تيانشان تورى
تيانشان تورى   ›   جاڭالىقتار   ›   ماڭىزدى حابارلار

شي جينپيڭ سينگاپۋردىڭ زۇڭليىمەن، تايلاندتىڭ زۇڭليىمەن جەكە - جەكە تەلەفوندا سويلەستى

  شينحۋا اگەنتتىگىنىڭ 7 - ايدىڭ 14 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 7 - ايدىڭ 14 - كۇنى سينگاپۋردىڭ زۇڭليى لي شيانلۇڭمەن تەلەفوندا سويلەستى.

  شي جينپيڭ لي شيانلۇڭنىڭ حالىقتىق ارەكەت پارتياسىن باستاپ، تاياۋداعى مەملەكەتتىك زور سايلاۋدا جەڭىسكە جەتكەندىگىن قۇتتىقتادى. شي جينپيڭ بىلاي دەپ اتاپ كورسەتتى: مەن سينگاپۋر جاقتىڭ جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋدا بەلسەندى تابىستارعا قول جەتكىزگەندىگىن كورىپ قاباعات قۋاندىم، ءسىزدىڭ باسشىلىعىڭىزدا سينگاپۋر حالقىنىڭ ىندەتتى، ءسوز جوق، كۇنى بۇرىن جەڭىپ، ەكونوميكانىڭ، قوعامنىڭ ومىرشەڭدىك كۇشىن قالپىنا كەلتىرەتىندىگىنە سەنەمىن. جۇڭگو جاق سينگاپۋر جاققا ۇزدىكسىز تۇردە باتىل قولداۋ كورسەتەدى. جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋدا جۇڭگو جاق ادامزاتتىڭ تاعدىرلاس ورتاق تۇلعاسى ۇستانىمىنان جازباي، ءارقايسى ەلمەن بۇكپەسىز تۇردە تاجىريبەلەردەن ورتاق پايدالانىپ، حالىقارالىق قوعامدى قولىنان كەلگەنشە زاتتىق ماتەريالدارمەن قامدادى جانە تەحنيكالىق قولداۋ كورسەتتى. جۇڭگو جاق سينگاپۋر جاقپەن بىرگە حالىقارالىق قوعامنىڭ ىندەتكە ىنتىماقتاسا وتىرىپ قارسى اتتانۋىن قولداپ، دۇنيە جۇزىلىك دەنساۋلىق ساقتاۋ ۇيىمىنىڭ رولىن اناعۇرلىم ويداعىداي ساۋلەلەندىرۋىن قولداپ، ادامزاتتىڭ دەنساۋلىق ساقتاۋ، سالاماتتىق ورتاق تۇلعاسىن بىرگە قۇرۋدى قالايدى.

