تيانشان تورى
تيانشان تورى   ›   جاڭالىقتار   ›   شينجياڭ حابارلارى

لاستانۋدان ساقتانۋ جانە ونى جونگە سالۋدىڭ ”ءۇش ءىرى شايقاسى“ ىشكەرىلەي ىلگەرىلەدى

شينجياڭ گازەتىنىڭ جالپىلىق اقپارات قۇرالدارى ءتىلشىسى لي شيڭ

    ەبينۇر كولىندەگى يازىۋان (6 - ايدىڭ 18 - كۇنى ۇشقىشسىز ۇشۋ اپپاراتى تۇسىرگەن). بۇراتالا موڭعۇل اۆتونوميالى وبلىسى ەبينۇر كولىنىڭ ەكولوگياسىن قالپىنا كەلتىرۋ جانە جونگە سالۋ ينجەنەرياسىن كۇش سالا اتقارىپ، سۋ ايدىنىنىڭ 805 شارشى كيلومەترى قالپىنا كەلدى، مول سۋ بايلىعىنىڭ تولىقتاۋىنىڭ ناتيجەسىندە توڭىرەكتەگى سازدى جەرلەردىڭ تىرشىلىك تىنىسى قايتا جانداندى. سۋرەتتى ان شياۋلۇڭ تۇسىرگەن

  ”وتانىمنىڭ بارلىق ولكە - قالالارىن ارالاپ شىقتىم، شينجياڭ مەنىڭ جۇرەگىمنىڭ تورىنەن تەرەڭ ورىن الدى“. 7 - ايدىڭ 4 - كۇنى توراپتاس aria ”شياۋحۇڭشۋدا“ شينجياڭدا ساياحاتتا بولعان كەزدەگى بەينەجازبالارىن جۇكتەپ، وسىنداي ءسوز قالدىرىپتى. بەينەجازباداعى كوكپەڭبەك اسپان، ادەمى اقشا بۇلتتار، مانات تاۋلار، تۇنىق سۋلار، ايبىندى كوركەم بايتاق دالا تالاي - تالاي توراپتاستان ىركەس - تىركەس القاۋ الىپ جاتتى.

  ايتىپ - ايتپاي، شينجياڭنىڭ كوركەمدىگى تۇمسا تابيعاتىمەن، تازا ەكولوگياسىمەن، ”اسقارالى تاۋلارى مەن ءمولدىر تۇنىق سۋ اۋىلعا دەگەن ساعىنىشپەن ەسىڭدە قالاتىندىعى“ ءشۇباسىز.

  شينجياڭنىڭ ەكولوگياسى ءالسىز، وسى جەردىڭ تاۋ - سۋىن ساقتاپ قالۋ ءۇشىن، ءسوز جوق، ەسەلەپ قۇلشىنۋ كەرەك. سوڭعى جىلدارى شينجياڭ تۇنىق سۋ، جاسىل تاۋ − باعالى بايلىق ۇستانىمىن بەرىك ورناتىپ، اشىق اسپان، تۇنىق سۋ، تازا توپىراق سىندى ءۇش ءىرى قورعاۋ شايقاسىن جەتەكشى ەتىپ، لاستانۋدان ساقتانۋ جانە ونى جونگە سالۋدان قامال الۋ شايقاسىنىڭ ىشكەرىلەي ىلگەرىلەۋىن ۇزدىكسىز جەبەپ، ەكولوگيالىق ورتاداعى ولقىلىقتاردى ۇزدىكسىز تولىقتاپ، اسپانى اشىق، جەرى مانات، سۋى تۇنىق كورىكتى شينجياڭ قۇرۋعا قۇلشىندى.

