تيانشان تورىنىڭ حابارى (تىلشىلەرىمىز يۇي جياڭيان، لۇي ي - حاندار حابارلايدى) جاڭا تيپتى ايدارشا ۆيرۋس وكپە قابىنۋ دياگنوزى تۇراقتاندىرىلعان ناۋقاستار مەن اۋرۋ بەلگىسى جوق جۇعىمدالۋشىلارعا قالاي قۇتقارۋ، ەمدەۋ جۇرگىزىلۋدە؟ كەزەكتە ەمدەۋ ونىمدىلىگى قانداي؟ وسى رەتكى جاڭا تيپتى ايدارشا ۆيرۋس وكپە قابىنۋ ىندەتىنە توتەپ بەرۋدە شيپاحانا ادام، زاتتىق ماتەريال جاقتارىندا قانداي كەپىلدىكتەر مەن دايىندىقتار جاسادى؟ 7 ـ ايدىڭ 20 ـ كۇنى تىلشىلەر اۆتونوميالى رايوندىق جۇقپالى اۋرۋلار شيپاحاناسى پارتكومىنىڭ مۇشەسى، ورىنباسار باستىعى سۇڭ يۇيشياعا ارناۋلى تىلشىلك ىستەدى.
ٴتىلشى: بۇل جولى ەمدەۋگە الىنعان ناۋقاستاردا قانداي ەرەكشەلىكتەر بار؟
سۇڭ يۇيشيا: وسى رەت ۇرىمجىدە بايقالعان ىندەتتى بيىل جىل باسىنداعى ىندەتپەن سالىستىرعاندا، ناۋقاستار تۇگەلدەي دياگنوزى تۇراقتاندىرىلعان جانە اۋرۋ بەلگىسى جوق جۇعىمدالۋشىلار. ٴبىز ەرتەرەك بايقادىق، سونداي - اق جۇمىلا كىرىسۋ شارالارىن ەرتەرەك قولداندىق.
ٴتىلشى: جەڭىل تيپتەگى جانە اۋرۋ بەلگىسى جوق جۇعىمدالۋشىلارعا قانداي قۇتقارۋ - ەمدەۋ جوباسى قولدانىلدى؟ قازىر ناۋقاستاردىڭ جاعدايى قالاي؟
سۇڭ يۇيشيا: جەڭىل تيپتەگى ناۋقاستار مەن اۋرۋ بەلگىسى جوق جۇعىمدالۋشىلار دەر كەزىندە بايعالعان كەزدە كەيبىر جۇمىلا كىرىسۋ شارالارىن قولدانسا، جەڭىلدەن اۋىرعا اينالۋدىڭ الدىن الۋعا بولادى. ناۋقاستاردى ەمدەۋ بارىسىندا كوپ ٴتۇرلى پاندەر سەلبەسىپ ەمدەپ - قۇتقارىپ، ”ٴبىر ادامعا ٴبىر شارا قولدانۋدى“ اتقارىپ، جۇڭگوشا شيپاگەرلىك پەن باتىسشا شيپاگەرلىكتى بىرلەستىرىپ ەمدەۋ جۇرگىزىپ، ناۋقاستاردى ەمدەۋ - قۇتقارۋدىڭ عىلمي، ٴتارتىپتى بولۋىنا شىنايى كەپىلدىك ەتتىك.
جەڭىل تيىپتەگى جانە اۋرۋ بەلگىسى جوق جۇعىمدالۋشىلاردىڭ اۋىر تيپكە وزگەرۋىنەن ساقتانۋ ٴۇشىن، ناۋقاستاردىڭ اۋرۋ جاعدايىن قاداعالاي باقىلاپ، ناۋقاستاردىڭ تىرشىلىك بەلگىسى مەن ٴتۇرلى تەكسەرۋ كورسەتكىشتەرىنە ٴار كۇنى تالداۋ، تۇجىرىم جاسادىق. حاۋىپ - قاتەر ٴتۇيىنىن دەر كەزىندە بايقاپ، دەر كەزىندە ارالاسىپ، ەرتەرەك سوڭىنا ٴتۇسىپ مەجەلەپ ٴارى اۋرۋ جاعدايىنا قاراي ۇعىنا ٴجۇرىپ ەمدەپ، ٴىس جۇزىندىك ونىمدىلىككە قول جەتكىزدىك.
7 - ايدىڭ 17 - كۇنىنەن باستاپ شيپاحانامىز شۇعىل جاعدايعا توتەپ بەرۋ قولباسشىلىق قىزمەتىن الدىعا جىلجىتىپ، اۋرۋ جاعدايىنا ٴار كۇنى تۇجىرىم جاساۋ، مالىمەت بەرۋ ٴتۇزىمىن ورناتىپ، بۇكىل شيپاحانانىڭ شۇعىل قۇتقارۋ، ەمدەۋ جاعدايىنا تالداۋ جاساپ، ەمدەۋ بارىسىنداعى جەتەرسىزدىكتەردى دەر كەزىندە شەشتىك. سونىمەن بىرگە، شيپاحانانىڭ الدىن الا تەكسەرۋ، بولەك دياگنوز قويۋ، قىزۋ امبۋلاتورياسى جانە شيپاحانانىڭ جۇعىمدالۋدان ساقتانۋ - تىزگىندەۋ قىزمەتىن اناعۇرلىم كۇشەيتتىك. قازىر بەلسەنە ەمدەۋ ارقىلى ناۋقاستاردىڭ اۋرۋ جاعدايى ورنىقتى بولۋدا.
