6 - ايدىڭ 12 - كۇنى ءيۇنۇس نياز قىستاق تۇرعىندارىن باستاپ قۇرىلىس ورنىندا جۇمىس ىستەۋدە. سۋرەتتى ءوزى بەرگەن
5 - ايدىڭ 31 - كۇنى ساعات 9دا، ءپىشان اۋدانى لوكچۇن قالاشىعى سىركىپ قىستاعىنىڭ تۇرعىنى ءيۇنۇس نياز سول كۇنگى جۇمىسكەرلەردى بەلگىلەنگەن ورىنعا جەتكىزىپ قويىپ، ۇيىنە قايتقاننان كەيىن، ءوز ءۇيىنىڭ قوي قوراسىن تازالاۋ قامىنا كىرىستى.
”وسى ۋاقىتتان پايدالانىپ قويلارىما جەم بەرەمىن، سالدەن سوڭ جۇمىسكەرلەردى الىپ قايتامىن“، - دەدى ءيۇنۇس، ”وسى بىرنەشە جىلدا مەن ۇكىمەتتىڭ قىرۋار كومەگىنە يە بولدىم. قازىر ەڭبەككۇش دەلدالى رولىمدى ويداعىداي ساۋلەلەندىرىپ، قىستاق تۇرعىندارىن باستاپ كىرىستى ارتتىرىپ، ولارمەن بىرگە باييمىن“.
جاقسى تۇرمىس ەڭبەكتەنۋدەن كەلەدى
”بيىل 3 - ايدان باستاپ، مەن قىستاق تۇرعىندارىنا كومەكتەسىپ ولاردىڭ جۇمىس ىستەۋىنە بايلانىس جاسادىم، كۇنىنە ورتا ەسەپپەن 10 نەشە ادامدى جۇمىس ىستەۋگە اپارامىن، ەڭ كوپ بولعاندا ءبىر كۇندە 60 ادامدى جەتكىزىپ سالامىن“، - دەدى ءيۇنۇس.
بۇگىنگى كۇندە ءيۇنۇس قىستاقتاعى ايتۋلى ەڭبەككۇش دەلدالى، كوپتەگەن قىستاق تۇرعىندارى ونىڭ كومەگىندە كەدەيلىككە قوش ايتتى. ايتسەدە، ءوزىنىڭ قانداي جاپالى قۇلشىنىس جاساپ، بۇگىنگى تاماشا تۇرمىسقا قول جەتكىزگەنى تەك ءيۇنۇستىڭ وزىنە عانا ايان.
ءيۇنۇس وتكەندى ەسىنە الا بىلاي دەدى: 10 جىلدىڭ الدىندا توسىننان تۋىلعان كولىك اپاتى وتباسىمدى 100 نەشە مىڭ يۋان قارىزعا جىعىپ، كەدەي وتباسىنا اينالدىق.
”قىستاق مەنى ارحيۆ تۇرعىزىلىپ، كارتچكالاندىرىلعان كەدەي وتباسى قاتارىنا ەنگىزدى، مەن قىستاق كادرىن ىزدەي بارىپ، كەدەيلىك ’قالپاعىن‘ كيگىم كەلمەيتىندىگىن ايتتىم، مەن وزىمە سۇيەنىپ كەدەيلىك قىسپاعىنان قۇتىلا الاتىندىعىمدى سەزىندىم“. ءيۇنۇس وتباسىنداعى نەبارى ءبىر مۋدان استام ءجۇزىم ەككەن جەرىن اينالىمعا سالىپ، ايەلىمەن بىرگە جالدانبا جۇمىس ىستەيدى. قىستاق كادرلارى دا وعان ىرىقتىلىقپەن كومەكتەسىپ، اقىل ايتىپ، ءجون كورسەتەدى.
2014 - جىلدىڭ سوڭىندا ءيۇنۇس قارىز اقشامەن ءبىر جۇك اۆتوموبيلىن ساتىپ الىپ، ۇساق - تۇيەك كۇندىك جۇمىس ىستەۋدەن سىرت، جاز كۇندەرى سول ماڭداعى قاۋىنشىلاردان قۇمىل قاۋىنىن الىپ ساتادى، ال قىستا ءۇرىمجى مەن ءپىشان اراسىندا قۇرىلىس ماتەريالدارىن تاسيدى.