شايقاس جەمىسى: لاستانۋدان ساقتانۋ جانە ونى جونگە سالۋ ناتيجەسى كورنەكتى بولدى

  باس شۋجي شي جينپيڭ كورنەكتى ەكولوگيالىق ورتا ماسەلەلەرىن شەشۋدى حالىق تۇرمىسىندا الدىمەن ەسكەرەتىن سالا ەتىپ، ”بۇقاراعا اشىق اسپان، اقشا بۇلت، سامسىعان جۇلدىز سيلاۋ“، ”سۋى تۇنىق، جاعاسى جاسىل، بالىعى اسىر سالعان كورىنىس سيلاۋ“ كەرەك دەپ اتاپ كورسەتكەن بولاتىن.

  بىلتىر قىستاعى جىلۋمەن قامداۋ ماۋسىمىندا، ءۇرىمجىنىڭ اشىق اسپانىن قورعاۋ شايقاسىنىڭ ناتيجەسى كورنەكتى بولدى. بۇكىل قالادا ولشەمگە جەتكەن كۇن سانى (ساپالى اۋا رايى كۇندەرى) 114كە جەتىپ، الدىڭعى جىلعى سايكەس مەزگىلدەگىدەن 26 كۇن ارتىپ، اۋىر لاستانعان كۇندەر الدىڭعى جىلعى سايكەس مەزگىلدەگىدەن 13 كۇن ازايدى. جىلۋمەن قامداۋ ماۋسىمىندا دا ءۇرىمجىنىڭ اسپانى كوكپەڭبەك بولىپ تۇردى.

  بۇل جونىندە ءۇرىمجى قالاسىنىڭ تۇرعىنى لي ايمين تەرەڭ اسەرگە يە: ”بۇرىن ءۇرىمجىنىڭ قىسىندا اۋىر لاستانعان كەزدەر بولدى، ۇلانبايدان قايىرىلا قاراساڭىز، اسپان قارا قازان توڭكەرگەندەي قارا تۇتىنمەن تۇمشالانىپ تۇراتىن. قازىر جاقساردى، اسپان كوكپەڭبەك بولىپ تۇرادى، قىستىڭ وزىندە دە باقتارعا بارىپ الاڭسىز جاياۋ ءجۇرىپ شىنىعىپ، تازا اۋامەن تىنىستاۋعا بولادى“.

  ”اشىق اسپان ينجەنەرياسىن“، ”كومىردى گازعا وزگەرتۋ“ ينجەنەرياسىن 10 نەشە جىل ۇزدىكسىز ورىستەتكەننەن كەيىن، ءۇرىمجى اتموسفەراسىنىڭ لاستانۋ جاعدايى ايتارلىقتاي جاقساردى. 2018 - جىلدىڭ سوڭعى جارتىسىندا ”اشىق اسپاندى قورعاۋ شايقاسى“ باستالعان سوڭ، ۇرىمجىدە 65 توننا/ساعاتتان تومەن كومىر جاعاتىن ونەركاسىپتىك پار قازاندارى نەگىزىنەن قاتاردان قالدىرىلىپ، ”بىتىراڭقى، بىلىققان، لاستاۋشى“ كاسىپورىندار جونگە سالىنىپ، ءىرى تيپتى ونەركاسىپتىك كاسىپورىنداردىڭ كوپشىلىگى اسا تومەن دەڭگەيدە لاس زات شىعارۋدى جۇزەگە اسىرىپ، اۋا ساپاسى ونان ارى جاقسارا ءتۇستى.

  لي ايميننىڭ العان اسەرىندە ايتىلعانداي، تازا اۋامەن تىنىستاۋ بۇقارانىڭ تابىس سەزىمىنىڭ، باقىت سەزىمىنىڭ ءبىر بولىگى، سونداي - اق جاپپاي دوڭگەلەك داۋلەتتىلىككە قادام تاستاۋدا كەم بولسا بولمايتىن ەكولوگيالىق نەگىز سانالادى.

  اشىق اسپاندى قورعاۋ شايقاسى، تۇنىق سۋدى قورعاۋ شايقاسى، تازا توپىراقتى قورعاۋ شايقاسى قاتار جۇرگىزىلىپ، لاستانۋدان ساقتانۋ مەن ونى جونگە سالۋدىڭ ”بۇيداسىن“ مىقتاپ يگەردى، ونىڭ ناتيجەسى دە تۇرلىشە سالادا ايقىن كورىنىس بەردى.

