شينجياڭ گازەتىنىڭ جالپىلىق اقپارات قۇرالدارى تىلشىلەرى لي چۇنشيا، جاۋ چۇنحۋا 7 - ايدىڭ 19 - كۇنى ۇرىمجىدەن حابارلايدى. ىندەتتەن ساقتانۋ - تىزگىندەۋدى ويداعىداي ىستەۋ ءۇشىن، جۋىقتا ءۇرىمجى قالاسى تۇتاس قالا كولەمىندە نۋكلەين قىشقىلىن تەگىن تەكسەرۋ قىزمەتىن توپقا ءبولىپ، ءتارتىپتى ورىستەتپەك. ءۇرىمجى قالالىق دەنساۋلىق ساقتاۋ - سالاماتتىق كوميتەتىنىڭ مەڭگەرۋشىسى جاڭ ۋي قالا تۇرعىندارىنا نۋكلەين قىشقىلىن تەكسەرگەن كەزدە ءوز قورعانۋىن ويداعىداي ىستەۋ كەرەكتىگىن ەسكەرتتى.
جاڭ ۋيدىڭ تانىستىرۋىنا قاراعاندا، ءۇرىمجى قالاسى ءارقايسى رايوندا بىرنەشە ۇلگى جيۋ تۇيىندەرىن قۇرعان، الەۋمەتتىك اۋماقتار تۇرعىنداردى ۇيىمداستىرىپ، تەكسەرۋدى ءتارتىپتى جۇرگىزەدى ەكەن. قالا تۇرعىندارى ءوزى تۇرعان الەۋمەتتىك اۋماقتىڭ حابارلاندىرۋ تالاپتارى بويىنشا بەلگىلەنگەن ۇلگى الۋ تۇيىندەرىنە بارىپ ۇلگى بەرگەندە، ءوز قورعانۋىن ويداعىداي ىستەۋىن، ءبىر مەتر ارالىق ساقتاۋىن، ۇيمەلەمەۋىن، توپتاسپاۋىن، نۋكلەين قىشقىلىن تەكسەرۋ قىزمەتىنە تارتىپپەن سايكەسۋىن وتىنەمىز.
جاڭ ۋي قالا تۇرعىندارىنا مىنالاردى ەسكەرتتى: نۋكلەين قىشقىلىن تەكسەرتكەن ۋاقىتتا تومەندەگىدەي ىستەرگە كوڭىل ءبولۋ كەرەك: نۋكلەين قىشقىلىن تەكسەرۋگە دەيىنگى 2 ساعاتتا تاماق ىشۋگە بولمايدى، تەكسەرۋ ناتيجەسىنە ىقپال جەتۋدەن ساقتانۋ ءۇشىن، ۇلگى الۋدان 30 مينۋت بۇرىن تەمەكى شەگۋگە، اراق ىشۋگە جانە ساعىز شايناۋعا بولمايدى؛ ءوزارا جۇعىمدالۋ قاتەرىن تومەندەتۋ ءۇشىن، بارلىق تەكسەرۋشىلەر ماسكى تارتۋى ءارى ءبىر زاپاس ماسكى دايىنداپ الۋى، ۇلگى الۋ اياقتاعاننان كەيىن اۋىستىرىپ تارتۋى قاجەت؛ مۇرىن - جۇتقىنشاقتان تامپونمەن ۇلگى الۋدان بۇرىن تەكسەرىلۋشى ۇلگى الۋشى قىزمەتكەرگە مۇرىن شەرشەۋى قيسايعان نەمەسە مۇرىن قۋىسى وپەراتسياسىن جاساتۋ تاريحىنىڭ بار - جوعىن ايتۋى كەرەك، بۇل بارىستا مۇرىن اشىپ قىشىسا، تىتىركەنىپ تۇشكىرسە، دەرەۋ قاعاز ورامالمەن نەمەسە شىنتاقپەن توسۋ قاجەت؛ نۋكلەين قىشقىلىن تەكسەرۋدىڭ الدى - ارتىندا قولدىڭ تازالىعىنا كوڭىل ءبولۋ، زارارسىزداندىرۋ سۇيىقتىعىمەن نەمەسە سپيريتپەن قوس قولدى ءسۇرتۋ كەرەك؛ ۇلگى العان كەزدە ادامدار ارا ءبىر مەتردەن ارتىق ارالىق ساقتاۋ قاجەت؛ ۇلگى العاندا جانە تەكسەرۋ ناتيجەسىن العاندا، ءسوزسىز، ازاماتتىق كۋالىگىن الا ءجۇرۋ كەرەك.
