التاي ايماعى جۇڭگوشا ءشوپ ءدارى كاسىپ سالاسىنىڭ دامۋىن بارىنشا جەبەدى
بايۋ ”شيپاشاعى“ كەدەيلىكتىڭ تامىرىن الاستادى
6 - ايدىڭ 30 - كۇنى ساياحاتشىلار التاي تاۋى جۇڭگوشا ءدارى شوپتەر مۇراجايىن ەكسكۋرسيالاۋدا. سۋرەتتى مىڭ جاۋپىڭ تۇسىرگەن
شينجياڭ گازەتىنىڭ جالپىلىق اقپارات قۇرالدارى تىلشىلەرى گى يوۋجۇن، جاۋ چۇنحۋا
”ءبىز كىرىستى ارتتىرىپ، كەدەيلىكتەن ارىلۋدىڭ جاقسى’شيپاشاعىن‘ تاپتىق، ول − جۇڭي ءدارى ءشوپ ەگۋ!“، - دەدى 6 - ايدىڭ 23 - كۇنى 43 جاستاعى نۇربەك كاكەن تىلشىگە قۋانىشپەن، - ”مەن مىنا بولىك جەرىمە تاسپا ءشوپ ەكتىم، كىرىسىم بۇرىنعىدان 3 ەسە جوعارىلادى“.
نۇربەك تۇرعان قابا اۋدانى سارتام اۋىلى كۇرمىش قىستاعىندا ارحيۆ تۇرعىزىلىپ، كارتچكالاندىرىلعان 101 كەدەي وتباسى بار. سارتام اۋىلدىق پارتكومنىڭ شۋجيى شىن دىلي تانىستىرىپ بىلاي دەدى: اۋىل شارۋاشىلىعىنىڭ ساپاسىن جوعارىلاتىپ، ونىمدىلىگىن ارتتىرۋدى جۇزەگە اسىرۋ ءۇشىن، 2019 - جىلى جەرگىلىكتى ورىن شينجياڭ حۇيچىڭ جۇڭي ءشوپ دارىلەرىن ءوسىرۋ عىلىم - تەحنيكا شەكتى سەرىكتەستىگىن (تومەندە حۇيچىڭ دارىشىلىگى دەلىنەدى) ەنگىزىپ، شارۋالاردى ۇيىمداستىرىپ، 3770 مۋ جەرگە تاسپا ءشوپ، قىزىل ميا جانە بانلانگىن ەكتى.
بىلتىر حۇيچىڭ دارىشىلىگى تۇقىممەن، مايسامەن جانە تەحنيكالىق جەتەكشىلىكپەن تەگىن قامدادى، نۇربەك 35 مۋ جەرگە سىناق رەتىندە تاسپا ءشوپ ەكتى. ”شىنىمدى ايتسام، ەگۋ ناتيجەسى قانداي بولاتىنى جونىندە مەندە دە سەنىم جوق بولاتىن“، - دەدى نۇربەك. ءونىم جيناۋ ماۋسىمىنا جەتكەندە، تاسپا ءشوپتىڭ مۋ باسىندىق تازا كىرىسى 1000 يۋاننان استى، بۇل نۇربەككە ءارى توسىن، ءارى قۋانىشتى سەزىلدى. بيىل ول تاۋەكەل دەپ ءوزىنىڭ 50 مۋ جەرىن جۇڭي ءدارى ءشوپ ءوسىرۋ بازاسىنا ءار مۋىن 500 يۋاننان اينالىمعا بەرىپ، ءوزى بازاعا كەلىپ جۇمىس ىستەدى.