  قالا، رايون، اۋىل - قالاشىق ءۇش دارەجەلى وزەن - كول باستىقتارىن ايقىنداعان سوڭ، ءۇرىمجى ساياپىل كولى جونگە سالۋدان كەيىن، ءبىر مەزەت تارتىلىپ بارا جاتقان كول ايدىنى قايتا ۇلعايا باستادى. سول ماڭدا تۇراتىن ياسىن قۇربان ساياپىل كولى مەملەكەتتىك سازدىق باقشاسىندا ەكولوگيا شارلاۋشىسى بولىپ ىستەيدى. ”كول ايدىنى ۇلعايۋدان سىرت، سۋى تۇنىپ، جاعاسى جاسىلدانىپ، قۇستار مولايدى، ءار كۇنى وسىندا قىزمەت ىستەپ، تۇرمىس كەشىرەتىن ءبىزدىڭ دە كوڭىلىمىز كوتەرىلىپ، جادىراي تۇستىك“، - دەيدى ياسىن.

  بيىل 1 - ايدان 6 - ايعا دەيىن رايونىمىزداعى 14 قالادا ساپالى اۋا رايى كۇندەرىنىڭ سالىستىرماسى %69.1كە جەتىپ، سايكەس مەزگىلدەگىدەن 2.7 پايىز ءوستى. اشىق اسپاندى قورعاۋ شايقاسىنداعى ءتۇيىندى اۋماقتار ”ءۇرىمجى - سانجى - شىحىزىنىڭ“، ”كۇيتۇن - مايتاۋ - ءۇرىمجىنىڭ“ اۋا ساپاسى ايتارلىقتاي جاقساردى؛ بۇكىل رايونداعى جەر ءۇستى سۋىنىڭ قورشاعان ورتا ساپاسى جالپى جاقتان تۇراقتى بولدى. ەكولوگيالىق ورتا مينيسترلىگى جاريالاعان 2019 - جىلعى «سۋدىڭ لاستانۋىنان ساقتانۋ جانە ونى جونگە سالۋ ارەكەت جوسپارىنىڭ» اتقارىلۋ جاعدايىندا، شينجياڭ سۋدىڭ لاستانۋىنان ساقتانۋ جانە ونى جونگە سالۋ ارەكەت جوسپارىن جاقسى اتقارعان ولكەلەر قاتارىنا ءىلىندى؛ توپىراقتى جونگە سالۋ جاعىندا، رايونىمىز حيميالىق تىڭايتقىشتاردىڭ مولشەرىن ازايتىپ، ونىمدىلىگىن ارتتىرۋدان ۇلگى كورسەتەتىن 11 اۋدان قۇردى، ۇلگى كورسەتۋ اۋدانى 247 مىڭ 700 مۋعا جەتىپ، اتىز جارعاقتارىن قايتا جيناپ الۋ مولشەرى %76.4 بولدى...

  تاماشا ەكولوگيالىق ورتا − حالىقتىڭ ەڭ ۇلكەن ىرىس - قۇتى. لاستانۋدان ساقتانۋ جانە ونى جونگە سالۋ ءۇش ءىرى شايقاسى قاتار ىلگەرىلەپ، رايونىمىزدىڭ ەكولوگيالىق ورتا ساپاسىن جالپى تۇلعالىق جاقتان جاقسارۋعا جەتەكتەدى.

