تيانشان تورى   ›   بىلگەنگە مارجان   ›   وتباسى جانە تۇرمىس

زارارسىزداندىرعىشتى جۇيەلى، عىلمي پايدالانايىق

  شينجياڭ گازەتىنىڭ جالپىلىق اقپارات قۇرالدارى تىلشىلەرى جاۋ چۇنحۋا، لي چۇنشيا 7 - ايدىڭ 29 - كۇنى ۇرىمجىدەن حابارلايدى. ىندەتتەن ساقتانۋ - تىزگىندەۋ كەزىندە ءۇيدى تازالاعاندا زارارسىزداندىرعىشتى پايدالانۋ كەرەك پە، جوق پا؟ پايدالانۋ بارىسىندا نەلەرگە كوڭىل ءبولۋ قاجەت؟ ءۇرىمجى قالالىق اۋرۋدىڭ الدىن الۋ - تىزگىندەۋ ورتالىعىنىڭ ورىنباسار مەڭگەرۋشىسى ۋىن گوشين قالىڭ قالا تۇرعىندارىنا مىنانى ەسكەرتتى: جاڭا تيپتى ايدارشا ۆيرۋس، نەگىزىنەن، جاقىن ارالىقتا تىنىس الۋ جولىنان شىققان تۇكىرىك شاشىراندىلارىنان جانە جاقىن جۋىسۋدان تارالادى، ەگەر وتباسىندا نەمەسە مەكەمەدە جاڭا تيپتى ايدارشا ۆيرۋس وكپە قابىنۋ ىندەتىنىڭ دياگنوزى تۇراقتاندىرىلعان ناۋقاس، اۋرۋ بەلگىسى جوق جۇعىمدالۋشى نەمەسە جاقىن جۋىسۋشى بولماسا، زارارسىزداندىرعىشتى ءار كۇنى بۇركۋدىڭ قاجەتى جوق، بولمە ءىشى تازالىعىن جاقسى ىستەسە بولعانى جەتىپ جاتىر.

  ۋىن گوشين بىلاي دەدى: وتباسى مەن مەكەمەدە زارارسىزداندىرعىشتى كۇندەلىكتى پايدالانعاندا، زارارسىزداندىرعىشتىڭ تۇسىندىرمەسى بويىنشا عىلمي ۇيلەسىمدى پايدالانىپ، بەتالدى پايدالانۋدان اۋلاق بولۋ كەرەك؛ زارارسىزداندىرعىشتىڭ تۇسىندىرمەسىندە كورسەتىلگەن وبيەكتى كولەمىندە عانا پايدالانۋ ءتيىس، كولەمنەن اسىرىپ پايدالانۋعا بولمايدى؛ ءتۇرلى زارارسىزداندىرعىشتىڭ بىرەۋىن عانا پايدالانۋ كەرەك، زارارسىزداندىرعىشتان ۋلانىپ قالۋدان ساقتانۋ ءۇشىن، ءتۇرلى زارارسىزداندىرعىشتى ءوز قالاعانىنشا ارالاستىرىپ پايدالانباۋ كەرەك، ”84“ زارارسىزداندىرۋ سۇيىقتىعىن قۇرامىندا اممياك بار دارەتحانا تازالاعىشپەن ارالاستىرىپ پايدالانۋعا بولمايدى. قالا تۇرعىندارى زارارسىزداندىرۋ سۇيىقتىعىن پايدالانعاندا، تۇسىندىرمەدەگى قويۋلىق دارەجەسىنە قاتاڭ نەگىزدەلە وتىرىپ دايىنداپ، تۇسىندىرمەدە تالاپ ەتىلگەن ەڭ قىسقا زارارسىزداندىرۋ ۋاقىتىنا جەتۋگە كەپىلدىك ەتۋ كەرەك. زارارسىزداندىرعىشتى دايىنداعاندا جانە پايدالانعاندا، ۇيلەسىمدى قورعانۋ بۇيىمدارىن، ايتالىق، ماسكى، قورعانۋ قولقابى سياقتىلاردى (رازينكە نەمەسە كاۋچۇك قولعاپتى پايدالانۋعا بولادى، ماتادان تىگىلگەن قولعاپتى نەمەسە جىپتەن توقىلعان قولعاپتى پايدالانۋعا بولمايدى) كيۋ كەرەك.

  ۋىن گوشين بىلاي دەپ اتاپ كورسەتتى: دەنەنى زارارسىزداندىرعاندا، باستىسى، قولدى، سونداي - اق لاستانۋى مۇمكىن بولعان دەنەنىڭ باسقا بولىمدەرىن زارارسىزداندىرۋ كەرەك، بۇكىل دەنەگە شاشىپ زارارسىزداندىرۋعا بولمايدى. سپيريتپەن زارارسىزداندىرۋ ۇساق بۇيىمدارعا عانا قولدانىلادى، ۇلكەن كولەمدە بۇركۋگە كەلمەيدى. قالا تۇرعىندارى زارارسىزداندىرعىشتى حاۋىپسىز، ۇيلەسىمدى تۇردە ساقتاۋى كەرەك، ورتتەن ساقتانۋ ءۇشىن، زارارسىزداندىرۋ سۇيىقتىعىن سۋسىن قۇمىراسىنا قۇيۋعا بولمايدى. بايقاماي ءىشىپ الىپ ۋلانۋدان ساقتانۋ ءۇشىن، زارارسىزداندىرعىشتى بالالاردىڭ قولى جەتپەيتىن كولەڭكەلى سالقىن ورىنعا قويۋ كەرەك.

  ۋىن گوشين بىلاي دەدى: ”زارارسىزداندىرعىشتىڭ بەلگىلى دارەجەدە تىتىركەندىرگىشتىگى بار، استە شەكتەن اسىرىپ بەتالدى پايدالانۋعا بولمايدى، وتباسى مەن مەكەمەنى زارارسىزداندىرعاندا جەكەلىك قورعانۋدى جاقسى ىستەپ، زارارسىزداندىرۋ رولىن اتقارۋ ۋاقىتىنا جەتكەن سوڭ دەر كەزىندە تازا سۋمەن ءسۇرتىپ، زارارسىزداندىرىلعان بۇيىمداردى بۇلدىرۋىنەن ساقتانۋ كەرەك“.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.

  • وسى كەزەكتى جۇڭگو − ازيا - ەۆروپا كورمەسى تۇڭعىش رەت نەگىزگى قوناق ولكەلەردى بەلگىلەدى
  • تاپسىرىس ونىمدەردى جەدەل ءوندىرىپ، قامداۋدى قامتاماسىز ەتتى
  • جىلدىق مىندەتتى ءساتتى ورىنداۋعا شىنايى كەپىلدىك ەتتى
  • شينجياڭ جۇڭتاي توبى دۇنيە جۇزىندەگى 500 قۋاتتى كاسىپورىن قاتارىنا ءوتتى
  • جەل - جارىق ەنەرگياسى ءوزارا تولىقتىردى