سەرىكتەستىك + بازا + شارۋا وتباسى مۇددەلەرىن بايلانىستىرۋ مەحانيزمى ارقىلى سارتام اۋىلى بيىل جۇڭي ءدارى ءشوپ ەگۋ اۋماعىن ءبىر جولدا 12 مىڭ مۋعا كەڭەيتتى. شىن دىلي بىلاي دەدى: 3 جىلدا تۇتاس اۋىلدا 4000 مۋلىق جۇڭي ءدارى ءشوپ جاساۋ، ەگۋ بازاسى، 6000 مۋلىق مايسا جەتىلدىرۋ بازاسى، 50 مىڭ مۋلىق ەگۋ بازاسى سالىنادى.
”التاي ايماعى جۇڭي ءدارى ءشوپ وسىرۋگە ۇيلەسەدى، وندىرىلگەن ونىمدەرىنىڭ دارىلىك قاسيەتى جاقسى، جۇڭي ءدارى ءشوپ كاسىپ سالاسىن دامىتۋدىڭ كومەسكى كۇشى وراسان زور“. حۇيچىڭ دارىشىلىگىنىڭ باس ديرەكتورى ۋاڭ ۋىنشين تالاي جەرگە ءدارى ماتەريالىن ەگىپ كورگەن، ول التاي ايماعىندا جۇڭي ءدارى ءشوپ كاسىپ سالاسىن دامىتۋعا توتەنشە ۇمىتپەن قارايدى.
التاي ايماعى بۇكىل ەلدەگى 6 ءىرى ورماندى ءوڭىردىڭ ءبىرى، سولتۇستىگى التاي تاۋى، وڭتۇستىك بولىگىندە جوڭعار ويپاتى جاتىر، تاعى ەرتىس وزەنى، ۇلىڭگىر وزەنى، جەمەنەي وزەنشەلەرى قۇنارلاندىرىپ جاتىر، كوپ نەگىزدى جەر بەدەرى ءتۇرى اسا مول وسىمدىك شوعىرىن تۋدىرعان، سونىمەن بۇل ارا ماڭىزدى ورگانيزم تۇرلەرىنىڭ گەن قامباسىنا اينالعان. ساناققا نەگىزدەلگەندە، التاي ايماعىنداعى جۇڭي دارىلىك وسىمدىكتەرىنىڭ تۇرىنەن 1755ى بار ەكەن.
6 - ايدىڭ 23 - كۇنى التاي قالاسىنداعى التاي تاۋى جۇڭي ءدارى ءشوپ مۇراجايىنىڭ 2 - قاباتىندا التاي ايماقتىق قازاق شيپاگەرلىگى شيپاحاناسى پارتيا باسشىلىق گرۋپپاسىنىڭ بۇرىنعى شۋجيى ۋاڭ رىن ءوزىنىڭ ”تانىمالى شيپاگەر قىزمەت ۇيىندە“ ناۋقاس كورىپ جاتتى.
2018 - جىلى جۇڭي ءدارى ءشوپ مۇراجايى سالىنا باستاعاندا، 71 جاستاعى ۋاڭ رىن مەن قىزمەتتەستەرى التاي ايماعىنىڭ تاۋ - وزەندەرىن تۇگەل ارالادى. قازىر بۇل مۇراجايدىڭ 1700 شارشى مەتردەن استام كەڭىستىگىندە 600دەن استام جۇڭي ءدارى ءشوبىنىڭ سۋرەتى، 300دەن استام ناقتى زات جانە 100دەن استام ۇلگى قويىلعان.
”التاي ايماعى كادىمگى ءبىر’بايساۋتاڭ‘، مۇندا جۇڭي ءدارى شوپتەرى وتە مول، ەگەر بارلىعى اشىلسا، ناۋقاستارعا باقىت جاراتۋمەن بىرگە، شارۋالاردىڭ كىرىسىن ارتتىرۋىنا دا دەم بەرەدى“، - دەدى ۋاڭ رىن.
