”ناۋقاستاردىڭ شيپاحانادان ساۋىعىپ شىعۋى ەڭ جاقسى مەرەكەلىك تارتۋ“

شينجياڭ گازەتىنىڭ جالپىلىق اقپارات قۇرالدارى ءتىلشىسى چاۋ جين

　　　　7 - ايدىڭ 31 - كۇنى قۇربان ايت مەرەكەسى، اۆتونوميالى رايوننىڭ جاڭا تيپتى ايدارشا ۆيرۋس وكپە قابىنۋ بويىنشا مەديتسينالىق قۇتقارۋ - ەمدەۋگە بەلگىلەنگەن شيپاحانادا گۇلباھار ابىلاحىمەت (وڭدا) قىزمەتتەستەرىمەن بىرگە دەمالىس ارەدىگىندە ساڭزىدان ءدام تاتۋدا. سۋرەتتى شينجياڭ گازەتىنىڭ جالپىلىق اقپارات قۇرالدارى ءتىلشىسى شيە لۇڭ تۇسىرگەن

　　7 - ايدىڭ 31 - كۇنى قۇربان ايت مەرەكەسى، اۆتونوميالى رايوننىڭ جاڭا تيپتى ايدارشا ۆيرۋس وكپە قابىنۋ بويىنشا مەديتسينالىق قۇتقارۋ - ەمدەۋگە بەلگىلەنگەن شيپاحاناداعى ەمدەۋ قىزمەتكەرلەرى باياعىسىنشا قاربالاس ىستەپ، ناۋقاستاردى دەن قويا قۇتقارىپ - ەمدەپ، بار پەيىلمەن كۇتىمدەدى. شيپاحانا پارتكومى الۋان ءتۇرلى فورمامەن مەرەكەلىك سالەمدى ولاردىڭ جانىنا جەتكىزدى.

　　وسى ەكى كۇندە، شيپاحانا پارتكوم القاسىنىڭ مۇشەلەرى جەكە - جەكە ناۋقاستار اۋماعىنا، شيپاگەر - سەسترالار تۇرعان ورىنعا بارىپ، ءبىرىنشى شەپتە ەرلىكپەن شايقاس جاساپ جاتقان ەمدەۋ قىزمەتكەرلەرىنە مەرەكەلىك سالەم جەتكىزدى ءارى مەرەكەلىك ءدامدى تاعامدار الا كەلىپ، ولاردى عىلمي ساقتانىپ - تىزگىندەپ، دەن قويا ەمدەۋ - قۇتقارۋعا ىنتالاندىردى.

　　”مەرەكە وزگەشە بولعانىمەن، قوعامنىڭ ءار سالاسىنىڭ جانە شيپاحانانىڭ قامقورلىعى، ۇيدەگىلەردىڭ قولداۋى بولعاندىقتان، مەرەكەنى بۇرىنعىداي جاقسى وتكىزىپ جاتىرمىز“. ساعات 15تەن 30 مينۋتتا، شيپاگەر گۇلباھار ابىلاحىمەت ناۋقاستار اۋماعىنان ەندى شىعىپ، تۇسكى تاماعىن جەۋگە كىرىستى. گۇلباھار 7 - ايدىڭ 19 - كۇنى شيپاحاناعا كەلىپ ەمدەۋ - قۇتقارۋ قىزمەتىنە ات سالىسقان - دى. ول تۇرعان ناۋقاستار اۋماعىندا 15 شيپاگەر كەزەكپەن اۋىسىپ ىستەيدى، ءار كۇنى ناۋقاس بولمەلەرىن ارالاپ تەكسەرۋ، دياگنوز قويۋ، اقىلداسىپ تۇجىرىم جاساۋ، شيپاگەرلىك تاپسىرمالار بەرۋمەن وتەدى... قىزمەت ءارى قاربالاس، ءارى ءتارتىپتى.

　　”بۇگىن تاڭەرتەڭ ناۋقاس بولمەسىنە كىرسەم، ناۋقاستاردىڭ رۋحاني كۇيى وتە جاقسى ەكەن، شيپاگەرلەر مەن ناۋقاستار ءبىر - بىرىمىزگە مەرەكەلىك سالەم ايتتىق“. ول تۇرعان ناۋقاستار اۋماعىنان قازىرگە دەيىن 8 ناۋقاس شيپاحانادان شىعىپ ۇلگىرىپتى، گۇلباھار: ”ناۋقاستاردىڭ شيپاحانادان ساۋىعىپ شىعۋى ەڭ جاقسى مەرەكەلىك تارتۋ“، - دەدى.

　　بۇل وسى ناۋقاستار اۋماعىنداعى سەسترا التۇنحان ءوماردىڭ 2 - رەت ”ىندەتكە“ قارسى شايقاسقا اتتانۋى. تاڭ اتا ول وتباسىنداعىلاردىڭ جانە دوستارىنىڭ ىقىلاستى تىلەكتەرىن تاپسىرىپ الدى. التۇنحان بىلاي دەدى: بۇل جولى ”مەرەكە قۇتتى بولسىن“ دەگەن ىزگى تىلەكتەردىڭ سوڭىنان ”ساقتانۋ - قورعانۋعا كوڭىل ءبول“، ”ءسىزدىڭ ىندەتتى، ءسوز جوق، جەڭىپ شىعاتىندىعىڭىزعا سەنەمىن“ دەگەن سياقتى ءسوز - سويلەمدەر قوسا جازىلىپتى، كورىپ كوڭىلدەنىپ قالدىم، جاۋاپ قايتارۋعا ۋاقىت بولماعانىمەن، ”ناۋقاستاردىڭ ەرتەرەك ساۋىعىپ وتباسىنداعىلارمەن قاۋىشۋىنا، ءسوز جوق، كومەكتەسە الاتىندىعىمىزدى ءوز ارەكەتتەرىمىزبەن دالەلدەيمىز“.

　　ساعات 18دە، شيپاحانا اسحاناسىندا، اسپازدار بۋى بۇرقىراعان ەتتى، فىنتاڭدى تاماق قالبىرىنا سالىپ جاتتى. ”بۇل ناۋقاستارعا دايىندالعان كەشكى اس. بۇگىن مەرەكە، اسقان ەت، فىنتاڭ سياقتى ءدامدى تاعامداردان اۋىز تيسە، ناۋقاستار وتباسىنىڭ مەيىرىن سەزىنەدى“، - دەدى شيپاحانانىڭ ارتقى شەپ قامداۋ ءبولىمىنىڭ مەڭگەرۋشىسى حۋ يانمىڭ جەمىس - جيدەك پەن ايران دايىنداي ءجۇرىپ.

　　ءبىر ناۋقاس بەينە ەكران ارقىلى تىلشىگە بىلاي دەدى: ”شيپاگەرلەردىڭ مەديتسينالىق قۇتقارۋ - ەمدەۋى تىڭعىلىقتى، سەسترالاردىڭ قارايلاسۋى دا جان - جاقتىلى، ساۋىعىپ ەرتەرەك شيپاحانادان شىعۋعا سەنىمىم نىعايا ءتۇستى“.