− ءار ۇرپاق جاستاردىڭ باتىس بولىككە تامىر تارتىپ، شينجياڭدى كوركەيتۋگە كۇش جالعاعاندىعى تۋرالى شالقىما
شينجياڭ گازەتىنىڭ جالپىلىق اقپارات قۇرالدارى تىلشىلەرى ليۋ شياڭ، ما ينيڭ، لياڭ ليحۋا، ءرايدا
”اۋىل - قىستاققا بارامىز، شەكارا وڭىرگە بارامىز، وتان ەڭ قاجەت ەتكەن جەرگە بارامىز!“ وتكەن عاسىردىڭ 50 -، 60 - جىلدارىندا توپ - توپ جاستار مەملەكەتتىڭ ۇندەۋىنە ءۇن قوسىپ، توڭىرەكتىڭ ءتورت بۇرىشىنان تيانشان تاۋىنىڭ باۋرايىنا، تارىم وزەنىنىڭ جاعاسىنا كەلىپ، كوكىرەك كەرنەگەن ىستىق جالىنمەن جاستىق جىرىن شىعانداتتى.
اعا بۋىنداردىڭ ءىزىن باسىپ، جاڭا جۇڭگونىڭ ءار ۇرپاق تاڭداۋلى جاستارى باتىستا ياڭگۋاننان ءوتىپ، شەكارا ءوڭىردى كوركەيتۋدىڭ تاريحي اۋىر مىندەتىن ارقالاپ، وزدەرىنىڭ ەڭ ءساليقالى جاستىق ورالدارىن ارنادى.
7 - ايدىڭ 7 - كۇنى باس شۋجي شي جينپيڭ جۇڭگو مۇناي داشۋەسى (بەيجيڭ) قارامايلى مەكتەپ رايونىنان وقۋ تاۋىسقان وقۋشىلارعا جاۋاپ حات قايتارىپ، قوعامعا قادام تاستاۋ الدىندا تۇرعان جاس وقۋشىلارعا ىقىلاستى ءۇمىت ارتىپ، ولاردى قيىندىقتاردى ەڭسەرە العا باسۋعا، جەكە مۇرات - تالپىنىستارىن پارتيا مەن مەملەكەت ىستەرىنە توعىستىرۋعا ىنتالاندىردى.
ۇكىلى جازبا كەلدى بۇلتتان اسىپ، مول مەيىر حات - قاعازدان جاتتى تاسىپ. تەرەڭ ىقىلاستى تاپسىرماعا شەكسىز ءۇمىت - تىلەك قامتىلىپ، ادامداردى ەكپىندەي ىلگەرىلەۋگە جىگەرلەندىردى.
جاستىق شاقتارىندا وسىناۋ توپىراققا تەر توككەن ءاربىر ادام ءدال وسى ساتتە، ءدال وسى ساعاتتا ايرىقشا شابىتتانىپ، كوڭىلى ەرەكشە تاسىدى.
وتان ەڭ قاجەت ەتكەن جەرگە بارامىز
پويەزعا وتىرىپ، حىناننىڭ جىڭجوۋىنان اتتانىپ، باتىسقا قاراي ءجۇرىپ، 7 كۇن، 7 ءتۇن وتكەرىپ، 1960 - جىلى 6 - ايدا سول كەزدە 25 جاستاعى ليۋ يتيڭ شينجياڭ ۇرىمجىگە كەلدى.
نەگە كەلدى؟ ”مەملەكەت وتان ەڭ قاجەت ەتكەن جەرگە بارۋعا ۇندەۋ تاستادى، شينجياڭدا وقىتۋشى تاپشى ەكەندىگىن ەستىدىم، مەنىڭ ’ماماندىعىم ساي كەلدى‘. جاستاردا وتان ءۇشىن ۇلەس قوساتىن ورايدىڭ بولعانى اسقان داڭق ەمەس پە!“. ليۋ يتيڭ ەشتەڭەدەن تايسالعان جوق.
تۋعان جەرى مەن جاقىندارىنان الىس كەتكەن ليۋ يتيڭنىڭ شەكارا وڭىرگە جىڭعىلداي تامىر تارتۋى كۇنى بۇگىنگە دەيىن جالعاستى.
