تيانشان تورىنىڭ حابارى (حابارىن جازعان ءتىلشى ۇي جياڭيان، سۋرەتىن تۇسىرگەن، كەسكىنگە العان تىلشىلەر دوۋ شيڭجۇن، جانات تولقىن، يىن تۇڭيۋان). 7 - ايدىڭ 25 - كۇنى تۇستەن كەيىن ساعات 5تە، اۆتونوميالى رايوندىق ۇكىمەتتىڭ اقپارات كەڭسەسى كەزەكتەگى ٴۇرىمجى قالاسىنىڭ جاڭا تيپتى ايدارشا ۆيرۋس وكپە قابىنۋ ىندەت جاعدايى جانە ساقتانۋ - تىزگىندەۋ قىزمەتى جونىندە 8-مايدان اقپار جاريالاۋ ٴماجىلىسىن اشتى، ءارى تىلشىلەردىڭ سۇراۋىنا جاۋاپ بەردى.
ءبىر ءتىلشى: ”ىندەت مەزگىلىندە ۇيدەگى تۇرعىنداردا ەگەردە قىزۋ، جوتەلۋ، ءىش ءوتۋ سياقتى اۋرۋ بەلگىلەرى بايقالسا قالاي ءبىر جايلى ەتۋ كەرەك“،- دەپ سۇرادى.
ءۇرىمجى قالالىق دەنساۋلىق ساقتاۋ، سالاماتتىق كوميتەتىنىڭ مەڭگەرۋشىسى جاڭ ۋي بىلاي دەدى: ەگەر تۇرعىنداردا ۇيدەگى كەزىندە قىزۋ، جوتەلۋ، جۇتقىنشاعى اۋرۋ، دەمى قىسىلۋ، تىنىس الۋى قيىنداسۋ، السىرەۋ، جۇرەگى اينىپ قۇسۋ، ءىش ءوتۋ، بۇلشىق ەتى سىزداپ اۋرۋ سىندى جايسىزدانۋ بەلگىلەرى بايقالسا، اۋرۋ بەلگىسىن جاسىرىپ، ۋاقىتىن ۇزارتىپ الۋدان ساقتانۋ ءۇشىن، ءوز الدىنا ءدارى ىشپەۋ كەرەك، دەر كەزىندە الەۋمەتتىك اۋماقپەن حابارلاسۋى، تۇتاس بارىستا ماسكى تاعۋى، الەۋمەتتىك اۋماق نەمەسە 120 شۇعىل قۇتقارۋ اۆتوكولىگىمەن بەلگىلەنگەن ەمدەۋ ورگاندارىنىڭ قىزۋ امبۋلاتورياسىنا بارىپ ەمدەلۋى كەرەك.
جاڭ ۋي بىلاي دەدى: ىندەت مەزگىلىندە ءوزىنىڭ سالاماتتىعىنا ءجىتى نازار اۋدارىپ، ءار كۇنى تاڭەرتەڭ - كەش ەكى رەت دەنە تەمپەراتۋراسىن ولشەۋى، ءارى الەۋمەتتىك اۋماققا دەر كەزىندەءوزىنىڭ دەنساۋلىق جاعدايىن مالىمدەپ تۇرۋى كەرەك.
جاڭ ۋي مىنانى ءبىلدىردى: جالپى حالىقتىق نۋكلەين قىشقىلىن تەكسەرۋدى، جەكە دەنساۋلىعىن تەكسەرۋدى ورىستەتۋ، سونداي - اق اۋرۋ بەلگىلەرى بايقالسا دەر كەزىندە مالىمدەۋ قاتارلىلاردىڭ بارلىعى ەرتە بايقاۋ، ەرتە مالىمدەۋ، ەرتە اۋاشالاۋ، ەرتە ەمدەۋدى تياناقتاندىرىپ، جۇعىمدالۋ قاينارىن دەر كەزىندە تىزگىندەپ، تارالۋ جولىن ءۇزىپ، قالا تۇرعىندارىنىڭ ءومىرىنىڭ حاۋىپسىزدىگى مەن دەنساۋلىعىنا جانە تۇرمىس تارتىبىنە شىنايى كەپىلدىك ەتۋ ءۇشىن بولىپ وتىر. ”قازىرگى بار ناۋقاستاردى ەمدەۋ جاعدايىنان الىپ قاراعاندا، ناۋقاستى ەرتە بايقاپ، ەمدەۋ شارالارىن دەر كەزىندە قولدانعان سايىن، ناۋقاستىڭ اۋرۋ بەلگىسى جەڭىل بولىپ، ساۋىعۋ ءونىمى دە ءتىپتى جاقسى بولادى. ءارقايسى قالا تۇرعىندارى الاڭسىز بولىڭىزدار، قازىر بىزدە وزىق ەمدەۋ تەحنيكا قابىلەتى مەن ساپالى ەمدەۋ ورەسى بار، سونداي-اق جاڭا تيپتى ايدارشا ۆيرۋس وكپە قابىنۋىن ەمدەۋ تاجىريبەسى مول ماماندار گرۋپپاسى بار، ىندەتتى جەڭۋگە قۋاتىمىز قاپتال جەتەدى“.