  شي جينپيڭ بىلاي دەپ باسا دارىپتەدى: ىندەت تۋىلعاننان بەرى، جۇڭگو مەن سينگاپۋر ەكى ەل ۇكىمەتتەرى مەن ءار سالاسى ءوزارا كومەك قولدارىن سوزىپ، ءبىر - بىرىنە قارايلاستى. ەكى ەل قاجەتتى ادامداردىڭ بارىس - كەلىس جاساۋ ”تەز، قولايلى ارناسىن“ الدىمەن اشىپ، وڭىرلىك قامداۋ تىزبەگىنىڭ، كاسىپ سالاسى تىزبەگىنىڭ ىركىلىسسىزدىگىن كۇش بىرىكتىرە ىلگەرىلەتتى. ىندەتكە قارسى اتتانۋ سەلبەستىگى جۇڭگو مەن سينگاپۋر قارىم - قاتىناسىنىڭ جاڭا جارقىن تۇيىنىنە اينالىپ، ەكى ەل قارىم - قاتىناسىنىڭ كورەگەندىك سيپاتىن، ستراتەگيالىق سيپاتىن، ۇلگى كورسەتۋ سيپاتىن تاعى ءبىر رەت ايگىلەدى، سونداي - اق جۇڭگو مەن سينگاپۋردىڭ جان - جاقتى سەلبەستىك سەرىكتەستىك قارىم - قاتىناسىنا ماڭىزدى ءمان قوستى. بيىل جۇڭگو مەن سينگاپۋردىڭ ديپلوماتيالىق قارىم - قاتىناس ورناتقاندىعىنىڭ 30 جىلدىعى، ەكى ەل قارىم - قاتىناسى جاڭا تاريحي باستامادا تۇر. ەكى جاق يكەمدى، الۋان ءتۇرلى فورمامەن قۇتتىقتاۋ قيمىلدارىن ورىستەتىپ، ەكى ەل دوستىعىن حالىق جۇرەگىنە تەرەڭ ۇيالاتۋ كەرەك. ىندەتكە قارسى اتتانۋ سەلبەستىگىن كۇشەيتىپ، ءوز ەلىندەگى قارسى تاراپ ەل ازاماتتارىنىڭ ءومىرىنىڭ حاۋىپسىزدىگى مەن دەنساۋلىعىنا شىنايى كەپىلدىك ەتۋ كەرەك. ”تەز، قولايلى ارنادان“ ويداعىداي، جەتكىلىكتى پايدالانىپ، ەكى ەلدىڭ جۇمىستى، ءوندىرىستى جەدەل قالپىنا كەلتىرىپ، ەكى ەلدىڭ ەكونوميكالىق دامۋىنا كۇش ۇستەۋ كەرەك. ەكى جاق ”ءبىر بەلدەۋ، ءبىر جولدى“ بىرگە قۇرۋ سەلبەستىگىن تەرەڭدەتىپ، ”قۇرلىق، تەڭىز جاڭا ارناسى“ مەن 3 - جاق سەلبەستىگىن اناعۇرلىم ويداعىداي ىستەۋ كەرەك. جۇڭگو جاق رەفورما جاساۋدى، ەسىك اشۋدى ۇزدىكسىز تەرەڭدەتىپ، شارۋاشىلىق - ساۋدا ورتاسىن جاقسارتادى، سينگاپۋر جاقتىڭ جۇڭگو كاسىپورىندارىنىڭ سينگاپۋرداعى ەكونوميكالىق قيمىلىنا تاماشا شارت - جاعداي ازىرلەۋىن ءۇمىت ەتەدى. جۇڭگو جاق سينگاپۋر جاقپەن بىرگە قۇلشىنىپ، كەدەرگىلەردى الاستاپ، ءوڭىردىڭ بەيبىتشىلىگىن، ورنىقتىلىعىن بىرگە ويداعىداي قورعاۋدى قالايدى.

  لي شيانلۇڭ مىنالاردى ءبىلدىردى: جاڭا تيپتى ايدارشا ۆيرۋس وكپە قابىنۋ ىندەتى دۇنيە جۇزىنە تەرەڭ ىقپال جەتكىزدى. ءسىزدىڭ پارمەندى باسشىلىعىڭىزدا، جۇڭگو ىندەتتى ءساتتى تىزگىندەدى. سينگاپۋر مەن جۇڭگو ەكى ەل ىندەتكە قارسى اتتانۋ بارىسىندا ءوزارا قولداپ، ءوزارا كومەكتەسىپ، سينگاپۋر جاقتىڭ ىندەتتى جەڭۋى ءۇشىن بەلسەندى رول اتقاردى. سينگاپۋر جاق جۇڭگو جاقپەن جوعارى جىكتەگىلەردىڭ بارىس - كەلىسىن جيىلەتىپ، ءار سالاداعى، ەكى جاقتى، كوپ جاقتى اۋىس - كۇيىستى، سەلبەستىكتى كۇشەيتۋدى قالايدى. سينگاپۋر جاق جۇڭگو جاقپەن ۆاكسينا زەرتتەۋ - اشۋ جانە ءدارى - دارمەك سياقتى جاقتارداعى سەلبەستىكتى كۇشەيتىپ، ”تەز، قولايلى ارنادان“ ۇزدىكسىز ويداعىداي پايدالانىپ، ”قۇرلىق، تەڭىز جاڭا ارناسىن“ ويداعىداي قۇرىپ، جۇمىستى، ءوندىرىستى قالپىنا كەلتىرۋدى نىق قاداممەن ىلگەرىلەتىپ، ەكونوميكانىڭ قالپىنا كەلۋىن، دامۋىن جەبەۋدى ءۇمىت ەتەدى. سينگاپۋر جاق جۇڭگو جاقپەن ەركىن، اشىق ساۋدانى بىرگە قورعاپ، وڭىرلىك قامداۋ تىزبەگىنىڭ، كاسىپ سالاسى تىزبەگىنىڭ ىركىلىسسىزدىگىنە شىنايى كەپىلدىك ەتۋدى قالايدى، جۇڭگو كاسىپورىندارىنىڭ سينگاپۋردىڭ ەكونوميكالىق قۇرىلىسىنا بەلسەنە ات سالىسۋىن قارسى الادى.