”ەسكە الار بولسام، العاش كەلگەن جىلدارىم شىنىمەن جاپالى ءوتتى، تام ۇيدە تۇرىپ، توپىراق جولمەن جۇردىك، بەيتانىس جۇرت، كورمەگەن جەر، جاراتىلىستىق ورتاسى دا مەكەنىمنەن وتە زور پارىقتى ەكەن، قاتتى ۇيىرلەسە المادىم“. قازىر شاشىنا اق كىرگەن ول بۇعان ەش وكىنگەن، وپىنعان ەمەس، ”دەگەنمەن جاپا - ماشاقاتىنان وتكەن سوڭ، بۇل جەردەن كەتۋگە ادام شىنىمەن قيمايدى ەكەن. وتان ەڭ قاجەت ەتكەن جەرگە بارۋ باستابىندا الاۋلاعان اسقاق سەزىمنىڭ سەبەبىنەن بولسا، كەيىن اسقاق سەزىم باسىلعان سوڭ جاۋاپكەرشىلىك پەن تاباندىلىق بولىپ تۇيىندەلدى“.
ليۋ يتيڭنىڭ جاۋاپكەرشىلىگى مەن تاباندىلىعى 3 كەز مىنبەردىڭ الدىنداعى جاۋدىرەگەن ءاربىر وقۋشى ءۇشىن بولدى. جىل ارتىنان جىل وزىپ، ونىڭ تاباندىلىعى تالاي بالانىڭ جارقىن بولاشاعىنا جول اشىپ، شينجياڭنىڭ كەلەشەگىنە ءۇمىت تۇقىمىن سەپتى.
جەرگىلىكتى ماقامى بۇگىنگە دەيىن وزگەرمەگەنىمەن، كوڭىل كوكىرەگىندە ءوزىن الدەقاشان شينجياڭدىقپىن دەپ تانىعان ليۋ يتيڭنىڭ جايى وسى، سول داۋىردە شينجياڭمەن بىرگە ەسەيىپ - تولىسقان، شەكارا وڭىرگە كومەككە كەلگەن جاستاردىڭ جايى دا وسىلاي!
”جاڭا بۋىن وتان ءۇشىن اناعۇرلىم كەسەك ۇلەس قوسۋعا ءتيىس!“ 1984 - جىلى جۇڭگو گەولوگيا داشۋەسىنىڭ (ۋحان) مۇنايدى گەوفيزيكالىق بارلاۋ ماماندىعىنان وقۋ تاۋىسقان سوڭ، چي ليشين جەتەكشىسىنە وسى ءسوزدى ايتقان سوڭ، تارىم ويپاتىنا كەلىپ قىزمەت ىستەدى، سول جىلى تارىم ويپاتىنىڭ مۇناي - گاز بارلاۋ زور شايقاسىنىڭ شىمىلدىعى رەسمي اشىلدى.
وتكەن عاسىردىڭ 80 - جىلدارىندا مۇنايشىلاردىڭ قىزمەت شارت - جاعدايىنىڭ ءوزى توتەنشە جاپالى، جۇمىس قۇر قولمەن سۇيرەۋگە، قىزىل يىقپەن كوتەرۋگە سۇيەنىپ ىستەلسە، ىشكەندەرى سۇيىق كوجە، شالاڭ شاي، جاتقاندارى قارابايىر تاقتاي ءۇي بولاتىن. ال تاكلاماكان قۇمدى ءشولىنىڭ جازداعى جوعارى تەمپەراتۋرالى اپتاپ ىستىق، قىستاعى سۇيەكتەن وتەتىن ايازدى ورتاسى ادامنىڭ رۋحى مەن جىگەرى ءۇشىن ءتىپتى ءبىر سىناق ەدى.
36 جىلدىق كۇرەستە چي ليشين تارىم ويپاتىنىڭ جۇڭگو مۇناي - گاز بايلىعىنىڭ ماڭىزدى شەبىنە اينالعاندىعىنا كۋا بولدى، شينجياڭنىڭ تەز دامىعاندىعىنا كۋا بولدى. 36 جىل ۋاقىتتا ول دا جۇمىسقا جاڭا ارالاسقان مەكتەپ بىتىرگەن وقۋشىدان جۇڭگو مۇناي حيميا بارلاۋ سالاسىنىڭ باس مامانىنا اينالدى.
