تيانشان تورى   ›   جاڭالىقتار   ›   عىلىم-تەحنيكا

10907 مەتر!

”حايدوۋ - 1“ بۇكىل تەڭىزدىك تەرەڭ سۋعا سۇڭگۋ اپپاراتى 10 مىڭ مەترلىك تەرەڭ تەڭىز سىناعىن ءساتتى ورىندادى

  شينحۋا اگەنتتىگىنىڭ 6 - ايدىڭ 8 - كۇنى شىنياڭنان بەرگەن حابارى (تىلشىلەر ۋاڭ يىڭ، باۋ يۇيحان). تەڭىز تۇبىنە زەر سالىپ، كوك مۇحيتقا تالپىندى. 40 نەشە كۇننەن كەيىن، جۇڭگو عىلىم اكادەمياسى شىنياڭ اۆتوماتتاندىرۋدى زەرتتەۋ ورنىنىڭ باسقارۋىمەن زەرتتەلىپ جاسالعان ”حايدوۋ - 1“ بۇكىل تەڭىزدىك دەربەس قاشىقتان مەڭگەرىلەتىن سۋعا سۇڭگۋ اپپاراتى 6 - ايدىڭ 8 - كۇنى ”تانسۋو - 1“ عىلمي ەكسپەديتسيا كەمەسىنە شىعىپ داڭقپەن ورالدى.

  ”حايدوۋ - 1“ بۇل رەت ماريانا تەڭىز شاتقالىندا تۇڭعىش رەتكى 10 مىڭ مەترلىك تەرەڭ تەڭىز سىناعىن جانە تاجىريبەلىك قولدانبا مىندەتىن ءساتتى ورىنداپ، ەڭ تەرەڭ بولعاندا 10907 مەترگە دەيىن سۇڭگىپ، ەلىمىز سۇڭگۋ اپپاراتتارىنىڭ ەڭ تەرەڭ سۇڭگۋ رەكوردىن جاڭالادى، سونىمەن بىرگە ەلىمىزدىڭ 10 مىڭ مەترلىك تەرەڭدىكتە جۇمىس ىستەيتىن ادامسىز سۇڭگۋ اپپاراتتارىنىڭ اقتاڭداعىن تولدىردى.

  وسى رەتكى تەڭىز ساپارىندا ”حايدوۋ - 1“ ماريانا تەڭىز شاتقالىندا 10 مىڭ مەتر تەرەڭگە سۇڭگۋدى 4 مارتە جۇزەگە اسىرىپ، جوعارى دالدىكپەن تەرەڭدىكتى بارلاۋ - ولشەۋ، مەحانيكالىق قولمەن جۇمىس ىستەۋ، اكۋستيكالىق بارلاۋ - ولشەۋ جانە ورىن انىقتاۋ، جوعارى انىقتىقپەن بەينەكەسكىن جەتكىزۋ سياقتى جاقتاردا ەلىمىز سۇڭگۋ اپپاراتتارى سالاسىنداعى كوپتەگەن بىرىنشىلىكتەردى جاراتتى.

  بارلاۋ - ولشەۋ جانە جۇمىس ىستەۋ ءبىر تۇلعالانعان، 10 مىڭ مەترلىك تەرەڭگە سۇڭگۋ جابدىعى رەتىندە، ”حايدوۋ - 1“ ەلىمىز كولەمىندە بۇكىل تەڭىزدىك جوعارى دالدىكپەن اكۋستيكالىق ورىن انىقتاۋ تەحنيكاسىن جانە اپپاراتتاعى كوپ سەنسور ينفورماتسيالارىن توعىستىرۋ ءادىسىن تۇڭعىش رەت قولدانىپ، ”سايىس جاريالاۋشىلار شىڭىراۋىنىڭ“ ەڭ تەرەڭ وڭىرىندە شارلاپ بارلاۋ - ولشەۋ جانە جوعارى دالدىكپەن تەرەڭدىك ولشەۋ جۇمىسىن ورىنداپ، ءبىرسىپىرا ساندى مالىمەت ماتەريالىنا قول جەتكىزدى.

  ”حايدوۋ - 1“ عىلىم - تەحنيكا مينيسترلىگىنىڭ ”13 - بەسجىلدىقتاعى“ مەملەكەتتىك ءتۇيىندى زەرتتەۋ - اشۋ جوسپارى ”تەرەڭ تەڭىزدەگى شەشۋشى تەحنيكا جانە جابدىق“ ءتۇيىندى ارناۋلى نىسانىنىڭ قولداۋ كورسەتۋىمەن تىركەلگەن نىسان، شىنياڭ اۆتوماتتاندىرۋدى زەرتتەۋ ورنى ەل ىشىندەگى باسىمدىققا يە 10 نەشە ورىنمەن بىرلەسىپ بىرگە زەرتتەپ جاساعان. 2016 - جىلى 7 - ايدا نىسان ىسكە قوسىلعاننان كەيىن، ”حايدوۋ - 1“ 2 جارىم جىل شەشۋشى تەحنيكادان قامال الۋدى جانە سىناق ەتىپ دالەلدەۋدى وتكەرىپ، 2019 - جىلى تاجىريبەحانادا جالپى قۇراستىرۋدى، بىرلەستىرىپ باپتاۋدى، سۋ كولشىگىندە سىناق ەتۋدى، چيانداۋحۋ كولىندە سىناق ەتۋدى جانە نانحاي تەڭىزىندە 4500 مەترلىك تەرەڭدىكتە كەزەڭدىك تەڭىز سىناعىن ورىنداعان. 2020 - جىلى جاڭا تيپتى ايدارشا ۆيرۋس وكپە قابىنۋ ىندەتى توسىن تاپ بەرگەندە، ”حايدوۋ - 1“ زەرتتەۋ - اشۋ توبى قات - قابات قيىنشىلىقتى جەڭىپ، 4 - ايدىڭ 23 - كۇنى ”تانسۋو - 1“ عىلمي ەكسپەديتسيا كەمەسىمەن ماريانا تەڭىز شاتقالىنا بارىپ، قىسقا ۋاقىت ىشىندە تەڭىز سىناعىن جانە تاجىريبەلىك قولدانبا مىندەتىن جوعارى ونىمدىلىكپەن ورىنداپ شىقتى.

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.