  لي شيانلۇڭ تاياۋدا جۇڭگونىڭ جياڭحۋاي الابىندا سەل اپاتى تۋىلعاندىعى بايلانىسىمەن حال سۇرايتىندىعىن ءبىلدىردى. شي جينپيڭ بۇعان العىس ايتاتىندىعىن ءبىلدىردى.

  شينحۋا اگەنتتىگىنىڭ 7 - ايدىڭ 14 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 7 - ايدىڭ 14 - كۇنى تايلاندتىڭ زۇڭليى بايۇيمەن تەلەفوندا سويلەستى.

  شي جينپيڭ بىلاي دەپ اتاپ كورسەتتى: جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان بەرى، جۇڭگو مەن تايلاند ەكى ەل ءوزارا قولداۋ كورسەتىپ، ۋاقىتتىق قيىندىقتى بىرگە جەڭىپ، ءىس جۇزىندىك ارەكەتى ارقىلى ”ءبىر شاڭىراقتىڭ ادامدارىنداي“ تەرەڭ دوستىق سۇيىسپەنشىلىگىن ءتۇسىندىردى. كەزەكتە ىندەت بۇكىل الەمدە ءالى ورشۋدە، جۇڭگو مەن تايلاند تۇگەلدەي سىرتتان كىرۋدەن ساقتانۋ، ىشتە قايتا بەلەڭ بەرۋدەن ساقتانۋ قىسىمىنا ءدوپ كەلۋدە. جۇڭگو جاق تايلاند جاقپەن تاجىريبە اۋىس - كۇيىسىن كۇشەيتىپ، ىندەتكە قارسى اتتانۋ مەن دامۋدى ءبىر تۇتاس جوسپارلاپ، ىندەتتەن ساقتانۋ - تىزگىندەۋدى ۇدايىلاندىرۋدى ويداعىداي ىستەۋ العى شارتىندا، جۇمىستى حاۋىپسىز قالپىنا كەلتىرۋدى، ءوندىرىستى اقاۋسىز قالپىنا كەلتىرۋدى ءتارتىپتى ىلگەرىلەتۋدى قالايدى. جۇڭگو جاق ادامزاتتىڭ تاعدىرلاس ورتاق تۇلعاسى ۇستانىمىنان جازباي، تايلاند جاقتى قامتىعان حالىقارالىق قوعاممەن بىرگە دۇنيە جۇزىلىك دەنساۋلىق ساقتاۋ ۇيىمىنىڭ رولىن اناعۇرلىم ويداعىداي ساۋلەلەندىرۋىنە قولداۋ كورسەتىپ، بۇكىل الەمنىڭ ىندەتكە قارسى اتتانۋ سەلبەستىگىن ىلگەرىلەتىپ، ىندەتكە قارسى تۇرۋ ءدارى - دارمەگىن جانە ۆاكسينا زەرتتەۋ - اشۋ سەلبەستىگىن كۇشەيتىپ، بۇكىل الەمدىك الەۋمەتتىك دەنساۋلىق ساقتاۋ ىستەرىنە بىرگە ۇلەس قوسادى.