جىلدار جىلىستاپ، وراسان وزگەرىس تۋىلدى. بۇگىنگى شينجياڭ كۇن سايىن جاڭارىپ، اي سايىن وزگەرىپ، گۇلدەنىپ، ورنىقتىلىعى بەكەمدەلە تۇسكەن، كەزىندەگى باستاۋشىلار دا بىرتە - بىرتە قارتايعان.
”شەكارا ءوڭىردى كوركەيتۋ ءبىر ۇرپاق ادام ورىنداي سالاتىن مىندەت ەمەس، سونىڭ ءبىر كەزەڭىنە ات سالىسقانىم ءۇشىن بۇل ءومىرىمنىڭ نارقىنا جەتتىم دەپ بىلەمىن“. ليۋ يتيڭ: ”ءار جولى بەس جۇلدىزدى قىزىل تۋدىڭ الدىندا تۇرعانىمدا، وعان نىق سەنىممەن قۇرمەت بىلدىرەمىن“، - دەدى.
توقتاۋسىز كۇرەس جۇرگىزۋ بارىسىندا تاماشا ءومىر كەسكىندەدى
”وقىعان ادامنىڭ مۇراتى اسقاق، ەركى بەرىك بولماسا بولمايدى، ويتكەنى ونىڭ مىندەتى اۋىر، جولى ۇزاق“. ءداۋىر باسقاشا بولعان سوڭ، ءار جاستىڭ بويىنداعى تاڭبا دا باسقاشا بولماق، ءبىراق وتانعا دەگەن جۇرەك تۇكپىرىنەن شىققان ىستىق ماحاببات ولاردىڭ ورتاق بەلگىسى سانالادى.
كۇنلۇن ءۇن قاتپاعانىمەن، اسقاقتىعى ءوز - وزىنەن بەلگىلى، بۇل اۆتونوميالى رايوندىق كەن بايلىقتارىن گەولوگيالىق بارلاۋ، تەكسەرۋ، اشۋ مەكەمەسى 8 - گەولوگيالىق ۇلكەن اترەتى گەولوگيالىق تەكسەرۋ ورنىنىڭ باستىعى ۋان جيانليڭنىڭ كۇنلۇن تاۋى جايلى اۋزىنان تاستامايتىن ءسوزى.
”گەولوگيالىق بارلاۋ - تەكسەرۋ ماماندىعىن وقىپ تۇرىپ، شينجياڭ سىندى كەن بايلىقتارى مول، شوعىرلى وڭىرگە كەلمەۋ مەملەكەتتىڭ باۋلۋىن اقتاماعاندىق، ءوزىڭدى ءوزىڭ ۇياتقا قالدىرعاندىق“. ءدال وسىنداي ءبىر مويىندىقپەن 2009 - جىلى ەڭگەزەردەي وسى جىگىت شينجياڭعا كەلگەن بەتى تۇپ - تۋرا 8 جىل تۇردى.
8 جىلدا ول كەن ىزدەۋ ءۇشىن ۇستىرتتە ءۇسىپ ءولىپ قالا جازدادى، ءۇستىرت اۋرۋىمەن 8 مارتە شيپاحانادا جاتىپ ەمدەلدى؛ ۇستىرتتە ءبىر كۇندە 39 كيلومەتر باسقان كەزى دە بولدى، ەڭ ۇزاق بولعاندا 6 اي بويى جۇمىس رايونىنان اتتاپ شىقپاي، تاۋدا جۇرۋگە ارنالعان كاسىپتىك اياق كيىمنەن ءبىرتالايىن توزدىردى.
نە ءبىر قيىندىقتار مەن قاتەرلەردى باسىنان وتكىزگەن ۋان جيانليڭ مەن اترەت مۇشەلەرى كۇنلۇن تاۋىنان ىلگەرى - كەيىن كوپ جەردەن قورعاسىن - مىرىش كەندەرىن بايقادى، سولاردىڭ ءبىرى اسا ءىرى تيپتى قورعاسىن - مىرىش كەنى بولىپ شىقتى.
”قىزمەتكە قاتىناسقان كەزدەگى ’كەن تاۋىپ ەڭبەك كورسەتىپ، وتانعا قىزمەت ەتەمىن‘ دەگەن ارمانىمدى جۇزەگە اسىردىم، مەن ءوزىمنىڭ تالعامىم مەن تاباندىلىعىمدى ماقتانىش ەتەمىن“، - دەيدى ۋان جيانليڭ بەرىك سەنىممەن.
