيپاحانادا وتاعا كىرۋدىڭ الدىندا، ول قاسىنداعىلارعا: ”ەسكى ناۋقاس قوي، قايتىپ بارىپ اۋىرعاندى باساتىن ەكى تال ءدارى ىشسەم بولدى“ دەگەن ەدى. قۇرساق بولىگىندەگى قابىنۋ ونى شىرىك قان اۋرۋىنا دۋشار ەتكەن ەكەن، يۇي حايحى اۋىر ۇيقىعا كەتكەننەن قايتىپ ويانا المادى.
2014 - جىلى 2 - ايدىڭ 17 - كۇنى جۇڭگو كوممۋنيستىك پارتياسى حيلۇڭجياڭ ولكەلىك كوميتەتى يۇي حايحىعا ولكەلىك تاڭداۋلى كوممۋنيستىك پارتيا مۇشەسى اتاعىن تولىقتاپ بەردى. 2014 - جىلى 6 - ايدا ورتالىق كوميتەت ۇيىمداستىرۋ ءبولىمى يۇي حايحىعا مەملەكەتتىك تاڭداۋلى كوممۋنيستىك پارتيا مۇشەسى اتاعىن تولىقتاپ بەردى.
