شينحۋا اگەنتتىگىنىڭ 6 - ايدىڭ 22 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 6 - ايدىڭ 22 - كۇنى كەشتە بەيجيڭدە بەينەەكران فورماسىمەن ەۆروپا القالار كەڭەسىنىڭ ءتوراعاسى ميچەلمەن جانە ەۆروپا وداعى كوميتەتىنىڭ ءتوراعاسى فون - دەر - لياييەنمەن كەزدەستى.
شي جينپيڭ بىلاي دەپ اتاپ كورسەتتى: جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان بەرى، جۇڭگو مەن ەۆروپا وداعى ءوزارا قولداۋ كورسەتتى، ءوزارا كومەكتەستى. جۇڭگو جاق ەۆروپا جاقپەن قول ۇستاسا قۇلشىنىپ، ”سوڭعى ىندەت داۋىرىندە“ جۇڭگو - ەۆروپا قارىم - قاتىناسىنىڭ اناعۇرلىم تۇراقتى، اقاۋسىز بولىپ، تولىسىپ، اناعۇرلىم جوعارى دەڭگەيگە كوتەرىلۋىن ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: جۇڭگو ءارى ۇزاق تاريحقا يە بايىرعى ەل، ءارى ومىرشەڭدىك كۇشكە تولى وركەندەپ كەلە جاتقان ەل. جۇڭگو بەيبىتشىلىكتى قاجەت ەتەدى، زورەكەرلىكتى قاجەت ەتپەيدى. ءبىزدىڭ بارلىق ساياساتىمىز بەن قىزمەتىمىزدىڭ تياناعى − جۇڭگو حالقىن باقىتتى تۇرمىسقا كەنەلتۋ. ءبىز بەيبىت دامۋ جولىمەن بۇلجىماي جۇرەمىز. جۇڭگو − وراي، قاتەر ەمەس. جۇڭگو الداعى جەردە رەفورمانى ۇزدىكسىز تەرەڭدەتەدى، ەسىك اشۋدى كەڭەيتەدى، بۇل ەۆروپاعا جاڭا كەزەكتى سەلبەسۋ ورايى مەن دامۋ كەڭىستىگىن ازىرلەيدى. جۇڭگو − سەرىكتەس، قارسىلاس ەمەس. جۇڭگو مەن ەۆروپادا ءتۇبىرلى مۇددەلىك قاقتىعىس جوق، سەلبەستىگى باسەكەدەن باسىم تۇرادى، ورتاق تانىمى الاۋىزدىقتان باسىم تۇرادى. ەكى جاق ءوزارا قۇرمەتتەپ، پارىقتاردى ساقتاپ ورتاقتىققا ۇمتىلىپ، جاراسىمدى بولىپ ءارى ءوز ەرەكشەلىگىن ساقتاپ، ءوزارا ءتۇسىنۋ مەن سەنىمدى ۇزدىكسىز كۇشەيتىپ، سەلبەستىك بارىسىندا ورتاق مۇددەنى كەڭەيتىپ، دامۋ بارىسىندا قيىن ماسەلەلەردى شەشىپ، اناعۇرلىم دۇنيە جۇزىلىك ىقپالعا يە جۇڭگو مەن ەۆروپا جالپى بەتتىك ستراتەگيالىق سەرىكتەستىك قارىم - قاتىناسىن سومداۋ كەرەك.
شي جينپيڭ بىلاي دەپ باسا دارىپتەدى: ىندەتتىڭ سوققىسىندا دۇنيە جۇزىندە تەرەڭ وزگەرىستەر تۋىلىپ، اناعۇرلىم كوپ ورنىقسىزدىق، تۇراقسىزدىق فاكتورلارىنا ءدوپ كەلۋدە. مەن ىلگەرىدە داعدارىس بارىسىندا جاڭا وراي جەتىلدىرۋگە، وزگەرىس بارىسىندا جاڭا جاعداي اشۋعا قۇلشىنۋ كەرەك دەگەندى ورتاعا قويعان ەدىم. وسى ءبىر ءتۇيىن جۇڭگو مەن ەۆروپانىڭ قارىم - قاتىناسىنا دا ۇيلەسەدى. جۇڭگو مەن ەۆروپا دۇنيە جۇزىندەگى ەكى ۇلكەن كۇش، ەكى ۇلكەن بازار، ەكى ۇلكەن وركەنيەت رەتىندە نەنى دارىپتەۋى، نەگە قارسى تۇرۋى، قانداي سەلبەستىك ورىستەتۋى دۇنيە جۇزىلىك مانگە يە.
