ماماندار: كوڭىل كۇيدىڭ ورنىقتىلىعىن ساقتاۋعا قۇلشىنۋ كەرەك
تيانشان تورىنىڭ حابارى (حابارىن جازىپ، سۋرەتىن تۇسىرگەن گو ليڭ، دوۋ شيڭجۇن، يىن تۇڭيۋان، جانات تولقىن). 8 - ايدىڭ 6 - كۇنى ساعات 17دە، اۆتونوميالى رايوندىق ۇكىمەتتىڭ اقپارات كەڭسەسى ٴۇرىمجى قالاسىنىڭ جاڭا تيپتى ايدارشا ۆيرۋس وكپە قابىنۋ ىندەت جاعدايى جانە ساقتانۋ - تىزگىندەۋ قىزمەتى جونىندە 20 - رەتكى اقپار جاريالاۋ ٴماجىلىسىن اشتى، شينجياڭ پسيحولوگيالىق دەنساۋلىق ساقتاۋ قوعامىنىڭ ۇنەمىلىك ىستەرگە جاۋاپتى ورىنباسار باس القاسى شۇي شياڭدۇڭ مەديتسينالىق باقىلاۋعا الىنعانداردىڭ پسيحيكالىق تەكسەرۋدى جانە كوڭىل كۇيىن مەڭگەرۋدى قالاي ويداعىداي ىستەۋى كەرەك دەگەن ماسەلەلەر توڭىرەگىندە كوپ جاقتىلى كەڭەس بەردى.
شۇي شياڭدۇڭ بىلاي دەدى: مەديتسينالىق باقىلاۋعا الىنعانداردىڭ بەلگىلى دارەجەدە پسيحيكالىق جاقتان باسىمعا ۇشىراۋى قالىپتى قۇبلىس. كوپشىلىك قىزمەتكەرلەردىڭ ورنالاستىرۋىنا بويسۇنىپ، تەكسەرۋگە سايكەسۋى، سونىمەن بىرگە مەديتسينالىق باقىلاۋ ٴتۇيىنىنىڭ توتەنشە حاۋىپسىز ەكەندىگىن، ەمدەۋ - كۇتىمدەۋ قىزمەتكەرلەرىنىڭ وزدەرىنە قامقورلىق جاساپ، كومەكتەسىپ جاتقاندىعىن، ومىرلەرىنىڭ حاۋىپسىزدىگىن قامتاماسىز ەتەتىن شارالاردىڭ بار ەكەندىگىن تانىپ جەتۋى كەرەك. بۇلاي بولعاندا ورنىقسىز فاكتوردان تۋىلاتىن بەيمازالىقتى كورنەكتى باسەڭدەتۋگە بولادى.
”كوڭىل كۇيدىڭ بايسالدىلىعىن ساقتاۋعا قۇلشىنىپ، بويداعى ۇرەيدى باسەڭدەتۋىمىز كەرەك.“ شۇي شياڭدۇڭ بىلاي دەدى: ٴبىرىنشى، وبيەكتيۆ تۇرعىدان بايىپپەن قاراۋ، باسى ارتىق ينفورماتسيالاردى نەمەسە جالعان ينفورماتسيالاردى قابىلداماۋ كەرەك. اۋرۋدى دۇرىس تانىپ، ەستىلىكپەن شىندىقتى قابىلداۋ، باق سىناماۋ، سونىمەن بىرگە ۇرەيلەنىپ كەتپەۋ كەرەك. ۇكىمەت جاريالاعان ينفورماتسيانى ولشەم ەتىپ، الىپ قاشپا سوزدەرگە سەنبەۋ، الدەكىمنىڭ ايتقان ٴسوزىنىڭ جەتەگىندە كەتپەۋ كەرەك.
ەكىنشى، دۇرىس جاقتان كوپ وي جۇگىرتۋ. كەيبىر بولىمسىز ىستەردى بەلسەندى جاققا جەتەلەپ، بەلسەندى، سابىرلى، بايسالدى كوڭىل كۇيدى ساقتاۋ كەرەك. قىسىم الدىندا، كوڭىل كۇيدى سەرگىتىپ، تۋىس - تۋعاندارىمەن تىلدەسۋدى جانە قارىم - قاتىناستى ساقتاۋ كەرەك، ٴوزارا شابىتتاندىرۋ جانە قولداۋ ٴبىزدىڭ ىندەتتى جەڭۋ سەنىمىمىزدى نىعايتادى.
ٴۇشىنشى، قوبالجىپ، جابىرقاپ، دەگبىرسىزدەنگەندە، كوڭىل كۇيدى سەرگىتۋدىڭ ۇيلەسىمدى ٴتاسىلىن قاراستىرۋ كەرەك. مىسالى، جاقىندارىمەن سىرلاسۋ، بولمە ىشىندە جەڭىل ارەكەتتەر جاساۋ، تەلەۆيزور كورۋ ت.ب.
ٴتورتىنشى، ۇرەيدەن ارىلىپ، ورىندى كومەك سۇراۋ. ەگەر پسيحيكالىق باسىم ٴبىرشاما اۋىر بولىپ، ٴوزىن - ٴوزى رەتتەي الماسا، دەر كەزىندە پسيحيكالىق كومەك سۇراۋدى ۇسىنىس ەتەمىز، بەت-بەدەلىن ويلاپ، پسيحيكالىق اقىل - كەڭەس سۇراۋدان باس تارتۋعا استە بولمايدى.