  شي جينپيڭ بىلاي دەپ باسا دارىپتەدى: جۇڭگو مەن تايلاند قارىم - قاتىناسىنىڭ نەگىزى مىعىم، كومەسكى كۇشى وتە زور. بيىل جىل باسىنان بەرى، ەكى ەل ىندەت ىقپالىن جەڭىپ، ناقتى ىستەر سەلبەستىگىن ءۇرتىس ىلگەرىلەتىپ، ەكى جاقتى ساۋدا قولايسىز جاعدايدا دا ارتتى، جۇڭگو - تايلاند تەمىر جول قۇرىلىسى ءساتتى ىلگەرىلەدى. ەكى جاق ”ءبىر بەلدەۋ، ءبىر جولدى“ بىرگە قۇرۋدى ”تايلاند 0. 4“، ”شىعىس بولىك ەكونوميكا ءدالىزى“ سياقتى دامۋ ستراتەگياسىمەن ۇشتاستىرۋدى تەرەڭدەتىپ، ەلەكتروندى ساۋدا سياقتى جاڭالىق اشۋ سالاسىنداعى سەلبەستىكتى ىلگەرىلەتىپ، جۇڭگو مەن تايلاندتىڭ جالپى بەتتىك ستراتەگيالىق سەلبەستىك سەرىكتەستىك قارىم - قاتىناسىنىڭ ۇزدىكسىز جاڭا دامۋعا قول جەتكىزۋىن ىلگەرىلەتۋ كەرەك. جۇڭگو جاق تايلاند جاقپەن بىرگە ءوڭىردىڭ، مەملەكەتتىڭ ىنتىماعىن، سەلبەستىگىن بەكەمدەپ، وسى ءوڭىردىڭ دامۋىنىڭ، گۇلدەنىپ - كوركەيۋىنىڭ تاماشا اۋقىمىن قورعاۋدى قالايدى.

  بايۇي مىنالاردى ءبىلدىردى: تايلاند پەن جۇڭگو ەكى ەل جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋ بارىسىندا باستان - اياق ءوزارا باتىل قولداۋ كورسەتىپ، ”تايلاند - جۇڭگو ءبىر شاڭىراقتىڭ ادامدارىنداي“ بولعان تەرەڭ دوستىق سۇيىسپەنشىلىگىن تولىق ايگىلەدى. تايلاند جاق جۇڭگو ۇكىمەتىنىڭ ىندەتكە قارسى اتتانۋدا ايگىلەگەن پارمەندى باسشىلىق قابىلەتى مەن حالىقتى بارىنەن جوعارى قويۋ ۇستانىمىن القايدى، جۇڭگو جاقتىڭ ءساتتى زەرتتەپ - اشقان ۆاكسينانى بۇكىل الەمدىك الەۋمەتتىك ءونىم رەتىندە پايدالانۋ جونىندە بەرگەن ۋادەسىن القايدى، جۇڭگو جاقپەن ىندەتكە قارسى تۇرۋ ءدارى - دارمەگى مەن ۆاكسينا زەرتتەۋ - اشۋ سەلبەستىگىن كۇشەيتۋدى ءۇمىت ەتەدى. تايلاند جاق ءبىر جۇڭگو ساياساتىن باتىل ۇستانىپ، جۇڭگو جاقتىڭ ءوزىنىڭ وزەكتى مۇددەسىن قورعاۋدا جاساعان قۇلشىنىستارىن باتىل قولدايدى. تايلاند جاق تايلاند پەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 45 جىلدىعىن قۇتتىقتاۋدى وراي ەتىپ، تايلاند پەن جۇڭگونىڭ دوستىعى مەن سەلبەستىگىن تەرەڭدەتىپ، ەكونوميكا - ساۋدا، جاڭالىق اشۋ، كەدەيلەردى سۇيەمەلدەۋ سياقتى سالالارداعى سەلبەستىكتى كۇشەيتىپ، ”ءبىر بەلدەۋ، ءبىر جولدى“ بىرگە قۇرۋدى ىلگەرىلەتىپ، ەكى ەلدىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ دەڭگەيىن جوعارىلاتۋدى ءۇمىت ەتەدى. تايلاند جاق جۇڭگو جاقپەن بىرگە ءوڭىردىڭ بەيبىتشىلىگىن، ورنىقتىلىعىن قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.

  بايۇي جۇڭگونىڭ وڭتۇستىگىندەگى كوپ جەرلەردە سەل اپاتى تۋىلعاندىعى بايلانىسىمەن حال سۇرايتىندىعىن ءبىلدىردى، شي جينپيڭ بۇعان العىس ايتاتىندىعىن ءبىلدىردى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.