شينجياڭ گازەتىنىڭ جالپىلىق اقپارات قۇرالدارى ءتىلشىسى لۋ فىڭباۋ 7 - ايدىڭ 7 - كۇنى ۇرىمجىدەن حابارلايدى. 7 - ايدىڭ 7 - كۇنى تۇستەن بۇرىن جۇڭگو تەمىر جول 14 - مەكەمەسى توبى شەكتى سەرىكتەستىگى ۇستىنە العان G30 شياۋساۋحۋدان ۇرىمجىگە دەيىنگى جاڭالاپ، كەڭەيتىپ سالۋ ينجەنەرياسىنىڭ ءتورتىنشى توقتامدىق بولىگىنىڭ قۇرىلىس ورنىندا، قۇرىلىسشىلار ءبولۋ راشەتكاسىن ورناتىپ جاتتى. وسى نىساننىڭ نەگىزگى جەلىسىنىڭ جاپپاي تۇتاسۋىنا بايلانىستى، شينجياڭعا كىرىپ - شىعاتىن جوعارى قارقىندى تاس جول ورتا ارناسىنىڭ قاتىناۋ قۋاتى ەسەلەپ ارتاتىن بولادى.
جۇڭگو تەمىر جول 14 - مەكەمەسى توبى شەكتى سەرىكتەستىگى شياۋساۋحۋ - ءۇرىمجى نىسانى ءتورتىنشى توقتامدىق بولىگىنىڭ تەحنيكالىق جاۋاپتىسى فان ۋيفىڭ بىلاي دەدى: ”ءبىز جاۋاپتى بولعان نەگىزگى تۇلعالىق ينجەنەريا اياقتالدى، قوسالقى قۇرىلعىلارى دا تاياۋدا اياقتايدى. ىندەتتىڭ ىقپالىن جەڭۋ ءۇشىن، ءبىز جۇمىس ۋاقىتىن قاۋىرت ورنالاستىرىپ، ادامدار مەن جابدىقتاردى ەسەلەپ كوبەيتىپ، ادام دەمالسا دا ماشينالاردى توقتاتپاي، نەگىزگى تۇلعالىق ينجەنەريا قۇرىلىسىن مەرزىمىنەن بۇرىن اياقتاتتىق“.
شياۋساۋحۋدان ۇرىمجىگە دەيىنگى بولىك − G30 ليانيۇنگاڭ - قورعاس جوعارى قارقىندى تاس جولى شينجياڭ بولىگىنىڭ ماڭىزدى قۇرامداس بولىگى ءارى ۇرىمجىگە كىرىپ - شىعاتىن ماڭىزدى قاتىناس ارناسى. شياۋساۋحۋ - ءۇرىمجى بولىگىندە بۇدان بۇرىن قوس باعىتتا 4 اۆتوموبيل جۇرەتىن، سوڭعى جىلدارى ليانيۇنگاڭ - قورعاس جوعارى قارقىندى تاس جولىمەن جۇرەتىن اۆتوموبيل سانىنىڭ كۇرت كوبەيۋىنە بايلانىستى، وسى جول بولىگىنىڭ ”ىركىلىسسز بولماۋ“ جايتى كۇن سايىن كورنەكتىلەنە ءتۇستى.
2016 - جىلى 8 - ايدا شياۋساۋحۋ - ءۇرىمجى نىسانىنىڭ قۇرىلىسى باستالدى، نىسان شياۋساۋحۋ ايقاسپالى كوپىرىنەن باستالىپ، ءۇرىمجى قالا اينالما جوعارى قارقىندى تاس جولى شىعىس جەلىسىنىڭ ۇلانبايداعى ايقاسپالى كوپىرىنە دەيىن جالعاستى، جالپى ۇزىندىعى شامامەن 121 كيلومەتر، تۇتاس جەلىدە قوس باعىتتا 8 اۆتوموبيل جۇرەتىن جوعارى قارقىندى تاس جولدىڭ تەحنيكالىق ولشەمى بويىنشا قۇرىلىس جۇرگىزىلدى، اۆتوموبيل جىلدامدىعى ساعاتىنا 120 كيلومەتر ەتىپ جوبالاندى.
شياۋساۋحۋ - ءۇرىمجى نىسانىنىڭ ۇنەمىلىك ىستەرگە جاۋاپتى ورىنباسار قولباسشىسى گۋان چىڭجياڭ بىلاي دەدى: وسى نىساندا ايدىڭ اياعىندا كولىك قاتىناۋعا ۇمتىلىس جاسالادى، سول كەزدە ۇرىمجىدەن تۇرپانعا بارۋ ءۇشىن ءبىر ساعاتقا جۋىق ۋاقىت ازاياتىن بولادى.
شياۋساۋحۋ - ءۇرىمجى نىسانىن، وعان بىلتىر سالىنىپ بولىپ كولىك قاتىناعان G30 ءۇرىمجى - كۇيتۇن بولىگىن جاڭالاپ، كەڭەيتىپ سالۋ قۇرىلىسى ينجەنەرياسى مەن تۇرپان - شياۋساۋحۋ بولىگىندەگى تاس جولدى قوسقاندا، شينجياڭعا كىرىپ - شىعاتىن جوعارى قارقىندى تاس جول ورتا ارناسىنىڭ قاتىناۋ جىلدامدىعى مەن قۋاتى بارىنشا ارتادى.
