تيانشان تورى   ›   جاڭالىقتار   ›   سپورت الەمى

ءۇرىمجىنىڭ بارقىت كەشىندەگى جۇگىرىس

شينحۋا اگەنتتىگىنىڭ تىلشىلەرى جاڭ شياۋلۇڭ، جاۋ گى، امان

  كەشكى ساعات 9دان 30مينۋت ءوتتى، ءۇرىمجى قالاسىنىڭ وڭتۇستىگى، كۇن ءالى جاپ - جارىق، اۋا تەمپەراتۋراسى جانعا جايلى.

  ”7 - اي، شىنىندا، كەشكى جۇگىرۋدىڭ تاماشا ۋاقىتى ەكەن!“ يامالىق تاۋى سالاماتتىق جۇگىرىس توبىنداعى 12 جۇگىرىسكەر جاياۋلار جولىنىڭ جاعاسىنداعى اشىق الاڭقىدا دەنە قىزدىرۋ ارەكەتىن ىستەي شۇيىركەلەسىپ تۇر. ءار اپتادا سالاماتتىق جۇگىرىس توبى، از دەگەندە، 2 رەت تاڭعى جۇگىرىس نەمەسە كەشكى جۇگىرىس ۇيىمداستىرادى.

  يامالىق تاۋىنىڭ باۋىرىنداعى چيڭفىڭ جولىن بويلاي جۇگىرگەن جۇگىرىسكەرلەر ءبىر قاتارعا ءتىزىلىپ الىپ، ءبىر قالىپتى العا جۇگىرىپ بارادى.

  ولاردىڭ اراسىنداعى كەيبىرەۋلەرى اياعىنا ارناۋلى جۇگىرىس شاقايىن، ۇستىنە سۋتۇرماس سپورت كيىمىن كيىپ، مويىندارىنا سپورتشىلار تىڭداعىشىن اسىپ الىپتى، كەيبىرەۋلەرى كادىمگى كۇندىز قىزمەتكە كيىپ باراتىن جەيدە مەن جەنسي شالبار كيىپ الىپتى. وسى قۇرىلعانىنا ءۇش - اق اي بولعان كاسىپتەن سىرتقى جۇگىرىس توبىنداعى جۇگىرىسكەرلەردىڭ جاس ارالىعى 50 جاسقا تاياۋ ەكەن. شاشىن قارا ءتۇستى دوعاشامەن قايىرىپ العان، ەڭسەگەي دەنەلى توپ باستىعى لياڭ بو تۇسىندىرە سويلەپ: ”بارلىعى كاسىپتەن سىرتقى شەبەرلەر بولعاندىقتان، جىلدامدىقتى ارتتىرۋعا كەلمەيدى“، - دەدى.

  30 مينۋتتاي جۇگىرگەننەن كەيىن، كەيبىر جاڭادان قوسىلعان جۇگىرىسكەرلەردىڭ توپتان قالىپ قويۋ جاعدايى بايقالدى.

  ”قايراتتان! تايما! بورباي ەتىمىز بورشا بولسا دا توپتان قالمايىق!“، - دەپ كاسىپتىك جاتتىقتىرۋشى، جۇگىرىسكەر حى شۇيچىڭ سىچۋان پۇتۇڭحۋاسىمەن ايعاي سالدى، ۇزىننان - ۇزاق قاتارعا سوزىلعان جۇگىرىسكەرلەر دۋ كۇلدى. حى شۇيچىڭ ادەيى باياۋ جۇگىرىپ، توپتىڭ ارتىندا قالعاندارمەن بىرگە جۇگىردى. توپتان قالۋعا اينالعان جۇگىرىسكەرلەر القىنا تىنىس الىپ، اقىرىن - اقىرىن جەتىسىپ الدى.

