شينجياڭ گازەتىنىڭ جالپىلىق اقپارات قۇرالدارى تىلشىلەرى جاۋ چۇنحۋا، جاۋ يۋە، ۋي حۇڭپيڭ
جەر قازۋ ماشينالارىنىڭ تولاس تاپپاعان گۇرىلى، ءوز جۇمىس ورنىندا قاربالاس جۇرگەن جۇمىسشىلار، ارلى - بەرلى قايشالىسقان ۇلكەن تاسىمال كولىكتەرى... 6 - اي كىرىسىمەن ءۇرىمجى قالاسى ءبىر جاعىنان، ىندەتتەن ساقتانۋ - تىزگىندەۋدى ۇدايىلاندىرۋدى مىقتى يگەرسە، ەندى ءبىر جاعىنان، ەكونوميكالىق، قوعامدىق دامۋدى مىقتى يگەرىپ، رايوننىڭ، قالانىڭ ءتۇيىندى نىسان قۇرىلىستارىن زور كۇشپەن ىلگەرىلەتتى، ۇلكەندى - كىشىلى قۇرىلىس الاڭدارىندا دابىرالى قاربالاس كورىنىستەر كوزگە تۇسەدى.
6 - ايدىڭ 2 - كۇنى شىجىعان ىستىقتا ءۇرىمجى حالىقارالىق اۋەجايىنىڭ وزگەرتىپ - كەڭەيتىپ سالۋ ينجەنەرياسىنىڭ قۇرىلىس جۇرگىزۋ جۇمىس باسىندا جاساۋلى قۇرىلمالار مەن بولات شىبىقتار بيىكتىگى 40 − 50 مەتر كەلەتىن سارى ءتۇستى مۇناراشا كرانمەن تاسىلۋدا. جاسىل ءتۇستى جۇمىس كيىمىن كيگەن قۇرىلىس قىزمەتكەرى قولىنا تىلدەسكى الىپ، توڭىرەگىندەگى قازۋ ماشيناسىنا، جۇك تيەگىش ماشيناسىنا سابىرلىلىقپەن قولباسشىلىق ەتۋدە.
”ينجەنەريا قۇرىلىسى وڭتۇستىكتەن سولتۇستىككە قاراي جۇرگىزىلەدى، باس تەرمينال عيماراتى اۋەجايدىڭ T1، T2، T3 تەرمينال عيماراتىنىڭ سولتۇستىگىنە ورنالاسقان، اۋەجايدى وزگەرتىپ - كەڭەيتىپ سالۋ ينجەنەرياسىنىڭ ’وزەكتى بولىگى‘ سانالادى، بىلتىر تۇعىر ينجەنەرياسى ورىندالدى، قازىر بار كۇشتى جۇمىلدىرىپ تەرمينال اۋماعىنىڭ نەگىزدىك توسەنىش قاباتىن توسەۋ، بولات شىبىقتاردى ماتاستىرۋ، بەتونداردى قۇيىپ دايىنداۋ جانە بۇكىل زالدىڭ دىڭگەكتەرىن ورناتۋ سياقتى جۇمىستار ىستەلىپ جاتىر، وسى جىل ىشىندە تەرمينال عيماراتى نەگىزگى تۇلعالىق قۇرىلىمىنىڭ ％70ىن ءساتتى سالىپ بولۋ، زور كولەمدەگى جەر استى قۇرىلىمى جانە ءىشىنارا قۇرىلىمداردىڭ توبەسىن جابۋ سياقتى بەلگىلەنگەن نىسانالاردى ءساتتى ورىنداۋ مەجەلەنۋدە“، - دەدى قۇرىلىس باسىندا جۇرگەن ءۇرىمجى لينكۇڭ - جۇڭجيان اۋەجاي قۇرىلىسى شەكتى سەرىكتەستىگى قۇرىلىس ورتالىعىنىڭ ورىنباسار باس ديرەكتورى ياڭ يۇڭ تىلشىگە.
