بۇل ساي سۇڭسۇڭنىڭ ءتىرى كەزىندەگى سۋرەتىنىڭ قايتا تارتىلعان نۇسقاسى. شينحۋا اگەنتتىگى تاراتقان
شينحۋا اگەنتتىگىنىڭ چىڭدۋدان بەرگەن حابارى (ءتىلشى ۋ گۋاڭيۇي، كاڭ جينچيان). 2017 - جىلى كوكتەم مەرەكەسى قارساڭىندا، سىچۋان لۋشيان اۋدانىنىڭ حالىق ساقشىسى ساي سۇڭسۇڭ سۇيەكتەن وتەتىن مۇزداي سۋىق سۋ قويماسىنا سەكىرىپ ءتۇسىپ، ءوز باسىنىڭ اماندىعىمەن ساناسپاي، ابايسىزدا سۋعا ءتۇسىپ كەتكەن 2 بالانى قۇتقارىپ، ءوزى سۋدان شىعا الماي، 31 جاسىندا ومىردەن ءوتتى.
ساي سۇڭسۇڭ، كوزى تىرىسىندە سىچۋان ولكەسى لۋشيان اۋداندىق قوعام حاۋىپسىزدىگى مەكەمەسى شىچياۋ ساقشى بولىمشەسىنىڭ حالىق ساقشىسى ەدى، حۋبەي ولكەسىنىڭ سۇڭزى قالاسىنان. 2017 - جىلى 1 - ايدىڭ 24 - كۇنى تۇستە جاڭا جىلعا قاراعان تۇنگە 2 كۇن عانا قالعان، لۋشيان اۋدانىندا 8 جاستاعى 2 ۇل بالا جەرى تىك قۇلاما كەلگەن شۋانتان شيڭفۋ سۋ قويماسىنىڭ توسپاسىندا ويناپ ءجۇرىپ، ابايسىزدا سۋعا ءتۇسىپ كەتەدى. قايىن اتاسىنىڭ ۇيىندە باس قوسۋ تاعامىن جەگەلى جاتقان ساي سۇڭسۇڭ جاردەم سۇراعان داۋىستى ەستي سالا تابيعي تۇردە اۋلادان اتىلىپ شىعىپ توسپاعا قاراي جۇگىرەدى.
قىسىلتاياڭ ساتتە ساي سۇڭسۇڭ سىرت كيىمىن شەشە سالىپ، ءارى - ءسارى بولماستان سۋعا سەكىرىپ ءتۇسىپ، قۇتقارۋعا كىرىسەدى، ول قوس قولىمەن تومەن باتىپ بارا جاتقان 2 بالانى تاس قىلىپ ۇستاپ جوعارى كوتەرىپ، بار كۇشىمەن بىرتە - بىرتە ولاردى توسپانىڭ شەتىنە قاراي جىلجىتادى، وسى كەزدە قۇتقارۋعا كەلگەن جۇرت كوبەيىپ، بىرەۋلەر بامبۋك سىرىقتى 2 بالاعا قاراي سوزادى، 2 بالانىڭ بامبۋك سىرىقتان ۇستاپ جاعاعا تارتىپ شىعارىلعانىن كورگەننەن كەيىن، بويىنداعى سوڭعى بار قايراتىن جۇمساعان ساي سۇڭسۇڭ بۇدان ارى شىداي الماي، ءالى قۇرىعان دەنە لەزدە مۇزداي سۋىق سۋعا باتىپ كەتەدى.
سول جاعدايدى كوزىمەن كورگەن لۋشيان اۋدانى شۋانتان قالاشىعى تۇڭشان قىستاعىنىڭ تۇرعىنى ۋاڭ كايگۇي بىلاي دەدى: ساي سۇڭسۇڭ قوس قولىمەن 2 بالانى كوتەرىپ سۋ بەتىنە شىعارعان كەزدە، سۋ الدەقاشان ونىڭ مۇرنىنان اسىپ، كوزى مەن توبەسى عانا جىلتىراپ كورىنىپ تۇرعان ەدى. كوپشىلىك بار كۇشتەرىن سالىپ ءجۇرىپ، ساي سۇڭسۇڭدى جاعاعا الىپ شىقتى، ءبىراق بۇل كەزدە ول ەندىگارى ادامداردىڭ ايعاي داۋىسىن ەستۋدەن قالعان ەدى.