جۇڭگو مەن ەۆروپا كۇللى الەمنىڭ بەيبىتشىلىگىن، ورنىقتىلىعىن قورعايتىن ەكى ۇلكەن كۇش بولۋ كەرەك. جۇڭگو جاق ەۆروپا جاقپەن بىرگە كەلەلى ماسەلەلەر جونىندە اۋىس - كۇيىس جاساۋدى قالايدى، ەۆروپا وداعىنىڭ ىنتىماق، ورنىقتىلىق، ەسىك اشۋ، گۇلدەنۋ بەتالىسىنا قاراي ۇزدىكسىز العا باساتىندىعىنا سەنەدى، ەۆروپا جاقتىڭ حالىقارالىق بەيبىتشىلىك، ورنىقتىلىق ءۇشىن سىندارلى ۇلەس قوسۋىن قۋانا كورگىسى كەلەدى، ەۆروپا جاقپەن ستراتەگيالىق سەلبەستىكتى كۇشەيتىپ، الەمدىك سىن - سايىسقا بىرگە توتەپ بەرۋدى قالايدى.
جۇڭگو مەن ەۆروپا الەمنىڭ دامۋىن، گۇلدەنۋىن ىلگەرىلەتەتىن ەكى ۇلكەن بازار بولۋعا ءتيىس. جۇڭگو مەن ەۆروپا ەكى ۇلكەن ەكونوميكالىق تۇلعا رەتىندە دۇنيە ءجۇزى ەكونوميكاسىنىڭ ”قوس قوزعالتقىشى“ رولىن ساۋلەلەندىرىپ، دۇنيە جۇزىلىك ەكونوميكانىڭ سەرپىلۋىنە دەم بەرىپ، عىلمي، ءتارتىپتى تۇردە جۇمىستى، ءوندىرىستى قالپىنا كەلتىرۋگە بىرگە قولداۋ كورسەتىپ، ماكرولىق ەكونوميكالىق ساياساتتى سايكەستىرۋدى كۇشەيتىپ، الەمدىك كاسىپ سالاسى تىزبەگىنىڭ، قامداۋ تىزبەگىنىڭ ورنىقتى، ىركىلىسسىز بولۋىن قورعاۋ كەرەك. ەكى جاق بازاردى ءوزارا اشىق ۇستاپ، جۇڭگو مەن ەۆروپانىڭ قارجى قوسۋ كەلىسىمى كەلىسسوزىن جەدەل ىلگەرىلەتىپ، جۇڭگو مەن ەۆروپانىڭ جاسىل جانە سيفر سالاسىنداعى سەلبەستىگىن كۇشەيتىپ، جاسىل دامۋدا سەرىكتەس بولۋدى تۇلعالاۋ كەرەك. ەكى جاق بەي ءۇشىنشى جاق سەلبەستىگىن كۇشەيتۋ كەرەك.
جۇڭگو مەن ەۆروپا كوپ جاقتىلىققا تاباندى بولاتىن، الەمدىك جونگە سالۋدى كەمەلدەندىرەتىن ەكى ۇلكەن وركەنيەت بولۋعا ءتيىس. حالىقارالىق جاعداي مەيلى قالاي وزگەرسە دە، جۇڭگو بارلىعىندا كوپ جاقتىلىق جاعىندا تۇرادى، بىرگە اقىلداساتىن، بىرگە قۇراتىن، بىرگە يگىلىكتەنەتىن الەمدىك جونگە سالۋ كوزقاراسىنا تاباندى بولادى. جۇڭگو جاق ەۆروپا وداعىنىڭ كوپ جاقتىلىقتى باتىل قولداپ، حالىقارالىق ىندەتكە قارسى اتتانۋ سەلبەستىگىنە ات سالىسقاندىعىن ءارى دۇنيە جۇزىلىك دەنساۋلىق ساقتاۋ ۇيىمى سياقتى حالىقارالىق قۇرىلىمدارعا ۇسىنىلىمدى ارتتىرعاندىعىن القايدى، ەۆروپا جاقپەن بىرگە كەلەلى حالىقارالىق جانە وڭىرلىك ماسەلەلەردە سايكەسۋدى، سەلبەسۋدى كۇشەيتىپ، دۇنيە جۇزىلىك الەۋمەتتىك دەنساۋلىق ساقتاۋ - جونگە سالۋداعى كەڭەس سەلبەستىگىن كۇشەيتىپ، ادامزاتتىڭ دەنساۋلىق ساقتاۋ، سالاماتتىق ورتاق تۇلعاسىن قۇرۋدى ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: مەن ەكى توراعامەن ءجيى تىلدەسۋدى ساقتاپ، جۇڭگو مەن ەۆروپانىڭ ءبىر قىدىرۋ ماڭىزدى ساياسي كەڭەستىك تاقىرىپتارىن ىلگەرىلەتىپ، جۇڭگو - ەۆروپا قارىم - قاتىناسىن جاڭا دەڭگەيگە كوتەرۋدى ىلگەرىلەتۋدى قالايمىن.
