− كەزەكتەگى ەكونوميكالىق قىزمەتتى ويداعىداي ىستەۋ جونىندە
حالىق گازەتىنىڭ شولۋشىسى
كەزەكتەگى ەكونوميكالىق قىزمەتتى ويداعىداي ىستەپ، تۇتاس جىلدىق ەكونوميكالىق، قوعامدىق دامۋ نىسانالارىن، مىندەتتەرىن قۇلشىنا ورىنداۋ ”14 - بەسجىلدىق“ جوبانى جاساپ جانە اتقارىپ، جاپپاي سوتسياليستىك وسىزاماندانعان مەملەكەت قۇرۋ ءۇشىن جاقسى باستاما اشۋدا، العاشقى قادامدى جاقسى باسۋدا كەلەلى ماڭىزعا يە.
تاياۋدا اشىلعان جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ ءماجىلىسى ”14 - بەسجىلدىق“ مەزگىلىندەگى ەلىمىزدىڭ دامۋى ءدوپ كەلەتىن ورايلار مەن سىن - سايىستارعا تەرەڭ تالداۋ جاساپ، ”14 - بەسجىلدىق“ مەزگىلىندەگى ەكونوميكالىق، قوعامدىق دامۋدى ىلگەرىلەتۋدىڭ جەتەكشى يدەياسىن جانە نەگىزگى تالابىن ايقىن العا قويىپ، كەزەكتەگى ەكونوميكالىق قىزمەتتى ويداعىداي ىستەۋ، تۇتاس جىلدىق ەكونوميكالىق، قوعامدىق دامۋ نىسانالارىن، مىندەتتەرىن قۇلشىنا ورىنداۋ جونىندە جان - جاقتى ورنالاستىرۋ جاسادى. باس شۋجي شي جينپيڭ وسىنىڭ الدىندا اشىلعان پارتيا سىرتىنداعى قايراتكەرلەردىڭ اڭگىمە ماجىلىسىندە بىلاي دەپ باسا دارىپتەدى: كەزەكتەگى ەكونوميكالىق جاعدايدى دۇرىس تانىپ، رەفورمانى جاپپاي تەرەڭدەتۋدى اناعۇرلىم زور سەرپىنمەن ىلگەرىلەتىپ، دامۋدا ءدوپ كەلگەن ءار ءتۇرلى قيىن ماسەلەلەردى بەلسەنە شەشىپ، ءار جاقتان كەلگەن حاۋىپ - قاتەر، سىن - سايىستاردى جانە وراسان زور قىسىمدى باسەڭدەتىپ، رەفورمانى، دامۋدى ىلگەرىلەتۋگە، ءتۇرلى حاۋىپ - قاتەر، سىن - سايىستاردى جەڭۋگە كەڭ كولەمدى ورتاق تانىم ۇيىستىرۋ، قۋاتتى كۇش توپتاۋ كەرەك.
قازىر دۇنيە ءجۇزى 100 جىلدا بولماعان زور وزگەرىستى باستان كەشىرۋدە، ەلىمىز دامۋىنىڭ ىشكى شارت - جاعدايى مەن سىرتقى ورتاسىندا تەرەڭ كۇردەلى وزگەرىستەر تۋىلۋدا. ىشكە قاراساق، ەلىمىز ەكونوميكاسى جوعارى ساپالى دامۋ ساتىسىنا ءوتتى، كوپ جاقتى باسىمدىق پەن شارت - جاعدايى بار، دامۋ بولاشاعى جاقسى، ءبىراق قۇرىلىمدىق، تۇزىلىستىك، پەريودتىق ماسەلەلەردىڭ ءوزارا كىرىگۋى اكەلگەن قيىنشىلىقتار مەن سىن - سايىستارعا ءدوپ كەلىپ وتىر. سىرتقا قاراساق، بەيبىتشىلىك پەن دامۋ ءالى دە ءداۋىردىڭ باستى تاقىرىبى بولا بەرەدى، سونىمەن بىرگە حالىقارالىق ورتا كۇن سايىن كۇردەلىلەسىپ، ورنىقسىزدىق، تۇراقسىزدىق كورنەكتى كۇشەيدى. كەزەكتە جانە الداعى ءبىر مەزگىلدە ەلىمىزدىڭ دامۋى ءالى دە ستراتەگيالىق وراي مەزگىلىندە تۇرادى، ءبىراق وراي مەن سىن - سايىستىڭ بارلىعىندا جاڭا دامۋ، وزگەرىستەر بولادى. ءبىز وراي تانىمى مەن حاۋىپ - قاتەر تانىمىن كۇشەيتىپ، دامۋ زاڭدىلىعىن يگەرىپ، كۇرەس رۋحىن ساۋلەلەندىرىپ، داعدارىس بارىسىندا جاڭا وراي جەتىلدىرۋگە، وزگەرىس بارىسىندا جاڭا جاعداي اشۋعا شەبەر بولىپ، ورايدى مىقتاپ يگەرىپ، سىن - سايىسقا توتەپ بەرىپ، پايدالى جاققا بەيىمدەلىپ، زالالدى جاقتان اۋلاق بولىپ، ەرلىكپەن العا باسۋىمىز كەرەك.
