شينجياڭ گازەتىنىڭ جالپىلىق اقپارات قۇرالدارى ءتىلشىسى ياڭ شۋحان
”كوپشىلىك تەزدەتىڭىزدەر!“، 7 - ايدىڭ 23 - كۇنى قاراقاش اۋدانى ءتوۋات اۋىلى وي قىستاعىنداعى التىن ساۋساق قولونەر بۇيىمدارىن جاساۋ شارۋالار كاسىپتىك سەلبەستىك كووپەراتيۆىندە كووپەراتيۆتىڭ 41 جاستاعى جاۋاپتىسى روزىتوحتى ماحسۇت جۇمىسشىلارمەن سويلەسە ءجۇرىپ، ولاردى جۇمىس قارقىنىن تەزدەتۋگە جىگەرلەندىردى.
”ءبىر ميلليون يۋاننىڭ تاپسىرىسىن، ءسوز جوق، ساپا مەن سانعا كەپىلدىك ەتە وتىرىپ ۋاعىندا ورىنداۋىمىز كەرەك!“. 25 جاستاعى تىگىنشى روزىنيسا تۇرسۇن ءوزىنىڭ جۇمىس قارقىنىن قالاي تەزدەتكەنىن دە بىلمەي قالدى.
سەلبەستىك كووپەراتيۆىندە 1500 شارشى مەتر شاماسىنداعى سەحتا 8 جۇمىسشى قاربالاس جۇمىس ىستەپ جاتىر، تولىق تىگىلىپ بولماعان دوپپالار جۇمىس ورنىنا رەتتى ءتىزىلىپ قويىلىپتى.
روزىتوحتى تىلشىگە قاراي ءجۇرىپ كەلىپ، ءبىر دوپپانى بەردى دە: ”بۇگىن كۇلىمدەدىڭ بە؟“، - دەپ مۇقيات سۇرادى. ءاسىلى بۇل روزىتوحتىنىڭ دوپپاسىنىڭ جارناما ءسوزى ەكەن، ول دوپپاسىنا ”كۇلىمدەۋ“ دەگەن ماركانى تىركەتىپتى.
2000 - جىلى جازعىتۇرىم، ۇستازىنىڭ ۇيىنە بارعاندا ءۇي تولى دوپپانى كورگەندە دوپپا تىگۋ ونەرىن جاقسى ۇيرەنىپ، كەيىن سول ونەرىمەن تىرشىلىك ەتۋگە ىشتەي بەكىگەنى روزىتوحتىنىڭ ءالى ەسىندە.
20 جىلدان بەرى، روزىتوحتى وسى جۇمىسپەن باستان - اياق اينالىسىپ كەلەدى. ”دوپپا تىگۋدى جاقسى كورەمىن، مەن قولونەر شەبەرىمىن“. روزىتوحتى ۇنەمى جۇرتتان پىكىر، ۇسىنىس الىپ، جاڭا ۇلگىنى زەرتتەپ، ءوزى ءتىپتى رازى بولاتىن دوپپانى تىككەنىن، ونى ەلەكترسيكلمەن بازارعا اپارىپ ساتقانىن ايتتى.
2018 - جىلى روزىتوحتى ءبىر ميلليون 500 مىڭ يۋان قارجى سالىپ، قىستاقتا قولونەر بۇيىمدارىن جاساۋ سەلبەستىك كووپەراتيۆىن قۇرىپ، قولونەر ۇيرەنگىسى كەلەتىن قىستاق تۇرعىندارىن بىرگە شارۋاشىلىق قۇرۋعا تارتۋعا بەكيدى.
كەزىندەگى كەدەي قىستاق تۇرعىنى قۇربان مامەت وسى سەلبەستىك كووپەراتيۆىنە مۇشە بولادى، ”سول كەزدە وتباسىمىزدىڭ تۇرمىسىندا قيىنشىلىق بار ەدى، روزىتوحتى زەيىن سالا جاقسى ىستەسەم، ءسوز جوق، اقشا تابا الاتىندىعىمدى ايتتى“، - دەيدى ول. سودان بەرى 3 جىل ءوتتى، ونەرگە ابدەن جاتىلعان قۇربان ءار ايدا 5000 يۋاننىڭ ۇستىندە ەڭبەكاقى الادى، ايەلى ءبىر كاسىپورىندا جۇمىس ىستەيدى، ايلىق ەڭبەكاقىسى 2500 يۋان.
30 جاستاعى قىستاق تۇرعىنى پاتەم مامەتايسا زەرەك ءارى شەبەر، ونىڭ بار زەيىن - زەردەسىمەن دوپپانى تىگىسىن جاتىق ءارى كوركەم ەتىپ تىگىپ وتىرعانىن كورەسىڭ. ”ءۇيدىڭ ىرگەسىندە جۇمىستانىپ اقشا تاۋىپ وتىرمىن، بالالار مەن ۇلكەندەرگە دە قارايلاسا الامىن، بۇل قىزمەتتى ەرەكشە جاقسى كورەمىن“، - دەيدى پاتەم كۇلىپ.
روزىتوحتىنىڭ ايتۋىنشا، قىستاقتىڭ ءبىرىنشى شۋجيى جان - جاققا شاپقىلاپ ءجۇرىپ دانەكەر بولىپ، ونىڭ دوپپاسىنىڭ ساتىلۋ جولىن اشتى، سونداي - اق ونىڭ ماركانى تىركەۋگە الدىرىپ، تانىمالدىعىنىڭ ارتۋىنا كومەكتەسىپتى.
”بايۋدىڭ امالى بىرەۋ عانا، ياعني ەڭبەكقورلىق، ءبىر ءىستى تاباندىلىقپەن، مەيلىنشە جاقسى ىستەگەندە عانا، اقشا تابۋدان قام جەمەيسىڭ“. روزىتوحتى ءوزىنىڭ كەلەسى قادامدا كەدەي وتباسىلارىنان تاعى دا ءبىراز ادامدى جۇمىسقا قابىلداپ، ولارعا اقشا تابۋدىڭ سىرتىندا تەحنيكا ۇيرەتىپ، قولونەرلەرىمەن بايۋعا مۇمكىندىك جاساۋدى ويلاستىرىپ وتىرعانىن ايتتى.
اۆتونوميالى رايوندىق جوعارى حالىق سوتى مەكەمەسىنىڭ قاراقاش اۋدانى ءتوۋات اۋىلىنىڭ وي قىستاعىندا تۇراتىن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتىنىڭ ءبىرىنشى شۋجيى يۇي لياڭ بىزگە قىزمەت اترەتىنىڭ سەلبەستىك كووپەراتيۆىنىڭ جۇيەلى شارۋاشىلىق جۇرگىزۋىنە كومەكتەسكەنىن، سەلبەستىك كووپەراتيۆىنىڭ جىلدىق ءونىم قۇنىنىڭ 2 ميلليون يۋانعا جەتكەنىن ايتتى.
