ءۇرىمجى قالاسىنداعى ەمدەۋ قۇرىلىمدارى نۋكلەين قىشقىلىن تەكسەرۋدى كۇندىز - ءتۇنى توقتاتپادى
تاجىريبەحاناعا كىرگەن سوڭ كوپشىلىك تىنىم الماي ىستەدى
شينجياڭ گازەتىنىڭ جالپىلىق اقپارات قۇرالدارى تىلشىلەرى لۋ فىڭباۋ، لياڭ ليحۋا، ۋاڭ يۇڭفي
ءۇرىمجى نۋكلەين قىشقىلىن تەگىن تەكسەرۋ قىزمەتىن جاپپاي جۇرگىزە باستاعاننان بەرى، ءۇرىمجى قالاسىنداعى 24 نۋكلەين قىشقىلىن تەكسەرۋ قۇرىلىمىنىڭ ساراپتاۋ، تەكسەرۋ قىزمەتكەرلەرى مەملەكەتتىك دەنساۋلىق ساقتاۋ، سالاماتتىق كوميتەتى ۇيىمداستىرعان 10 ولكە، قالانىڭ شينجياڭعا كومەككە جىبەرگەن نۋكلەين قىشقىلىن تەكسەرەتىن 10 اترەتىندەگى 200دەن استام اداممەن بىرگە كۇن - ءتۇن دەمەي نۋكلەين قىشقىلىن تەكسەرۋ قىزمەتىن ورىستەتىپ، ىندەتتەن ساقتانۋ - تىزگىندەۋ توسقاۋىل شايقاسىنىڭ جەڭىسىنە جەتۋگە ماڭىزدى قامتاماسىزدىق ازىرلەدى.
7 - ايدىڭ 25 - كۇنى تاڭعى ساعات 1دەن 50 مينۋت وتكەندە، ءۇرىمجى حالىقارالىق شيپاحاناسى ساراپتاۋ ءبولىمىنىڭ شىراقتارى جارقىراپ تۇر، نۋكلەين قىشقىلىن تەكسەرۋ تاجىريبەحاناسىنىڭ ەسىگى اشىلىپ، باسقارۋعا جاۋاپتى ساراپتاۋشى سۋ گۋاڭلۇڭ تاجىريبەحانادان اقىرىن شىعىپ، قورعانۋ كيىمى، رازينكە قولعاپ، كوز قورعاۋ كوزىلدىرىگى سياقتىلاردى شەشىپ، ورىندىققا وتىرا كەتىپ، ءبىر قۇمىرا سۋدى الىپ جارتىسىن جۇتا سالدى، ءۇرتىس 8 ساعاتتان استام ۋاقىت جۇمىس ىستەگەننەن كەيىن، ونىڭ راقاتتانا سۋ ءىشۋىنىڭ ءوزى ەڭ قاناعاتتانارلىق ىسكە اينالدى.
”قىزمەت ىستەگەندە، دارەتحاناعا بارۋ قولايسىز، نەدە بولسا سۋ ىشپەي قويۋ كەرەك“. سۋ گۋاڭلۇڭ ماسكىنىڭ سىرتىنان بەتىن ءبىر سيپاپ قويدى، ەكى قولى تەرلەگەندىكتەن رازينكە سورىپ اعارىپ كەتىپتى، بەتىندەگى كوز قورعاۋ كوزىلدىرىگىنىڭ تابى انىق كورىنىپ تۇر.
ءۇرىمجى حالىقارالىق شيپاحاناسى ساراپتاۋ ءبولىمىنىڭ جاۋاپتىسى جىڭ جينرىنعا تىلشىلىك جاساۋ وتە قيىن بولدى، ول قابىلدايتىن تەلەفون وتە كوپ، تەكسەرۋ بارىسىنداعى ىستەردى سايكەستىرەدى، بايلانىستىرادى، ءبىر جاقتى ەتەدى، تاعى كەڭسەسىنە قايتىپ بارىپ ساندى مالىمەتتەرگە تالداۋ جاسايدى. ”تىلشىلىكتى بىلاي قويعاندا، ۇيىمدەگىلەرمەن تەلەفون ەكرانىندا سويلەسۋدىڭ وزىنە مۇرسام تيمەيدى“، - دەدى جىڭ جينرىن ىڭعايسىزدانا.
ساراپتاۋ بولىمىندەگى بارلىق ادام قاربالاس، الايدا ءتىلشى دالىزدەن ”بوي جازىپ“ جۇرگەن بىرەۋدى كوردى.
”جاڭا ساندى مالىمەتتەر شىعۋدان بۇرىنعى بوس ۋاقىتتا ورنىمنان تۇرەگەلىپ ارلى - بەرلى جۇرەمىن، ايتپەسە، ورىندىقتا وتىرا بەرسەم قالعىپ كەتەدى ەكەنمىن“، - دەدى ساراپتاۋشى لي شياڭپىڭ ”ءتۇسىندىرىپ“.
