7 - ايدىڭ 17 - كۇنى قالا تۇرعىندارى ءۇرىمجى قالاسى سايباق رايونىنىڭ ءبىر الەۋمەتتىك اۋماعىنداعى كوكونىس توتە ساتۋ دۇكەنىندە كوكونىس تاڭداۋدا. سۋرەتتى شينجياڭ گازەتىنىڭ جالپىلىق اقپارات قۇرالدارى ءتىلشىسى وتكۇر نيجات تۇسىرگەن
شينجياڭ گازەتىنىڭ جالپىلىق اقپارات قۇرالدارى تىلشىلەرى يۇي شي، جاۋ يۋە، يە شياۋمين 7 - ايدىڭ 17 - كۇنى ۇرىمجىدەن حابارلايدى. ءۇرىمجى قالاسىنداعى ءار دارەجەلى تاراۋلار پارمەندى قامتاماسىزداندىرۋ شاراسىن قولدانىپ، بۇقارانى تۇرمىستىق زاتتىق ماتەريالدارمەن جانە شۇعىل جاعدايعا توتەپ بەرۋ زاتتىق ماتەريالدارىمەن ءونىمدى تۇردە قامداۋعا شىنايى كەپىلدىك ەتتى. قازىر استىق - ماي، ەت، كوكونىس، جۇمىرتقا، ءسۇت سياقتى زاتتىق ماتەريالدارىنىڭ قورى جەتكىلىكتى، قامداۋ ورنىقتى، باعا تۇراقتى بولدى.
زات كىرگىزۋ ارناسىن كەڭەيتىپ، تاۋارلاردىڭ سالىنۋىن كوبەيتىپ، قامباداعى قوردى مولايتۋ ءۇشىن، يوۋحاۋ توبى دەر كەزىندە قامداۋشى ساۋداگەرلەرمەن سايكەسىپ، كۇرىش، ۇن، ماي، جەمىس - جيدەك، كوكونىس، ەت سياقتى زاتتىق ماتەريالداردىڭ كوپتەگەن قامداۋ ارناسىنىڭ قامداۋىن ىسكە اسىردى. قازىر وسى توپتىڭ كۇرىش، ۇن، ماي سياقتى تۇرمىسقا قاجەتتى بۇيىمداردى زاپاس ساقتاۋ كولەمى 3 ايلىق بازار قامداۋىن قاناعاتتاندىرا الادى. يوۋحاۋ توبى، سونداي - اق ينتەرنەت جەلىسىندە ساتىپ الۋدى، تەلەفوندا تاپسىرىس بەرۋدى بەلسەنە ورىستەتىپ، ينتەرنەت جەلىسىنەن تىس زاتتى وتباسىلارعا جەتكىزۋ ءتاسىلى ارقىلى قالا تۇرعىندارىنىڭ قاجەتىن قاناعاتتاندىردى. شينجياڭ يوۋحاۋ (توبى) جارنا شەكتى سەرىكتەستىگىنىڭ ورىنباسار القا باستىعى، قوسىمشا ەرەن بازار بولىمشە سەرىكتەستىگىنىڭ باس ديرەكتورى جاۋ چيڭمەي: ”ءبىز ىندەتتەن ساقتانۋ - تىزگىندەۋدى ۇدايىلاندىرۋدى ويداعىداي يگەرۋمەن قاتار، ءار ءتۇرلى تۇرمىستىق قاجەتتى بۇيىمداردى كىرگىزۋ ارناسى مەن ساپا وتكەلىن قاتاڭ يگەرىپ، تەكسەرۋ - كارانتيندەۋ جانە باعانى ءبىر - بىرلەپ تەكسەرۋ قىزمەتىن جاقسى ىستەپ، قالا تۇرعىندارى ءۇشىن ساپالى قىزمەت وتەۋگە كۇش سالامىز“، - دەدى.
شينجياڭ جيۋديڭ اۋىل شارۋاشىلىعى ونىمدەرىن تولايىم ساتۋ بازارى بۇكىل شينجياڭداعى اۋىل شارۋاشىلىعى قوسىمشا ونىمدەرىن، اسىرەسە، كوكونىس ونىمدەرىن نەگىزگى توپتاپ - تاراتاتىن جەر جانە ۇلەستىرىپ ساتاتىن جەر رەتىندە، ماڭىزدى اۋىل شارۋاشىلىعى ونىمدەرىمەن قامداۋعا كەپىلدىك ەتۋ قىزمەتىن كۇش سالا جاقسى ىستەپ، ءار ۇلت بۇقاراسىنىڭ تۇرمىستىق زاتتىق ماتەريال قاجەتىن قامتاماسىز ەتتى. 7 - ايدىڭ 17 - كۇنى ساعات 12دەگى ساندى مالىمەت جيۋديڭ بازارىندا 3000 توننا شاماسىندا كوكونىس ساۋدالانعانىن، قالا تۇرعىندارىنا قاجەتتى 30 ءتۇرلى ۇنەمى كەزدەسەتىن كوكونىس پەن 20دان استام ءتۇرلى ارناۋلى قامدالاتىن كوكونىس مولشەرىنىڭ جەتكىلىكتى، باعاسىنىڭ تۇراقتى ەكەنىن كورسەتتى. ۇعىسۋعا قاراعاندا، ءۇرىمجى قالاسىندا ءار كۇنى شامامەن 1500 توننا كوكونىسكە سۇرانىس بولادى ەكەن.
