تيانشان تورى
تيانشان تورى   ›   جاڭالىقتار   ›   ماڭىزدى حابارلار

شي جينپيڭ تاجىكستاننىڭ زۇڭتۇڭىمەن، ەكۆادوردىڭ زۇڭتۇڭىمەن جەكە - جەكە تەلەفوندا سويلەستى

  شينحۋا اگەنتتىگىنىڭ 6 - ايدىڭ 16 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 6 - ايدىڭ 16 - كۇنى كەشتە تاجىكستاننىڭ زۇڭتۇڭى راحمونمەن تەلەفوندا سويلەستى.

  شي جينپيڭ بىلاي دەپ باسا دارىپتەدى: قيىنشىلىق كەزىندە شىنايى سۇيىسپەنشىلىك ايگىلەنەدى. جۇڭگو ىندەتتەن ساقتانۋ - تىزگىندەۋدىڭ ماشاقاتتى جاعدايىندا تۇرعان كەزدە، تاجىكستان ۇكىمەتى مەن قوعامىنداعى ءار سالا جۇڭگونىڭ ىندەتكە قارسى اتتانۋ كۇرەسىنە تۇرلىشە فورمالارمەن قولداۋ كورسەتتى. تاجىكستاندا ىندەت تۋىلعاننان كەيىن، جۇڭگو جاق تاجىكستان جاققا قولىنان كەلگەنىنشە كومەك كورسەتتى، ەكى ەلدىڭ ەمدەۋ ماماندارى بەينەەكران جالعانىمى ارقىلى ىندەتكە قارسى اتتانۋ تاجىريبەلەرىن اۋىستىردى، جۇڭگو جاقتىڭ ەمدەۋ ماماندارى بىرلەسكەن قىزمەت گرۋپپاسى تاجىكستاننىڭ كوپتەگەن جەرلەرىنە بارىپ بەلسەنە قىزمەت ورىستەتىپ، جۇڭگو - تاجىكستان دامۋ ورتاق تۇلعاسى مەن حاۋىپسىزدىك ورتاق تۇلعاسىنىڭ تيەسىلى بورىشىن ايگىلەدى. جۇڭگو جاق تاجىكستانعا ۇزدىكسىز باۋىرلاستىق قولداۋ كورسەتۋدى جانە كومەكتەسۋدى قالايدى. ءسىزدىڭ باسشىلىعىڭىزدا تاجىكستاننىڭ، ءسوز جوق، ىندەتتى كۇن ىلگەرى جەڭە الاتىندىعىنا سەنەمىن. جۇڭگو جاق تاجىكستان جاقتى قامتىعان حالىقارالىق قوعاممەن بىرگە حالىقارالىق ىندەتكە قارسى اتتانۋ سەلبەستىگىن بەلسەنە ورىستەتىپ، وسى الەمدىك الەۋمەتتىك دەنساۋلىق ساقتاۋدى قورعاۋ شايقاسىنىڭ جەڭىسىنە بىرگە قول جەتكىزۋدى قالايدى.

  شي جينپيڭ بىلاي دەپ باسا دارىپتەدى: جۇڭگو مەن تاجىكستاننىڭ قارىم - قاتىناسى جاڭا تاريحي باستامادا تۇر. ەكى جاق ىندەتتەن ساقتانۋ - تىزگىندەۋدى جانە ساۋدا بارىس - كەلىسىن ويداعىداي ءبىر تۇتاس جوسپارلاپ، وي جەلىسىن كەڭەيتىپ، ”ءبىر بەلدەۋ، ءبىر جولدى“ بىرگە قۇرۋداعى ءتۇيىندى نىسانداردى تياناقتاندىرۋعا شىنايى كەپىلدىك ەتۋ كەرەك. ىندەتتەن كەيىنگى داۋىرگە كوز جىبەرىپ، ەكونوميكا - ساۋدا، قارجى قوسۋ، ەنەرگيا، ۇلاستىرۋ - تۇتاستىرۋ، اۋىل شارۋاشىلىعى سياقتى ءتۇيىندى سالالارداعى سەلبەستىكتى ەرتەرەك جوبالاپ، ەكى ەل قارىم - قاتىناسىنىڭ جاڭا دامۋعا يە بولۋىن ىلگەرىلەتۋ كەرەك.

