لوپ اۋدانى باستاماشى كاسىپورىنداردى جوعارى دەڭگەيدە ەنگىزدى
جاساندى شاش كاسىبى ”قارقىندى دامىدى“
شينجياڭ گازەتىنىڭ جالپىلىق اقپارات قۇرالدارى ءتىلشىسى ءپاريزات ابدۇل، ەرىكتى ءتىلشى گاۋھار
24 جاستاعى جىگىت ابباس مامەتيۇسىپ وقىتۋعا پايدالانىلاتىن مودەلگە شاش ەگىلەتىن كولەمدى نوبايلاپ سىزىپ العان سوڭ، قولىنا قارماق ءبىزدى الىپ شاش ەگۋگە دايىندالدى. وسىمەن ءبىر ۋاقىتتا، ابىلىپيز ابدۇمىجيت ءوندىرىس جەلىسىندە شاش ورامىن جاساپ جاتقان، زاۆودقا كىرگەن العاشقى كەزدەگىمەن سالىستىرعاندا، ول ءوز جۇمىسىنا بارعان سايىن ىسىلا تۇسكەن ەدى... 7 - ايدىڭ 12 - كۇنى لوپ اۋدانىنداعى بەيجيڭنىڭ شينجياڭعا كومەكتەسۋ كاسىپ باقشاسى رايونىنىڭ شاش ونىمدەرى كاسىپ باقشاسىنا بارعانىمىزدا، وسى جەردىڭ بارلىق جەرىنەن جالىندى تىرشىلىك لەبى مەن ومىرشەڭدىك كۇشتى سەزىندىك.
لوپ اۋدانى ەڭبەك شوعىرلانعان كاسىپتەردى دامىتۋدى كەدەيلىكتەن ارىلتۋدان قامال الۋدىڭ ماڭىزدى شاراسى ەتىپ، باستاماشى كاسىپورىنداردى جوعارى دەڭگەيدە ەنگىزىپ، شاش ونىمدەرى كاسىپ باقشاسى رايونىن قۇرىپ، جوعارى ساپالى دامۋدىڭ قارقىنىن ارتتىردى.
32 جوعارى - تومەن جەلىدەگى كاسىپورىندى ىرگە تەبۋگە باۋرادى
7 - ايدىڭ 12 - كۇنى لوپ اۋدانىنىڭ شاش ونىمدەرى كاسىپ باقشاسىندا ءاربىر ءوندىرىس جەلىسى 40 مىڭ دانا تاپسىرىستى كۇش سالا ءوندىرىپ جاتتى. ”قازىر 9 ءوندىرىس جەلىسى تولىق كوتەرىمدىلىكپەن ءوندىرىس جۇرگىزۋدە، بىلتىرمەن سالىستىرعاندا ءونىم مولشەرى ％30 ارتتى“، - دەپ تانىستىردى كاسىپ باقشاسى جاساندى شاش ءوندىرۋ سەحىنىڭ ديرەكتورى جۋ حۋانلين.
سوڭعى جىلدارى ەل ىشىندە ءبىرتالاي شاش ونىمدەرىن وندىرەتىن كاسىپورىندار ءوندىرىس قۋاتىن ارتتىرۋدى شۇعىل قاجەت ەتىپ، ورىن تاڭداپ زاۆود قۇرا باستادى. لوپ اۋدانى ورىن، قاتىناس، بايلىق، بازار، ساياسات، سونداي - اق بەيجيڭنىڭ شينجياڭعا باعىتتامالى كومەكتەسۋى سياقتى باسىمدىقتارىن تولىق ساۋلەلەندىرىپ، ورايدى مىقتى ۇستاپ، شاش ونىمدەرى كاسىپ باقشاسى رايونىنىڭ نەگىزدىك قۇرىلعى قۇرىلىسىنا قارجى قوسۋدى كۇشەيتىپ، شاش ونىمدەرى كاسىبىنىڭ دامۋىن ىلگەرىلەتتى.