”شينجياڭعا كەلگەنىمە 16 جىل بولدى، بۇل جەر الدەقاشان مەنىڭ ەكىنشى مەكەنىم بولىپ كەتتى“، - دەدى 7 - ايدىڭ 10 - كۇنى قۇمىل قالاسى يجوۋ رايوندىق اۋىل شارۋاشىلىعى جانە اۋىل - قىستاق مەكەمەسى پارتيا باسشىلىق گرۋپپاسىنىڭ ورىنباسار شۋجيى، مەكەمە باستىعى حۋ شياۋجۇن.
حۋ شياۋجۇن گانسۋدىڭ تيانشۇيىنان، گانسۋ اۋىل شارۋاشىلىعى داشۋەسىنەن وقۋ تاۋىسقان. 2004 - جىلى حۋ شياۋجۇن 8 ساباقتاسىمەن بىرگە شينجياڭعا كەلىپ، نەگىزگى ساتىعا تامىر تارتىپ، تەحنيكتەن باستاپ ىستەپ، اۋىل شارۋاشىلىعىن دامىتۋدىڭ ەڭ الدىڭعى شەبىندە ەرلىكپەن شايقاس جۇرگىزدى.
10 نەشە جىل شينجياڭدا قىزمەت ىستەگەن، تۇرمىس كەشىرگەن حۋ شياۋجۇن قاشاندا اۋەلگى ماقساتتى ۇمىتپاي، جەرگىلىكتى ورىننىڭ اۋىل شارۋاشىلىعىن وسىزامانداندىرۋ ءۇشىن بار زەيىن - زەردەسىن سارقا جۇمسادى. وسىندا تامىر تارتۋشى رەتىندە، ول ءوز جۇرەك ءسوزىن بىلايشا جەتكىزدى: ”قازىر نەگىزگى ساتىنىڭ تۇرمىس جانە قىزمەت شارت - جاعدايىندا تۇگەلدەي اسا ۇلكەن جاقسارۋ بولدى، جوعارى مەكتەپتەن وقۋ تاۋىسىپ شينجياڭعا كەلىپ قىزمەت ىستەۋدى تاڭداعان قالىڭ وقۋشىلاردىڭ باس شۋجيدىڭ تاپسىرماسىن ەستە بەرىك ساقتاپ، وسى جەرگە كوڭىل قازىعىن بايلاپ، ەڭكەيىپ ەڭبەك ەتىپ، تامىر تارتۋىن ءۇمىت ەتەمىن، ءبىز ۇرپاقتان - ۇرپاققا جالعاستىرىپ، شينجياڭنىڭ دامۋى ءۇشىن ۇزدىكسىز تۇردە جاستىق جالىنىن لاۋلاتامىز!“
شەكاراعا تامىر تارتىپ، جاڭا ءداۋىردىڭ ارمانعا قانات قاعۋشىلارى بولدى
جاڭا داۋىرگە قادام تاستاۋ، كۇرەس جاساۋ، اۋەلگىدەي جاستىق شاقتا بولۋعا ءتيىستى بەينە.
2017 - جىلى ليۋ شين جۇڭگو مۇناي داشۋەسى (بەيجيڭ) گەولوگيالىق ينجەنەريا ماماندىعىنان وقۋ تاۋىسقاننان كەيىن شينجياڭعا كەلىپ، قۇبا ءتۇز، قۋاڭ دالا قويناۋىنداعى مۇناي الابىنا كەلدى.
ول ءوزىن سالىمدى سانايدى، ويتكەنى نەبارى 3 جىل قىزمەت ىستەگەننەن كەيىن، ول دۇنيە جۇزىندەگى كولەمى ەڭ زور تولىق قۇرىلعان رۋدىيتتى مۇناي الابى − ماحۋ مۇناي الابىن قاۋىرت اشۋعا ات سالىستى ءارى وعان كۋا بولدى.
ليۋ شين وسى رەتكى ورايدى مىقتى ۇستاپ، ۇيرەنگەندەرىن بار كوڭىلىمەن ماحۋ مۇنايلى ءوڭىرىنىڭ قۇرىلىسىنا قولداندى، اسىرەسە، ماحۋ مۇنايلى وڭىرىندەگى العاش كولەمدى سالىنعان ءوندىرىس ءوڭىرى ماحۋ 18 - قۇدىق ءوڭىرىنىڭ بايكوۋچۋان گرۋپپاسىنداعى مۇناي جاتىنىن اشۋ بارىسىندا كەزدەسكەن ماسەلەلەرگە مەڭزەس، ىشكەرىلەي تۇرگە ايىرىپ، جىنتىكتەي تالداۋ جاساپ، وسى مۇناي جاتىنىنىڭ جوعارى ونىممەن اشىلۋىنا شىنايى كەپىلدىك ەتتى.
