لۇي جيانجياڭنىڭ سۋرەتى. شينحۋا اگەنتتىگى تاراتقان
شينحۋا اگەنتتىگىنىڭ شىجياجۋاڭنان بەرگەن حابارى (ءتىلشى ياڭ فان). لۇي جيانجياڭ − نەگىزگى ساتىنىڭ حالىق ساقشىسى، جەر - الەمدى ءدۇر سىلكىندىرەرلىك پالەندەي ۇلى ءىس ەمەس، بۇقاراعا قىزمەت وتەۋدەي قاراپايىم ىستەردى كوپ ىستەۋشى عانا. الايدا، ول ءىس جۇزىندىك ارەكەتىمەن حالىق ساقشىسىنىڭ جاۋاپكەرشىلىگى مەن سول جاۋاپكەرشىلىكتى ارقالاۋىن جازىپ، قاراپايىمدىلىقتان ۇلىلىقتى سومدادى.
لۇي جيانجياڭ 1989 - جىلى ارمياعا قاتىناسقان، 2004 - جىلى اسكەري قوسىننان قوعام حاۋىپسىزدىگى ورگانىنا قىزمەت اۋىستىرعان، ساقشى بولعان 13 جىلدا باستان - اياق نەگىزگى ساتىداعى قىزمەت ورنىنا تامىر تارتتى، كوزى تىرىسىندە شىجياجۋاڭ قالالىق قوعام حاۋىپسىزدىگى مەكەمەسى چياۋشي بولىمشە مەكەمەسى انجيانچياۋ ساقشى ىستەرى پۋنكتىنىڭ مەڭگەرۋشىسى بولعان. 2017 - جىلى 12 - ايدىڭ 1 - كۇنى ول شەكتەن تىس قالجىراعاندىقتان، زورىعىپ، توسىن جۇرەك اۋرۋى قوزعالىپ، قايتىس بولدى، سول جىلى 47 جاستا عانا ەدى.
لۇي جيانجياڭنىڭ كوڭىلىندە، ”قاراستى اۋماقتىڭ شەكاراسى“ دا، ”قىزمەتتەن ءتۇسۋ“ دەيتىن ايتىلىم دا جوق. كەزەكشىلىك مىندەت وتەگەن كەزىندە ول كوپشىلىكتى باستاپ ”4 كەزەك بويىنشا 3 رەت اينالىپ“ قىزمەت ورنىنان تاپجىلمايدى. ۇيىنە قايتقان سوڭ، ول ينتەرنەتتە تاعى دا ”ۇزاق ۋاقىت بويى جەلىدە بولىپ“، كەڭەس - كومەك سۇراعان ادامدارعا كەز كەلگەن ۋاقىتتا قىزمەت وتەدى. قايتىس بولارىنان ءبىر كۇن بۇرىن ءتۇن ورتاسىندا، ول ءالى دە قىزمەت توبىندا شارلاۋ قىزمەتىن جاقسى ىستەۋدى تاپسىرىپ وتىرعان بولاتىن.
لۇي جيانجياڭ جايشىلىقتا بۇقاراعا قالاي كومەكتەسىپ، جانىنداعى قيىن ىستەردى شەشۋگە ۇنەمى باس قاتىرىپ جۇرەتىن. قارتتاردىڭ اداسىپ كەتۋىنەن ساقتانۋ ءۇشىن، اداسۋدان ساقتاناتىن ”سارى ءتۇستى بىلەزىك“ جاساپ شىقتى؛ اۆتوكولىك توقتاتۋ، جىلجىتۋ داۋ - شارىن شەشۋ ءۇشىن، ول ءۇشىنشى ۇرپاق ”اۆتوكولىكتى جىلجىتۋدىڭ زەردەلى كارتچكاسىن“ جاساپ شىقتى جانە جاڭالادى.
نەگىزگى ساتىداعى لۇي جيانجياڭ حىبەي بويىنشا تالاي رەت بىرىنشىلىكتەردى جاراتتى. ول تۇڭعىش رەت ينتەرنەتتەگى الەۋمەتتىك اۋماق ساقشى ىستەرى ءۇيىن قۇرىپ، تاجىريبەسى بۇكىل ولكەدە جالپىلاستىرىلدى، ول تاعى تۇڭعىش رەتكى الەۋمەتتىك يگىلىك بويىنشا جوعالعان زاتتاردى تانىپ الۋ تورىن قۇردى، ەڭ ەرتە شىنايى اتى - جونىمەن ميكروبلوگ اشتى، سونداي - اق بىرتىندەپ حىبەي قوعام حاۋىپسىزدىگى جۇيەسى بويىنشا ينتەرنەتتە ىقپالى ەڭ كۇشتى حالىق ساقشىسىنىڭ بىرىنە اينالدى.
