ءداستۇرلى جول جەلىسىنەن تاسىمال ۋاقىتى 5 كۇن قىسقارادى
شينجياڭ گازەتىنىڭ جالپىلىق اقپارات قۇرالدارى ءتىلشىسى چىن چياڭۋي 6 - ايدىڭ 21 - كۇنى ۇرىمجىدەن حابارلايدى. ءۇرىمجى كەدەنىنەن ۇعىسۋىمىزشا، 6 - ايدىڭ 18 - كۇنى جۇڭگو - ەۆروپا كەزەكشى پويەزى ”جۇڭگو - قىرعىزستان - وزبەكستان“ تاس جول مەن تەمىر جولدا ۇتىلاپ تاسىمالداۋ حالىقارالىق جۇك تاسىمالى كەزەكشى پويەزىنىڭ تۇڭعىش توپتاعى تيەۋىش قوراپتارى ەركەشتام شەكارا وتكەلىنەن شىققان. بۇل ەل ىشىندە ”تەمىر جول - تاس جول - تەمىر جول“ فورماسىندا ۇتىلاپ تاسىمالداۋ تاسىلىمەن ۇيىمداستىرىلعان، قاتىناعان تۇڭعىش جۇڭگو - ەۆروپا كەزەكشى پويەزى سانالادى ەكەن.
بۇل جولعى حالىقارالىق جۇك تاسىمالى كەزەكشى پويەزىنا بارار جولدا ەكسپورتتىق ەلەكتر بۇيىمدارى تيەلسە، قايتار جولدا يمپورت ەتىلەتىن ماقتا ءجىپ تيەلمەك. 6 - ايدىڭ 5 - كۇنى لانجوۋدان شىعىپ، تەمىر جولمەن قاشقارعا جەتكەن سوڭ، تاس جول ارقىلى ەركەشتام شەكارا وتكەلىنەن شىعىپ، قىرعىزستاننىڭ وش قالاسىنا، ونان ارى تەمىر جول ارقىلى وزبەكستاننىڭ استاناسى تاشكەنتكە جەتپەك. جۇڭگو - ەۆروپا كەزەكشى پويەزىمەن قازاقستان ارقىلى وزبەكستانعا باراتىن ءداستۇرلى جول جەلىسىنە سالىستىرعاندا، تاسىمال ۋاقىتى مەجەمەن 5 كۇن اينالاسىندا ۇنەمدەلەدى ەكەن.
وسى جولعى جۇك تاسىمالىن ۇستىنە العان زات جەتكىزۋ سەرىكتەستىگىنىڭ نىسان باس باقىلاۋشىسى ليۋ جىنحۇي مىنانى ءبىلدىردى: بۇل جولعى ”جۇڭگو - قىرعىزستان - وزبەكستان“ تاس جول مەن تەمىر جولدا ۇتىلاپ تاسىمالداۋ حالىقارالىق جۇك تاسىمالى كەزەكشى پويەزى كاسىپورنىمىزدىڭ باتىسقا جۇرەتىن جاڭا جول جەلىسىن اشۋداعى پايدالى سىناعى، ەگەر قاتىناۋ جۇمىسى جاقسى بولىپ جاتسا، كەيىن اپتاسىنا ءبىر كەزەك ۇدايىلاندىرىپ قاتىناپ تۇرۋىمىز مۇمكىن.
”ەركەشتام شەكارا وتكەلى ەلىمىزدىڭ قىرعىزستانعا شىعاتىن ماڭىزدى تاس جول شەكارا وتكەلى. قازىر اتالعان شەكارا وتكەلىنىڭ تاس جول تاسىمالى ىندەتتىڭ الدىنداعى دەڭگەيگە بىرتىندەپ كەلە باستادى، سونداي - اق بىرتىندەپ ءوسۋ كۇيى جارىققا شىقتى. بۇل جولى كاسىپورىننىڭ تاس جول مەن تەمىر جولدا ۇتىلاپ تاسىمالداۋ ءتاسىلىن سىناپ كورۋى ەركەشتام شەكارا وتكەلىنىڭ كەدەننەن ءوتۋ كومەسكى كۇشىن ىشكەرىلەي ىسكە قوسىپ قالماستان، شينجياڭنىڭ باتىسقا باعىتتالعان ارناسىنىڭ ورنىن ونان ارى كۇشەيتتى“، - دەيدى ەركەشتام كەدەنى باقىلاۋ - باسقارۋ ءبولىمىنىڭ ورىنباسار باستىعى ءمىناۋار يلام.
