شينجياڭ گازەتىنىڭ جالپىلىق اقپارات قۇرالدارى ءتىلشىسى ليۋ شياڭ
”كەلىڭىز، كەلىڭىز، كەلىڭىز شونجىنىڭ ناعىز مايلى قۋىرداعىنان ءدام تاتىڭىز!“، ”جاڭا پىسقان قوي ەتى قارماسى، الاسىز با؟“ 6 - ايدىڭ 23 - كۇنى ءساندى شامداردى جاڭا جاققان كەزدە، شونجى گۋچىڭ ساۋدا كوشەسىندە ساۋداگەرلەردىڭ ايعايلاعان داۋىسى جان - جاقتان كوتەرىلدى. 6 - ايدىڭ 18 - كۇنى جۇڭگو. شونجى 8 - كەزەكتى ساياحات - مادەنيەت ءدامدى تاعام مەرەكەسى وسى ارادا باستالعاننان بەرى، دۋماندى بەينە كۇن سايىن كورىنىس بەردى.
ادام بويىنداي ەتىپ تىزىلگەن ”ساڭزى مۇناراسى“ سارى التىنداي جارقىراپ تۇر، ساپ - سارى بولىپ پىسقان قارما ناننىڭ ءيىسى مۇرىندى جارادى... ساياحات - مادەنيەت ءدامدى تاعام مەرەكەسىنىڭ باستالۋ سالتى وتكىزىلگەن جەردە شونجىنىڭ 6 تورەتاباق جەلىلەس ەرەكشە ءدامدى تاعامى ءوزىن ايگىلەپ، ساياحاتشىلاردى تۇس - تۇستان كەلىپ ەستەلىك سۋرەتكە تۇسۋگە باۋرادى. ”ماعان ءبىر تاباق ساڭزى بەرە سالىڭىز!“ ۇرىمجىلىك ساياحاتشى شىن جيۋپيڭ سۋرەتكە تارتىپ بولا سالا اسىعا ءدامىن تاتتى. قاربىتا اساپ جىبەرىپ ەدى، ۇگىتىلىپ تۇر ەكەن، سويلەۋگە ۇلگىرمەي، قايتا - قايتا باس بارماعىن شىعارىپ القادى.
ءوزى پىسىرعان ساڭزىنىڭ وسىنشاما القاۋعا يە بولعانىن كورىپ، يوۋسۋلان ءدامدى ساڭزى دۇكەنىنىڭ باس ديرەكتورى باۋ رۇيجۋان قۋانىشتان ءماز - ءمايرام بولىپ ءجۇردى. ”مىنا ’ساڭزى مۇناراسىن‘ 5 قالتا ۇن ىستەتىپ، 4 ادام 12 كۇندە ارەڭ پىسىرىپ بولدى، مۇنىڭ بارىسى جاپالى بولعانىمەن، ساياحاتشىلار ۇناتىپ جاتسا، بىزگە سونىڭ ءوزى جەتىپ جاتىر!“. ول بىلاي دەدى: ”ماي شۇيكە، شيراتپا، سوقتالى پراندىك، ساڭزى سىقىلدىلاردىڭ ءبارى بۇرىن تۇرعىندار ۇيلەرىندە جەيتىن دۇنيە بولاتىن، قازىر ءدامدى تاعام مەرەكەسى ارقىلى اناعۇرلىم كوپ ادامدارعا جەرگىلىكتى ەرەكشە جەڭىل تاعامداردىڭ ءدامىن تاتتىرىپ قانا قالماستان، شونجىنىڭ ءدامدى تاعامىنىڭ تانىمالدىلىعىن ارتتىردى، بۇل وتە جاقسى بولدى“.
جۇڭگو. شونجى 8 - كەزەكتى ساياحات - مادەنيەت ءدامدى تاعام مەرەكەسى 6 كورمە وڭىرىنەن 160 كورمە ورنىن قۇردى، ۋاقىتى 6 - ايدىڭ 18 - كۇنىنەن 6 - ايدىڭ 25 - كۇنىنە دەيىن جالعاسادى.