ميچەل مەن فون - دەر - لياييەن مىنالاردى ءبىلدىردى: ەۆروپا مەن جۇڭگو دۇنيە جۇزىندەگى ەكى ۇلكەن ەكونوميكالىق تۇلعا سانالاتىندىقتان ەكى جاقتىڭ قارىم - قاتىناسى ومىرشەڭدىك كۇشكە تولى. كەزەكتە دۇنيە ءجۇزى اسا زور تۇراقسىزدىقتارعا ءدوپ كەلۋدە، حالىقارالىق سەلبەستىك بولعاندا عانا الەمدىك سىن - سايىسقا توتەپ بەرۋگە بولادى، تىلدەسۋ، كەڭەسۋ بولعاندا عانا قايشىلىقتى، قاقتىعىستى شەشۋگە، وڭىرلىك ورنىقسىزدىقتى جويۋعا بولادى. ەۆروپا جاق رياسىز پوزيتسيامەن جۇڭگو جاقپەن ستراتەگيالىق كەڭەس ورىستەتىپ، ورتاق تانىمدى كەڭەيتۋدى قالايدى. ەۆروپا جاق جۇڭگو جاقپەن ۆاكسينا زەرتتەۋ - اشۋ، جۇمىستى، ءوندىرىستى قالىپنا كەلتىرۋ جونىندە سەلبەستىكتى كۇشەيتىپ، ەكى جاقتى ساۋدا كولەمىن كەڭەيتىپ، جاسىل، تومەن كومىر تەكتى، سيفرلى ەكونوميكا سياقتى كەڭ سالالارداعى سەلبەستىكتى ىلگەرىلەتۋدە اناعۇرلىم كوپ ىلگەرىلەۋشىلىككە قول جەتكىزىپ، ەۆروپا مەن جۇڭگونىڭ قارجى قوسۋ كەلىسىمىن تەز ارادا جاساسىپ، ىندەت ىقپالىن كۇنى بۇرىن جويۋ، دۇنيە جۇزىلىك ەكونوميكانىڭ سەرپىلۋىن جەبەۋ ءۇشىن قۇلشىنىس جاساۋدى قالايدى. ەۆروپا جاق كوپ جاقتىلىققا تاباندى بولىپ، جۇڭگو جاقپەن بىرلەسكەن مەملەكەتتەر ۇيىمى، دۇنيە جۇزىلىك ساۋدا ۇيىمى، 20 ەل توبى سياقتى جۇلگەلەردە الەۋمەتتىك دەنساۋلىق ساقتاۋ حاۋىپسىزدىگى، كليمات وزگەرىسى، باياندى دامۋ، بەي ءۇشىنشى جاق سەلبەستىگى سياقتى كەلەلى ماسەلەلەر جونىندە سايكەسۋدى، سەلبەسۋدى كۇشەيتۋدى قالايدى. ەۆروپا جاق جۇڭگو جاقپەن بىرگە قۇلشىنىپ، ەۆروپا مەن جۇڭگو كەلىسكەن كەلەلى ساياسي كەڭەستىك تارتىپتەردى ىلگەرىلەتۋدە تابىسقا قول جەتكىزۋدى قالايدى.
ۋاڭ ي، حى ليفىڭ قاتارلىلار كەزدەسۋگە قاتىناستى.
