شينجياڭ تەمىر جولى جۇك تاسىمالىنىڭ قامداۋ جاعىنداعى رەفورماسىن ۇزدىكسىز تەرەڭدەتتى، الدىڭعى 5 ايداعى جۇك تاسىمال مولشەرى سايكەس مەزگىلدەگىدەن ％21.6 ارتتى −
لەنيا بازارمەن تىعىز بايلانىستىرىلدى، تاسىمال قۋاتى سۇرانىسپەن تىعىز بىرلەستىرىلدى
شينجياڭ گازەتىنىڭ جالپىلىق اقپارات قۇرالدارى ءتىلشىسى لۋ فىڭباۋ
6 - ايدىڭ 23 - كۇنى تۇستەن بۇرىن ءبىر جۇڭگو - ەۆروپا كەزەكشى پويەزى الاتاۋ ساعاسى شەكارا وتكەلىنەن شەكارادان شىقتى، بۇل بيىل الاتاۋ ساعاسى شەكارا وتكەلى ارقىلى شەكارادان كىرگەن - شىققان 2000 - رەتكى جۇڭگو - ەۆروپا كەزەكشى پويەزى بولىپ، بىلتىرعىدان 52 كۇن بۇرىن وسى نىسانا ورىندالدى.
بيىل الدىڭعى 5 ايدا شينجياڭ تەمىر جولىنداعى جۇك تاسىمال مولشەرى 69 ميلليون 770 مىڭ تونناعا جەتىپ، بىلتىرعى سايكەس مەزگىلدەگىمەن سالىستىرعاندا، ％21.6 ارتتى. كوزگە ايرىقشا تۇسەتىن وسى ناتيجەنىڭ استارىندا شينجياڭ تەمىر جولى تاراۋلارىنىڭ ىندەت ىقپالىنا قۇلشىنا توتەپ بەرىپ، جۇك تاسىمالىنىڭ قامداۋ جاعىنداعى رەفورماسىن ۇزدىكسىز تەرەڭدەتىپ، جۇك تاسىمال مولشەرىن ارتتىرۋ ارەكەتىن ىشكەرىلەي اتقارىپ، وزىندىك دامۋدىڭ ”ۇدەمەلى جىلدامدىعىن“ ايگىلەگەندىگى جاتىر.
تاسىمال ارناسىن ىركىلىسسىزدەندىردى
شينجياڭ تەمىر جول جۇك تاسىمالى جونىنەن ايتقاندا، كومىر تاسىمالى − مولىنان تاسىلاتىن زاتتاردىڭ ىشىندە ەڭ ماڭىزدىسى سانالادى.
بيىل شينجياڭ تەمىر جولى قامداۋ جاعىنداعى قۇرىلىمدىق رەفورمانى تەرەڭدەتىپ، كومىر وندىرەتىن كاسىپورىنداردىڭ ”ساتىلىمى ارقىلى ءوندىرۋدى بەلگىلەۋ“ جاڭا جاعدايىمەن بىرلەستىرىپ، 14 تەكسەرۋ - زەرتتەۋ گرۋپپاسىن ۇيىمداستىرىپ قۇرىپ، بۇكىل شينجياڭداعى 7 ءتۇيىندى وڭىرگە، 43 ءتۇيىندى كاسىپورىنعا جۇمىس باسىندا تەكسەرۋ - زەرتتەۋ جۇرگىزىپ، كاسىپورىنداردىڭ تيجارات احۋالىن جانە زات قاينارى بەتالىسىن ۇعىستى؛ سول جەردە تۇراتىن قاريدارلار ۋاكىلىنىڭ رولىن ساۋلەلەندىرىپ، قامداۋشى - قاجەتسىنۋشى ەكى جاقتىڭ سۇرانىسىن بەلسەنە سايكەستىرىپ، زاتپەن قامداۋ كەلىسىمىنە كەلىستى. تاپسىرىستى قابىلداعاننان كەيىن، شينجياڭ تەمىر جول تاراۋلارى كومىر تاسىمالداۋ ارناسىن ونان ارى ىركىلىسسىزدەندىرىپ، كومىردىڭ تەز ارادا تاسىمالدانۋىنا مۇمكىندىك جاسادى.
