تيانشان تورى
تيانشان تورى   ›   جاڭالىقتار   ›   ۇلتتىڭ گۇلدەنۋى جولىندا ەرجۇرەك قۇرباندار شەجىرەسى

لي جيڭجۇڭ: وق تيگەنىنە قاراماي ەسىرتكى الىپساتارىنا ۇمتىلدى

لي جيڭجۇڭنىڭ كوزى تىرىسىندە جاتتىعۋ جاساپ جۇرگەن سۋرەتى. شينحۋا اگەنتتىگى تاراتقان

  شينحۋا اگەنتتىگىنىڭ كۇنميڭنەن بەرگەن حابارى (ءتىلشى ۋاڭ يان). ونىڭ اتى لي جيڭجۇڭ، ول اتى زاتىنا ساي كاسىبىن قادىرلەيتىن، ادال جان بولاتىن. يۇننان شەكارا وڭىرىندەگى ەسىرتكىگە تيىم سالۋ ۇلكەن اترەتىنىڭ ساقشىسى بولعان ول بارلىعىن، ءتىپتى، ءومىرىن دە ەسىرتكىگە تيىم سالۋ ىستەرىنە ارنادى.

  لي جيڭجۇڭ 1984 - جىلى 8 - ايدا دۇنيەگە كەلگەن، لاحۋ ۇلتى، جۇڭگو كوممۋنيستىك پارتياسىنىڭ مۇشەسى، 2007 - جىلى قوعام حاۋىپسىزدىگى قىزمەتىنە قاتىناسقان، كوزى تىرىسىندە يۇننان ولكەسى شيشۋاڭباننا وبلىسى جيڭحۇڭ قالالىق قوعام حاۋىپسىزدىگى مەكەمەسى ەسىرتكىگە تيىم سالۋ ۇلكەن اترەتىنىڭ ورىنباسار باستىعى بولعان. كاسىبىن قادىرلەۋ، ادال بولۋ لي جيڭجۇڭنىڭ ەڭ شىنايى بەينەسى بولاتىن: ساقشى بولعان 9 جىلدا ول جيىنى 382 رەت ەسىرتكى دەلوسىن بارلاپ اشۋعا قاتىناسىپ، قىلمىس كۇماندىلارىنان 354ىن تۇتقىنداپ، 3820 گرام ەسىرتكىنى قولعا ءتۇسىرىپ، 90 ميلليون يۋاننان استام ەسىرتكى قارجىسىن، 29 مىلتىق، 1500دەن استام وقتى ولجالاپ، ىلگەرىندى - كەيىندى جەكەلەي 3 رەت ءۇشىنشى دارەجەلى ەڭبەك كورسەتكەن.

  كوپشىلىك ونى ”كەم ءسوزدى، بار ويلاعانى دەلو“ دەپ سۋرەتتەيدى. ول جاپاكەش ەدى، قىلمىس كۇماندىلارىن تۇتقىنداۋ ءۇشىن تالاي رەت جالعىز ءوزى بارلاۋ جۇرگىزىپ، ەرىنبەي - جالىقپاي ءاربىر ينفورماتسيانى ءبىر - بىرلەپ تەكسەرىپ اداقتاپ، تالداۋ جاساپ، ءار رەت مىندەتتى تۇگەلدەي تابىسپەن ورىنداپ وتىردى. وندا قايسار كۇش بار ەدى، دەلو اشىلمايىنشا تىنىم المايتىن، ول ءبىر كۇندە ارت - ارتىنان 10 مىڭ گرام كەلەتىن 3 ەسىرتكى دەلوسىن اشىپ، مەكەمە ىشىندە ”اڭىزعا“ اينالعان ەدى.

  2016 - جىلى 11 - ايدىڭ 4 - كۇنى تاڭعا جۋىق، ادامداردىڭ كوبى شىرت ۇيقىدا جاتقان شاق، جيڭحۇڭ قالالىق قوعام حاۋىپسىزدىگى مەكەمەسى ەسىرتكىگە تيىم سالۋ ۇلكەن اترەتىنىڭ ساقشىلارى ءباز - باياعىسىنداي قاربالاس قىزمەت ىستەپ جاتقان ەدى. ولار الگىندە عانا كوپتەن بەرى سوڭىنا تۇسكەن بىرنەشە ەسىرتكى الىپساتارىنىڭ شەكاراعا كىرىپ، جيڭحۇڭ قالاسى جيڭحا اۋىلى جۇڭگو - بيرما شەكاراسىندا ەسىرتكى ساۋدالاماقشى بولىپ جاتقانى تۋرالى حابار الادى. ول جەردىڭ ورمانى بىتىك، جالعىز اياق جولى كوپ ەدى، تۇتقىنداۋدىڭ ءساتتى بولۋىنا شىنايى كەپىلدىك ەتۋ ءۇشىن، ولار ايىرباس جاساماق بولعان جەردىڭ قاتىستى جاعدايىنا زەرتتەۋ جۇرگىزىپ، تالداۋ جاساپ، تۇتقىنداۋ جوسپارىن جاسايدى ءارى جۇمىس بولىسەدى. ەسىرتكى الىپساتارلارى ەشتەڭە سەزبەگەن كەزدە، تۇزاق قۇرۋ جىم - جىرت ورىندالىپ قويعان ەدى.

