شي جينپيڭ جينشاجياڭ ۋدۇڭدى سۋ ەلەكتر ستانسياسىنىڭ العاشقى توپتاعى گەنەراتور اگراگاتتارىنىڭ وندىرىسكە قوسىلىپ توك تاراتقاندىعى جونىندە ماڭىزدى نۇسقاۋ بەرىپ، بىلاي دەپ باسا دارىپتەدى
جاڭا دامۋ ۇستانىمىنا تاباندى بولىپ، عىلىم - تەحنيكانىڭ جاڭا شىرقاۋ شىڭىنا ەرلىكپەن شىعىپ، سارا ينجەنەريا قالىپتاستىرىپ، حالىقتى اناعۇرلىم تاماشا باقىتقا كەنەلتۋگە قۇلشىنۋ كەرەك
شينحۋا اگەنتتىگىنىڭ 6 - ايدىڭ 29 - كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ جۋىقتا جينشاجياڭ ۋدۇڭدى سۋ ەلەكتر ستانسياسىنىڭ العاشقى توپتاعى گەنەراتور اگراگاتتارىنىڭ وندىرىسكە قوسىلىپ توك تاراتقاندىعى جونىندە ماڭىزدى نۇسقاۋ بەرىپ، پارتيا ورتالىق كوميتەتى اتىنان العاشقى توپتاعى گەنەراتور اگراگاتتارىنىڭ وندىرىسكە قوسىلىپ توك تاراتقاندىعىن قىزۋ قۇتتىقتادى، بارلىق قۇرىلىسشىلارعا جانە ينجەنەريا قۇرىلىسىنا ۇلەس قوسقان قالىڭ كادرلار مەن بۇقاراعا ىقىلاستى سالەم جولدادى.
شي جينپيڭ بىلاي دەپ باسا دارىپتەدى: ۋدۇڭدى سۋ ەلەكتر ستانسياسى − ”ەلەكتردى باتىستان شىعىسقا جەتكىزەتىن“ مەملەكەتتىك كەلەلى ينجەنەريا. جولداستاردىڭ كۇش ۇستىنە كۇش قوسىپ، جاڭا دامۋ ۇستانىمىنا تاباندى بولىپ، عىلىم - تەحنيكانىڭ جاڭا شىرقاۋ شىڭىنا ەرلىكپەن شىعىپ، ينجەنەريا قۇرىلىسىنىڭ سوڭعى مىندەتتەرىن جوعارى ولشەممەن، جوعارى ساپامەن ورىنداپ، ۋدۇڭدى سۋ ەلەكتر ستانسياسىن سارا ينجەنەريا ەتىپ قۇرىپ شىعۋعا قۇلشىنۋىن ءۇمىت ەتەمىن. ەكولوگيانى الدىڭعى ورىنعا قويۋعا، جاسىل دامۋعا تاباندى بولىپ، جينشاجياڭنىڭ سۋ ەنەرگيا بايلىعىن اشۋدى عىلمي، ءتارتىپتى تۇردە ىلگەرىلەتىپ، جينشاجياڭ الابىن قورعاۋ بارىسىندا دامىتۋدى، دامىتۋ بارىسىندا قورعاۋدى ىلگەرىلەتىپ، حالىقتى اناعۇرلىم تاماشا باقىتقا كەنەلتۋ كەرەك.
ۋدۇڭدى سۋ ەلەكتر ستانسياسىنىڭ العاشقى توپتاعى گەنەراتور اگراگاتتارىنىڭ وندىرىسكە قوسىلىپ توك تاراتۋ سالتى 6 - ايدىڭ 29 - كۇنى بەينەەكران فورماسىمەن وتكىزىلدى، بەيجيڭدە نەگىزگى جينالىس الاڭى، يۇننان، سىچۋان قاتارلى جەرلەردە بولىمشە جينالىس الاڭى ورنالاستىرىلدى، سالتتا شي جينپيڭنىڭ ماڭىزدى نۇسقاۋى جەتكىزىلدى.
ۋدۇڭدى سۋ ەلەكتر ستانسياسى يۇننان ولكەسى كۇنميڭ قالاسىنىڭ لۋچۋان اۋدانى مەن سىچۋان ولكەسى لياڭشان وبلىسىنىڭ حۇيدۇڭ اۋدانىنىڭ تۇيىلىسكەن جەرىندە، جۇڭگو چاڭجياڭ ءۇش قىساڭ توبى شەكتى سەرىكتەستىگى 2015 - جىلى 12 - ايدا جالپى بەتتىك قۇرىلىس باستاعان، جالپى گەنەراتور اگراگاتتارىنىڭ سيىمدىلىعى 10 ميلليون 200 مىڭ كيلوۆات، جىلدىق ورتاشا توك تاراتۋ مولشەرى 38 ميلليارد 910 ميلليون كيلوۆات - ساعات. سۋ ەلەكتر ستانسياسىنىڭ بارلىق گەنەراتور اگراتتارى 2021 - جىلى 7 - ايدان بۇرىن قۇرىلىپ بولىپ وندىرىسكە قوسىلادى دەپ جوسپارلانعان.
