اۆتونوميالى رايوندىق اۋا رايى ستانسياسى ەمتيحان بەرەتىن وقۋشىلارعا جانە ولاردىڭ اتا - انالارىنا ىستىقتان ساقتانۋدى ەسكەرتەدى
شينجياڭ گازەتىنىڭ جالپىلىق اقپارات قۇرالدارى ءتىلشىسى شيە حۇيبيان 7 - ايدىڭ 3 - كۇنى ۇرىمجىدەن حابارلايدى. اۆتونوميالى رايوندىق اۋا رايى ستانسياسىنان ۇعىسۋعا قاراعاندا، مەجەمەن 7 - ايدىڭ 5 - كۇنىنەن 7 - ايدىڭ 9 - كۇنىنە دەيىن بۇكىل شينجياڭداعى ءارقايسى جوعارى مەكتەپ ەمتيحانى ورىندارىندا نەگىزىنەن كۇن اشىق بولىپ، سوڭىنان بۇلتتايدى، سولتۇستىك شينجياڭنىڭ ءىشىنارا جەرلەرىندە جاڭبىر جاۋادى، وڭتۇستىك شينجياڭنىڭ باسىم كوپ جەرلەرىندە، شىعىس شينجياڭدا جوعارى تەمپەراتۋرالى اۋا رايى جالعاسىپ، ءىشىنارا جەرلەردە ℃40تان اسادى. اۆتونوميالى رايوندىق اۋا رايى ستانسياسى قالىڭ ەمتيحان بەرەتىن وقۋشىلارعا جانە ولاردىڭ اتا - انالارىنا ىستىقتان ساقتانۋعا، كۇنگە كۇيۋدەن ساقتانۋعا كوڭىل ءبولۋدى ەسكەرتىپ، ءارقايسى ەمتيحان بەرۋ ورىندارىندا سۋمەن قامداۋ، ىستىقتى قايتارۋ سياقتى قاتىستى قىزمەت وتەۋلەردى جاقسى ىستەۋدى ۇسىنىس ەتەدى.
الدىن الا مالىمەتتە كورسەتىلۋىنشە، 7 - ايدىڭ 5 - كۇنى كۇندىزدەن 7 - ايدىڭ 7 - كۇنى تۇنگە دەيىن ىلە قازاق اۆتونوميالى وبلىسى، بۇراتالا موڭعۇل اۆتونوميالى وبلىسى، تارباعاتاي ايماعى، التاي ايماعى، ءۇرىمجى قالاسى، شىحىزى قالاسى، سانجى حۇيزۋ اۆتونوميالى وبلىسى سياقتى ءبىر ءبولىم وڭىرلەردە، اسىرەسە، تاۋلى وڭىرلەردە سەبەزگى نەمەسە از جاڭبىر جاۋادى، ءىشىنارا جەرلەردە قىسقا مەزەتتىك كۇشتى جاۋىن - شاشىن، نايزاعاي، قاتتى بوران، بۇرشاق جاۋۋ سياقتىلار تۋىلادى، قالىڭ ەمتيحان بەرەتىن وقۋشىلار ءجۇرىپ - تۇرعاندا جاڭبىرلىق بۇيىمداردى الا ءجۇرۋى ءتيىس. 7 - ايدىڭ 8 - كۇنى كۇندىزدەن تۇنگە دەيىن بۇكىل شينجياڭنىڭ باسىم كوپ جەرلەرىندە كۇن اشىق بولىپ، سوڭىنان بۇلتتايدى؛ 7 - ايدىڭ 9 - كۇنى كۇندىزدەن تۇنگە دەيىن ىلە وبلىسىنىڭ وڭتۇستىك بولىگىندەگى تاۋلى وڭىرلەر، قىزىلسۋ قىرعىز اۆتونوميالى وبلىسى، اقسۋ ايماعىنىڭ سولتۇستىگىندەگى تاۋلى وڭىرلەر، بايىنعولين موڭعۇل اۆتونوميالى وبلىسىنىڭ سولتۇستىك بولىگىندەگى تاۋلى وڭىرلەر سياقتى ءبىر ءبولىم وڭىرلەردە سەبەزگى نەمەسە از جاڭبىر جاۋادى.
اۆتونوميالى رايوندىق اۋا رايى ستانسياسى مىنانى ەسكەرتەدى: جوعارى مەكتەپ ەمتيحانى كەزىندە وڭتۇستىك شينجياڭداعى ءبىر ءبولىم ەمتيحان ورىندارىندا قيىس شىعىستان 5 بال اينالاسىندا جەل سوعادى، ءىشىنارا ساتتە بوز بوران سوعادى نەمەسە شاڭ - توزاڭ جاۋادى، ەمتيحان بەرەتىن وقۋشىلارعا، اتا - انالارعا، سونداي - اق قاتىستى قىزمەتكەرلەرگە ساقتانۋعا كوڭىل ءبولۋ ۇسىنىسىن بەرەمىز. سونىمەن بىرگە، ەمتيحان بەرەتىن وقۋشىلار مەن ولاردىڭ اتا - انالارىنا جەرگىلىكتى اۋا رايى ستانسيالارى تاراتقان دەر كەزىندەگى اۋا رايى ينفورماتسيالارىن تىڭداۋعا كوڭىل ءبولۋدى، ەمتيحان بەرۋگە بارۋ مەن اۋىلىنا قايتۋ ۋاقىتىن الدىن الا ويداعىداي ورنالاستىرۋلارىن ەسكەرتەمىز.