  ءدال ءتۇس بولعاندا، دالالىق اۆتوموبيلدە وتىرعان 2 ەسىرتكى الىپساتارى ەسىرتكى ساۋدالاي باستايدى. الدىڭعى شولعىنشى دەرەۋ ارەكەت جاساۋ سيگنالىن بەرىپ، ءار گرۋپپا بىردەي ۋاقىتتا شابۋىلعا شىعادى، ەسىرتكى الىپساتارلارىنىڭ اۆتوموبيلىن ساقشىلار ايداعان 2 اۆتوموبيل ءبىرى الدىنان، ءبىرى ارتىنان بوگەپ الادى، ءبىر ەسىرتكى الىپساتارى ساسقالاقتاپ اۆتوموبيلدەن سەكىرىپ تۇسكەننەن كەيىن ماڭىنداعى قالىڭ ورمانعا قاراي قاشا جونەلەدى، لي جيڭجۇڭ اۆتوموبيلدەن تۇسە سالىسىمەن - اق ەسىرتكى الىپساتارىنىڭ اۆتوموبيلىنە قاراي تاپ بەرەدى. ءدال وسى شاقتا ”تارس“ ەتىپ، اۆتوموبيلدىڭ ارتقى ورىندىعىندا قورعالاپ وتىرعان ەسىرتكى الىپساتارى وعان وق شىعارادى. وق لي جيڭجۇڭنىڭ موينىن تەسىپ وتە شىعادى، ول اۋەلگىدەي اۆتوموبيلدىڭ ارتقى ەسىگىنە قاراي اتىلادى. قارا نيەتى قابىنىپ قۇتىرىنعان ەسىرتكى الىپساتارى ەكىنشى وقتى دا شىعارىپ ۇلگىرەدى... لي جيڭجۇڭ جەرگە جىعىلىپ تۇسەدى. ول ءوزىنىڭ دەنەسىمەن ەسىرتكى الىپساتارىنىڭ كورۋ اياسى مەن وعىن توسقان سول ءبىر ءسات جاۋىنگەر سەرىكتەرىنىڭ حاۋىپسىزدىگىن قورعاپ قالىپ، ولاردىڭ ەڭ سوڭىندا مىلتىق اتقان ەسىرتكى الىپساتارىن ءساتتى تۇتقىنداۋىنا مۇمكىندىك جاسايدى.

  اۆتوموبيل لي جيڭجۇڭدى سالىپ الىپ شيپاحاناعا قاراي زۋلايدى. ساعات 13تەن 20 مينۋت وتكەندە، لي جيڭجۇڭ شۇعىل قۇتقارۋ ءونىم بەرمەي قۇربان بولادى. جاۋىنگەر سەرىكتەرى قايعىنى قايراتقا اينالدىرىپ، 30 نەشە ساعات ۇزدىكسىز شايقاس جاساپ، سوڭىندا دەلوعا قاتىستى بارلىق ادامدى تۇتقىندايدى. بۇل دەلودا جيىنى 21 كيلوگرام ەسىرتكى، 2 ناگان ولجالانادى.

  11 - ايدىڭ 7 - كۇنى جيڭحۇڭ قالاسى سۋ شاشۋ الاڭىندا لي جيڭجۇڭنىڭ سۇيەگىمەن قوشتاسۋ سالتى وتكىزىلەدى، 100 مىڭنان استام بۇقارا وزدىكتەرىنەن الاڭعا كەلىپ، ونى سوڭعى ساپارعا شىعارىپ سالادى. 2017 - جىلى 5 - ايدا لي جيڭجۇڭدى يۇننان ولكەلىك حالىق ۇكىمەتى قۇربان دەپ تۇراقتاندىرادى، سول جىلى 9 - ايدا ”مەملەكەتتىك قوعام حاۋىپسىزدىگى جۇيەسىندەگى 1 - دارەجەلى قاھارمان ۇلگى“ اتاعى تولىقتاپ بەرىلەدى.

  قاھارمان ومىردەن ءوتتى، ءبىراق لي جيڭجۇڭنىڭ ومىرىمەن، ىستىق قانىمەن سومداعان رۋحى جيڭحۇڭ قالالىق قوعام حاۋىپسىزدىگى مەكەمەسى ەسىرتكىگە تيىم سالۋ ۇلكەن اترەتىندەگى ءاربىر حالىق ساقشىسىن جىگەرلەندىرىپ كەلەدى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.