30 جاستاعى لي شياڭپىڭ شىنىندا ”جالقاۋلىققا سالىنعان“ جوق، ول تەكسەرۋ ساندى مالىمەتتەرى دايىن بولعان سوڭ، تالداۋ جاساپ، نۋكلەين قىشقىلىن تەكسەرۋ مالىمەتىن شىعارۋعا جاۋاپتى. جۋىقتا نۋكلەين قىشقىلىن تەكسەرۋ مالىمەتى قاۋىرت كوبەيىپ، ول كۇن - ءتۇن دەمەي ۇستەمەلەپ جۇمىس ىستەيتىن بولدى.
”شياڭپىڭ، ساندى مالىمەت شىقتى“. قىزمەتتەسى كەڭسەدە ايعاي سالدى. لي شياڭپىڭ دەرەۋ تىك تۇرىپ، كەرىلىپ الدى دا، جۇگىرە باسىپ كەڭسەگە كىرىپ كەتتى، ”مەن تاڭ اتۋدان بۇرىن ساندى مالىمەتتەرگە تالداۋ جاساپ بولۋىم كەرەك“، - دەدى ول جۇگىرىپ بارا جاتىپ تىلشىگە.
7 - ايدىڭ 25 - كۇنى تاڭعى ساعات 1دە ءۇرىمجى قالالىق 1 - حالىق شيپاحاناسىنىڭ ىشىندە قاۋىرت قاربالاستىق بولىپ جاتتى، الەۋمەتتىك اۋماقتان الىنعان ءبىر توپ نۋكلەين قىشقىلى ۇلگىلەرى جاڭا عانا جەتكىزىلگەن ەكەن.
”نۋكلەين قىشقىلىن تەكسەرۋ ۇلگىسى اكەلىنگەننەن تەكسەرىپ بولعانعا دەيىن بىزدە ءبىر قاتاڭ تەكسەرۋ ءتارتىبى بار“. وسى شيپاحانانىڭ ساراپتاۋ ءبولىمىنىڭ مەڭگەرۋشىسى جاڭ ۋىنلي بىلاي دەدى: نۋكلەين قىشقىلىن تەكسەرۋ تاجىريبەحاناسى سىناما دايىنداۋ اۋماعى، ۇلگى ازىرلەۋ اۋماعى، كەڭەيتىلگەن اۋماق دەپ بولىنگەن، ءاربىر اۋماقتىڭ سايكەستى جۇمىس ءتارتىبى بار. سونىمەن بىرگە، تەكسەرۋ ءتارتىبى دە ءىس جۇزىندىك جۇمىس بارىسىندا ۇزدىكسىز ساپالىلانىپ وتىرادى، تەكسەرۋ ونىمدىلىگى دە ۇزدىكسىز جوعارىلايدى.
جاڭ ۋىنلي بىلاي دەدى: ”حىنان ولكەسىنەن شينجياڭعا كومەككە كەلگەن نۋكلەين قىشقىلىن تەكسەرۋ اترەتى 6 نۋكلەين قىشقىلىن تەكسەرۋ اسپابىن الا كەلىپتى. ءبىز حىنان ولكەسىنەن شينجياڭعا كومەككە كەلگەن نۋكلەين قىشقىلىن تەكسەرۋ اترەتىمەن ىنتىماقتاسا سەلبەسىپ، ءوزارا سايكەسىپ، 4 اۋىسىممەن ىستەۋ ءتۇزىمىن قولدانىپ، اسپاپتىڭ 24 ساعات بويى جۇمىس جۇرگىزۋىن ورىندادىق. قازىر تەكسەرۋ مولشەرى ولار كەلەردەن بۇرىنعى كەزدەن 10 ەسەگە تاياۋ جوعارىلادى“.
تاڭعى ساعات 2دە كەزەك اۋىسۋ ۋاقىتى كەلدى، تەكسەرۋشىلەر ابدەن قالجىراپ سۇلدەرىن سۇيرەتىپ، ىلگەرىندى - كەيىندى نۋكلەين قىشقىلىن تەكسەرۋ تاجىريبەحاناسىنان شىقتى، ۇزاق ۋاقىت ەڭكەيىپ جۇمىس ىستەگەندىكتەن، ولار ەرىكسىزدەن ارقالارىن ۇرعىلاپ قويادى.
