شينجياڭ گازەتىنىڭ جالپىلىق اقپارات قۇرالدارى ءتىلشىسى حي حۇڭۋي 6 - ايدىڭ 15 - كۇنى ۇرىمجىدەن حابارلايدى. ”كوپشىلىك سالەمەتسىزدەر مە، گۋاڭجوۋ ساۋدا جارمەڭكەسىنە كەلگەندەرىڭىزدى قارسى الامىز، سەرىكتەستىگىمىز ەرەسەكتەردىڭ ءتۇرلى كاستوم - برۋلكاسىن ءوندىرۋدى، وڭدەۋدى نەگىز ەتكەن سىرتقى ساۋدا كاسىپورنى...“ 6 - ايدىڭ 15 - كۇنى تۇستەن بۇرىن 127 - كەزەكتى گۋاڭجوۋ ساۋدا جارمەڭكەسىنىڭ جانە تۇڭعىش كەزەكتى جەلىدەگى گۋاڭجوۋ ساۋدا جارمەڭكەسىنىڭ شىمىلدىعى اشىلدى، ءۇرىمجى قالالىق دانشالييا كيىم - كەشەك شەكتى سەرىكتەستىگىنىڭ زات ساتۋشىسى جەلىدە تىكە تاراتۋ ارقىلى سەرىكتەستىكتىڭ ونىمدەرىن حانزۋ، اعىلشىن تىلدەرىندە تانىستىردى.
بۇل سەرىكتەستىكتىڭ ونىمدەرى، باستىسى، ورتا ازيا ەلدەرىنە، سونداي - اق ەۆروپا جانە امەريكاداعى ەلدەرگە ساتىلادى، سەرىكتەستىكتىڭ باس ديرەكتورى لي يانرۋدىڭ تانىستىرۋىنشا، بيىل سەرىكتەستىك جەلىدە 30دان استام ءوتىمدى ونىمدەرىن تانىستىرادى ەكەن. ”ءبىز بىرنەشە كەزەكتى گۋاڭجوۋ ساۋدا جارمەڭكەسىنە قاتىناستىق، بۇرىن تۇگەلدەي جەلىدەن تىس وتكىزىلەتىن، بيىل جەلىدە جۇرگىزىلۋگە وزگەرتىلدى، فورماسى جاعىنان قازىرگى كەزدە ەڭ داۋرەندەپ تۇرعان زاتتى تىكە ساتۋمەن ۇقساپ كەتەدى، بيىل تاماشا ناتيجەنىڭ قولعا كەلۋىن ءۇمىت ەتەمىن“، - دەدى لي يانرۋ.
ىندەتتىڭ ىقپالىنا ۇشىراعاندىقتان، وسى كەزەكتى گۋاڭجوۋ ساۋدا جارمەنكەسى تاسىلدە جاڭالىق اشىپ، جەلىدە وتكىزۋگە وزگەرتىلدى، وتكىزىلەتىن ۋاقىت 6 - ايدىڭ 15 - كۇنىنەن 24 - كۇنىنە دەيىن. بيىل رايونىمىزدا جالپى 146 كاسىپورىن 235 كورمە ورنىنا ءوتىنىش ەتكەن، كورمەگە قاتىناسقان كاسىپورىندار سانى الدىڭعى كەزەكتەگى گۋاڭجوۋ ساۋدا جارمەنكەسىندەگىدەن ％18 كوبەيىپ، كورمە ورنىنىڭ سانى ％10 ارتقان.
وسى كەزەكتى جەلىدەگى گۋاڭجوۋ ساۋدا جارمەنكەسى، باستىسى، جەلىدە كورسەتۋ - ءتۇيىلىسۋ تۇعىرى، شەكارا اتتاعان ەلەكتروندى ساۋدا ارناۋلى اۋماعى، تىكە تاراتۋ، ساتۋ، قىزمەت وتەۋى سىندى 3 بولىك مازمۇن بولىپ، 16 ۇلكەن تۇردەگى تاۋار بويىنشا 50 كورمە اۋماعى قۇرىلدى، كورمەگە قاتىناسقان كاسىپورىندار سۋرەت، بەينەكەسكىن، 3D سياقتى نۇسقالارمەن كورمە بۇيىمدارىن جولداپ، كوپ ءتۇرلى فورما، كوپ تۇرعىدا ماركا وبرازىن ايگىلەدى.