”شونجىنىڭ جەڭىل تاعامدارى ءدامدى، ءتۇرى مول، وسى رەتكى ساياحات - مادەنيەت ءدامدى تاعام مەرەكەسىندە ەرەكشە ايگىلى جەڭىل تاعام كورمە ورنى شونجى اۋدانىنىڭ 50 ءتۇرلى ەرەكشە ايگىلى جەڭىل تاعامىن كورمەگە شىعاردى، بۇل مايلى قۋىرداق لاڭمانى، حۋاڭميان كاۋاپ، قوي ەتى قارماسى، بويۇيزى، شونجىنىڭ 4 ايگىلى سورپاسى، (ماي سورپا، جۇمىرتقا سورپاسى، ارالاسپا سورپا، بۇرشاق ىرىمشىگى سورپاسى)، ت . ب قامتىدى“، - دەدى شونجى اۋدانى اسپازدار قوعامىنىڭ باستىعى جاڭ جۇڭ تانىستىرىپ.
قيمىل كەزىندە، ءبىر قىدىرۋ مادەنيەت ارقىلى حالىققا تيىمدىلىك جەتكىزۋ قيمىلى دا ىركەس - تىركەس وتكىزىلدى. ءبي «كوككە سامعاۋ» بيشىلەردىڭ مىڭ بۇرالعان بەينەسى كورەرمەندەردى ءتانتى ەتتى؛ اسپازداردىڭ تاماق ءپىسىرۋ باسەكەسىندە، شونجى اۋدانىنىڭ ۇلكەندى - كىشىلى اسحانالارىنان كەلگەن اسپازدار ءوز ونەرلەرىن كورسەتتى...
2019 - جىلى شونجى اۋدانى ”جۇڭحۋا ءدامدى تاعام مەكەنى“ بولىپ باعالاندى. ءداستۇرلى ەرەكشە ءدامدى جەڭىل تاعامدارىن مولىنان جاساپ شىعارۋ ارقىلى شار تاراپتان ەرەكشە ءدامدى تاعامداردى ەنگىزىپ، اس - سۋ ايگىلى دۇكەندەرىن، ايگىلى ءدامحانالاردى بەلسەنە قۇردى.
جاڭا تيپتى ايدارشا ۆيرۋس وكپە قابىنۋ ىندەتى سەبەبىنەن، شونجى اۋدانىنىڭ تۇتىنۋ بازارى ىقپالعا ۇشىرادى. جۇمىس، ءوندىرىس قالپىنا كەلگەننەن بەرى، تۇتىنۋدى قايتادان جانداندىرۋدى جەدەل ىلگەرىلەتۋ ءۇشىن، شونجى اۋداندىق پارتكوم مەن اۋداندىق ۇكىمەت شارا قولدانىپ، كەشكى تۇتىنۋ بازارىن كوركەيتتى. قازىر بۇل اۋدان شونجى گۋچىڭ ساۋدا كوشەسى، حۇيتۇڭ حانماتوۋ سياقتى 10 كەشكى بازاردى تۇلعالادى. كەشكى ەكونوميكا جالىنداعان شونجى اۋدانى 5 - ايدا تاۋارلاردى بولشەك ساتۋدان 17 ميلليون 700 مىڭ يۋان كىرىس كىرگىزدى، بۇل سايكەس مەزگىلدەگىدەن ％154.4 ارتتى، اس - سۋ كىرىسى 4 ميلليون 958 مىڭ يۋان بولىپ، سايكەس مەزگىلدەگىدەن ％95.8 ارتتى.
”كەلەسى قادامدا، شونجى اۋدانى ۇكىمەت جەتەكشىلىك ەتۋ، كاسىپورىن تۇلعا بولۋ، ساياسات ارقىلى ىلگەرىلەتۋ، بازار اينالىمى سياقتى تاسىلدەر ارقىلى كەشكى ەكونوميكانىڭ شوعىرلانۋعا، ەرەكشەلەنۋگە، كوپ نەگىزدەنۋگە قاراي دامۋىن جەبەپ، ’تيانشاننىڭ شىعىسىنداعى ءتۇنسىز قالا، رومانتيكالى شونجى ءسىزدى قارسى الادى‘ دەگەن ماركا ىقپالىن ۇزدىكسىز كەڭەيتەدى“، - دەدى شونجى اۋداندىق پارتكومنىڭ شۋجيى ما شۇيدۇڭ.
