تيانشان تورىنىڭ حابارى (تىلشىلەر گو ليڭ، دوۋ شيڭجۇن، جانات تولەگەن، ي تۇڭيۋان حابارلايدى ) 7-ايدىڭ 23 -كۇنى تۇستەن كەيىن ساعات 5تە، شينجياڭ ۇيعۇر اۆتونوميالى رايوندىق ۇكىمەتتىڭ اقپارات كەڭسەسى اقپار جاريالاۋ ٴماجىلىسىن اشىپ، كەزەكتەگى ٴۇرىمجى قالاسىنىڭ جاڭا تيپتى ايدارشا ۆيرۋس وكپە قابىنۋ ىندەتى جانە ودان ساقتانۋ-تىزگىندەۋ قىزمەتىنىڭ جاعدايىن حابارلاندىردى ٴارى تىلشىلەردىڭ سۇراۋىنا جاۋاپ بەردى.
تانىستىرۋعا قاراعاندا، 7-ايدىڭ 22-كۇنى ساعات 0دەن 24كە دەيىن، ٴۇرىمجى قالاسىندا جاڭادان قوسىلعان جاڭا تيپتى ايدارشا ۆيرۋس وكپە قابىنۋ دياگنوزى تۇراقتاندىرىلعان ناۋقاس 18 (مۇنىڭ ىشىندە 16 ناۋقاس اۋرۋ بەلگىسى جوق جۇعىمدالۋشىدان دياگنوزى تۇراقتاندىرىلعان ناۋقاسقا اينالعاندار)، جاڭادان قوسىلعان اۋرۋ بەلگىسى جوق جۇعىمدالۋشى 24 بولعان. 7-ايدىڭ 22-كۇنى ساعات 24كە دەيىن، ٴۇرىمجى قالاسىندا قازىر دياگنوزى تۇراقتاندىرىلعان ناۋقاس 80 ، اۋرۋ بەلگىسى جوق جۇعىمدالۋشى 77 بولعان.
”بۇگىنگى 16 ناۋقاس مەديتسينالىق باقىلاۋداعى اۋرۋ بەلگىسى جوق جۇعىمدالۋشىدان دياگنوزى تۇراقتاندىرىلعان ناۋقاسقا اينالعاندار ەكەنىن، سونىمەن بىرگە اۋرۋ بەلگىسى جوق جۇعىمدالۋشىلارعا 24 ناۋقاستىڭ جاڭادان قوسىلعاندىعىن كوپشىلىك بايقادىڭىزدار. بۇل ٴبىزدىڭ تۇتاس قالادا نۋكلەين قىشقىلىن تەگىن تەكسەرۋىمىزدىڭ توتەنشە دەركەزىندە، توتەنشە قاجەتتى ەكەندىگىن تۇسىندىرەدى“. ٴۇرىمجى قالالىق دەنساۋلىق ساقتاۋ، سالاماتتىق كوميتەتىنىڭ مەڭگەرۋشىسى جاڭ ۋي بىلاي دەپ تانىستىردى: نۋكلەين قىشقىلىن تەكسەرۋ، سارالاۋ ارقىلى كەيبىر تارالعان ناۋقاستار مەن اۋرۋ بەلگىسى جوق جۇعىمدالۋشىلاردى بايقادىق ٴارى دەرەۋ جوعارىعا مالىمدەپ، بەلگىلەنگەن شيپاحاناعا اپارىپ شوعىرلى ەمدەۋ جۇرگىزدىك. بۇل ٴبىزدىڭ ىندەتتى تىزگىندەۋىمىزگە توتەنشە ٴتيىمدى ، سونىمەن بىرگە اۋرۋ بەلگىسى بايقالماۋدان بۇرىن نەمەسە اۋرۋ بەلگىسى جەڭىلدەۋ كەزدە دەر كەزىندە ەمدەۋگە الىپ، ناۋقاستاردى سوڭعى كەزەڭدە ەمدەۋ جانە ساۋىقتىرۋدا دا توتەنشە ماڭىزدى“.
نۋكلەين قىشقىلىن تەكسەرۋدىڭ ۇزدىكسىز ىلگەرىلەۋىنە بايلانىستى، سوڭعى كەزەڭدە تاعى دا كەيبىر تارالعان ناۋقاستار مەن اۋرۋ بەلگىسى جوق جۇعىمدالۋشىلاردى انىقتاپ شىعۋ، بۇل ەرتە بايقاۋ، ەرتە مالىمدەۋ، ەرتە اۋاشالاۋ، ەرتە ەمدەۋ تالابىنا ۇيلەسەدى، ىندەت جاعدايىن ەڭ قىسقا ۋاقىت ىشىندە ٴونىمدى تىزگىندەۋگە پايدالى.
اۋرۋ بەلگىسى جوق جۇعىمدالۋشىلار ادەتتە ەكى تۇرگە بولىنەدى: ٴبىرى، جاسىرىن مەزگىلدەگى اۋرۋ بەلگىسى جوق جۇعىمدالۋ كۇيىندە بولادى، ونان كەيىن قىزۋ، دارمەنسىزدەنۋ، قۇرعاق جوتەلۋ سياقتى كلينيكالىق اۋرۋ بەلگىلەرى كورىلەدى نەمەسە CTدە تەكسەرگەندە وكپە قابىنۋ وزگەرىسى كورىلىپ، جاڭا تيپتى ايدارشا ۆيرۋس وكپە قابىنۋدىڭ دياگنوزى تۇراقتاندىرىلعان ناۋقاسىنا اينالادى؛ كەيبىر اۋرۋ بەلگىسى جوق جۇعىمدالۋشىلار دا باستان-اياق اۋرۋ بەلگىسى جوق كۇيدى ساقتايدى.
جاڭ ۋي مىنانى باسا دارىپتەدى: اۋرۋ بەلگىسى جوق جۇعىمدالۋشىلاردا دا بەلگىلى جۇعىمتالدىق بولادى. سوندىقتان كوپشىلىك جەكەلىك قورعانۋ قىزمەتىن جاقسى ىستەۋگە كوڭىل ٴبولۋى، جينالماۋى، ماسكى تاعۋى، قولدى ٴجيى جۋۋى، ٴبىر مەتردەن جوعارى قوعامدىق قارىم - قاتىناس حاۋىپسىز ارالىعىن ساقتاپ، ٴوزىنىڭ دەنساۋلىعىن جاقسى قورعاۋىمى كەرەك.
اۋدارعان: قادىر ماقان