ينتەرنەتتە لۇي جيانجياڭ ءۇن قاتۋعا باتىل، شەبەر بولدى، 17 مىڭنان استام بلوگ مازمۇنى ىشىندە ول كەيدە ساقشىنىڭ ىستىق - سۋىعىن ايتاتىن، كوبىندە كوپشىلىككە زيانكەستىكتەن قالاي ساقتانۋدى ۇيرەتىپ، وڭ ەنەرگيا تاراتاتىن.
لۇي جيانجياڭ كوزى تىرىسىندە: ”بۇقارا قايدا بولسا، سوندا بارىپ قىزمەت وتەيمىز، شەتسىز - شەكسىز ينتەرنەت مەنىڭ بۇقارا ءۇشىن قىزمەت ىستەيتىن ’قولىمدى‘ ۇزارتتى“ دەيتىن. بۇقارا ءۇشىن ءىس ىستەگەندە، ونىڭ اياعى دامىل تاپپايتىن، اۋزى بوسامايتىن، جۇگىرە باسىپ، شىن جۇرەگىمەن بۇقارانىڭ كوڭىل قالاۋىنان شىعا قىزمەت ىستەيتىن.
حالىق ءۇشىن قىزمەت ىستەگەندە ”قىزمەتتەن تۇسپەيتىن“ لۇي جيانجياڭنىڭ ءوز باسى ءۇپى - تاپى تۇرمىس كەشىرىپ كەلدى. ءبىر ءۇيلى جان شاعىن ەكى بولمەلى ۇيدە تۇردى، ءۇي جيھازدارى جۇپىنى، ەسكى ەدى. ايەلى سۇي ليپيڭ قوناق بولمەگە كۇيەۋىنىڭ سۋرەتىن ىلەيىن دەسە، لايىقتى ورىن تابا الماي، امالسىزدان مۇزداتقىشتىڭ توبەسىنە قويدى. ول بۇرىن ”قىزمەت قولايلىلىعىنان پايدالانىپ“، ەڭ تومەنگى تۇرمىسى قامتاماسىزداندىرىلاتىن ديڭ جۇڭگۋاڭعا ارت - ارتىنان 3 بىردەي قىزمەت تاۋىپ بەرگەنىمەن، ۇيىندە جۇمىس كۇتىپ وتىرعالى 3 جىل بولعان جۇبايى سۇي ليپيڭنىڭ قىزمەت ماسەلەسىن شەشە المادى. لۇي جيانجياڭ قايتىس بولعاننان كەيىن عانا، كوپ ادام ونىڭ وتباسى تۇرمىسىنىڭ قانشالىق قيىنشىلىقتا ەكەندىگىن ءبىلدى.
لۇي جيانجياڭدى ماڭگىلىك ساپارعا اتتاندىرعان كۇنى، ءبىر بويجەتكەن تۇندەلەتىپ تاييۋاننان كەلدى − 3 جىلدىڭ الدىندا ول وزىنە قول سالماقشى بولعاندا، لۇي جيانجياڭ وعان ءتۇنى بويى اقىل ايتىپ، ونى ءولىپ الۋ ويىنان قايتارعان ەكەن. سول كۇنى 1000نان استام ادام قاقاعان ايازعا قاراماي جەرلەۋ ورنىنا لۇي جيانجياڭدى شىعارىپ سالۋعا كەلدى، نەشە ون مىڭداعان توردوس وعان لەبىز قالدىرىپ قۇرمەت ءبىلدىردى، مىڭداعان قالا تۇرعىنى وزدىكتەرىنەن ول قىزمەت ىستەگەن ساقشى ىستەرى پۋنكتىنە كەلىپ گۇل ۇسىنىپ ازا ءبىلدىردى...
لۇي جيانجياڭ ماڭگىلىك ساپارعا اتتاندى، ول ءتىرى كەزىندە قىزمەت ىستەگەن ساقشى ىستەرى پۋنكتىنىڭ اتى ”لۇي جيانجياڭ ساقشى ىستەرى پۋنكتى“ بولىپ وزگەرتىلدى، بۇل حىبەيدا تۇڭعىش رەت جەكە ادامنىڭ اتىمەن اتالعان ساقشى ىستەرى پۋنكتى ەدى. كوپتەگەن قالا تۇرعىندارى جونىنەن ايتقاندا، ساقشى ىستەرى پۋنكتى الدەقاشان ءبىر ەسكەرتكىشكە اينالدى.