شىلىڭگىر ىستىق جاز كۇندەرى، ءۇرىمجى - جوڭعار تەمىر جولى جياڭجۇنمياۋ اينالما جەلىسى ىشىندە جۇرگىزۋشىنىڭ تەتىكتى جەڭىل باسۋىمەن قۇيعىش قويمادان كومىر ساۋ ەتىپ توگىلدى، پويەز ءبىر توقتاپ، ءبىر ءجۇرىپ 45 مينۋت اينالاسىندا توبەسى اشىق ۆاگونداردى تولتىردى.
”ءبىز ءۇرىمجى - جوڭعار تەمىر جولىندا جاڭا تاسىمال بەكەتىن كەڭەيتىپ، 4 - ايدا جياڭجۇنمياۋ اينالما جەلىسىن ىسكە قوسىپ، ءۇرىمجى - جوڭعار تەمىر جول اينالما جەلىسىن 4 جەلىگە كوبەيتىپ، تيەۋ ونىمدىلىگىن بارىنشا ارتتىرىپ، سولتۇستىك شينجياڭداعى كاسىپورىنداردىڭ كومىر پايدالانۋىنا كەپىلدىك ەتۋمەن بىرگە، وڭتۇستىك شينجياڭنىڭ كومىر تاسىمالىنا جاڭا ارنا كەڭەيتتىك“، - دەدى جۇڭگو تەمىر جول ءۇرىمجى مەكەمەسى توبى شەكتى سەرىكتەستىگى ءۇرىمجى جۇك تاسىمالداۋ ورتالىعىنىڭ ورىنباسار باس ديرەكتورى يە شياۋجۇن.
شينجياڭ ىشىندەگى كومىر تاسىمالىن ارتتىرۋمەن بىرگە، شينجياڭ تەمىر جولى تاراۋلارى شينجياڭ سىرتىنداعى بازارلاردى بەلسەنە اشىپ، حىشي كاريدورى، چىڭدۋ، كۇنميڭ باعىتىنداعى كاسىپورىنداردىڭ تاسىمال سۇرانىسىن ءتۇيىندى تۇردە كوزدەپ، تۇيىننەن - تۇيىنگە دەيىنگى كومىر تاسىمال ارناۋلى جەلىسىن بەلسەنە ۇيىمداستىردى. 5 - ايدا شينجياڭ تەمىر جولى تاسىعان كومىر 6 ميلليون 678 مىڭ 200 تونناعا جەتىپ، سايكەس مەزگىلدەگىدەن ％22.04 ارتتى.
جاڭا ارتۋ ءتۇيىنىن مىقتاپ يگەردى
شينجياڭ تەمىر جول تاراۋلارى كومىر تاسىمالىن ويداعىداي ىستەۋمەن بىرگە، بازارداعى جاڭا ارتۋ ءتۇيىنىن دە يگەرىپ، جۇك تاسىمال مولشەرىنىڭ ۇزدىكسىز ارتۋىن ىسكە اسىردى.
كوكتوعاي اۋدانىنىڭ كەن بايلىعى مول، التاي - كوكتوعاي - جۇندۇڭ تەمىر جولىنىڭ كوكتوعاي بولىگىندە پويەز قاتىناعاننان بەرى، شينجياڭ تەمىر جولى ەكى جەلى ارقىلى بۇكىل پويەزبەن مەتال كەن ونىمدەرىن تاسىمالدادى. التاي - كوكتوعاي - جۇندۇڭ تەمىر جولىنىڭ دەم بەرۋىندە 5 - ايدا شينجياڭ تەمىر جولى تاسىعان مەتال كەن ونىمدەرى ءبىر ميلليون 806 مىڭ 500 تونناعا جەتىپ، سايكەس مەزگىلدەگىدەن ％71.39 ارتتى.
