7 - ايدىڭ 29 - كۇنى ءۇرىمجى قالاسى تيانشان رايونى سۇيچۋان جولى اۋماعىن باسقارۋ كوميتەتى جاستار جولى وڭتۇستىك الەۋمەتتىك اۋماعىنىڭ قىزمەتكەرى ادىل قۇربان سيىر، قوي ەتىن تىكە ساتۋ تۇيىنىنەن تۇرعىندارعا سيىر، قوي ەتىن اپارا جاتىر. ءۇرىمجى قالاسى 7 - ايدىڭ 29 - كۇنىنەن 8 - ايدىڭ 12 - كۇنىنە دەيىن سيىر، قوي ەتىن تۇراقتى باعادا بازارعا ۇزدىكسىز سالادى، مولشەرمەن 200 توننا قوي ەتىن، 150 توننا سيىر ەتىن بازارعا سالىپ، قالىڭ قالا تۇرعىندارىن تۇراقتى باعاداعى ساپالى ەتپەن قامدايدى. سۋرەتتى شينجياڭ گازەتىنىڭ جالپىلىق اقپارات قۇرالدارى ءتىلشىسى ساي زىڭلى تۇسىرگەن
مەرەكە تاياپ كەلەدى، رايونىمىزدىڭ جەر - جەرى، تاراۋلارى سيىر، قوي ەتى سياقتىلاردىڭ بازارداعى قامداۋىن قامتاماسىز ەتىپ، قالىڭ الەۋمەتتىك اۋماق قىزمەتكەرلەرىنىڭ قىزمەت وتەۋ ءتارتىبىن اشالاپ، تۇرعىندار ءۇشىن دالمە - ءدال قىزمەت وتەپ، كوپ جاق بىرلەسە قيمىلداپ، ءار ۇلت بۇقاراسىنىڭ داستارقانىنىڭ مول بولۋىنا شىنايى كەپىلدىك ەتتى. ءار ۇلت بۇقاراسى جابال ءۇي تازالاپ، ەرەكشەلىككە يە ءدامدى تاعامدار دايىنداپ، مەرەكەنىڭ كەلۋىن كۇتۋدە.
ەت، جەمىس - جيدەك، كوكونىس جەتكىلىكتى
7 - ايدىڭ 29 - كۇنى تاڭەرتەڭ ساعات 9دا ءۇرىمجى قالاسى بازارعا سالعان زاپاس ەت تيانشان رايونى سۇيچۋان جولى اۋماعىن باسقارۋ كوميتەتى جاستار جولى وڭتۇستىك الەۋمەتتىك اۋماعىنداعى سيىر، قوي ەتىن تىكە ساتۋ تۇيىنىنە جەتكىزىلدى. ”بۇگىن دۇكەندە 400 كيلوگرامنان ارتىق زاپاس ەت بار، سيىردىڭ جاس ەتىنىڭ ءار كيلوگرامىنىڭ ورتاشا باعاسى 66 يۋان، قويدىڭ جاس ەتىنىڭ ءار كيلوگرامىنىڭ ورتاشا باعاسى 60 يۋان، ءبارى بۇگىن تاڭەرتەڭ سويىلعان مالدىڭ جاڭا ەتتەرى“، - دەدى شيە شياۋجۋان سيىر، قوي ەتىن قاربالاس ءبولىپ جاتىپ.
ءتىلشىنىڭ ۇعىسۋىنشا، مەرەكە كەزىندەگى ءار ۇلت بۇقاراسىنىڭ قاجەتىن قاناعاتتاندىرۋ ءۇشىن، ءۇرىمجى قالاسى تولايىم باعا بويىنشا سيىردىڭ، قويدىڭ جاس ەتتەرىن ساتىپ الىپ، قوسىمشا قاراجات بەرىلگەننەن كەيىنگى باعا بويىنشا بازارعا سالعان. 7 - ايدىڭ 29 - كۇنىنەن 8 - ايدىڭ 12 - كۇنىنە دەيىن ۇزدىكسىز بازارعا سالىناتىن قوي ەتى مەجەمەن 200 تونناعا، سيىر ەتى 150 تونناعا جەتەدى ەكەن.
ىلە جيۋديڭ اۋىل شارۋاشىلىعى ونىمدەرىن تولايىم ساتۋ بازارىندا، ءتۇرلى كوكونىستەر، قاۋىن - قاربىز، جەمىس - جيدەكتەر سياقتى نە كەرەكتىڭ بارلىعى سامسىپ تۇر، سول جەردە وسىرىلگەن كوكونىستەر مەن جەمىس - جيدەكتەر ىركەس - تىركەس توپ - توبىمەن بازارعا شىعارىلعان، بۇلار مەرەكە كەزىندەگى بۇقارانىڭ تۇرمىستىق قاجەتىن قاناعاتتاندىرا الادى.