” تەك كەدەيلىكتەن ارىلىپ بايۋ بەكىمىنە كەلىپ، قاجىرلىلىقپەن ەڭبەك ىستەپ قوس قولىڭا سۇيەنسەڭ بولعانى، تۇرمىسىڭ، ءسوزسىز، جاقسارا تۇسەدى“. ءيۇنۇس باستان - اياق وسىنداي بەكەم ويىنان جازبادى.
ەڭبەككۇش دەلدالى بولدى
قىزى سايفيا ءيۇنۇستىڭ نازارىندا اكەسى ىزگى نيەتتى قايسار جان، تۇرمىستا ەشقاشان دا كەيىمەيدى، كورشىلەرى، دوستارى قيىنشىلىققا ۇشىراسا، كومەك قولىن سوزۋمەن بىرگە، ولاردى كەيىگەننىڭ ورنىنا قۇلشىنا كۇرەس جاساۋعا ءناسيحاتتايدى ەكەن. ”اكەم ۇنەمى وزگەلەرگە كومەكتەسكەنىڭ وزىڭە كومەكتەسكەنىڭ دەيدى“، - دەدى سايفيا.
اشىق - جارقىن سيلاسىمدى مىنەزدى ءيۇنۇستىڭ دوستارى بارعان سايىن كوبەيۋمەن بىرگە، وعان تىڭ بايۋ جولىن دا الا كەلدى. ءبىر جولى سىرتقا شىعىپ ماقتا تەرۋ بارىسىندا ءيۇنۇس ماڭىنداعى ەگىس الاڭىنىڭ ماقتا ەگىنشىلىك ءىرى وتباسىمەن تانىسىپ قالادى، ول يۇنۇسكە وزىنە جۇمىسكەر جيناپ بەرۋىن ءۇمىت ەتەتىندىگىن ايتادى.
ءيۇنۇس سونىمەن ەڭبەككۇش دەلدالى بولۋدى سىناپ كورەدى، ءبىر كۇن ىلگەرى جۇمىسكەرلەرمەن سويلەسىپ، ەرتەسى تاڭەرتەڭ ساعات 5 − 6 مولشەرىندە ءوز اۆتوكولىگىمەن جۇمىسكەرلەردى بەلگىلەنگەن جۇمىس ورنىنا جەتكىزىپ سالعاننان كەيىن، اراسىنان ءوزى دە بەلگىلى ءناپاقاعا يە بولادى.
يۇنۇس ءپىشان اۋدانى وتكىزگەن ەڭبەككۇش دەلدالدارىن باۋلۋ كۋرسىنا تىزىمدەلىپ، قاتىناسىپ، ەڭبەككۇش دەلدالى تولىمدىلىق كۋالىگىن الادى. قىستاق تۇرعىندارىنىڭ جۇمىس ىستەۋ سۇرانىسىن يگەرۋ ءۇشىن، ءيۇنۇس قىستاق تۇرعىندارىمەن ىرىقتى تۇردە حابارلاسىپ، ولاردىڭ وتباسى جاعدايلارىن ۇعىسىپ، تۇرمىسىندا قيىنشىلىعى بار وتباسىلارى مەن كەدەي وتباسىلارىنا ايرىقشا نازار اۋدارادى، جۇمىسشى ىستەتۋ سۇرانىسى بولا قالسا بولعانى الدىمەن وسى وتباسىلارىنا حابارلاسادى. بىرتە - بىرتە، ءيۇنۇستىڭ اتاعى بارعان سايىن اسپانداپ، كوپتەگەن ەگىنشىلىك ءىرى وتباسىلارى مەن كەدەي وتباسىلار ونىمەن بايلانىس جاسايتىن بولدى.
قۇلشىنباۋعا مۇلدە سەبەپ جوق
ەڭبەككۇش دەلدالىنىڭ باستاماشىلىق رولىن جەتە ساۋلەلەندىرىپ، ەڭبەككۇشتەردى باسقا سالاعا ويىستىرىپ جۇمىستاندىرۋدى جەبەۋ ءۇشىن، اۆتونوميالى رايون جانە جەرگىلىكتى ۇكىمەت كوپتەگەن ىنتالاندىرۋ - سۇيەمەلدەۋ شارالارىن شىعاردى. ءيۇنۇستىڭ بەلسەندىلىگى ءتىپتى دە ارتىپ، كوكتەمگى ەگىستەن كۇزگى جيىن - تەرىنگە دەيىن، ءار كۇنى ەگىنشىلىك وتباسىلارىنىڭ جۇمىسشى ىستەتۋ سۇرانىسى بويىنشا جۇمىس ىستەۋشىلەردى سايكەستىرىپ، اپارىپ - اكەلىپ تۇردى.
