شينجياڭ گازەتىنىڭ جالپىلىق اقپارات قۇرالدارى ءتىلشىسى لي چۇنشيا 7 - ايدىڭ 17 - كۇنى ۇرىمجىدەن حابارلايدى. ءۇرىمجى قالالىق ىندەتتىڭ الدىن الۋ، تىزگىندەۋ ورتالىعىنان ۇعىسۋىمىزشا، 7 - ايدىڭ 16 - كۇنى ساعات 0دەن 7 - ايدىڭ 17 - كۇنى ساعات 12گە دەيىن ءۇرىمجى قالاسىندا جاڭا تيپتى ايدارشا ۆيرۋس وكپە قابىنۋ دياگنوزى تۇراقتاندىرىلعان 5 ناۋقاس، اۋرۋ بەلگىسى جوق 8 جۇعىمدالۋشى جاڭادان قوسىلعان. 7 - ايدىڭ 15 - كۇنى ساعات 0دەن 7 - يدىڭ 17 - كۇنى ساعات 12گە دەيىن ۇرىمجىدە دياگنوزى تۇراقتاندىرىلعان 6 ناۋقاستىڭ، اۋرۋ بەلگىسى جوق جۇعىمدالۋشىدان 11 ادامنىڭ ءبارى ۇيلەسىمدى مەديتسينالىق قۇتقارۋ - ەمدەۋگە يە بولدى جانە اۋاشالانىپ مەديتسينالىق باقىلاۋعا الىندى.
وسى جولعى ىندەت جاعدايى بايقالعاننان كەيىن، ءۇرىمجى قالالىق جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ قىزمەتى قولباسشىلىق شتابى بارىنشا ءمان بەرىپ، شۇعىل جاعدايعا توتەپ بەرۋ، دايىندىق جوباسىن دەرەۋ ىسكە قوسىپ، دياگنوزى تۇراقتاندىرىلعان ناۋقاستار مەن اۋرۋ بەلگىسى جوق جۇعىمدالۋشىلاردىڭ جاعدايىنا مۇقيات تالداۋ جاساپ، ەپيدەميولوگيالىق تەكسەرۋ جانە تەگىن انىقتاۋ قىزمەتىن زور كۇشپەن ورىستەتىپ، ءبىر ادامنىڭ دا قاعىس قالماۋىنا شىنايى كەپىلدىك ەتتى، قازىرگە دەيىن تىعىز جاناسقان 135 ادامعا شوعىرلى تۇردە مەديتسينالىق باقىلاۋ شاراسىن قولداندى.
تارالۋ جولىن كەسۋ ءۇشىن، ءۇرىمجى قالالىق جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ قىزمەتى قولباسشىلىق شتابى نازاردى ءتۇيىندى ادامدار شوعىرىنا، ءتۇيىندى ورىندارعا شوعىرلاندىرىپ، قاتاڭ باسقارۋ - تىزگىندەۋ شاراسىن قولدانىپ، نۋكلەين قىشقىلىن تەكسەرۋگە تيىستىلەردى مۇمكىندىكتىڭ بارىنشا تەكسەرىپ، كارانتيندەۋگە تيىستىلەردى مۇمكىندىكتىڭ بارىنشا كارانتينگە الىپ، ىندەتتىڭ ونان ارى تارالىپ ءورشۋىن باتىل اۋىزدىقتادى.
ءۇرىمجى قالالىق ىندەتتىڭ الدىن الۋ، تىزگىندەۋ ورتالىعى پارتيا ياچەيكاسىنىڭ ورىنباسار شۋجيى، مەڭگەرۋشى رۇي باۋليڭ بىلاي دەپ تانىستىردى: ءۇرىمجى قالاسىنداعى قازىر دياگنوزى تۇراقتاندىرىلعان ناۋقاستاردىڭ، اۋرۋ بەلگىسى جوق جۇعىمدالۋشىلاردىڭ بارلىعى شوعىرلى مەديتسينالىق باقىلاۋعا الىندى، ءۇرىمجى قالاسىنىڭ ىندەت جاعدايى جالپى العاندا تىزگىندەلگەن، كوپشىلىك ۇرەيلەنبەسىن. قاتىستى تاراۋلار ۇگىتتى جاپپاي كۇشەيتىپ، ءار ۇلت بۇقاراسىن عىلمي قورعانۋدى ويداعىداي ىستەۋگە جەتەكتەپ، ىندەت جاعدايىن دەر كەزىندە جاريالاپ، قوعام ءجىتى نازار اۋدارىپ وتىرعان ىستەرگە ىرىقتىلىقپەن جاۋاپ قاتادى.
رۇي باۋليڭ قالىڭ قالا تۇرعىندارىنا مىنانى ەسكەرتتى: كۇندەلىكتى سىرتقا شىققاندا، ماسكى تارتۋدى، ءسوز جوق، ەستەن شىعارماي، توپتالماي، قوعامدىق قارىم - قاتىناستا حاۋىپسىز ارالىق ساقتاپ، كەزدەسكەندە قول الىسپاۋ، الەۋمەتتىك قۇرىلعىلار مەن بۇيىمدارعا مۇمكىندىكتىڭ بارىنشا جۋىماۋ؛ تۇرمىستا قولدى ءجيى جۋىپ، ۇنەمى اۋا الماستىرىپ، جەكە باستىق قورعانۋدى جانە ورتانى تازالاپ، زارارسىزداندىرۋدى ويداعىداي ىستەۋ كەرەك. ەگەر تۇرعىندار دەنەسى جايسىزدانسا، دەر كەزىندە الەۋمەتتىك اۋماققا مالىمدەپ، قورعانۋ تالابىنا ساي تەزىرەك شيپاگەرگە كورىنىپ، اۋرۋ جاعدايىن جانە ەپيدەميولوگيالىق تاريحىن شىنايى مالىمدەۋى كەرەك. الەۋمەتتىك اۋماقتار، اۋاشالاۋ ورىندارى قاتاڭ باسقارىپ، قامتاماسىزداندىرۋدى جاقسى ىستەپ، اۋاشالاۋ شاراسىنىڭ ناقتاپ تياناقتانۋىنا شىنايى كەپىلدىك ەتۋى كەرەك.
