التاي − كوكتوعاي − جۇندۇڭ تەمىر جولى تۇتاس جەلى بويىنشا تۇتاستىرىلدى
سولتۇستىك شينجياڭ تەمىر جولىنىڭ اينالما جەلىسى رەسمي قالىپتاستى
7 - ايدىڭ 2 - كۇنى رەليس جاتقىزعىش 2 ماشينانىڭ 25 مەترلىك ەكى قاتار رەليستى ورنىنا قويۋىنا ىلەسە، التاي − كوكتوعاي − جۇندۇڭ تەمىر جولىنىڭ التايدان كوكتوعايعا دەيىنگى رەليسى ءساتتى جاتقىزىلىپ، التاي − كوكتوعاي − جۇندۇڭ تەمىر جولىنىڭ تۇتاس جەلى بويىنشا تۇتاستىرىلعاندىعىن كورسەتتى. سۋرەتتى جاۋ شۋميڭ تۇسىرگەن
شينجياڭ گازەتىنىڭ جالپىلىق اقپارات قۇرالدارى ءتىلشىسى لۋ فىڭباۋ، ەرىكتى ءتىلشى مۋ جىپىڭ 7 - ايدىڭ 2 - كۇنى ۇرىمجىدەن حابارلايدى. 7 - ايدىڭ 2 - كۇنى ساعات 13تە كوكتوعاي اۋدانىنداعى قاراشوقى سۋ قويماسى 1 - ءنومىرلى ۇلكەن كوپىرىندە رەليس جاتقىزعىش 2 ماشينانىڭ 25 مەترلىك ەكى قاتار رەليستى ورنىنا قويۋىنا ىلەسە، التاي − كوكتوعاي − جۇندۇڭ تەمىر جولى تۇتاس جەلى بويىنشا تۇتاستىرىلىپ، سولتۇستىك شينجياڭ تەمىر جولى اينالما جەلىسىنىڭ رەسمي قالىپتاسقاندىعىن كورسەتتى.
التاي − كوكتوعاي − جۇندۇڭ تەمىر جولى − شينجياڭ تەمىر جولىنىڭ شينجياڭنان شىعۋىنداعى، سولتۇستىككە قاتىناۋىنداعى ماڭىزدى بۋىن، شينجياڭ تەمىر جول تورى جوسپارىنداعى ”ءتورت تىك، ءتورت كولدەنەڭ“ نەگىزگى تۇلعاسىنداعى ”ءتورت تىكتىڭ“ بىرەۋى. بۇل جەلىنىڭ جالپى ۇزىندىعى 427 كيلومەتر، باتىسى بەيتۇن − التاي جەلىسى التاي بەكەتىنەن باستالىپ، وڭتۇستىگى ءۇرىمجى − جۇندۇڭ تەمىر جولى جۇندۇڭ بەكەتىمەن جالعاسىپ، كۇيتۇن − بەيتۇن تەمىر جولىمەن، لانجوۋ − شينجياڭ تەمىر جولىمەن، ءۇرىمجى − جياڭجۇنمياۋ تەمىر جولىمەن بىرگە سولتۇستىك شينجياڭ تەمىر جولىنىڭ اينالما جەلىسىن قالىپتاستىرادى.
التايدان كوكتوعايعا دەيىنگى بولىكتە رەليس جاتقىزىلىپ تۇتاستىرىلعاننان كەيىن، مەجەمەن 8 - ايدىڭ سوڭىندا تۇتاس جەلىدە پويەز قاتىناپ، التاي ايماعىنداعى مول كەن بايلىعىنىڭ تەك كۇيتۇن − بەيتۇن تەمىر جولى ارقىلى تاسىمالداناتىن قازىرگى جاعدايدى وزگەرتەتىن بولادى. التايدان ۇرىمجىگە دەيىنگى تەمىر جول تاسىمال ساپارى دا قازىرگى 760 كيلومەتردەن 640 كيلومەترگە قىسقارىپ، ءجۇرۋ ۋاقىتى مولشەرمەن 2 ساعات قىسقارادى، سونىمەن بىرگە كوكتوعاي، ۇلىڭگىر كولى سياقتى سولتۇستىك شينجياڭداعى ايگىلى ساياحات كورىنىس تۇيىندەرىن تۇتاستىرادى.
”ءبىز 3 - ايدىڭ سوڭعى شەنىندە جۇمىس ورنىمىزعا قايتىپ، جۇمىستى قالپىنا كەلتىرگەننەن كەيىن، جۇمىس تۇيىندەرىندە جۇمىس ۋاقىتىن قاۋىرت ورنالاستىرۋدى ءجىتى قاداعالاپ، ارقالىق تاسيتىن 5 ماشينانى سەپتەپ كەزەك - كەزەك تاسىپ، الدىڭعى جاقتاعى رەليس جاتقىزۋ جۇمىسىنىڭ ىركىلىسسىزدىگىنە كەپىلدىك ەتتىك. جۇمىس باسىندا ءبىز 24 ساعاتتا 3 كەزەك بويىنشا كەزەك اۋىستىرۋ، جۇمىسكەر دەمالسا دا ماشينانى توقتاتپاۋ ءادىسىن قولدانىپ، رەليس جاتقىزۋ جۇمىسىن دەر كەزىندە ورىنداۋعا شىنايى كەپىلدىك ەتتىك“، - دەدى جۇڭگو تەمىر جولى ءبىرىنشى مەكەمەسى التاي − كوكتوعاي − جۇندۇڭ نىسانى ءبولىمى پارتيا ياچەيكاسىنىڭ شۋجيى ما ۋيحۇڭ.
ۇعىسۋىمىزشا، قازىر وڭتۇستىك شينجياڭ ءوڭىرىنىڭ تەمىر جول قۇرىلىسى اياق الىسى ءساتتى، گولمۇد − كورلا تەمىر جولىندا (شينجياڭ بولىگى) بيىل پويەز قاتىنايدى، حوتان − چارقىلىق تەمىر جولىندا مەجەمەن كەلەر جىلى پويەز قاتىنايدى، سول كەزدە حوتان − چارقىلىق تەمىر جولى، گولمۇد − كورلا تەمىر جولى، وڭتۇستىك شينجياڭ تەمىر جولى وڭتۇستىك شينجياڭ ءوڭىرى تەمىر جولىنىڭ اينالما جەلىسىن قالىپتاستىرادى ەكەن.