قورعاس قالاسى دۇڭفاڭحۇڭ ەرەن بازارىندا كوكونىس، ازىقتىق ماي سياقتى تۇرمىستىق قاجەتتى بۇيىمدار سورەگە تولتىرىلا ءتىزىلىپتى، ساۋدا دۇكەنىنىڭ قىزمەتكەرى ۋ سۇڭ زات تولىقتاۋمەن قاربالاستاپ جاتىر ەكەن. ”7 - ايدىڭ 28 - كۇنىنەن باستاپ، ەرەن بازارىمىز تاپسىرىس بەرگەن زاتتار ىركەس - تىركەس دۇكەنگە جەتكىزىلە باستادى، مەن ۋاقىتتى مىقتى ۇستاپ زاتتاردى تولىقتاپ، تۇرعىنداردىڭ قاجەتىن اناعۇرلىم ويداعىداي قاناعاتتاندىرۋىم كەرەك“، - دەيدى ۋ سۇڭ.
جان كۇيەرلىكپەن قىزمەت وتەپ، وتباسىلارعا دەيىن جەتكىزىپ بەردى
”جاڭا سويىلعان جاس ەت، باعاسى دا قىمبات ەمەس ەكەن. كەشە تاپسىرىس بەرسەم، بۇگىن ۇيگە اكەلىپ بەرىپسىزدەر، جاپا شەكتىڭىزدەر، ەرەكشە العىس ايتامىن“، - دەدى 7 - ايدىڭ 29 - كۇنى تۇستەن كەيىن تۇرعىن مامەت روزى ءۇرىمجى جوعارى، جاڭا تەحنيكالىق كاسىپتەردى اشۋ رايونى (جاڭا قالا رايونى) چاڭچۇن ورتا جولى اۋماعىن باسقارۋ كوميتەتى ۋانشىڭ الەۋمەتتىك اۋماعى پارتيا باس ياچەيكاسىنىڭ شۋجيى جاڭ ۋيدىڭ قولىنان زاپاس ەتتى قۋانا الىپ جاتىپ.
سول كۇنى تۇستەن كەيىن، جاڭ ۋي بىرنەشە ەرىكتىنى ەرتىپ قاراستى اۋماقتاعى سيىر، قوي ەتىن تىكە ساتۋ ءتۇيىنى مەن تۇرعىندار عيماراتى اراسىندا ارلى - بەرلى ءجۇرىپ، تۇرعىندار ساتىپ العان سيىردىڭ، قويدىڭ جاس ەتتەرىن ءبىر - بىرلەپ ۇيلەرىنە جەتكىزىپ بەردى. ەرىكتىلەر تۇرعىنداردىڭ اتى - ءجونىن، ءۇيىنىڭ ادرەسىن جانە تاپسىرىس بەرگەن سيىر، قوي ەتتەرىنىڭ بولىكتەرىن، سانىن ءبىر - بىرلەپ اداقتاپ، تۇرعىنداردىڭ تەكسەرىپ سالىستىرۋىنا قولايلى بولۋ ءۇشىن زات ساتىپ الۋ تالونىن ازىق - تۇلىك قالتاسىنا سالىپ جاتتى. ”بۇگىن ءبىز جالپى 67 تۇرعىننان تاپسىرىس قابىلدادىق، جاسى ۇلعايعان قارتتارعا، مۇگەدەك جاندارعا ءبىز الدىمەن جەتكىزىپ بەرەمىز، كوپشىلىكتىڭ مەرەكەنى قۋانىشتى وتكىزۋىن ءۇمىت ەتەمىز!“، - دەدى جاڭ ۋي.
”مىناۋ، ءسىز تاپسىرعان كوكونىس، جەمىس - جيدەك، قانداي قاجەتىڭىز بولسا بىزگە ايتىڭىز، مەرەكەڭىزگە الدىن الا قۇتتى بولسىن ايتامىز!“، - دەدى 7 - ايدىڭ 29 - كۇنى قاشقار قالاسى قۇمداربازا ءمالىسى ۇجىمىلىك الەۋمەتتىك اۋماعىندا الەۋمەتتىك اۋماق قىزمەتكەرى شى حۇڭچياڭ زات ساتىپ الۋ قالتاسىن ءجۇرىس - تۇرىسى قولايسىز گۇلميرا نۇرمامەت قارتتىڭ قولىنا تاپسىرىپ جاتىپ. ”الەۋمەتتىك اۋماق قىزمەتكەرلەرى ءبىز ءۇشىن جان - جاقتى ويلاپ جىگى - جاپار بولىپ ءجۇر، ۇيدە ىشەر اس - سۋدىڭ ەشتەڭەسىنەن كەندە ەمەسپىز، مەرەكەنى، ءسوز جوق، قۋانىشتى وتكىزەمىز!“، - دەدى گۇلميرا.