ٴتىلشى: وسى رەتكى ىندەتكە توتەپ بەرۋدە شيپاحانالارىڭىز قانداي دايىندىقتار جاسادى؟
سۇڭ يۇيشيا: الدىڭعى مەزگىلدە ىندەتتەن ساقتانۋ - تىزگىندەۋ ۇدايىلانعان كەزدەگى ماماندار توبى تارقاماي، بۇرىنعىداي شايقاس الدىنداعى جاعدايدى ساقتادى. ولارعا مەرزىم بويىنشا شۇعىل جاعدايعا توتەپ بەرۋ جاتتىعۋىن ۇيىمداستىرىپ، جۇمىس ٴتارتىبىن جاقسارتتىق. وسى رەتكى ىندەتكە توتەپ بەرۋدە مىناداي قىزمەتتەر ىستەدىك .
شۇعىل جاعدايعا توتەپ بەرۋ جوباسىن دەرەۋ ىسكە قوسىپ، تەرىس قىسىم ناۋقاس بولمەلەرىنىڭ ناۋقاس قابىلداۋ كۇيىن باستاپ، شيپاحانانىڭ ەمدەۋ، شۇعىل جاعدايعا توتەپ بەرۋ اترەتىندەگى 280 ادام دەرەۋ جۇمىس ورنىنا كەلىپ، كلينيكالىق ەمدەۋ - قۇتقارۋ توبى قۇرىلدى. بوستىق قالدىرماي قىزمەتكە شىعۋ، الما - كەزەك اۋىستىرۋ ٴتاسىلى ارقىلى ٴبىرىنشى شەپتەگى ەمدەۋ - قۇتقارۋ قىزمەتىنىڭ حاۋىپسىزدىگىنە، ٴونىمدى جۇرگىزىلۋىنە بار كۇشپەن كەپىلدىك ەتتىك. كەزەكتە، شيپاحانامىز باسقا اۋرۋ رايونىنداعى توسەكتەردى بوساتىپ، ەمدەۋ بۇيىمدارىن ساقتاپ، دايىندالىپ تا بولدى.
ٴتىلشى: وسى رەتكى قۇتقارۋ- ەمدەۋ بارىسىندا، قايسى ماماندار گرۋپپاسى قاتىناستى؟
سۇڭ يۇيشيا: ”ٴتورتتى شوعىرلاندىرۋ“ پرينسيپى بويىنشا، ٴبىز ەڭ الدىمەن تىنىس الۋ، سالماقتى اۋرۋ، جۇعىمدالۋ، جۇڭگوشا ەمدەۋ، كۇتىمدەۋ، شيپاحانانىڭ جۇعىمدالۋدان ساقتانۋ - تىزگىندەۋى سياقتى 3 دارەجەلى ەمدەۋ قۇرىلىمدارىنىڭ 55 مامانىنان ۇيىمداسقان ”اۆتونوميالى رايوندىق جاڭا تيپتى ايدارشا ۆيرۋس وكپە قابىنۋ ىندەتىن قۇتقارۋ - ەمدەۋ ماماندار گرۋپپاسىن“ ىسكە قوسىپ، اۋرۋ جاعدايىن دەر كەزىندە مەجەلەپ، تالداۋ جاسادىق. اۋرۋ جاعدايىنىڭ وزگەرىسىن قاداعالاي باقىلاپ، اۋرۋ جاعدايىنىڭ جەڭىلدەن قاتەرلى جاعدايعا اينالۋىنان ساقتاندىق.
كەزەكتە، مەملەكەتتىك كەڭەستىڭ جاڭا تيپتى ايدارشا ۆيرۋس وكپە قابىنۋ ىندەتىنە توتەپ بەرۋ بويىنشا بىرلەسىپ ساقتانۋ، بىرلەسىپ تىزگىندەۋ مەحانيزمى ماماندار گرۋپپاسى بىزبەن بىرلەسىپ قىزمەت ورىستەتۋدە. ٴبىز مامانداردىڭ جەتەكشىلىگىندە، قازىرگى ەمدەۋ جوباسى مەن ٴتارتىبىن ونان ارى جاقسارتامىز.
بۇدان سىرت، تاعى شينجياڭنان حۋبەيعا كومەككە بارعان ەمدەۋ اترەتى دە بار. الدىڭعى مەزگىلدە ولار ۋحاندا قۇتقارۋ، ەمدەۋ جانە باسقارۋ جاعىندا مول تاجىريبە توپتادى، ەگەر قاجەت بولسا، ولار دا وسى رەتكى قۇتقارۋ بارىسىنا كەز كەلگەن ۋاقىتتا قاتىناسادى.
اۆتونوميالى رايوندىق پارتكوم مەن اۆتونوميالى رايوندىق حالىق ۇكىمەتىنىڭ پارمەندى قولداۋىندا، ٴسوزسىز جەڭىسكە جەتەتىندىگىمىزگە كامىل سەنەمىن.
اۋدارعان: قادىر ماقان
