(2020 - جىلى 7 - ايدىڭ 28 - كۇنى، بەيجيڭ)
جۇڭحۋا حالىق رەسپۋبليكاسىنىڭ ءتوراعاسى شي جينپيڭ
قۇرمەتتى القالار،
ۋاكىلدەر ۇيىرمەلەرىنىڭ باستىقتارى،
قۇرمەتتى قوناقتار،
حانىمدار، مىرزالار، دوستار:
ازيا نەگىزدىك قۇرىلعىلارعا قارجى قوسۋ بانكەسىنىڭ 5 - كەزەكتى القالار كەڭەسى جىلدىق ءماجىلىسىنىڭ اشىلۋ ساتىندە، مەن جۇڭگو ۇكىمەتى مەن جۇڭگو حالقى اتىنان، سونداي - اق ءوز اتىمنان بۇل رەتكى ءماجىلىستىڭ اشىلعاندىعىن قىزۋ قۇتتىقتايمىن! ماجىلىسكە قاتىناسقان ءارقايسى مۇشەلەر ۋاكىلدەرىنە شىن ىقىلاستى سالەم جولدايمىن!
2013 - جىلدىڭ سوڭىندا مەن جۇڭگو اتىنان ازيا نەگىزدىك قۇرىلعىلارعا قارجى قوسۋ بانكەسىن قۇرىپ، ازيا وڭىرىندەگى نەگىزدىك قۇرىلعىلار قۇرىلىسىن جانە ۇلاستىرۋدى، تۇتاستىرۋدى ىلگەرىلەتىپ، وڭىرلىك سەلبەستىكتى تەرەڭدەتىپ، بىرگە دامۋدى جۇزەگە اسىرۋ جونىندە ۇسىنىس قويعان بولاتىنمىن. 2016 - جىلى 1 - ايدىڭ 16 - كۇنى ازيا نەگىزدىك قۇرىلعىلارعا قارجى قوسۋ بانكەسى رەسمي جۇمىس باستادى. 4 جىلدان استام ۋاقىتتان بەرى، ازيا نەگىزدىك قۇرىلعىلارعا قارجى قوسۋ بانكەسى كوپ جاقتى وركەندەۋ بانكەسى ۇلگىسى مەن پرينسيبى بويىنشا جۇمىس جۇرگىزىپ، حالىقارالىق سيپاتقا، جۇيەلىلىككە، جوعارى ولشەمگە تاباندى بولىپ، تاماشا باستامانى جۇزەگە اسىردى. باستابىندا ىرگەسىن قالاعان 57 مۇشەنىڭ قول ۇستاسا جەلكەن كوتەرۋىنەن دامىپ بۇگىنگى تاڭدا ازيا، ەۆروپا، افريكا، سولتۇستىك امەريكا، وڭتۇستىك امەريكا، وكەانيا قاتارلى 6 قۇرلىقتاعى 102 مۇشەگە كەڭەيدى، ازيا نەگىزدىك قۇرىلعىلارعا قارجى قوسۋ بانكەسى ۇزدىكسىز دامىپ، زورايىپ، مۇشەلەر ءۇشىن نەگىزدىك قۇرىلعىلارعا 20 ميلليارد دوللارعا جۋىق قارجى قوستى. ازيا نەگىزدىك قۇرىلعىلارعا قارجى قوسۋ بانكەسىنىڭ دوستار شەڭبەرى بارعان سايىن ۇلعايىپ، جاقسى سەرىكتەستەر بارعان سايىن كوبەيىپ، سەلبەستىك ساپاسى بارعان سايىن جوعارىلاپ، حالىقارادا كاسىبي، جوعارى ونىمدىلىككە يە، كىرشىكسىز، جاڭا تيپتى كوپ جاقتى وركەندەۋ بانكەسى سىندى شىت جاڭا وبرازىن ايگىلەدى.
جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان بەرى، ازيا نەگىزدىك قۇرىلعىلارعا قارجى قوسۋ بانكەسى جەدەل قيمىلداپ، شۇعىل جاعدايعا توتەپ بەرۋ قورىن قۇرىپ، مۇشەلەردىڭ ىندەتكە توتەپ بەرۋىنە جانە ەكونوميكانى قالپىنا كەلتىرۋىنە قولداۋ كورسەتىپ، ازيا نەگىزدىك قۇرىلعىلارعا قارجى قوسۋ بانكەسىنىڭ ارەكەت قابىلەتىن تولىق ايگىلەدى. الەمدەگى جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋدىڭ امالياتى ادامزاتتىڭ بەينەت پەن زەينەتتى بىرگە وتكەرەتىن، تار جول، تايعاق كەشۋدى بىرگە وتكەرەتىن تاعدىرلاس ورتاق تۇلعا ەكەندىگىن، تەك ءوزارا قولداۋ كورسەتۋ، ىنتىماقتاسا سەلبەسۋ عانا داعدارىستى جەڭىپ شىعاتىن دۇنيەنىڭ دۇرىس جولى ەكەندىگىن كورسەتتى. ەكونوميكانىڭ جاھاندانۋ ۇدەرىسىندە جارىققا شىققان قايشىلىقتاردى شەشۋدە ءار ەل اناعۇرلىم سيىسىمدى الەمدىك جونگە سالۋ، اناعۇرلىم ءونىمدى كوپ جاقتى مەحانيزم، اناعۇرلىم بەلسەندى وڭىرلىك سەلبەستىك قالىپتاستىرۋعا قۇلشىنۋ ءتيىس. ازيا نەگىزدىك قۇرىلعىلارعا قارجى قوسۋ بانكەسى مۇشەلەردىڭ بىرگە دامۋىن جەبەيتىن، ادامزاتتىڭ تاعدىرلاس ورتاق تۇلعاسىن ورناتۋدى ىلگەرىلەتەتىن جاڭا تۇعىرعا اينالۋعا ءتيىس. مەن مىناداي ۇسىنىس قويامىن:
ءبىرىنشى، نازاردى بىرگە دامۋعا شوعىرلاندىرىپ، ازيا نەگىزدىك قۇرىلعىلارعا قارجى قوسۋ بانكەسىن الەمنىڭ بىرگە دامۋىن ىلگەرىلەتەتىن جاڭا تيپتى كوپ جاقتى وركەندەۋ بانكەسى ەتىپ تۇلعالاۋ. بەيبىتشىلىك پەن دامۋ − ءالى دە زامانىمىزدىڭ باستى تاقىرىبى. نەگىزدىك قۇرىلعىلاردى ۇلاستىرۋ، تۇتاستىرۋ − ءار ەلدىڭ بىرگە دامۋىنا دەم بەرەتىن ماڭىزدى زاتتىق نەگىز. ازيا نەگىزدىك قۇرىلعىلارعا قارجى قوسۋ بانكەسى بارلىق مۇشەلەردىڭ دامۋ قاجەتى ءۇشىن قىزمەت ەتۋگە كۇش سالىپ، نەگىزدىك قۇرىلعىلارعا اناعۇرلىم جوعارى ساپالى، وزىندىك قۇنى تومەن، باياندى قارجى قوسۋعا كۇش سالۋ، ءداستۇرلى نەگىزدىك قۇرىلعىلارعا قولداۋ كورسەتۋمەن بىرگە، جاڭا تيپتى نەگىزدىك قۇرىلعىلارعا دا قولداۋ كورسەتۋ، ازيانىڭ جانە باسقا دا وڭىرلەردىڭ ەكونوميكالىق، قوعامدىق دامۋىن جەبەۋ ءۇشىن تىڭ قوزعاۋشى كۇش ۇستەۋ ءتيىس.
ەكىنشى، جۇرەكتىلىكپەن ءورىس اشىپ، جاڭالىق اشىپ، ازيا نەگىزدىك قۇرىلعىلارعا قارجى قوسۋ بانكەسىن داۋىرمەن بىرگە العا باساتىن جاڭا تيپتى دامۋ امالياتى تۇعىرى ەتىپ قالىپتاستىرۋ. جاڭالىق اشۋعا ۇمتىلعاندا عانا بولاشاققا جول اشۋعا بولادى. ازيا نەگىزدىك قۇرىلعىلارعا قارجى قوسۋ بانكەسىنىڭ ءوزى حالىقارالىق ەكونوميكانى جونگە سالۋ جۇيەسىنىڭ جاڭا مۇشەسى سانالادى، ول اۋقىمعا قاراي ىستەپ، جاعدايعا قاراي وزگەرىپ وتىرۋ، دامۋ ۇستانىمىندا، كاسىپ ۇلگىسىندە، قۇرىلىمدىق جونگە سالۋدا جاڭالىق اشۋ، يكەمدى، الۋان ءتۇرلى دامۋعا قارجى قۇراۋ ونىمدەرى ارقىلى ۇلاستىرۋدى، تۇتاستىرۋدى جەبەپ، جاسىل دامۋدى ىلگەرىلەتىپ، تەحنيكانىڭ العا باسۋىنا قولداۋ كورسەتۋ ءتيىس.