  اسپان رەڭى كوكشىلدەن قاراكوك تۇسكە ەنگەنىن بايقاماي قالىپپىز، تاۋعا جاستاي سالىنعان بيىك عيماراتتاردىڭ شىراقتارى جانا باستادى، كوشەلەردە كولىكتەر ارلى - بەرلى اعىلىپ جاتىر، كوشە بويىنداعى كەسپەحانالاردىڭ، كاۋاپحانالار مەن ساماۋىر سورپاحانالارىنىڭ ساۋداسى قىزىپ كەتتى، بۇكىل قالا ۇيقى كورمەيتىن سياقتى.

  جۇگىرۋشىلەر توبى چيڭفىڭ جولىنىڭ ەڭ شەتكى سولتۇستىك بولەگىنەن وڭتۇستىككە قاراي قايىرىلىپ، قينالا ورگە قاراي تىرمىسىپ بارادى. 51 جاستاعى ليۋ يانچين اياق الىسى مەن تىنىس الۋ جيىلىگىن ءبىر قالىپتان وزگەرتپەي كەلەدى، ول 6 جىلدىڭ الدىنان باستاپ كەشكى جۇگىرىسكە قاتىناسىپتى، جۇگىرىس توبىنداعى كوپتەگەن جۇگىرىسكەر ونىڭ بۇرىن كەشكى جۇگىرىستە كەزدەستىرگەن ءتۇس تانىس ادامدارى ەكەن.

  تۇنگى ساعات 10نان 30 مينۋت وتكەندە، 12 ادام جۇگىرۋگە دايىندىق جاساعان اۋەلگى الاڭقىعا ىلگەرىندى - كەيىندى كەلىپ جەتتى. لياڭ بونىڭ جەتەكشىلىگىندە كوپشىلىك بۇكتەلىپ، ءيىلىپ، قولدارىمەن بۇلشىق ەتتەرىن ۇرعىلاپ، جۇگىرىستەن كەيىنگى كەرىلىپ - سوزىلۋ ارەكەتتەرىن مۇقياتتىلىقپەن جاسادى. جولاي ءوتىپ بارا جاتقان كەيبىر ادامدار دا بۇلارعا قوسىلا ارەكەتتەنىپ جاتىر.

  ”دەنە شىنىقتىرۋداعى ەڭ قيىن نارسە تاباندىلىق كورسەتۋ، بۇگىن ءبىز تاعى ءبىر رەت ءوزىمىزدى جەڭدىك“، - دەدى لياڭ بو ىقىلاسپەن جۇگىرىسكەرلەردى شابىتتاندىرىپ. 45 جاسقا كەلگەن ول فينانس سالاسىنىڭ قىزمەتكەرى، 4 جىلدىڭ الدىندا ول، اۋەلى، دەنە سالماعى ارتىپ كەتكەنىنە بولا ۋايىمداپ جۇرەتىن.

  سوڭعى جىلدارى ءۇرىمجى قالالىق ۇكىمەت ”تاۋعا اعاش ەگۋ“ ينجەنەرياسىن ۇزبەي اتقارعاندىقتان، يامالىق تاۋىنىڭ جاسىلدانۋ مولشەرى بارىنشا جوعارىلادى. قالانى جاسىلداندىرۋ مەن نەگىزدىك قۇرىلعىلار قۇرىلىسى ينجەنەرياسىنىڭ جىلدام ىلگەرىلەتىلۋى كوپتەگەن دەنە شىنىقتىرۋشىلار توبىن باۋرادى.

  ”ءبىز بارلىعىمىز يامالىق تاۋىنىڭ وڭتۇستىگىندە تۇرامىز، تاپ - تاقىر تاستى تاۋدىڭ سىڭسىعان نۋ ورمانمەن كومكەرىلگەنىن كوزىمىزبەن كوردىك“، - دەگەن ليۋ يانچين سول كەزدەردەن باستاپ، ەسىكتەرىنىڭ الدىندا دەنە شىنىقتىراتىن ادامداردىڭ بارعان سايىن كوبەيىپ، اقىرىندا لياڭ بو ۋيچات شوعىرىندا ۇيىمداستىرعان توپقا قوسىلعاندىعىن ايتتى.