ءۇرىمجى حالىقارالىق اۋەجايىن وزگەرتىپ - كەڭەيتىپ سالۋ ينجەنەرياسى اۆتونوميالى رايون مەن ءۇرىمجى قالاسىنىڭ ءتۇيىندى نىسانى. 3 - ايدىڭ باسىندا، ءۇرىمجى قالاسى ۇشاق جالداپ قۇرىلىس جۇرگىزەتىن تەحنيك قىزمەتكەرلەردى جۇمىس ورنىنا قايتارىپ اكەلىپ، نىساننىڭ جالپى بەتتىك قايتا جۇمىس باستاۋىنا دەم بەردى. ءار دارەجەلى باسشىلار تالاي رەت جۇمىس باسىنا بارىپ قىزمەت ىستەپ، قۇرىلىس جۇرگىزۋ بارىسىندا جولىققان ماسەلەلەردى شەشىپ، ينجەنەريانىڭ اياق الىسىن ءونىمدى تەزدەتتى.
ءتۇيىندى نىساندار قۇرىلىسى ورنىقتى قاداممەن ىلگەرىلەدى، حالىق تۇرمىسىنا ساياتىن ءبىر توپ نەگىزدىك قۇرىلعىلار نىسان قۇرىلىستارىنىڭ اياق الىسى دا تەزدەدى.
ءۇرىمجى قالاسى شۇيموگوۋ رايونى ءماجىلىس - كورمە شاعىن اۋماعىندا، جاڭادان سالىنعان ءماجىلىس - كورمە ورتا كوشەسى وڭتۇستىك مەكتەبى مەن ءماجىلىس - كورمە شاعىن اۋماعى چيداۋان شىعىس كوشەسى مەكتەبى جالپى بەتتىك قۇرىلىس جۇرگىزۋ ساتىسىنا ءوتتى. نىسان سالىنىپ بولعاننان كەيىن، 3400 وقۋشىنىڭ وقۋعا تۇسۋىنە مۇمكىندىك جاسالىپ، ءماجىلىس - كورمە شاعىن اۋماعىنىڭ الەۋمەتتىك قىزمەت وتەۋ سايكەستى قۇرىلعىلارىن زور دارەجەدە كەمەلدەندىرەدى.
6 - ايدىڭ 1 - كۇنى ءتىلشى ءماجىلىس - كورمە ورتا كوشەسى وڭتۇستىك مەكتەبى قۇرىلىس الاڭىنىڭ كىرە بەرىسىندە، كىرىپ - شىققان ادامداردىڭ دەنە تەمپەراتۋراسىن ولشەپ تۇرعان جانە دەزينفەكسيالاپ تۇرعان ارناۋلى ادام بار ەكەندىگىن كوردى، ەكى اي قۇرىلىس جۇرگىزۋ ارقىلى نىساننىڭ ۋاقىتتىق قۇرىلعىلارى مەن توپىراق قازۋ جۇمىستارى نەگىزىنەن اياقتادى، قازىر جاپپاي نەگىزگى قۇرىلىسىن جۇرگىزۋ باسقىشىنا ءوتتى.
جۇڭگو قۇرىلىس 8 - ينجەنەريا مەكەمەسى شەكتى سەرىكتەستىگى ءماجىلىس - كورمە ورتا كوشەسى وڭتۇستىك مەكتەبى نىسانىنىڭ جاۋاپتىسى يۇي جىحۇي تانىستىرىپ بىلاي دەدى: ءماجىلىس - كورمە ورتا كوشەسى وڭتۇستىك مەكتەبىنىڭ جەر اۋدانى 40 مۋ، جوسپار بويىنشا نىساننىڭ تۇلعالىق قۇرىلىسى 2020 - جىلى سالىنىپ بىتەدى، 2021 - جىلى 9 - ايدا پايدالانۋعا بەرىلەدى. ول: ءبىز نىسان قۇرىلىسىن دەر كەزىندە جوعارى ساپامەن ورىنداۋعا سەنىمىمىز بار، - دەدى.