مەتال كەن ونىمدەرى بازارىنىڭ سۇرانىسى ارتۋدان تىس، بيىل ماقتا سۇرانىسى دا كورنەكتى ارتتى، شينجياڭ تەمىر جول تاراۋى ىرىقتىلىقپەن قيمىلداپ، ماقتا تاسىمالداۋ سەرپىنىن ارتتىرىپ، تاسىمالداۋ مولشەرىن ارتتىردى.
6 - ايدىڭ 26 - كۇنى كۇيتۇن بيڭتۋان ماقتاسى ارناۋلى جەلىسى ىشىندە 10عا تارتا قىسقىشتى تيەۋ ماشيناسى ماقتا تيەۋ جۇمىسىن ءبىر ۋاقىتتا جۇرگىزدى. ”تاياۋدان بەرى ماقتا تاسىمال مولشەرى ارتتى، ءبىز تيەۋ بارىسىندا ماشينانى دەر كەزىندە ورنالاستىرىپ، زاتتاردىڭ حاۋىپسىز، جوعارى ءونىمدى، قولايلى تاسىمالدانۋىنا كەپىلدىك ەتتىك“، - دەدى كۇيتۇن جۇك تاسىمال ورتالىعى ساتۋ ءبولىمىنىڭ ساتۋ ديرەكتورى جاڭ يۋە.
بيىل شينجياڭ تەمىر جولى بۇكىل ەلدەگى ماقتا ساۋدا بازارلارىمەن، ءارقايسى جالپىلىق تەكسەرۋ قامبالارىمەن، ساتىپ الۋشى قاريدارلارمەن، ساۋداگەرلەرمەن جانە ارالىق زات جەتكىزۋشى ساۋداگەرلەرمەن تەرەڭ سەلبەستىكتى كۇشەيتىپ، ءارقايسى جالپىلىق تەكسەرۋ قامبالارىنداعى ماقتانى قاريدارلارعا جەتكىزۋ جوسپارى مەن جەتكىزۋ بەتالىسىن دەر كەزىندە يگەرىپ، قاريدارلاردىڭ زات جەتكىزۋ ۋاقىت شەگى، توپ - رەت سانى سياقتى تۇرلىشە قاجەتىنە ساي، ولارعا ارنايى جاسالعان زات جەتكىزۋدى شەشۋ وزگەشە جوباسىن جاسادى. 5 - ايدا شينجياڭ تەمىر جولىنىڭ ماقتا تاسىمالداۋ مولشەرى 634 مىڭ تونناعا جەتىپ، سايكەس مەزگىلدەگىدەن ％312.83 ارتتى.
تاسىمالداۋعا ۇيىمداستىرۋدى ساپالىلاندىردى
زات بولۋمەن بىرگە، زات تاسيتىن كولىك بولۋ كەرەك، شينجياڭ تەمىر جول تاراۋلارى تاسىمالداۋعا ۇيىمداستىرۋدى ساپالىلاندىرىپ، كولىكتەردىڭ اينالىم مولشەرىن جوعارىلاتىپ، ۆاگون - ۆاگون زاتتاردى شينجياڭنىڭ ءىشى - سىرتىنا، سونداي - اق حالىقارالىق بازارعا جەتكىزدى.
6 - ايدىڭ 17 - كۇنى تۇستەن بۇرىن، كۇن شىلىڭگىر ىستىق، جۇڭگو تەمىر جول ءۇرىمجى مەكەمەسى توبى شەكتى سەرىكتەستىگى ءۇرىمجى باتىس ۆوكزالى جونەلتۋ قولباسشىلىق زالىندا قىزمەتكەرلەر پويەزداردىڭ ۆوكزالدان كىرىپ - شىعۋىنا قولباسشىلىق ەتىپ، قىزمەتكەرلەردى جۇمىس باسىندا تەكسەرۋ جۇرگىزۋگە ورنالاستىرىپ جاتتى... مۇنداعى ”قىزۋ بەينە“ سىرتتاعى ىستىقتان كەم ەمەس.
”27118 - رەتكى جۇك پويەزى 2 - الاڭنىڭ 6 - جولىنا توقتاسىن“. ءۇرىمجى باتىس ۆوكزالىنىڭ بەكەت كەزەكشى قىزمەتكەرى ما چىڭ تىلدەسكىمەن پويەزداردىڭ بەكەتكە كىرۋىنە بۇيرىق بەرىپ جاتتى.
