شينحۋا اگەنتتىگىنىڭ شىجياجۋاڭنان بەرگەن حابارى (ءتىلشى ياڭ فان). قىزمەت ۇستەلىندە قالعان كالەندار، جەپ تاۋسىلماعان پراندىك، ورىندىقتىڭ ارقالىعىندا ءىلىنۋلى تۇرعان شاپان... 5 جىل ءوتتى، ءبىراق حىبەي ولكەسى سۋنيڭ اۋداندىق قوعام حاۋىپسىزدىگى مەكەمەسىندەگى كوپتەگەن قىزمەتتەستەرىنىڭ نازارىندا سول تۇستاعى جىڭۋي شۋە يۇڭچيڭنىڭ بارلىق بولمىسى ءالى كوز الدىندا ەدى.
2015 - جىلى 6 - ايدىڭ 8 - كۇنى جەتى قاراڭعى تۇندە سۋنيڭ اۋدانى شيشىباۋ قىستاعىندا قىلمىس كۇماندىسى ليۋ شۋاڭرۇي قولىنا قوس اۋىز اڭ مىلتىعىن الىپ، ارت - ارتىنان سول قىستاقتاعى 2 ادامدى اتىپ ءولتىرىپ، 3 ادامدى جارالايدى. 6 - ايدىڭ 9 - كۇنى تۇنگى ساعات 1دەن اسقاندا، شۋە يۇڭچيڭ حاباردى ەستي سالا اترەتتى باستاپ جەتىپ كەلەدى.
ول، ءبىر جاعىنان، ساقشى كۇشىن جانە قارۋ - جاراق جابدىقتاردى ىسكە قوسسا، ءبىر جاعىنان، ۋاقيعا تۋىلعان جەردەگى اۆتوكولىكتەردىڭ ءبارىنىڭ شىراعىن جاققىزىپ، قاراڭعى قالتارىسقا بۇقپانتايلاعان قىلمىس كۇماندىلارىنا سەس كورسەتەدى، تۇتقىنداۋ قىزمەتى ىلە - شالا باستالادى.
تاڭعى ساعات 3 كەزىندە، قىستاقتىڭ شىعىسىنان كەنەت مىلتىق داۋىسى ەستىلىپ، شۋە يۇڭچيڭ اترەتتى باستاپ قورشاپ الادى. ءيت جاتتىقتىرۋشى يۋان شۋاي ساقشى ءيتىن ەرتىپ ناق مايدانعا اتىلىپ كىرگەندە، قاراڭعىدا جاسىرىنىپ جاتقان قىلمىس كۇماندىسىنىڭ اتقان وعى تيەدى. شۋە يۇڭچيڭ اترەت مۇشەلەرىن يۋان شۋايدى ەمدەلۋگە جەتكىزۋگە بۇيىرادى دا، ءوزى كوپشىلىكتىڭ الدىنا اتىلىپ شىعادى.
تۇتقىنداۋ ءتۇيىنى ەڭ سوڭىندا قىلمىس كۇماندىسىنىڭ ءۇيىنىڭ كونە تۇراعىنا شوعىرلانادى. تاڭ اعارىپ اتىپ، قىستاق تۇرعىندارى ۇزدىك - سوزدىق سىرتقا شىعا باستايدى، ەگەر كوپشىلىك قاۋمالاي كەلسە، ءتىپتى ۇلكەن حاۋىپ تۋادى، سونداي - اق قىلمىس كۇماندىسىنا پايدالانارلىق وراي تۋىلۋشى ەدى. شۋە يۇڭچيڭ شايقاستى دەرەۋ اياقتاتۋعا بەكىپ، قورشايتىن كۇشتەردى ورنالاستىرعان سوڭ، اۋداندىق قوعام حاۋىپسىزدىك مەكەمەسىنىڭ ءتارتىپ تەكسەرۋ شۋجيى جاڭ جىحۇڭ مەن 4 ساقشىنى ەرتىپ تۇتقىنداۋعا كىرىسەدى.