7 - ايدىڭ 25 - كۇنى تۇستەن كەيىن شينجياڭ مەديتسينا داشۋەسىنە قاراستى وسپە اۋرۋلار شيپاحاناسى (تومەندە وسپە اۋرۋلار شيپاحاناسى دەلىنەدى) رادياتسيالىق ەمدەۋ عيماراتىنىڭ 3 - قاباتىنداعى وسپەدەن ساقتانۋ - ەمدەۋدى زەرتتەۋ ورنىنىڭ كەڭسەسىندە ءتىلشى ازىق - تۇلىك سورەسىندە مينەرال سۋ، سۋسىن، دايىن كەسپە، تورت سياقتى ازىق - تۇلىكتەردىڭ ءتىزۋلى تۇرعانىن كوردى.
”بۇل ازىق - تۇلىكتەر PCR تاجىريبەحاناسىنداعى ەمدەۋ قىزمەتكەرلەرىنە دايىندالعان“. وسپە اۋرۋلار شيپاحاناسىنىڭ ورىنباسار باستىعى سۇن گاڭ بىلاي دەدى: كۇشەمەلىلىگى زور جۇمىس ولاردىڭ دەنە قۋاتىن مولىنان سارىپ ەتەدى، تاجىريبەحانادان شىققاننان سوڭ دەرەۋ دەنە قۋاتتارىن تولىقتاۋى قاجەت.
وسپە اۋرۋلار شيپاحاناسى ساراپتاۋ ءبولىمىنىڭ جاۋاپتى شيپاگەرى گو فان قولىنا ءبىر قۇمىرا مينەرال سۋ الىپ، تاڭدايىن ءجىبىتتى، ”دەرەۋ تاجىريبەحاناعا كىرەمىن، ىشىندە دارەتحاناعا بارۋعا بولمايدى، كوپ ىشكەننەن قورقامىن“، - دەدى گو فان، - ”تاجىريبەحاناعا كىرگەن سوڭ، كوپشىلىك جارىسقانداي، تەكسەرۋدى كوبىرەك ىستەۋدى ويلايدى. ايتسەدە، تاجىريبەحانادان شىعا سالىپ، موينىمىز بەن جاۋىرىنىمىز اشىپ اۋىرادى“.
وسپە اۋرۋلار شيپاحاناسى ساراپتاۋ ءبولىمىنىڭ مەڭگەرۋشىسى ما شيۋمين بىلاي دەدى: وسى بىرنەشە كۇندە تەكسەرۋ جابدىقتارى توقتاماي جۇمىس جۇرگىزدى، جۇمىس مولشەرى زور بولعاندىقتان، 12 اسپاپتىڭ تورتەۋىنەن كىنارات شىقتى، الايدا وسى شەشۋشى ساتتە، ءبىز ەمدەۋ قىزمەتكەرلەرى، ءسوزسىز، كۇشتى جاۋاپكەرشىلىك سەزىم جانە بورىشتىلىق سەزىم ارقىلى جۇمىس ورنىمىزدان تاپجىلماۋىمىز كەرەك.
”7 - ايدىڭ 18 - كۇنى كەشتە شاندۇڭ ولكەسىنىڭ نۋكلەين قىشقىلىن تەكسەرۋ اترەتى شينجياڭعا كومەككە كەلگەننەن كەيىن، تىكەلەي شيپاحانامىزدىڭ قىزمەتكەرلەرىمەن ارالاستىرىلىپ، دەرەۋ تاجىريبەحاناعا كىرىپ تەكسەرۋ قىزمەتىن ورىستەتتى“، - دەدى شينجياڭ مەديتسينا داشۋەسىنە قاراستى 1 - شيپاحاناسى مەديتسينالىق ساراپتاۋ ورتالىعىنىڭ ورىنباسار مەڭگەرۋشسى جاڭ فىڭبو.
ارالاسپالى اترەت تەكسەرۋ قىزمەتىنە كىرىسكەننەن بەرى، 24 ساعاتتا 4 اۋىسىممەن ىستەۋدى جولعا قويدى. ”جۇمىس مولشەرى زور، مىندەت اۋىر، كوپشىلىك ەرەكشە جاپا شەكتى“، - دەدى جاڭ فىڭبو، - ”ءبىر ەمدەۋ قىزمەتكەرى ىستىق، تۇيىق قورعانۋ كيىمىن كيگەندىكتەن، ونىڭ ۇستىنە جوعارى كۇشەمەلىلىكپەن جۇمىس ىستەگەندىكتەن، تالىپ قالدى، الايدا ول ازداپ دەمالعان سوڭ كەلەسى كەزەكتەگى تەكسەرۋ قىزمەتىنە كىرىسىپ كەتتى. اترەت مۇشەلەرىنىڭ كاسىپتى قادىرلەۋ جانە ۇلەس قوسۋ رۋحى ىندەتتەن ساقتانۋ - تىزگىندەۋ توسقاۋىل شايقاسىنىڭ جەڭىسىنە قول جەتكىزۋگە قىمباتتى ۋاقىت ۇتىپ بەردى“.