بارىس: جوعارى مەن تومەن جۇدىرىقتاي جۇمىلىپ، تىنباي قۇلشىندى

  بىلتىر 5 - ايدا ءۇرىمجى ەكونوميكالىق - تەحنيكالىق اشۋ رايونىنداعى (توۋتۇنحى رايونى) شينجياڭ يانلي ساۋدالىق بەتون قۇرىلىس شەكتى سەرىكتەستىگى جارتى جىلدان ارتىق ءوندىرىستى توقتاتىپ رەتتەۋ - جونگە سالۋدان كەيىن، قورشاعان ورتانى قورعاۋ تالابىنا جەتىپ، ءوندىرىسىن قايتادان قالپىنا كەلتىردى. اتالعان سەرىكتەستىك ءۇرىمجى قالاسى ءبىر - بىرلەپ تەكسەرىپ جونگە سالعان ”بىتىراڭقى، بىلىققان، لاستاۋشى“ 3217 كاسىپورىننىڭ ءبىرى.

  ”شىنىن قۋعاندا، ءوندىرىستى توقتاتۋدان ءبىرتالاي زيان شەكتىك. دەسەدە، ءبىز بەلدى بەكەم بايلاپ رەتتەۋ - جونگە سالۋ جۇرگىزدىك، قورشاعان ورتانى قورعاۋ جابدىقتارىن ىسكە قوستىق، كاسىپورىننىڭ ءوندىرىس باسقارۋ دەڭگەيى دە ءبىر بەلەسكە كوتەرىلدى. شينجياڭنىڭ اشىق اسپانى ءۇشىن بۇلاي ىستەۋ ابدەن ورىندى“، - دەيدى كاسىپورىن جاۋاپتىسى.

  لاستانۋدان ساقتانۋ جانە ونى جونگە سالۋدان قامال الۋ شايقاسىن ويداعىداي جۇرگىزۋدە نىشاندىق مانگە يە بىرنەشە ەلەۋلى شايقاستى ويداعىداي جۇرگىزىپ، بۇقارانىڭ ماڭىنداعى كورنەكتى قورشاعان ورتا ماسەلەلەرىن كۇشتى شوعىرلاندىرا وتىرىپ شەشۋ كەرەك.

  ءۇش ءىرى قورعاۋ شايقاسىنىڭ ناتيجە بەرۋى بۇكىل رايونداعىلاردىڭ جوعارىدان تومەنگە دەيىن جۇمىلا شارا قولدانىپ، جابىلا كۇش شىعارۋىنىڭ، جۇمىلا ساقتانىپ، جۇمىلا جونگە سالۋىنىڭ ارقاسى، بۇل ەكولوگيالىق وركەنيەت يدەياسىنىڭ تيانشاننىڭ تۇستىگى مەن تەرىستىگىندە تەرەڭ تامىر تارتىپ، گۇل اشىپ جەمىس بەرگەندىگىن تولىق ءتۇسىندىردى.

  سوڭعى جىلدارى رايونىمىز قاينار كوزىنەن ساقتانۋ - جونگە سالۋعا تاباندى بولىپ، باسىم كۇشتەردى شوعىرلاندىرىپ، ءار جاقتىڭ كۇشىن جۇمىلدىرىپ، شايقاستى تولاسسىز جۇرگىزدى، كاسىپ سالاسىنىڭ، ەنەرگيانىڭ، تاسىمالدىڭ جانە اۋىل شارۋاشىلىعىنىڭ ۇسىنىلىم قۇرىلىمىن رەتتەۋ جالپى بەتتىك ورىستەتىلدى.

  تەك 2019 - جىلدىڭ وزىندە بۇكىل رايوندا تەمىر قورىتۋ وندىرىستىك قۋاتىنان جالپى ءبىر ميلليون 500 مىڭ تونناسى، بولات قورىتۋ وندىرىستىك قۋاتىنان جيىنى 2 ميلليون 250 مىڭ تونناسى قاتاردان شىعارىلدى. ”بىتىراڭقى، بىلىققان، لاستاۋشى“ كاسىپورىنداردان جيىنى 3940ى تەكسەرىلىپ اداقتالدى، ونىڭ %90تەن استامىنا جابۋ، توقتاتۋ، تاراتۋ، بىرىكتىرىپ كوشىرۋ، سول جەردە دارەجەسىن ءوسىرىپ جاڭالاۋ جۇمىستارى ورىندالدى. بۇكىل رايوندا كومىر جاعاتىن گەنەراتور اگراگاتتارى اسا تومەن دەڭگەيدە لاس زات شىعارۋدى نەگىزىنەن جۇزەگە اسىردى. سەمەنت، تاقتا اينەكتەردىڭ مەشەۋ وندىرىستىك قۋاتتارى تۇگەلدەي قاتاردان شىعارىلدى.

