شي جينپيڭ ەسىرتكىگە تيىم سالۋ قىزمەتى جونىندە ماڭىزدى نۇسقاۋ بەرىپ بىلاي دەپ باسا دارىپتەدى
ەسىرتكىگە تيىم سالۋ باعىتىن قاتاڭ اتقارۋعا تاباندى بولىپ، ەسىرتكىگە تيىم سالۋ حالىقتىق شايقاسىن ويداعىداي جۇرگىزىپ، ەسىرتكىگە تيىم سالۋ قىزمەتىندە ۇزدىكسىز تىڭ ونىمدىلىكتەرگە قول جەتكىزۋدى ىلگەرىلەتۋ كەرەك
شينحۋا اگەنتتىگىنىڭ 6 - ايدىڭ 23 - كۇنى بەيجيڭنەن بەرگەن حابارى. حالىقارالىق ەسىرتكىگە تيىم سالۋ كۇنى قارساڭىندا، مەملەكەتتىك ەسىرتكىگە تيىم سالۋ قىزمەتىندەگى وزات كوللەكتيۆتەر مەن وزات جەكەلەردى ماداقتاۋ - سيلاۋ ءماجىلىسى 6 - ايدىڭ 23 - كۇنى تۇستەن بۇرىن بەيجيڭدە وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ماڭىزدى نۇسقاۋ بەرىپ، پارتيا ورتالىق كوميتەتى اتىنان ماداقتالىپ - سيلانعان وزات كوللەكتيۆتەر مەن وزات جەكەلەردى قىزۋ قۇتتىقتادى، بۇكىل ەلدەگى ەسىرتكىگە تيىم سالۋ شايقاس شەبىندەگى جولداستاردان شىنايى حال سۇرادى.
شي جينپيڭ بىلاي دەپ باسا دارىپتەدى: قازىر شەكارا ىشىندەگى جانە شەكارا سىرتىنداعى ەسىرتكى ماسەلەسى، ءداستۇرلى جانە جاڭا ەسىرتكى زالالى، ينتەرنەتتەگى جانە ينتەرنەتتەن تىس ەسىرتكىگە ساياتىن قىلمىس ءوزارا قاباتتاسىپ، بۇقارانىڭ ءومىرىنىڭ حاۋىپسىزدىگى مەن دەنساۋلىعىنا، قوعامنىڭ ورنىقتىلىعىنا اۋىر قاتەر توندىرۋدە، ءسوز جوق، ەسىرتكىگە تيىم سالۋ قىزمەتىن قاز - قالپىندا، باتىل، تۇبەگەيلى ىشكەرىلەي جۇرگىزۋ كەرەك. ءار دارەجەلى پارتكومدار مەن ۇكىمەتتەر حالىقتى وزەك ەتكەن دامۋ يدەياسىنا تاباندى بولىپ، مەملەكەتكە، ۇلتقا، حالىققا، تاريحقا وسكەلەڭ جاۋاپتى بولۋ پوزيتسياسىمەن ەسىرتكىگە تيىم سالۋ باعىتىن قاتاڭ اتقارۋعا تاباندى بولىپ، ەسىرتكىگە تيىم سالۋ حالىقتىق شايقاسىن ويداعىداي جۇرگىزىپ، ەسىرتكىنى جونگە سالۋ جۇيەسىن كەمەلدەندىرىپ، ەسىرتكىگە تيىم سالۋدىڭ حالىقارالىق سەلبەستىگىن تەرەڭدەتىپ، ەسىرتكىگە تيىم سالۋ قىزمەتىندە ۇزدىكسىز تىڭ ناتيجەلەرگە قول جەتكىزۋدى ىلگەرىلەتىپ، قوعامنىڭ جاراسىمدىلىعىن، ورنىقتىلىعىن قورعاۋعا، حالىقتىڭ الاڭسىز تىرشىلىك، شات - شادىمان تۇرمىس كەشىرۋىن قامتاماسىز ەتۋگە تىڭ دا اناعۇرلىم زور ۇلەستەر قوسۋ كەرەك.
مەملەكەتتىك كەڭەستىڭ مۇشەسى، مەملەكەتتىك ەسىرتكىگە تيىم سالۋ كوميتەتىنىڭ مەڭگەرۋشىسى جاۋ كىجى ماجىلىستە شي جينپيڭنىڭ ماڭىزدى نۇسقاۋىن جەتكىزدى. ول بىلاي دەپ اتاپ كورسەتتى: باس شۋجي شي جينپيڭنىڭ ماڭىزدى نۇسقاۋىنىڭ رۋحىن مۇقيات ۇيرەنىپ، يگەرىپ، باتىل دايەكتىلەندىرىپ، تياناقتاندىرىپ، ماداقتالىپ - سيلانعان وزات كوللەكتيۆتەر مەن وزات جەكەلەردى ۇلگى ەتىپ، اناعۇرلىم بەرىك بەكىممەن، اناعۇرلىم اسقاق كۇرەس جىگەرىمەن، اناعۇرلىم پارمەندى شارالارمەن جاڭا داۋىردەگى ەسىرتكىگە تيىم سالۋ حالىقتىق شايقاسىنىڭ تىڭ جەڭىسىنە ۇزدىكسىز قول جەتكىزۋ كەرەك.
ماجىلىستە 2015 - جىلدان بەرى ەسىرتكىگە تيىم سالۋ قىزمەتىنىڭ ءارقايسى شايقاس شەپتەرىندە كورنەكتى ۇلەس قوسقان 100 وزات كوللەكتيۆ پەن 100 وزات جەكە ماداقتالىپ - سيلاندى. يۇننان ولكەسى لينساڭ قالالىق قوعام حاۋىپسىزدىگى مەكەمەسى ەسىرتكىگە تيىم سالۋ تارماق اترەتى، شىنجىن كەدەن مەكەمەسى اتكەزشىلەردى تيۋ مەكەمەسى بارلاۋ 2 - باسقارماسى، يۇننان شەكارادان كىرىپ - شىعۋ شەكارا قورعانىسى تەكسەرۋ باس پۋنكتى پۋىر شەكارالىق باسقارۋ تارماق اترەتى لانساڭ شەكارالىق تەكسەرۋ پۋنكتى جانە ىشكى موڭعۇل اۆتونوميالى رايوندىق قان ورتالىعى قانمەن قامتاماسىز ەتۋ ءبولىمىنىڭ مەڭگەرۋشىسى تاۋ يىڭچۇن، جياڭشي ولكەسى پيڭشياڭ قالاسى ەسىرتكىگە تيىم سالۋ ەرىكتىلەر قوعامىنىڭ باستىعى دۋان حۋاشىڭ قاتارلى وزات كوللەكتيۆتەر مەن وزات جەكەلەردىڭ ۋاكىلدەرى ءسوز سويلەدى.
ءماجىلىس تەلەۆيزور - تەلەفون ءماجىلىسى فورماسىندا اشىلدى، مەملەكەتتىك ەسىرتكىگە تيىم سالۋ كوميتەتىندەگى قاتىستى جاۋاپتى جولداستار، ءارقايسى ولكەلىك، قالالىق، اۋداندىق ەسىرتكىگە تيىم سالۋ كوميتەتتەرىندەگى جاۋاپتى جولداستار، ماداقتالىپ - سيلانعان وزات كوللەكتيۆتەردىڭ ۋاكىلدەرى مەن وزات جەكەلەر، ت.ب جەكە - جەكە نەگىزگى جيىن زالىندا جانە بولىمشە جيىن زالدارىندا ماجىلىسكە قاتىناستى.