جۇمىس باسىندا قىزمەتكەرلەر الدىن الا قىزمەت ورنىنا جايعاسىپ، جۇك پويەزى ابدەن توقتاعاننان كەيىن بىرەۋلەرى پاراۆوزدى الماستىرسا، بىرەۋلەرى پويەزدى تەكسەرىپ، ءتۇرلى قىزمەتتەر ءتارتىپتى ءجۇرىلىپ جاتتى.
80 مينۋتتان كەيىن پويەز رەتى الماستىرىلعان اۋەلگى 27118 - رەتكى جۇك پويەزى قۇمىل جاققا قاراي جول الۋعا ساقاداي سايلاندى.
باسىن كوتەرىپ ۋاقىتقا قاراعان ءۇرىمجى باتىس ۆوكزالى جۇمىس جۇرگىزۋ سەحىنىڭ قاتىستى جاۋاپتىسى لۋ گوحۇڭ ماڭدايىنداعى تەرىن ءسۇرتىپ جاتىپ بىلاي دەدى: ”80 مينۋت، ءبىز بىلتىرعى نەگىزدە جۇك پويەزىنىڭ وتكەرمەلەنۋ ۋاقىتىن 10 مينۋتقا تاياۋ قىسقارتتىق“دەدى.
ءۇرىمجى باتىس پويەز ۆوكزالى شينجياڭ تەمىر جولىنداعى ەڭ ۇلكەن گرۋپپاعا ءبولۋ بەكەتى، ءار كۇنى بۇكىل شينجياڭنىڭ تەمىر جول جۇك تاسىمالىنداعى ％80 پويەز وسى ارانى باسىپ وتەدى، وتكەرمەلەنەدى نەمەسە قايتا گرۋپپا قۇراپ تاسىمالدايدى. بيىل بۇل ۆوكزال تاسىمالداۋعا ۇيىمداستىرۋ ونىمدىلىگىن ءۇرتىس جوعارىلاتۋ ارقىلى پويەزداردىڭ اينالىم مولشەرىن ％30 اينالاسىندا جوعارىلاتتى.
شينجياڭ تەمىر جولى شەكارا وتكەل باسىمدىعىن دا ساۋلەلەندىرىپ، كەدەننەن ءوتۋ ونىمدىلىگىن جوعارىلاتىپ، جۇڭگو - ەۆروپا كەزەكشى پويەزدارىنىڭ ”جۇكتى كوپ تيەپ، جىلدام ءجۇرۋىن“ ىسكە اسىردى.
”شەكارا وتكەلدىڭ تاسىمال ىركىلىسسىزدىگىنە شىنايى كەپىلدىك ەتۋ ءۇشىن، ءبىز كەدەنمەن، شەكارالىق تەكسەرۋ ورىندارىمەن، ۋاكىلدىك كاسىپورىندارمەن بايلانىس جاساپ، سايكەسۋدى كۇشەيتىپ، كەزەكشى پويەزداردىڭ كەدەننەن تەز ءوتۋىن جۇزەگە اسىردىق“، - دەدى جۇڭگو تەمىر جول ءۇرىمجى مەكەمەسى توبى شەكتى سەرىكتەستىگى الاتاۋ بەكەتىنىڭ ورىنباسار باستىعى ليۋ چۋانميڭ.
بيىل الدىڭعى 5 ايدا الاتاۋ ساعاسى شەكارا وتكەلى ارقىلى شەكارادان كىرىپ - شىققان جۇڭگو - ەۆروپا كەزەكشى پويەزى 1669 بولىپ، سايكەس مەزگىلدەگىدەن ％39.43 ارتتى؛ قورعاس شەكارا وتكەلى ارقىلى شەكارادان كىرىپ - شىققان جۇڭگو - ەۆروپا كەزەكشى پويەزى 1401گە جەتىپ، سايكەس مەزگىلدەگىدەن ％15.31 ارتتى.