شينجياڭ جيۋديڭ اۋىل شارۋاشىلىعى ونىمدەرى تيجارات باسقارۋ شەكتى سەرىكتەستىگى پارتيا باس ياچەيكاسىنىڭ شۋجيى، القا باستىعى چين جۇڭ بىلاي دەپ تانىستىردى: ”ءبىز ساۋدا جاعدايىن ناق ۋاقىتىندا ديناميكالىق قاداعالاپ، ءار كۇنى نەگىزگى جەمىس - جيدەك، كوكونىس ونىمدەرىنىڭ ساۋدا ينفورماتسياسىنىڭ ساناعىن جاساپ، جوعارى دارەجەلى قاتىستى تاراۋلارعا دەر كەزىندە مالىمدەپ تۇرامىز ءارى بازارعا العى ديناميكالىق جانە ۇيلەسىمدى تالداۋ جاساۋ ۇسىنىسىن بەرىپ، ءار دارەجەلى ۇكىمەت تاراۋىنىڭ قامداۋمەن قامتاماسىز ەتۋىنە، زات باعاسىن تۇراقتاندىرۋىنا ماڭىزدى نەگىز ازىرلەيمىز. قىزمەتكەرلەردى، شارۋاشىلىق جۇرگىزۋشىلەردى، شينجياڭ سىرتىنداعى جۇك اۆتوموبيلى شوفەررىن، وعان وتىرۋشىلاردى توركوزدەندىرىپ وڭىرگە ءبولىپ باسقارۋدىڭ سىرتىندا، شينجياڭ سىرتىنداعى جۇك اۆتوموبيلى شوفەرلەرىن، وعان وتىرۋشىلاردى الاڭعا كىرگەندە تىركەۋدەن، وكىلەتتى اۆتوموبيل جۇرگىزىپ تاسىمالداۋدان تاماعىن، جاتاعىن ورنالاستىرۋعا، ادام مەن اۆتوموبيلدىڭ الاڭنان كەتۋىنە دەيىنگى جالپى بارىستى قاتاڭ باسقارىپ تىزگىندەيمىز“.
بەييۋانچۇن بازارىنداعى ساۋداگەرلەر زات قاينارىن بەلسەنە ۇيىمداستىرىپ، ۇلەستىرۋ - جونەلتۋ ارنالارىن سايكەستىرىپ، تاماشا قامداۋ ءتارتىبىن ساقتادى. 7 - ايدىڭ 17 - كۇنى تاڭعا جۋىق ۋاقىتتان باستاپ، بەييۋانچۇن بازارىنداعى 270تەن استام تيجارات جۇرگىزۋشى ساۋداگەر تۇندەلەتىپ كوكونىس تاسىپ، كوكونىستىڭ زاپاس مولشەرى 200 تونناعا جەتتى. ءۇرىمجى بەييۋانچۇن (توبى) شەكتى جاۋاپكەرشىلىك سەرىكتەستىگى بەييۋانچۇن بازارى ينفورماتسيا ورتالىعىنىڭ ديرەكتورى لي شۋەشان: ”جاسىل جاپىراقتى كوكونىستەر وڭاي ساقتالمايدى، سوندىقتان تيجاراتشىلار نەگىزىنەن سول كۇنى اكەلىپ سول كۇنى ساتادى. ءبىز بارلىق تيجاراتشىلاردان باعاسىنىڭ، ءسوز جوق، انىق بولۋىن، الاڭعا كىرگەن كوكونىستەردە، ءسوز جوق، وندىرىلگەن جەر انىقتاماسى نەمەسە زات كىرگىزۋ تالونى بولۋ كەرەكتىگىن تالاپ ەتەمىز“، - دەدى.
ۇعىسۋعا قاراعاندا، ءۇرىمجى قالاسىندا الەۋمەتتىك اۋماقتارداعى 532 كوكونىس، قوسىمشا ازىق - تۇلىك تىكە ساتۋ دۇكەندەرى (الەۋمەتتىك اۋماقتارداعى قوي، سيىر ەتىن تىكە ساتۋ دۇكەندەرىن قامتيدى) قالىپتى تيجارات جۇرگىزىپ، قالا تۇرعىندارىن كوكونىسپەن، سيىر، قوي ەتىمەن قامداعان. سونىمەن بىرگە، قالا دارەجەلى شۇعىل جاعدايعا توتەپ بەرىپ قامداۋعا كەپىلدىك ەتۋشى كاسىپورىندار بازاردىڭ ديناميكالىق وزگەرىسىنە قاداعالاي نازار اۋدارىپ، زاپاس تاۋارلاردى ساتىپ الىپ باسقارۋدى، تاسىمالعا دايىنداۋدى جانە بازاردىڭ قامداۋىن بار كۇشپەن جاقسى ىستەگەن. مۇنان سىرت، ورتالىق قالانىڭ بازار باقىلاۋ - باسقارۋ تاراۋلارى دا باقىلاۋ - باسقارۋدى كۇشەيتىپ، قىمباتقا ساتۋ ءۇشىن ىركۋ، زات باعاسىن قىمباتتاتۋ، جالعان تاۋار ءوندىرۋ، ساتۋ سياقتى زاڭسىز ارەكەتتەرگە قاتاڭ سوققى بەرەدى.