  راحمون مىنالاردى ءبىلدىردى: ءسىزدىڭ پارمەندى باسشىلىعىڭىزدا، جۇڭگو جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋدا كورنەكتى ونىمدىلىككە قول جەتكىزىپ، ەكونوميكالىق، قوعامدىق دامۋدا ۇزدىكسىز تابىسقا جەتىپ، جۇڭگو ۇكىمەتىنىڭ اسا تاماشا جونگە سالۋ قابىلەتىن ايگىلەدى. تاجىكستان جاق جۇڭگو جاقتىڭ تاجىكستاننىڭ ىندەتكە قارسى اتتانۋىنا جانە ەكونوميكانى قالپىنا كەلتىرۋىنە زور كۇشپەن قولداۋ كورسەتكەندىگىنە العىس ايتادى، جۇڭگو جاقپەن دوستىقتى، ءوزارا سەنىمدىلىكتى تەرەڭدەتىپ، ءبىر - بىرىنە قارايلاسىپ، ”ءبىر بەلدەۋ، ءبىر جولدى“ بىرگە قۇرۋ مەن تاجىكستاننىڭ ”2030 - جىلعا دەيىنگى مەملەكەتتىڭ دامۋ ستراتەگياسىن“ ۇشتاستىرۋدى كۇشەيتىپ، ەكونوميكا - ساۋدا، ەمدەۋ، عىلىم - تەحنيكا سياقتى سالالارداعى سەلبەستىكتى كەڭەيتىپ، شاڭحاي سەلبەستىك ۇيىمى، ازيا ءوزارا ىقپالداستىق جانە سەنىمدىلىك شارالارى سياقتى وڭىرلىك ۇيىمداردا سەلبەستىكتى جيىلەتىپ، ەكى ەلدىڭ جان - جاقتى ستراتەگيالىق سەرىكتەستىك قارىم - قاتىناسىنىڭ اناعۇرلىم دامۋىن ىلگەرىلەتۋدى قالايدى. تاجىكستان جاق ءبىر جۇڭگو پرينسيبىن باتىل ساقتايدى، جۇڭگو جاقتىڭ ءوزىنىڭ يەلىك ۇقىعىن، حاۋىپسىزدىگىن قورعاۋ ءۇشىن قولدانعان ورىندى شاراسىن باتىل قولدايدى. تاجىكستان جاق جۇڭگو جاقپەن بىرگە ادامزاتتىڭ تاعدىرلاس ورتاق تۇلعاسىن قۇرۋدى قول ۇستاسا ىلگەرىلەتۋدى قالايدى.

  شينحۋا اگەنتتىگىنىڭ 6 - ايدىڭ 16 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 6 - ايدىڭ 16 - كۇنى كەشتە ەكۆادوردىڭ زۇڭتۇڭى مورەنومەن تەلەفوندا سويلەستى.

  شي جينپيڭ بىلاي دەپ اتاپ كورسەتتى: كەزەكتە جاڭا تيپتى ايدارشا ۆيرۋس وكپە قابىنۋ ىندەتى ەكۆادوردا تارالۋدا، ورشۋدە. مەن جۇڭگو ۇكىمەتى مەن جۇڭگو حالقى اتىنان شىنايى حال سۇرايمىن. جۇڭگو ىندەتكە قارسى اتتانۋدا ەڭ قينالعان كەزدە ەكۆادور ۇكىمەتى جۇڭگو جاققا دەر كەزىندە ىندەتتەن ساقتانۋ زاتتىق ماتەريالدارىن كومەككە بەردى. ەكۆادوردا ىندەت تۋىلعاننان كەيىن، جۇڭگو ۇكىمەتى، جەرگىلىكتى ورىندار، كاسىپورىندار، حالىقتىق ۇيىمدار سياقتىلار جىلدام كومەك قولىن سوزىپ، جۇڭگو - ەكۆادور ەكى ەلدىڭ ءوزارا قولدايتىن، كومەكتەسەتىن دوستىق ءداستۇرىن ءتۇسىندىردى. جۇڭگو جاق ەكۆادور جاقتىڭ ىندەتكە قارسى اتتانۋ كۇرەسىنە ۇزدىكسىز باتىل قولداۋ كورسەتىپ، قولىنان كەلگەنىنشە قاجەتتى كومەك كورسەتىپ، ۆاكسينا مەن ءدارى - دارمەكتى زەرتتەپ اشۋ، ءوندىرۋ سياقتى سەلبەستىك ورىستەتۋدى كەڭەسەدى. ءسىزدىڭ باسشىلىعىڭىزدا ەكۆادوردىڭ، ءسوز جوق، ىندەتتى كۇنى بۇرىن جەڭىپ، تاماشا دامۋ جولىنا قايتا ورالاتىندىعىنا سەنەمىن. ەكۆادور جاقتىڭ ەكۆادورداعى جۇڭگو قارجىلاندىرعان كاسىپورىنداردى جانە جۇڭگو ازاماتتارىنىڭ قىزمەتى مەن تۇرمىسىن ۇزدىكسىز قامتاماسىز ەتۋىن ءۇمىت ەتەمىن.