قىزمەتتەستەرىنىڭ نازارىندا ساي سۇڭسۇڭنىڭ ءومىر مەن ءولىم تايتالاسىندا جاساعان تاڭداۋى استە كەزدەيسوق ەمەس، ول قىسقا عانا ومىرىندە، كوپ رەت كەۋدە كەرە العا شىعىپ باسقالاردى قۇتقارعان ەدى.
1996 - جىلى ساي سۇڭسۇڭ سۋعا ءتۇسىپ كەتكەن اۋىلداس سەرىگىن ەرلىكپەن قۇتقارىپ العان، 2003 - جىلى ول تاعى چاڭجياڭعا ءتۇسىپ كەتكەن ءبىر ورەندى قۇتقارعان ەدى.
2006 - جىلى دۇنيەسى ۇرلانعان شارۋا جۇمىسكەرگە كومەكتەسۋ ءۇشىن ول قانجارىن جالاڭداتقان كۇماندىنى قارۋسىز بويسۇندىردى ءارى قالتاسىنان اقشا شىعارىپ، دۇنيەسى ۇرلانعان ادامعا ۇيىنە قايتاتىن پويەز بەلەتىن الىپ بەرەدى.
2009 - جىلى ابا وبلىسى حۇڭيۋان اۋدانىندا جايلىمعا ءورت كەتكەندە، ول جاۋىنگەر سەرىكتەرىن باستاپ، دەرەۋ ءورت كەتكەن جەرگە لاپ قويىپ، سۇراپىل ءورتتىڭ ءورشۋىنىڭ دەر كەزىندە الدىن الىپ، نەشە جۇزدەگەن قوداستى، نەشە ءجۇز گەكتار جايلىمدى جانە مالشىلاردىڭ تۇرارجايىن قورعاپ قالدى.
ساي سۇڭسۇڭ قۇربان بولعاننان كەيىن، ادام كۇشى بايلىعى جانە قوعامدىق قامتاماسىزداندىرۋ مينيسترلىگى، قوعام حاۋىپسىزدىگى مينيسترلىگى ساي سۇڭسۇڭ جولداسقا ”مەملەكەتتىك قوعام حاۋىپسىزدىگى جۇيەسىندەگى 1 - دارەجەلى قاھارمان ۇلگى“ داڭقتى اتاعىن تولىقتاپ بەردى.
ول شۇعىل اتتاندى، ونىڭ كوزى تىرىسىندە قىزمەت ىستەگەن ساقشى بولىمشەسى، قىزمەتتەستەرى ونىڭ قاربالاس بەينەسىن، شارشاپ - شالدىعۋدان قارلىققان داۋىسىن اۋەلگىدەي ەستەرىندە ساقتايدى. ساي سۇڭسۇڭنىڭ اكە - شەشەسى قاراپايىم ديقان، جالعىز ۇلدارىنىڭ قۇربان بولعانىن تىلگە العاندا، اكەسى ساي باڭكاي كوز جاسىن ارەڭ تيىپ: ”ۇلىمىزدى مەملەكەتكە ۇلەس قوسسىن دەپ تاربيەلەدىك، ونىڭ ەرلىكپەن ءوزىن ارناۋى مەملەكەتتىڭ ءۇمىتىن اقتاعانى“، - دەدى.
ءومىرىنىڭ سوڭعى ساتىندە، ساي سۇڭسۇڭ ”ءومىر مەن ءولىمنىڭ اماناتى“ ارقىلى كوممۋنيستىك پارتيا مۇشەسىنىڭ ۇلەس قوسۋعا پەيىل، قۇربان بەرۋدەن قورىقپايتىن تاڭداۋلى قاسيەتىن ايگىلەدى. ءبىر ساقشى رەتىندە، ول بۇكىل ومىرىمەن ايبىندى سەرتىن جانە حالىق ساقشىسى ىستەرىنە دەگەن شەكسىز ادالدىعىن امالياتتا ايگىلەدى.