  رايونىمىز ونەركاسىپتىك لاستانۋدان ساقتانۋ جانە ونى جونگە سالۋدى مىقتاپ يگەرىپ، قاعاز جاساۋ، بولات - تەمىر، ازوتتى تىڭايتقىش، ورنەك باسۋ - بوياۋ، ءدارى - دارمەك جاساۋ، بىلعارى جاساۋ كاسىپتەرىنە تازارتۋ - وزگەرتۋ قىزمەتىن ورىنداپ، لاستاۋشى زاتتاردىڭ شىعارىلۋىن قاتاڭ تىزگىندەدى. 2019 - جىلدىڭ سوڭىنا دەيىن بۇكىل رايون بويىنشا اۆتونوميالى رايون دارەجەسىندەگى جانە ودان جوعارى ونەركاسىپ شوعىرلانعان 85 اۋماقتىڭ 83ىندە لاس سۋدى شوعىرلى ءبىر جاقتى ەتۋ قۇرىلعىلارى سالىندى جانە اۆتوماتتى تۇردە ينتەرنەت جەلىسىندە باقىلاۋ - مەڭگەرۋ جابدىعى ورناتىلدى. بۇكىل رايونداعى 3355 وزەندە، 121 كولدە وزەن - كول باستىعى ءتۇزىمى ورناتىلىپ، وزەن - كولدەردى 3 جىل رەتتەۋ - جونگە سالۋ ارەكەتى سازدى جەرلەردىڭ قايتا قالپىنا كەلۋىنە، كولدىڭ ءمولدىر، سۋدىڭ تۇنىق بولۋىنا مۇمكىندىك جاسادى.

  «توپىراقتىڭ لاستانۋىنان ساقتانۋ جانە ونى جونگە سالۋ زاڭىن» جالپى بەتتىك تياناقتاندىرىپ، بۇكىل رايونداعى توپىراقتىڭ لاستانۋىنان ساقتانۋ جانە ونى جونگە سالۋدى ەگجەي - تەگجەيلى تەكسەرۋدى ىلگەرىلەتىپ، قۇرىلىسقا پايدالانىلاتىن جەر مەن اۋىل شارۋاشىلىعىنا پايدالانىلاتىن جەردەگى توپىراقتىڭ لاستانۋ حاۋىپ - قاتەرىن مەڭگەرۋ - تىزگىندەۋدى ىلگەرىلەتىپ، قاينار كوزىنەن ساقتانۋدى كۇشەيتىپ، بۇقارانىڭ ازىق - تۇلىكتى الاڭسىز تۇتىنۋىنا، تۇرعىن ۇيىندە الاڭسىز تۇرۋىنا مۇمكىندىك جاسادى.

  بۇكىل رايوندا جوعارىدان تومەنگە دەيىن ”اسپان اشىق، جەر مانات، سۋ تۇنىق“ بولۋ ءۇشىن تىنباي قۇلشىنىس جاساۋمەن بىرگە، ەكولوگيانى ايالاۋ، قورشاعان ورتانى قورعاۋ دا جۇرتتىڭ سانالى ارەكەتىنە اينالدى.