  شي جينپيڭ بىلاي دەپ اتاپ كورسەتتى: الەمدە ىندەت ءالى دە تارالۋدا، تەك ءار ەل ىنتىماقتاسا سەلبەسكەندە عانا، ەڭ سوڭىندا شايقاستىڭ جەڭىسىنە جەتۋگە بولادى. جۇڭگو جاق ءار ەلمەن بىرگە ىندەتكە قارسى اتتانۋ سەلبەستىگىن ۇزدىكسىز ورىستەتىپ، ادامزاتتىڭ دەنساۋلىق ساقتاۋ، سالاماتتىق ورتاق تۇلعاسىن قۇرۋدى بىرگە ىلگەرىلەتۋدى قالايدى. جۇڭگو جاق ءار ەلدىڭ ماكرولىق ساياساتتى سايكەستىرۋىن كۇشەيتۋدى باتىل قولداپ، دۇنيە ءجۇزى ەكونوميكاسىنىڭ ورنىقتىلىعىن جەبەپ، الەمدىك جونگە سالۋدى ىلگەرىلەتەدى، كەمەلدەندىرەدى.

  شي جينپيڭ بىلاي دەپ باسا دارىپتەدى: 2018 - جىلى ءسىز ءساتتى تۇردە جۇڭگودا مەملەكەت ىستەرى ساپارىندا بولدىڭىز، ءبىز كوپتەگەن ماڭىزدى ورتاق تانىمعا كەلدىك. ەكى جاقتىڭ ورتاق قۇلشىنۋىنىڭ ارقاسىندا، ەكى ەلدىڭ ءار سالاداعى ناقتى ىستەر سەلبەستىگى سۇبەلى تابىسقا قول جەتكىزدى. جۇڭگو جاق جۇڭگو مەن ەكۆادور قارىم - قاتىناسىن دامىتۋعا باسا ءمان بەرەدى، ەكۆادور جاقپەن بەلسەنە بايلانىس جاساپ، ىندەت اكەلگەن قيىندىقتى جەڭىپ، ناقتى ىستەر سەلبەستىگىن قايتا باستاپ ءارى ىلگەرىلەتىپ، ىندەتتەن كەيىنگى جۇڭگو مەن ەكۆادوردىڭ جان - جاقتى ستراتەگيالىق سەرىكتەستىك قارىم - قاتىناسىنىڭ جاڭا دەڭگەيگە كوتەرىلۋىن ىلگەرىلەتىپ، ەكى ەل حالقىن ونان ارى باقىتقا كەنەلتۋدى قالايدى.

  مورەنو مىنالاردى ءبىلدىردى: جۇڭگو ۇكىمەتى مەن جۇڭگو حالقى ەكۆادوردىڭ جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋىنا قىمباتتى كومەك بەردى جانە قولداۋ كورسەتتى، بۇل ەكۆادور جاقتىڭ ىندەتكە توتەپ بەرۋىندە ماڭىزدى رول اتقاردى. جۇڭگو ەكۆادوردىڭ ماڭىزدى جان - جاقتى ستراتەگيالىق سەرىگى، ەكۆادور مەن جۇڭگونىڭ سەلبەستىگى، دوستىعى ءبىر - بىرىنە پايدا جەتكىزەدى. ەكۆادور جاق جۇڭگو جاقتىڭ ىندەتكە قارسى اتتانۋداعى تابىستى تاجىريبەسىنەن ۇلگى الىپ، سەلبەستىكتى كۇشەيتىپ، ەكۆادور جاقتىڭ قيىنشىلىقتى جەڭۋىنە، ىندەتتى جويۋىنا كومەكتەسىپ، ەكونوميكالىق دامۋدى سەرپىلتۋدى ءۇمىت ەتەدى. مەن ءتوراعا شي جينپيڭمەن ءجيى بارىس - كەلىستى ساقتاپ، ەكۆادور مەن جۇڭگو قارىم - قاتىناسىنىڭ ۇزدىكسىز العا دامۋىن بىرگە ىلگەرىلەتۋدى قالايمىن.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.