شينجياڭ گازەتىنىڭ جالپىلىق اقپارات قۇرالدارى تىلشىلەرى لي چۇنشيا، جاۋ چۇنحۋا 8 - ايدىڭ 7 - كۇنى ۇرىمجىدەن حابارلايدى. 8 - ايدىڭ 7 - كۇنى اۆتونوميالى رايوندىق ۇكىمەت اقپارات كەڭسەسى اشقان ىندەتتەن ساقتانۋ - تىزگىندەۋ قىزمەتى جونىندەگى اقپار جاريالاۋ ماجىلىسىندە ءۇرىمجى قالالىق حالىق ۇكىمەتىنىڭ ورىنباسار باس حاتشىسى شاڭ يۇيلان بىلاي دەپ تانىستىردى: ءۇرىمجى قالاسى تۇرعىنداردىڭ تۇرمىسىن قامتاماسىز ەتۋدى ىندەتتەن ساقتانۋ - تىزگىندەۋ قىزمەتىن ورىستەتۋدىڭ ماڭىزدى شاراسى رەتىندە ناقتى، ەگجەي - تەگجەيلى يگەرىپ، تۇرعىنداردى تۇرمىستىق زاتتىق ماتەريالدارمەن قامداۋدى جانە جەتكىزۋدى بار كۇشپەن جاقسى ىستەپ، تۇرعىنداردىڭ ۇيدە الاڭسىز جاتۋىنا، تۇرمىسىنىڭ قالىپتى بولۋىنا شىنايى كەپىلدىك ەتتى.
”قازىر ءۇرىمجى قالاسىندا ەت، كوكونىس، استىق، مايمەن قامداۋ جەتكىلىكتى، باعا تۇراقتى“. شاڭ يۇيلان بىلاي دەدى: ءۇرىمجى قالاسى ىندەتتەن ساقتانۋ - تىزگىندەۋ مەزگىلىندەگى كوكونىس جانە ەتتى بازارعا سالۋ جوباسىن بەلگىلەپ، اتقارىپ، ەت، كوكونىس، استىق، ماي سياقتى تۇرمىستىق قاجەتتى بۇيىمدارمەن تۇراقتى باعادا قامداۋدى قامتاماسىز ەتتى؛ ينتەرنەت جەلىسىندە تاپسىرىس بەرۋ، جەلىدەن تىسقارى جەتكىزىپ بەرۋ سياقتى تاسىلدەردى كۇش سالا ىلگەرىلەتىپ، شاعىن اۋماقتاعى تۇرعىنداردى نەگىزگى تۇرمىستىق زاتتىق ماتەريالدارمەن قالىپتى قامداۋدى قامتاماسىز ەتتى.
ءۇرىمجى قالاسى الەۋمەتتىك اۋماقتاردىڭ ساقتانۋ - تىزگىندەۋ ءبىرىنشى شەبىنىڭ نەگىزگى كۇشتىك رولىن ساۋلەلەندىرىپ، تومەنگە تۇسكەن ورگان، ءىسورىندارىنداعى كادرلاردى، ەرىكتىلەردى، ”ۇعىسۋ، تيىمدىلىك جاساۋ، توعىستىرۋ“ قىزمەت اترەتىنىڭ مۇشەلەرىن ءبىر تۇتاس ورنالاستىرىپ، الەۋمەتتىك اۋماق ءبىرىنشى شەبىندەگى زاتتىق ماتەريال جەتكىزۋدى جانە قىزمەت وتەۋدى قامتاماسىزداندىرۋ كۇشتەرىن نىعايتىپ، زورايتىپ، جەكەلىك ساقتانۋ - قورعانۋ جۇمىسىن ويداعىداي ىستەۋ العى شارتىندا، تۇرعىنداردىڭ ازىق - تۇلىك، ءدارى - دارمەك سياقتى تۇرمىستىق قاجەتتى بۇيىمداردى دەر كەزىندە ساتىپ الۋىنا كومەكتەسىپ، زاتتى تۇيىننەن - تۇيىنگە، ۇيگە ءدال، جولىقپاي جەتكىزىپ بەردى. قازىر تۇتاس قالادا 2000نان استام ەرىكتىلەر قىزمەت وتەۋ اترەتى ءار ۇلت تۇرعىندارىنىڭ زات ساتىپ الۋ، تاماق جەتكىزۋ، قوقىر - قوقسىقتى جيناۋ سياقتى ءىس جۇزىندىك ماسەلەلەرىن شەشىپ بەرۋدە.
ەرەكشە قيىنشىلىعى بار بۇقارانىڭ نەگىزگى تۇرمىسىن قامتاماسىز ەتۋگە شىنايى كەپىلدىك ەتۋ ءۇشىن، ءۇرىمجى قالاسى كوڭىل ءبولۋ، قامقورلىق جاساۋ سەرپىنىن ارتتىرىپ، قيىنشىلىعى بار بۇقارا، جەتىم - جەسىر قارتتار، مۇگەدەكتەر قاتارلىلاردى تۇرمىستىق زاتتىق ماتەريالدارمەن دەر كەزىندە قامداپ، ءتۇرلى قۇتقارۋ - كومەكتەسۋ شارالارىن تياناقتاندىرىپ، قىزمەتكەرلەردى تۇرمىستىق زاتتىق ماتەريالداردى وكىلەتتى ساتىپ الۋ، ۇيگە جەتكىزىپ بەرۋ قىزمەتىن تۇيىننەن - تۇيىنگە ورىستەتۋگە ۇيىمداستىردى. شيپاگەرگە كورىنبەكشى بولعان سوزىلمالى ناۋقاسى بارلار، جۇكتى، بوسانعان ايەلدەر قاتارلىلار ءۇشىن ءدارى - دارمەكتى وكىلەتتى ساتىپ الىپ بەرۋ، جاسىل ارنا اشۋ ارقىلى شيپاگەرگە كورىنۋىن قامتاماسىز ەتۋ سياقتى تاسىلدەرمەن ويداعىداي قىزمەت وتەدى. كەنەتتەن اۋىرعان تۇرعىنداردى الەۋمەتتىك اۋماق كولىكپەن الىپ بارىپ - الىپ كەلدى، ەرەكشە جاعدايى بارلارعا ارنايى ادام قارادى.