  ءار اپتانىڭ سوڭىندا قاربالاس جۇمىسى بولماسا، باعراش اۋدانىنىڭ تۇرعىنى ۋاڭ مينجى دوستارىمەن بىرگە باعراش كولىنىڭ جاعاسىنا كەلىپ، سۋداعى قوقسىقتاردى تەرەدى. ”قورشاعان ورتانىڭ جاقسارۋى وڭاي - وسپاق قولعا كەلگەن جوق، ءبىز باعراش كولىن جاقسى قورعاپ، ونىڭ ماڭگى كوركەم بولۋىنا، بىزگە اناعۇرلىم كوپ سەيىل - سەرۋەن ءلاززاتىن سيلاۋىنا مۇمكىندىك جاساۋىمىز كەرەك“، - دەدى ۋاڭ مينجى كول بەتىنە قاراپ تۇرىپ.

بولاشاق: ۇزدىكسىز كۇش شىعارىپ، ىشكەرىلەي ىلگەرىلەتىلەدى

  7 - ايداعى شىلىڭگىر ىستىق كەز، باۋگاڭ توبى شينجياڭ 1 - تامىز بولات - تەمىر شەكتى سەرىكتەستىگى 1 - تامىز بولات - تەمىر وتتەكتى دومنا پەشىنە وت جاعىلىپ، ىستىق جەلمەن ۇرلەۋدىڭ ورنىنا تازا وتتەگى قولدانىلدى. تەحنولوگيانى ساپالىلاندىرۋ، كومىر گازىن اينالمالى پايدالانۋ ارقىلى كومىرتەكتى زاتتاردىڭ شىعارىلۋىن %40تەن استام ازايتۋعا، وندىرىستىك قۋاتتى %40 جوعارىلاتۋعا بولادى.

  ”لاستانۋدان ساقتانۋ جانە ونى جونگە سالۋ − ۇزاق مەرزىمدىك شايقاس، ءبىر - اق جولدا ورىنداي سالۋعا كەلمەيدى. ساقتالعان ماسەلەلەردى جونگە سالعان سوڭ، ءالى دە ءجىتى قاداعالاپ، ماسەلەنىڭ قايتا تۋىنداۋىنان ساقتانۋ كەرەك“. اۆتونوميالى رايوندىق قورشاعان ورتا مەڭگەرمەسىنىڭ ورىنباسار مەڭگەرمە دارەجەلى كادرى ۋىن يۇيبياۋدىڭ ايتۋىنشا، بيىل اۆتونوميالى رايون ءتۇيىندى وڭىرلەردى، ءتۇيىندى كاسىپ سالالارىن، ءتۇيىندى لاستانۋ نەگىزدەرىن باسقارۋ - مەڭگەرۋ سەرپىنىن كۇشەيتىپ، بولات - تەمىر، وت ەلەكتر، سەمەنت سياقتى ءتۇيىندى كاسىپ سالالارىن باسقارۋ - مەڭگەرۋدى ءجىتى قاداعالاپ، بولات - تەمىر ونەركاسىبىندە اسا تومەن دەڭگەيدە لاس زات شىعارۋ، VOC، قۇرىلىس ماتەريالدارى سياقتى سالالاردا ولشەمدى جوعارىلاتۋ، وزگەرتۋ جۇمىستارىن ۇزدىكسىز ىلگەرىلەتىپ، دالمە - ءدال شارا قولدانىپ، ۇزدىكسىز كۇش شىعارىپ، اشىق اسپاندى قورعاۋ شايقاسىن باتىل، ويداعىداي جۇرگىزەدى ەكەن.

  بيىلعى جىلۋمەن قامداۋ مەزگىلى ەندى وتە بەرە، ءۇرىمجى قالاسى، سانجى حۇيزۋ اۆتونوميالى وبلىسى ىسكە كىرىسىپ، جىلۋمەن قامدالمايتىن مەزگىلدەگى اشىق اسپاندى قورعاۋ شايقاسىنا ات سالىستى. ءۇرىمجى - سانجى ءوڭىرى شاڭ - توزاڭدى لاستانۋدى جونگە سالۋ بويىنشا ارناۋلى رەتتەۋ - جونگە سالۋ قىزمەتىن ورىستەتتى، ۇرىمجىدەگى موتورلى كولىكتەردىڭ لاس زات شىعارۋىن تەكسەرەتىن 23 قۇرىلىم جالپى بەتتىك جاڭا ولشەم قولدانىپ تەكسەرۋ ورىستەتتى، ديزەلمەن جۇرەتىن جۇك كولىكتەرىنىڭ قالدىق گاز شىعارۋىنىڭ ولشەمگە جەتۋ جاعدايىنا ۇدايىلانعان زاڭ اتقارۋ تەكسەرۋىن جۇرگىزدى...