حاۋىپ - قاتەر، سىن - سايىستاردى جەڭۋ ءۇشىن، ءتۇبىن قۋعاندا، ءوز ءىسىمىزدى جاقسى ىستەۋىمىز كەرەك. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ ءماجىلىسى: ءبىز جولىققان كوپتەگەن ماسەلەلەر ورتا، ۇزاق مەرزىمدىك ماسەلەلەر، بۇل ماسەلەلەردى، ءسوز جوق، ۇزاققا سوزىلاتىن سوعىس جۇرگىزۋ تۇرعىسىنان تانۋىمىز كەرەك، - دەپ اتاپ كورسەتتى. بۇل كەلەلى تۇجىرىم، ءبىز، ءسوز جوق، سىرتقى ورتاداعى وزگەرىستەرگە ءبىرشاما ۇزاق ۋاقىت توتەپ بەرۋدىڭ يدەيالىق دايىندىعى مەن قىزمەت دايىندىعىن ويداعىداي جاساۋىمىز كەرەك. بۇل بىزدەن دامۋدىڭ تياناعىن كوبىنەسە ەل ىشىنە قويىپ، ىشكى سۇرانىستى كەڭەيتۋ سىندى ستراتەگيالىق نەگىزگى ءتۇيىندى مىقتى يگەرىپ، ەل ىشىندەگى ۇلكەن اينالىمدى نەگىزگى تۇلعا ەتكەن، ەل ءىشى مەن حالىقارا سىندى ەكى اينالىم ءبىرىن - ءبىرى جەبەيتىن جاڭا دامۋ ارناسىن جەدەل قالىپتاستىرىپ، ىندەتتەن ساقتانۋ - تىزگىندەۋ مەن ەكونوميكالىق، قوعامدىق دامۋ قىزمەتىن ورتا، ۇزاق مەزگىل بويىنشا سايكەستىرۋ مەحانيزمىن ورناتىپ، ارتۋدى ورنىقتىرۋ مەن حاۋىپ - قاتەردەن ساقتانۋدىڭ ۇزاق ۋاقىت تەڭگەرىمدى بولۋىن جۇزەگە اسىرۋدى تالاپ ەتەدى. الەمدىك بازار تارايعان سىرتقى ورتا الدىندا، ءبىز، ءسوز جوق، ەل ىشىندەگى ايرىقشا كەڭ كولەمدى بازار باسىمدىعىن تولىق ساۋلەلەندىرىپ، ەل ءىشى ەكونوميكاسىن گۇلدەندىرۋ، ەل ىشىندەگى ۇلكەن اينالىمدى ىركىلىسسىزدەندىرۋ ارقىلى ەلىمىز ەكونوميكاسىنىڭ دامۋىنا قوزعاۋشى كۇش قوسۋىمىز كەرەك. ەكونوميكانىڭ جوعارى ساپالى دامۋىن تاباندىلىقپەن ىلگەرىلەتىپ، ەكونوميكالىق دامۋدىڭ ساپا وزگەرىسىن، ونىمدىلىك وزگەرىسىن، قوزعاۋشى كۇش وزگەرىسىن كۇش سالا ىلگەرىلەتىپ، ەكونوميكانىڭ باسەكەلىك قۋاتىن، جاڭالىق اشۋ قۋاتىن، حاۋىپ - قاتەرگە قارسى تۇرۋ قۋاتىن ارتتىرۋىمىز كەرەك. دامۋ مەن حاۋىپسىزدىكتى ءبىر تۇتاس جوسپارلاپ، قۇرىلىمدى رەتتەۋدىڭ ستراتەگيالىق بەتالىسىنان جازباي، ماكرولىق رەتتەۋ - مەڭگەرۋدىڭ پەريود اتتاعان جوبالانۋى مەن رەتتەلۋىن كەمەلدەندىرىپ، جاڭا دامۋ ۇستانىمىن دامۋدىڭ جالپى بارىسىمەن جانە ءار سالامەن ساباقتاستىرىپ، اناعۇرلىم جوعارى ساپالى، اناعۇرلىم ونىمدىلىككە يە، اناعۇرلىم ءادىل، اناعۇرلىم باياندى، اناعۇرلىم حاۋىپسىز دامۋدى جۇزەگە اسىرۋعا قۇلشىنۋ كەرەك. بازار تۇلعالارىنىڭ ومىرشەڭدىگىن زور كۇشپەن قورعاپ جانە قاۋلاتىپ، عىلىم - تەحنيكادا جاڭالىق اشۋدى، سونداي - اق باسقا جاقتارداعى جاڭالىق اشۋدى زور كۇشپەن ىلگەرىلەتىپ، شەشۋشى وزەكتى تەحنيكالاردان قامال الۋدى جەدەلدەتىپ، كاسىپ سالاسى تىزبەگىنىڭ، قامداۋ تىزبەگىنىڭ ورنىقتىلىعى مەن باسەكەلىك قۋاتىن جوعارىلاتىپ، كاسىپ سالاسىنىڭ جوعارى دەڭگەيلەنۋ، جاسىلدانۋ، زەردەلىلەنۋ، توعىسۋ بەتالىسىنا قاراي دامۋىن ىلگەرىلەتۋ كەرەك.