اۋلادا دا، ۇيدە دە ەشكىم جوق، شۋە يۇڭچيڭ ەسىكتىڭ جانىندا ءبىر ساتى تۇرعانىنا نازار اۋدارادى، ول ءۇي توبەسىن قىلمىس كۇماندىسى جاسىرىنۋ مۇمكىندىگى ەڭ جوعارى ورىن بولار دەپ تۇجىرىمدايدى. سول كەزدە ءۇي توبەسى جيەگىنىڭ استىندا جاڭ جىحۇڭ مەن شۋە يۇڭچيڭ ەكەۋى عانا قالعان بولاتىن، شۋە يۇڭچيڭ جاڭ جىحۇڭدى ارتقا يتەرىپ، ءوزى ءبىر قولىنا ناگان الىپ، ەندى ءبىر قولىمەن ساتىنى ۇستاي اقىرىن جوعارى ورلەيدى.
”تاجىريبەگە يە جانە جاي ساۋاتى بار قارت ساقشى جونىنەن، ول قاتەردىڭ دارەجەسىن بىلۋگە ءتيىس، ەگەر قولىنا زاقىمداۋ كۇشى ەرەكشە زور قوس اۋىزدى اڭ مىلتىعىن ۇستاعان قىلمىس كۇماندىسىنىڭ ءۇي توبەسىندە بولسا سوڭى نەگە سوعارى بەلگىلى ەدى“، - دەپ ەسىنە الدى جاڭ جىحۇڭ.
كوپ ويلانۋعا ۇلگىرتپەي، ءۇي توبەسىنەن قۇلاق تۇندىرارلىق مىلتىق داۋىسى شىقتى. ءۇي توبەسىن تەكسەرىپ شىققان شۋە يۇڭچيڭ جەرگە اۋىر قۇلاپ ءتۇسىپ، قۇتقارۋ ءونىم بەرمەي، داڭقپەن قۇربان بولدى. بارار جەر، باسار تاۋى قالماعان قىلمىس كۇماندىسى ەڭ سوڭىندا وزىنە ءتيىستى جازاسىن تارتتى.
1989 - جىلى ساقشى بولعاننان كەيىن، شۋە يۇڭچيڭ باستان - اياق مىندەتىن، جاۋاپكەرشىلىگىن ادا ەتىپ، جۇرتتىڭ الدىندا ءجۇردى، ءار جولى تۇتقيىل ۋاقيعا تۋىلعاندا، ءوزىن ەڭ حاۋىپتى گرۋپپاعا ءبولدى. ول بۇرىن مەملەكەتتىك قوعام حاۋىپسىزدىگى ەكونوميكالىق قىلمىستاردى بارلاۋ جۇيەسىندەگى وزات جەكە بولعان، ”ولكە بويىنشا تاڭداۋلى حالىق ساقشىسى“، ”ولكە بويىنشا ەكونوميكالىق قىلمىستاردى بارلاۋ مامانى“، ”حىبەي ولكەسى جاڭا ۇزاق جورىق تۇتقيىل شابۋىلشىسى“ بولىپ باعالانعان.
2015 - جىلى 6 - ايدا ادام كۇشى بايلىعى جانە قوعامدىق قامتاماسىزداندىرۋ مينيسترلىگى، قوعام حاۋىپسىزدىگى مينيسترلىگى شۋە يۇڭچيڭعا ”مەملەكەتتىك قوعام حاۋىپسىزدىگى جۇيەسىندەگى 1 - دارەجەلى قاھارمان ۇلگى“ داڭقتى اتاعىن تولىقتاپ بەردى، حىبەي ولكەلىك پارتكوم، ولكەلىك ۇكىمەت شۋە يۇڭچيڭعا ”حالىقتىڭ قورعاۋشىسى“ اتاعىن بەرسە، حىبەي ولكەلىك ۇكىمەت شۋە يۇڭچيڭدى توڭكەرىستىك قۇربان دەپ بەكىتتى.