  ”بيىل ءۇش ءىرى قورعاۋ شايقاسىنىڭ شەشۋشى جەڭىس جىلى، قازىرگى ەڭ ماڭىزدى جۇمىس − لاستانۋدان ساقتانۋدىڭ جانە ونى جونگە سالۋدىڭ ىشكەرىلەي ىلگەرىلەۋىن جەبەپ، شايقاستا اناعۇرلىم ۇلكەن جەتىستىككە قول جەتكىزۋگە قۇلشىنۋ“، - دەيدى ۋىن يۇيبياۋ.

  رايونىمىز سۋدىڭ لاستانۋىنان ساقتانۋ جانە ونى جونگە سالۋ قىزمەت جوباسىن ىشكەرىلەي اتقارىپ، كول، سۋ قويمالارىنداعى سۋدىڭ لاستانۋىن جونگە سالۋدى كۇشەيتەدى. باعراش كولى، ۇلىڭگىر كولى، ەبينۇر كولى سياقتى كولدەردىڭ ەكولوگيالىق ورتاسىن جالپىلىق جونگە سالۋدى ۇزدىكسىز ىلگەرىلەتەدى؛ «اۆتونوميالى رايوننىڭ توپىراقتىڭ لاستانۋىنان ساقتانۋ جانە ونى جونگە سالۋ قىزمەت جوباسىن» ىشكەرىلەي اتقارىپ، ءتۇيىندى سالالارداعى كاسىپورىندار پايدالاناتىن جەرلەردەگى توپىراقتىڭ لاستانۋ احۋالىن تەكسەرىپ، كادمي سياقتى اۋىر مەتالدارمەن بايلانىستى ءتۇيىندى كاسىپتەردەگى كاسىپورىنداردى اداقتاپ تەكسەرۋدى، رەتتەۋ - جونگە سالۋدى ىلگەرىلەتىپ، قاينار كوزىنەن ىسكە كىرىسىپ اۋىر مەتالداردىڭ ەگىستىك جەردى لاستاۋىنان ساقتانادى.

  اۆتونوميالى رايون: 2020 - جىلدىڭ سوڭىنا بارعاندا ەكولوگيالىق ورتانىڭ ساپاسىن جالپى تۇلعالىق جاقتان جاقسارتۋدى، ەكولوگيالىق وركەنيەت قۇرىلىسىنىڭ دەڭگەيىن جاپپاي دوڭگەلەك داۋلەتتى قوعام ورناتۋ نىساناسىنا ۇيلەستىرۋدى، بۇكىل رايون ەكونوميكاسىنىڭ دامۋ ساپاسى مەن ونىمدىلىگىن ايتارلىقتاي جوعارىلاتۋدى؛ 2035 - جىلعا بارعاندا كورىكتى شينجياڭ نىساناسىن نەگىزىنەن جۇزەگە اسىرۋدى؛ وسى عاسىردىڭ ورتا شەنىنە بارعاندا اسپانى اشىق، جەرى مانات، سۋى تۇنىق كورىكتى شينجياڭ قۇرىپ شىعۋدى ورتاعا قويدى.

  نىسانا بەلگىلەندى، ەندىگى جۇمىس − بار كۇشتى سالىپ، كورىكتى شينجياڭ قۇرۋ ءۇشىن قايراتتانا ۇمتىلۋ!

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.