2019 - جىلى سالىنىپ ىسكە قوسىلعان لوپ اۋدانى شاش ونىمدەرى كاسىپ باقشاسى جاساندى شاش ونىمدەرىن ءوندىرۋدى، مانەرلەۋدى نەگىز ەتتى، قازىر بۇكىل ەلدىڭ جەر - جەرىنەن كەلگەن 32 جوعارى - تومەن بۋىنداعى كاسىپورىن وسى اراعا ىرگە تەۋىپ، ورنىقتى تۇردە جۇمىستانعان ادام سانى 7000عا جەتتى. بۇدان سىرت، كاسىپ باقشاسى ”اۋداندا كاسىپ باقشاسى رايونى بولۋ، اۋىلدا كەدەيلەردى سۇيەمەلدەۋ سەحى بولۋ، قىستاقتا قىستاق باسقارۋىنداعى زاۆود بولۋ، وتباسىندا شاعىن شەبەرحانا بولۋ“ سىندى 4 دارەجەلى جۇلگەنى قالىپتاستىرىپ، جالپى ءوندىرىس قۇرىلىمى 10 مىڭنان استام ادامنىڭ جۇمىستانۋ ماسەلەسىن شەشە الاتىن بولدى.
”الدا تاعى 8 كاسىپورىن كەلىپ ىرگە تەپپەكشى. ءبىز 2 جىلدا شاش ونىمدەرى كاسىپ باقشاسىنىڭ جىلدىق ءونىم قۇنىن 3 ميلليارد 500 ميلليون يۋانعا جەتكىزۋگە قۇلشىنۋدامىز“، - دەدى لوپ اۋداندىق پارتكومنىڭ تۇراقتى مۇشەسى، اۋداننىڭ ۇنەمىلىك ىستەرگە جاۋاپتى ورىنباسار اكىمى ۋاڭ چياڭ.
كاسىپورىندا تۇرىپ قىزمەت ەتەتىن 100 ارناۋلى قىزمەتكەر ورنالاستىردى
”كاسىپ باقشاسىنا كەلىپ ىرگە تەپكەن كاسىپورىندار تىركەلۋدەن سىناق رەتىندە ءوندىرىس جۇرگىزگەنگە دەيىن، اۋداننىڭ ساياساتتىق قولداۋىنان جانە ىقىلاستى قىزمەت وتەۋىنەن يگىلىكتەندى“، - دەدى حوتان ايماقتىق شاش ونىمدەرى كاسىبى قوعامىنىڭ باستىعى ياڭ گۋاڭحۇي.
شارۋاشىلىق - ساۋدا ورتاسىنىڭ ءبىر باسى باقشا رايونىنىڭ دامۋىن كوتەرسە، ەندى ءبىر باسى كاسىپورىننىڭ بولاشاعىن ارقالاپ وتىر. لوپ اۋدانى كاسىپورىنداردا تۇرىپ قارقىندى يگەرۋ، قارجى قوسۋدى كەڭەيتۋ، جاسىل ارنا اشۋ سياقتى شارالاردى قولدانىپ، جوعارى بۋىنداعى شيكىزاتتاردىڭ تاسىمال ماسەلەسى سەبەبىنەن دەر كەزىندە جەتكىزىلمەۋ ماسەلەسىن شەشتى؛ جۇمىسكەرلەردىڭ تاماق، جاتىن ورىن سياقتى ماسەلەلەرىن شەشىپ، باقشا رايونىنا ىرگە تەپكەن كاسىپورىندارعا تەكسەرىپ بەكىتۋى از، جۇمىس ءتارتىبى ساپالى، ونىمدىلىگى جوعارى، قىزمەت وتەۋى جاقسى شارۋاشىلىق - ساۋدا ورتاسىن ازىرلەپ بەردى.
بۇدان سىرت، باقشا رايونىنداعى كاسىپورىندارعا ساياساتتى اناعۇرلىم ءدال ءتۇسىندىرۋ، جۇمىسكەرلەردى باسقارۋىنا كومەكتەسۋ ءۇشىن، لوپ اۋدانى كاسىپورىنداردا تۇرىپ قىزمەت ەتەتىن 100 ارناۋلى قىزمەتكەر ورنالاستىردى.