ۋاڭ رىننىڭ كوزقاراسىن التاي ايماقتىق پارتكوم اۋىل شارۋاشىلىعى كەڭسەسىنىڭ مەڭگەرۋشىسى، التاي ايماقتىق اۋىل شارۋاشىلىعى، اۋىل - قىستاق مەكەمەسى پارتيا باسشىلىق گرۋپپاسىنىڭ شۋجيى جۇڭ كايجى بارىنشا قۇپتادى. جۇڭ كايجى تانىستىرىپ بىلاي دەدى: بيىل التاي ايماعىنداعى جۇڭي ءدارى شوپتەرىنىڭ ەگىلۋ اۋماعى 120 مىڭ مۋعا كەڭەيىپ، مىڭداعان شارۋانىڭ كىرىسىن ارتتىرۋىن جەبەدى. قازىر تۇتاس رايوندا ءوسىرىلىپ وتىرعان جۇڭي ءدارى ءشوبىنىڭ تۇرلەرىنەن، باستىسى، قىزىل ميا، تاسپا ءشوپ، بانلانگىن سياقتى 6 ءتۇر بار، ال جەرگىلىكتى ورىندا وسىرۋگە ەرەكشە ۇيلەسەتىن جۇڭي ءدارى ءشوبىنىڭ ءتۇرى 30 نەشەگە جەتەدى.
”التاي ايماعى كومەسكى كۇشتى بەلسەندىلىكپەن اشىپ، باسىمدىقتى زورايتىپ، كولەمدەنگەن جۇڭي ءدارى ءشوپ كاسىپ سالاسىن قالىپتاستىرۋدى بارىنشا جەبەۋدە“، - دەدى جۇڭ كايجى.
”جۇڭگونىڭ باتىس بولىكتەگى ءدارى اڭعارىن“ تۇلعالاۋدى نىسانا ەتىپ، التاي ايماعى 2021 - جىلعا جەتكەندە تۇتاس ايماقتاعى جۇڭي ءدارى ءشوپ ەگۋ اۋماعىن 500 مىڭ مۋعا جەتكىزىپ، 4000نان استام ەگۋشىنىڭ كىرىسىن ارتتىرۋدى جەبەۋدى جوسپارلادى.
مول دا ساپالى جۇڭي ءدارى ءشوپ بايلىعىن تايانىش ەتكەن جەرگىلىكتى ورىن بايلىق ارقىلى ءدارى كاسىپورىندارىن باۋراپ، جۇڭي ءدارى ءشوپ ءوسىرۋ، مانەرلەۋ كاسىپ تىزبەگىن ۇزدىكسىز كەڭەيتتى. قازىر جەرگىلىكتى ورىن جۇڭي ءدارى ءشوپ وڭدەيتىن 5 كاسىپورىندى ەنگىزىپ، جۇڭي ءدارى شوپتەرىن ءوسىردى جانە جىنتىكتەپ مانەرلەدى.
كەزەكتە التايدىڭ جۇڭي ءدارى شوپتەرىن شيكىزات ەتىپ جاسالعان دارىلەر شينجياڭنىڭ ىشىندە ساتىلىپ قانا قالماستان، ىشكى وڭىرلەردەگى كوپتەگەن ءدارى دۇكەندەرىنە دە كىردى. سونىمەن بىرگە، جەرگىلىكتى ورىننىڭ جۇڭي ءدارى ءشوپ ءوندىرۋشى كاسىپورىندارى ەل ىشىندەگى كوپتەگەن جوعارى دەڭگەيلى عىلمي زەرتتەۋ قۇرىلىمدارىمەن سەلبەستىك جاساپ، التاي جۇڭي ءدارى شوپتەرىن شيكىزات ەتىپ، جۇڭي ءدارى ونىمدەرىن زەرتتەپ اشۋدا.
”ءبىز باستاماشى كاسىپورىنداردى جەتەكشى، بازانى تىرەك، عىلىم - تەحنيكانى دەمەۋشى ەتىپ، جۇڭي ءدارى ءشوپ كاسىپ سالاسىن قۇلشىنا ۇلعايتامىز، كۇشەيتەمىز“، - دەدى جۇڭ كايجى.