شينجياڭ تيانشان ءجۇن - توقىماشىلىق جارنا شەكتى سەرىكتەستىگى جوعارى ساپالى ءتۇبىت جانە ءتۇبىت ارالاسقان توقىما ءجىپ، ءتۇبىت پوپايكە، ارالاسپالى ءجىپ پوپايكەنى ارناۋلى ءوندىرۋدى نەگىز ەتكەن توقىماشىلىق كاسىپورنى. سەرىكتەستىكتىڭ ورىنباسار ديرەكتورى مىڭ شينلي بىلاي دەدى: وسى رەتكى جەلىدەگى گۋاڭجوۋ ساۋدا جارمەنكەسىنە قاتىناسۋ ءۇشىن، سەرىكتەستىك ءبىر ايدان استام ۋاقىت دايىندىق جاساپ، سۋرەت، بەينەكەسكىن ۇگىتىنەن تارتىپ قىزمەتكەرلەردى باۋلۋعا دەيىن، ءاربىر قىزمەتتى بارىنشا ىجداعاتتىلىقپەن ىستەدى. بيىلعى وسى ءبىر وزگەشە كورمە ارقىلى سەرىكتەستىكتىڭ ساتۋ ارناسىن اناعۇرلىم كەڭەيتۋدى ءۇمىت ەتەمىز.
كاسىپورىنداردىڭ كورمەگە قاتىناسۋ قىزمەتىن جاقسى ىستەۋىنە كومەكتەسۋ ءۇشىن، اۆتونوميالى رايوندىق ساۋدا ىستەرى مەڭگەرمەسى جەر - جەردەگى ساۋدا ىستەرى تاراۋلارىمەن، كورمەگە قاتىناساتىن كاسىپورىندارمەن ارا تىلدەسۋدى، سايكەسۋدى كۇشەيتىپ، كورمەگە قاتىناسۋ ءتارتىبى مەن كورمەنىڭ نازىك بۋىندارىنا دەيىن دەر كەزىندە يگەردى؛ جەر - جەردەگى ساۋدا ىستەرى تاراۋلارى ارناۋلى ادام بەلگىلەپ جەرگىلىكتى ورىنداعى كورمەگە قاتىناساتىن كاسىپورىنداردىڭ كورمەگە قاتىناسۋدان بۇرىنعى قىزمەت وتەۋ قىزمەتتەرىنە جاۋاپتاندىرىپ، كورمەگە قاتىناساتىن كاسىپورىندارعا كورمە ينفورماتسيالارىن دەر كەزىندە جەتكىزىپ، كاسىپورىنداردى كورمەگە قاتىناسۋدىڭ ءتۇرلى دايىندىقتارىن الدىن الا ويداعىداي ىستەۋگە قۋزادى.
”وسى رەتكى گۋاڭجوۋ ساۋدا جارمەنكەسى، بۇرىنعى جەلىدەن تىس كۇيدەن جەلىگە شىعارىلدى، ءبىز دە بىرتە - بىرتە ىزدەنىس جاساپ، وسى ينتەرنەت تۇعىرى ارقىلى سەرىكتەستىكتىڭ دامۋى ءۇشىن جاڭا ءورىس اشۋدى ءۇمىت ەتەمىز“، - دەدى قاشقار جياڭگوگو اۋىل شارۋاشىلىعى عىلىم - تەحنيكا شەكتى سەرىكتەستىگىنىڭ ساتۋ ىستەرى ديرەكتورى ليۋ شىتاۋ.