ءۇشىنشى، ەڭ تاڭداۋلى امالياتتى جارىققا شىعارىپ، ازيا نەگىزدىك قۇرىلعىلارعا قارجى قوسۋ بانكەسىن جوعارى ولشەمدى جاڭا تيپتى حالىقارالىق سەلبەستىك قۇرىلىمى ەتىپ قالىپتاستىرۋ. ازيا نەگىزدىك قۇرىلعىلارعا قارجى قوسۋ بانكەسى دامۋ بارىسىندا جوعارى ولشەمگە، جوعارى ساپاعا تاباندى بولىپ، حالىقارادا ءبىر تۇتاس قولدانىلاتىن ولشەمگە بويسۇنۋدى جالپىلىق دامۋ زاڭدىلىعىنا قۇرمەت ەتۋدى ءاربىر مۇشەنىڭ ءوز دامۋىنا ۇيلەسەتىن ءىس جۇزىندىك قاجەتىمەن ورگانيكالى تۇردە ۇشتاستىرۋ، حالىقارالىق دامۋ سەلبەستىگىنىڭ ەڭ تاڭداۋلى امالياتىن جارىققا شىعارۋ كەرەك.
ءتورتىنشى، اشىقتىققا، سيىسىمدىلىققا تاباندى بولىپ، ازيا نەگىزدىك قۇرىلعىلارعا قارجى قوسۋ بانكەسىن حالىقارالىق كوپ جاقتى سەلبەستىكتىڭ جاڭا ۇلگىسى ەتىپ قالىپتاستىرۋ. بىرگە اقىلداسۋ، بىرگە قۇرۋ، بىرگە يگىلىكتەنۋ پرينسيبىنە تاباندى بولىپ، الەمدىك ەكونوميكالىق ارنانىڭ رەتتەلۋ، وزگەرۋ اۋقىمىنا ۇيلەسىپ، اناعۇرلىم كوپ دامۋ سەرىكتەستەرمەن سەلبەستىك ورىستەتىپ، وڭىرلىك جانە الەمدىك الەۋمەتتىك ونىممەن قامداپ، وڭىرلىك ەكونوميكانىڭ ءبىر تۇلعالانۋىن ىلگەرىلەتىپ، ەكونوميكانىڭ جاھاندانۋىنىڭ اناعۇرلىم اشىق، سيىسىمدى، جالپىعا ءتيىمدى، تەڭگەرىمدى، تەڭ يگىلىككە كەنەلەتىن بەتالىسقا قاراي دامۋىن ىلگەرىلەتۋ كەرەك.
حانىمدار، مىرزالار، دوستار!
جۇڭگو قاشاندا كوپ جاقتىلىقتى قولدايدى، كوپ جاقتىلىقتى امالياتتا ايگىلەيدى، اشىق ۇستاۋ، سەلبەسۋ، تەڭ يگىلىككە كەنەلۋ رۋحىن ۇستانا وتىرىپ دۇنيە جۇزىندەگى ءار ەلمەن بىرگە دامۋدى قاراستىرادى. جۇڭگو ءارقايسى مۇشەلەرمەن بىرگە ازيا نەگىزدىك قۇرىلعىلارعا قارجى قوسۋ بانكەسىنە قولداۋ كورسەتىپ، ازيا نەگىزدىك قۇرىلعىلارعا قارجى قوسۋ بانكەسىن ويداعىداي باسقارىپ، حالىقارالىق قوعامنىڭ حاۋىپ - قاتەرگە، سىن - سايىسقا توتەپ بەرۋى، بىرگە دامۋدى جۇزەگە اسىرۋى ءۇشىن اناعۇرلىم زور ۇلەس قوسادى. ازيا نەگىزدىك قۇرىلعىلارعا قارجى قوسۋ بانكەسىنىڭ ءوز بورىشىنىڭ ۇددەسىنەن شىعۋىن، ءداۋىردىڭ ۇددەسىنەن شىعۋىن، كوپتىڭ ءۇمىتىن اقتاۋىن ءۇمىت ەتەمىن.
سوڭىندا، مەن وسى كەزەكتى القالار كەڭەسىنىڭ جىلدىق ءماجىلىسىنىڭ تولىق تابىستى بولۋىن شىن جۇرەكتەن تىلەيمىن!
كوپشىلىككە راقىمەت!
(شينحۋا اگەنتتىگىنىڭ 7 - ايدىڭ 28 - كۇنى بەيجيڭنەن بەرگەن حابارى)