  ”’باگاڭ‘،’لۇيگوۋ‘،’ يامالىق‘، وسىناۋ قۇلاققا تانىس ءۇرىمجىنىڭ جەر اتتارى دا تۇگەلدەي جۇگىرىس توپتارىنىڭ اتىنا اينالدى“. لياڭ بو بىلاي دەدى: سوڭعى 3 تە 5 جىلدا، ءۇرىمجى قالاسىنداعى كوپتەگەن رايونداردىڭ بارىندە جاياۋلار جولى مەن دەنە شىنىقتىرۋ ورىندارى سالىنىپ، ءاربىر شاعىن اۋماقتىڭ، الەۋمەتتىك اۋماقتىڭ بارىندە دەرلىك تۇرعىندار وزدەرى ۇيىمداسىپ قۇرعان جۇگىرىس توپتارى پايدا بولدى، قالىڭ جۇگىرىس توپتارى اراسىندا تاعى ءمالىم مەزگىلدەردە جارىس ۇيىمداستىرىلىپ جاتادى.

  توڭىرەكتىڭ ءتورت بۇرىشىنان كەلىپ وسىندا باسى قوسىلعان جۇگىرىسكەرلەردىڭ ءوز اۋىلدارىنىڭ تىلىندە قۇرعان اڭگىمە دۇكەنىنەن ءتىلشىنىڭ اڭعارعانى، بۇلاردى وزدەرى مەن تابان تىرەگەن وسىناۋ مەكەننىڭ بايلانىسى كوپتەپ تولقىتادى ەكەن: ىلگەرىدە ولار ۇرىمجىدە ءبىر كاسىپتىڭ قۇلاعىن ۇستاۋ ءۇشىن ”زىر جۇگىرسە“، بۇگىنگى كۇندە سالاماتتىق ءۇشىن جۇگىرىپ ءجۇرىپتى.

  ”كوپشىلىكتىڭ شينجياڭعا، ءۇرىمجى سىندى وسى قالاعا دەگەن سۇيىسپەنشىلىگى توتەنشە تەرەڭ“. سىچۋاننىڭ سۇينيڭىندا دۇنيەگە كەلگەن، قوسىننان شەگىنگەن اسكەر حى شۇيچىڭنىڭ ۇرىمجىدە تۇرعانىنا 28 جىل بولىپتى، ول سامبىرلاي سويلەپ: ”ءبىلىپ قويىڭدار، مەنىڭ ازاماتتىق كۋالىك ءنومىرىم دە 65تەن باستالعان تەگىندە! (شينجياڭدا ازاماتتىق كۋالىك ءنومىرى 65تەن باستالادى)“ دەپ ەدى، كوپشىلىك تاعى دا دۋ كۇلدى.

  تۇنگى ساعات 11 مولشەرىندە، جۇگىرىسكەرلەر كەلەر جولعى جۇگىرىس ۋاقىتىنا ۋادەلەسىپ الىپ، ءبىر - بىرىمەن قوشتاستى. چيڭفىڭ جولىندا ماناۋراعان كوشە شىراقتارى ءتۇن قويۋلىعىن سىرىپ تاستاعان، ەكىدەن - ۇشتەن كوشەدە جۇرگەن جۇرگىنشىلەر ءالى دە جازعى كەشتىڭ سالقىن سامالىنان ءلاززات الۋدا.

(شينحۋا اگەنتتىگىنىڭ 7 - ايدىڭ 6 - كۇنى ۇرىمجىدەن بەرگەن حابارى)

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.

  • ”تاريحى ۇزاق“ كاسىپورىن سارا جولعا ءتۇسىپ، ورايدى مىقتاپ يگەردى
  • انار گۇلى قىپ - قىزىل بولىپ اشىلدى
  • سۋ دا وسىنداي ءتاتتى بولادى ەكەن
  • شينجياڭداعى كەدەي حالىقتىڭ اۋىز سۋ حاۋىپسىزدىگى جالپى بەتتىك جۇزەگە اسىرىلدى
  • رايونىمىز دالمە - ءدال شارا قولدانىپ جۇمىستانۋدى ورنىقتىرىپ، حالىق تۇرمىسىن قامتاماسىز ەتتى