ۇزاق ۋاقىت يۇنۇسكە ىلەسىپ جۇمىس ىستەگەن ابدوللا ازەز ول تۋرالى ءسوز بولعاندا القاپ بىلاي دەدى: ”ول − ءبىزدىڭ باستاماشىمىز، ءبىزدى جۇمىس ىزدەۋدىڭ اۋرەشىلىگىنەن قۇتىلدىردى، ءار كۇنى وعان ىلەسىپ، اقشا تاباتىن بولدىق، ۇيىمىزدەگى ەگىس جۇمىسى دا اقساپ قالمادى. قازىر مەن كەدەيلىكتەن ارىلدىم، وعان ايرىقشا العىس ايتامىن“، - دەدى.
2016 - جىلى ءيۇنۇس وتباسى كەدەيلىكتەن ارىلدى، ول ىرىقتى تۇردە قىستاق تۇرعىندارى كوميتەتىنە كەدەيلىكتەن ارىلۋ ءوتىنىشىن تاپسىرىپ، كەدەيلىكتەن ارىلۋ بويىنشا تەكسەرۋدەن ءساتتى ءوتتى، سونداي - اق سول جىلى ”كەدەيلىكتەن ارىلتۋدان قامال الۋدىڭ مەملەكەتتىك سيلىعىنىڭ“ ەكپىندەي ىلگەرىلەۋ سيلىعى داڭق اتاعىنا يە بولدى.
بۇل داڭقتى اتاق الدىندا، ءيۇنۇس بىلاي دەيدى: ”مەن پالەندەي ەشتەڭە تىندىرعان ەمەسپىن، ءوزىم كەدەيلىكتەن ارىلعان كەزدە قىستاق تۇرعىندارىنا ازدا بولسا كومەگىم تيسە دەگەندى عانا ويلادىم. مەملەكەتتىڭ ساياساتى جاقسى عوي، ءبىزدىڭ قۇلشىنباۋىمىزعا سەبەپ جوق. مەن قىستاق تۇرعىندارىمەن بىرگە جاقسى تۇرمىس وتكىزۋدى ءۇمىت ەتەمىن“.
كەدەيلەردى سۇيەمەلدەۋدەن تۇيگەن وي
كەدەيلىكتەن ارىلىپ، بايۋعا تالپىناتىن مىعىم سەنىم جانە قۇلشىنا جۇمىس ىستەيتىن ارەكەت بولعاندا عانا، كەدەيلىكتىڭ قىسپاعىنان، ءسوزسىز، قۇتىلۋعا بولادى. پارتيا مەن مەملەكەت ءبىزدى قوس قولىمىزعا سۇيەنىپ جاقسى تۇرمىس وتكىزۋگە ىنتالاندىرۋ ءۇشىن جاقسى ساياسات ازىرلەۋدە.
قازىر قىستاقتاعى ءتۇرلى كاسىپ سالاسى تۇگەلدەي ويداعىداي دامۋدا، كورىكتى اۋىل - قىستاق قۇرىلىسى بارلىق ادامنىڭ ات سالىسۋىنا مۇقتاج. ەڭبەككۇش دەلدالى رەتىندە، مەن قىستاق تۇرعىندارىن ىرىقتى تۇردە ويداعىداي ۇيىمداستىرىپ، جۇمىسكەر ىستەتۋشى قاريدارلارمەن بەلسەنە بايلانىس جاساپ، قىستاق تۇرعىندارىن كىرىستى ارتتىرۋعا، بايۋعا جەتەكتەيمىن، كوپشىلىك بىرگە قۇلشىنعاندا عانا، ءبىز، ءسوز جوق، ەڭبەكشىل قوس قولىمىزبەن باقىتتى تۇرمىستى جاراتا الامىز.
− ءيۇنۇس نياز