ىزدەنگىشتىگى مەن جانسەبىلدىگىنىڭ ارقاسىندا، ليۋ شين مول رۋدىيتتى مۇناي جاتىنىن باسقارۋ تاجىريبەسىن توپتادى، ءار رەتكى قيىندىقتاردان قامال الۋ ونى ۇزدىكسىز جەتىلدىرە ءتۇستى.
مۇنايدىڭ تابالدىرىعىن اتتاعان ەكەنسىڭ مۇنايشى بولاسىڭ. قارامايلىعا كەلگەن 3 جىلدا ليۋ شين بالاڭدىقپەن قوشتاسىپ، مۇناي اشۋ زاۆودىنداعى جاس عىلمي زەرتتەۋ تىرەكتىسىنە اينالدى، ول 36 جىلدىڭ الدىندا قاعىر دالاداعى مۇناي الابىنا كەلىپ، جىگەرى جالىنداعان چي ليشيننەن اۋمايدى.
كوپ جىلدان بەرى، تالاي ۇرپاق داشۋە وقۋشىلارى ”وتانىما مۇناي ارنايمىن“ دەيتىن سەنىممەن شينجياڭعا كەلىپ قىزمەت ىستەدى. 20 جىلعا تاياۋ ۋاقىتتا تەك جۇڭگو مۇناي حيميا باتىس سولتۇستىك مۇناي الابى بۇكىل ەلدەگى 31 ولكەدەن كەلگەن 2392 داشۋە وقۋشىسىن قارسى الدى. ءدال سولاردىڭ ايانباي ۇلەس قوسۋى ارقىلى باتىس سولتۇستىك مۇناي الابى 1978 - جىلى شينجياڭعا كىرگەننەن بەرى، جالپى شيكى مۇناي ءونىم مولشەرىن 100 ميلليون توننادان اسىردى ءارى 10 ميلليون توننا دارەجەسىندەگى ءىرى مۇناي - گاز الابى سىندى نىسانانى جۇزەگە اسىرۋعا ارشىندى قاداممەن العا تارتتى.
جاستىق اتىمەن، يۇي ياڭ ءوزىنىڭ ءومىر قۇنىن تاپتى.
”جاستار جالىندى بولسا، كەز كەلگەن جەردە بەلىن بۋار. وتانىم قاجەت ەتكەن جەر، تۇگەلدەي مەكەنىم بولار“. 7 - ايدىڭ 10 - كۇنى ءتىلشى لوپنۇر اۋداندىق سالىق ىستەرى مەكەمەسىندە قىزمەت ىستەيتىن يۇي ياڭنان نە ءۇشىن شينجياڭعا كەلۋدى تاڭداعانىن سۇراعاندا، ول كوكىرەگىن كەرنەگەن جىر جولدارىن قويۋ سۇيىسپەنشىلىكپەن ناشىنا كەلتىرە ايتتى.
2017 - جىلعى وقۋ تاۋىسۋ ماۋسىمىندا يۇي ياڭ حىبەي عىلىم - تەحنيكا داشۋەسى وتكىزگەن باتىس بولىك جوسپارى ەرىكتىلەر ۇگىت - لەكسيا ۇيىرمەسىنىڭ بايانداما جاساۋ جينالىسىنا قاتىناستى، ءدال وسى ۇگىت لەكسيا جينالىسى يۇي ياڭنىڭ جۇرەگىندەگى ارمان الاۋىن تۇتاتتى. ۇگىت - لەكسيا جينالىسىندا سۋرەتتەگى ءار ۇلت بالالارىنىڭ مولدىرەگەن جانارلارىن كورىپ، جەر - جەردەن كەلگەن ەرىكتىلەردىڭ اڭگىمەسىن تىڭداپ، ”باتىس بولىك جوسپارىنا“ ات سالىسۋ تىلەگى ءدال سول ساتتە يۇي ياڭنىڭ جۇرەگىندە بۇرشىك جاردى.