مەرەكە كەزىندەگى قامداۋدى قامتاماسىز ەتۋ ءۇشىن، قاشقار قالاسىنداعى قالىڭ الەۋمەتتىك اۋماق قىزمەتكەرلەرى ”شابارمانعا“، ”ساتىپ اكەلىپ بەرۋشىگە“ اينالىپ، جەتىم قارت، مۇگەدەك جان سياقتى قيىنشىلىعى بار قاۋىمعا جان - جاقتى، ەگجەي - تەگجەيلى جەتكىزىپ بەرۋ قىزمەت وتەۋىن ۇسىندى.
ءۇي تازالاپ، پراندىك - تورت پىسىردى
7 - ايدىڭ 29 - كۇنى تيانشان رايونى نانۋان كوشەسى اۋماعىن باسقارۋ كوميتەتى داۋان سولتۇستىك الەۋمەتتىك اۋماعى اتلانتس شاعىن اۋماعىنىڭ تۇرعىنى مامەتتوحتى رەجەپتىڭ ۇيىندە ءجۇزىم، قۇمىل قاۋىنى، ساڭزى، ماي نان قاتارلى ءدامدى ازىق - تۇلىكتەر ۇستەلگە تولتىرا ءتىزىلىپتى. جارتى ايدىڭ الدىندا - اق، ولار ءۇيدى تازالاپ، ساڭزى پىسىرىپ، پراندىك - تورت دايىنداي باستاعان. ”ىندەت الدىندا، بارلىعىمىز سانالى تۇردە ۇيدە وتىرىپ مەرەكە وتكىزۋىمىز، تۋىس - تۋعانعا، قوناققا بارماۋىمىز كەرەك. پارتيا مەن ۇكىمەتتىڭ باسشىلىعىندا، ءبىزدىڭ، ءسوز جوق، وسى رەتكى ىندەتتەن ساقتانۋ - تىزگىندەۋ توسقاۋىل شايقاسىنىڭ جەڭىسىنە قول جەتكىزەتىندىگىمىزگە سەنەمىز!“، - دەيدى مامەتتوحتى نىق سەنىممەن.
7 - ايدىڭ 29 - كۇنى توقسۇن اۋدانى عولبويى اۋىلى قارابۇلاق قىستاعىنىڭ تۇرعىنى ءابيبا ابىلەميت ەرتە تۇردى. ول الدىمەن باعىمشىلىق اۋماعىنا بارىپ قويلارعا جەم بەرىپ، ونان سوڭ سىپىرعىسىن الىپ اۋلانى سىپىرۋعا، ءۇي ءىشىن تازالاۋعا كىرىستى. ”مەرەكە وتكىزەمىز عوي، ءۇيدىڭ ءىشى - سىرتىن رەتتى، تاپ - تۇيناقتاي تازا جيناپ قويۋىم كەرەك“. ءابيبانىڭ بەيقۇت ۇيىندە توڭازىتقىش، سۇيىق كريستالدى تەلەۆيزور سياقتى كەرەك - جاراقتىڭ ءبارى بار ەكەن. جاڭادان اۋىستىرىلعان داستارقاننىڭ ورتاسىندا 2 تال قىپ - قىزىل اناردىڭ سۋرەتى باسىلىپتى، ”پارتيا مەن ۇكىمەتتىڭ ارقاسىندا جاڭا ۇيگە كوشىپ، جاقسى تۇرمىس كەشىرىپ جاتىرمىن، قازىر ءار كۇنىمىز مەرەكە عوي. وتانىمىزدىڭ گۇلدەنىپ، شالقي بەرۋىن، شينجياڭنىڭ بولاشاعىنىڭ اناعۇرلىم نۇرلى بولۋىن تىلەيمىن“، - دەدى ءابيبا كۇلىپ.
(شينجياڭ گازەتىنىڭ جالپىلىق اقپارات قۇرالدارى ءتىلشىسى جاۋ چۇنحۋا، قاتىناسقان تىلشىلەر لي چۇنشيا، يۇي شي، جاۋ يۋە، جازيرا نەسىپبەك، حان چين - يان، جاڭ رۇيلين، ەرىكتى ءتىلشى ۋاڭ جىنچياڭ جازعان)