”جاساندى شاش جاساۋ نازىك جۇمىس بولعاندىقتان، زاۆودقا كەلگەن العاشقى كەزدە جۇمىسكەرلەردىڭ كوبى ۇيلەسە العان جوق. باقشا رايونى جۇمىس ورنىندا تاربيەلەۋ، سيلاۋ مەحانيزمى، شەبەرلىك جارىسىن وتكىزۋ سياقتىلار ارقىلى جۇمىسكەرلەردىڭ بەلسەندىلىگىن قاۋلاتتى، بۇرىن ىستەۋدى ويلاماسا، ىستەگىسى كەلمەسە، قازىر تالاسا - تارماسا ىستەيتىن بولدى، شەبەرلىگى ارتىپ قانا قويماي، جۇمىسكەرلەردىڭ جىگەر - قايراتى دا تاسقىنداي ءتۇستى“، - دەدى كاسىپورىندا تۇراتىن كومەكتەسۋ - سۇيەمەلدەۋ كادرى انارگۇل مۇحتار.
”قازىر كاسىپ باقشاسى باس قاپ، شاش تۇيدەگى، شاش ورامى سياقتى 4 ۇلكەن جەلى 100 نەشە ءتۇرلى ءونىمدى ءوندىرىپ وتىر. بيىل ءبىز كاسىپ تىزبەگىن اناعۇرلىم كەمەلدەندىرىپ، جوعارى ساپادا دامۋعا ۇزدىكسىز دالمە - ءدال كۇش سالامىز“، - دەدى ياڭ گۋاڭحۇي.
شارۋالار ءۇيىنىڭ ىرگەسىندە جۇمىستانىپ كىرىستەرىن ارتتىردى
”قازىر ءار كۇنى 900دەن استام شاش ورامىن جاسايمىن، بولاشاقتاعى تۇرمىسىمنىڭ بارعان سايىن جاقساراتىندىعىنا سەنىمدىمىن“، - دەدى كاسىپ باقشاسىنىڭ جۇمىسشىسى ابىلىپيىز ماقتانىشپەن.
”بۇل جەردە ىستەپ تەحنيكا ۇيرەنىپ الدىم، ءار ايدا تۇراقتى كىرىسىم بار“. ءمۇتالىپ يمىننياز تەبىرەنە بىلاي دەدى: ”وسىنىڭ بارىندە پارتيانىڭ ابزال ساياساتىنا العىس ايتامىن“.
”اي سايىن 3400 يۋان ەڭبەكاقى الامىن، قازىر شاكىرت ەمەسپىن، ءوندىرىس شەبەرىنە اينالدىم، اعام دا باقشا رايونىنداعى كاسىپورىننىڭ اماندىق قورعاۋشىسى بولىپ ىستەيدى، اي سايىن 3500 يۋان ەڭبەكاقى الادى، ەكەۋىمىز بىرگە قۇلشىنا كۇرەس جۇرگىزۋدەمىز، كەدەيلىك بىزدەن بارعان سايىن الىستادى“، - دەگەن 21 جاستاعى جۇمىسشى ابدۇليز روزىتوحتىنىڭ سوزىنەن بولاشاققا دەگەن ءۇمىت مەن مۇندالايدى.
لوپ اۋدانىنىڭ شاش ونىمدەرى كاسىپ باقشاسى قۇرىلعان العاشقى تۇستا، اۋداندىق پارتكوم مەن اۋداندىق ۇكىمەت جۇمىسكەرلەردىڭ جوعارى ساپادا جۇمىستانۋىن تۇتقا ەتۋگە تاباندى بولىپ، جۇمىستاندىرۋ ارقىلى حالىققا تيىمدىلىك جاساۋ ساياساتىن جالپى بەتتىك تياناقتاندىرىپ، جۇمىستانۋ ارناسىن كەڭەيتىپ، جۇمىستانۋ ورتاسىن جاقسارتىپ، جۇمىستانۋ ساپاسىن جوعارىلاتتى. ”كەلەسى قادامدا، كاسىپ باقشاسى كولەمدى اناعۇرلىم كەڭەيتىپ، اناعۇرلىم كوپ شارۋانىڭ ءۇيىنىڭ ىرگەسىندە جۇمىستانىپ كىرىستى ارتتىرۋىنا مۇمكىندىك جاسايدى“، - دەدى ياڭ گۋاڭحۇي.