سول جىلى يۇي ياڭ حىبەي ولكەلىك ۇكىمەت قىزمەتكەرى ەمتيحانىنىڭ بەتپە - بەت ەمتيحانى ورايىنان باز كەشىپ، انا مەكتەبىنىڭ ”ارمانىڭنىڭ جەبەۋىمەن جاستىعىڭنىڭ ءۇمىتىن اقتا“ دەگەن تاپسىرماسىن ارقالاپ، باتىسقا بەت العان پويەزعا شىعىپ، شينجياڭعا كەلدى.
قىزمەت ورنىنا كەلگەن سوڭ كوپ وتپەي، يۇي ياڭ داشۋە وقۋشىسى ەرىكتىسى سالاۋاتىمەن ىرىقتىلىقپەن لوپنۇر اۋدانى گۇلباق اۋىلى اقشەكەر قىستاعىندا شىنىعۋدى ءوتىنىش ەتتى. جارتى جىل ۋاقىتتا ول اقشەكەر قىستاعىنىڭ ءاربىر كوشەسىن تۇگەل ارالادى، مەيماندوس قىستاق تۇرعىندارى، پاك تە سۇيكىمدى بالالار، حوش ءيىسى اڭقىعان جەمىس - جيدەكتەر... ءبارى - ءبارى ونىڭ باتىس بولىكتە قالۋ سەنىمىن بەكەمدەي ءتۇستى.
2018 - جىلى ءبىر جىلدىق ەرىكتى قىزمەت وتەۋ مەرزىمى تولعان كەزدە، يۇي ياڭ وسى ارادا تامىر تارتۋدى تاڭدادى، مەملەكەتتىك ۇكىمەت قىزمەتكەرى ەمتيحانىن تاپسىرىپ، لوپنۇر اۋداندىق سالىق ىستەرى مەكەمەسىنە ءوتىپ، شينجياڭدا ءومىر قۇنىن جالعاستىردى.
”العا باسۋ جولىندا ءبىزدىڭ وتە كوپ تاڭداۋىمىز بولادى، ال مەن قالۋدى تاڭدادىم، شينجياڭعا تامىر تارتۋدى تاڭدادىم، مەن كوپتەگەن جەرگىلىكتى شينجياڭدىق سياقتى، شينجياڭنىڭ قوجايىنىنا اينالدىم، شينجياڭدى گۇلدەندىرۋدىڭ، شينجياڭدى قورعاۋدىڭ ءبىر مۇشەسىنە اينالدىم“. بايلام جاساعان كۇنگى يۇي ياڭنىڭ دوستىق شەڭبەرىندەگى وسى ءسوزى 100دەن استام قۇپتاۋعا يە بولدى.
ساندى مالىمەتتەردە كورسەتىلۋىنشە، 2003 - جىلى داشۋە وقۋشىلارىنىڭ باتىس بولىككە ەرىكتى قىزمەت وتەۋ جوسپارى اتقارىلعاننان بەرى، شينجياڭ العاشقى توپتاعى باتىس بولىك جوسپارىن اتقارعان ولكە، رايونداردىڭ ءبىرى رەتىندە، ءۇرتىس 18 جىل اتقارىپ، جالپى 24 مىڭنان استام داشۋە وقۋشىسى ەرىكتىسىن قابىلدادى، مۇنىڭ ىشىندە ىشكى جەرلەردەن قابىلداعانى 19 مىڭنان استى.
سوتسياليستىك وسىزاماندانعان قۇدىرەتتى ەل قۇرىپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ − كۇش جالعاپ جۇگىرۋ جارىسى. توپ - توپ قۇرىلىسشىلار ۇرپاقتان - ۇرپاققا جالعاپ، شەكارا وڭىرگە تامىر تارتىپ، شەكارا وڭىرگە قىزمەت وتەپ، شەكارا ءوڭىردى قورعاعاندىقتان بۇگىنگى شينجياڭ بولدى. جاڭا داۋىردەگى شينجياڭنىڭ ءار ۇلت جاستارى باتىلدىقپەن ۇتىلامالى تاياقشانى قولعا الىڭدار، جاستىق اتىمەن ارمانعا قانات قاعىڭدار. ءدال وسى ساتتە، ءبىز بارلىعىمىز ”حات قابىلداۋشىلارمىز“.