رەفورما جاساۋ، ەسىك اشۋ − حاۋىپ - قاتەردەن ساقتانۋداعى باسىمدىق ءارى سىن - سايىستاردى جەڭۋدەگى ۇتىمدى شارا. قامداۋ جاعىنداعى قۇرىلىمدىق رەفورمانى نەگىزگى جەلى ەتۋگە تاباندى بولىپ، رەفورمانىڭ تىڭنان جول اشۋ جانە جەتەكتەۋ رولىن ويداعىداي ساۋلەلەندىرىپ، نىسانا ارقىلى جەتەكتەۋگە جانە ماسەلەنى باعدار ەتۋگە تاباندى بولۋ، تەبىن توپتاۋعا، كۇش جيناۋعا، اۋقىمدى جوسپارلاۋعا ءارى وزگەرىستى تانۋعا، وزگەرىسكە تالپىنۋعا، وزگەرىسكە توتەپ بەرۋگە شەبەر بولىپ، تەتىكتى مىقتى ۇستاپ، ىزدەنىس جاساۋعا بەلسەنە شابىتتاندىرىپ، رەفورمانىڭ ناقتى ونىمدىلىگىن كورنەكتىلەندىرىپ، رەفورماعا سۇيەنە وتىرىپ جاڭا وراي جەتىلدىرۋ، جاڭا جاعداي اشۋ كەرەك. ەل ىشىندەگى ۇلكەن اينالىمدى نەگىزگى تۇلعا ەتۋ دەگەنىمىز استە ەسىكتى بەكىتىپ جابىق اينالىمدا جۇمىس جۇرگىزۋ دەگەندىك ەمەس، قايتا ىشكى سۇرانىستىڭ كومەسكى كۇشىن ساۋلەلەندىرۋ ارقىلى ەل ءىشى بازارى مەن حالىقارالىق بازاردىڭ اناعۇرلىم جاقسى تۇتاسۋىنا مۇمكىندىك جاساپ، حالىقارا جانە ەل ءىشى سىندى ەكى بازاردان، ەكى ءتۇرلى بايلىقتان اناعۇرلىم جاقسى پايدالانىپ، اناعۇرلىم ەكپىندى، باياندى دامۋدى جۇزەگە اسىرۋ. ۇزاق بولاشاقتان قاراعاندا، ەكونوميكانىڭ جاھاندانۋى ءالى دە تاريح اعىنى، ءار ەلدىڭ جۇمىس ءبولىسى بويىنشا سەلبەسۋى، ءوزارا پايدا جەتكىزىپ تەڭ يگىلىككە كەنەلۋى ۇزاق ۋاقىتتىق بەتالىس. ءبىز تاريحتىڭ دۇرىس جاعىندا تۇرىپ، رەفورمانى تەرەڭدەتۋگە، ەسىك اشۋدى كەڭەيتۋگە تاباندى بولىپ، اشىق دۇنيە ءجۇزى ەكونوميكاسىن قۇرۋدى ىلگەرىلەتۋىمىز، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋىمىز كەرەك.
باس شۋجي شي جينپيڭ ايتقانداي: ”بىزدە سىن - سايىسقا توتەپ بەرەتىن مىعىم بەكىم، بۇلجىماس جىگەر، بەرىك مەملەكەت قۋاتى بار، ءتۇرلى حاۋىپ - قاتەردى، سىناقتى جەڭۋگە جەتكىلىكتى قايرات، قابىلەت، اقىل - پاراسات بار، جۇڭحۋا ۇلتىنىڭ ۇلى گۇلدەنۋدى جۇزەگە اسىرۋىنىڭ تاريحي اياق الىسىنا ەشقانداي مەملەكەت، ەشقانداي ادام بوگەت بولا المايدى“.
(8 - ايدىڭ 3 - كۇنگى «حالىق گازەتىندە» باسىلعان)
