داعدىلى ەمدەۋمەن ۇشتاستىرىپ، جالپىلىق عىلمي قۇتقارۋ - ەمدەۋ ورىستەتەدى
شينجياڭ گازەتىنىڭ جالپىلىق اقپارات قۇرالدارى ءتىلشىسى چاۋ جين 8 - ايدىڭ 10 - كۇنى ۇرىمجىدەن حابارلايدى. جاڭا تيپتى ايدارشا ۆيرۋس وكپە قابىنۋ ناۋقاستارىندا تۋىلۋى مۇمكىن بولعان قوسانجار اۋرۋلار نەمەسە شۇعىل اۋرۋلار سياقتى ەرەكشە جاعدايعا مەڭزەس، اۆتونوميالى رايون جاڭا تيپتى ايدارشا ۆيرۋس وكپە قابىنۋ بويىنشا مەديتسينالىق قۇتقارۋ - ەمدەۋگە بەلگىلەگەن شيپاحانا مەديتسينالىق ارناۋلى ءبولىم بويىنشا توتەنشە جاعدايعا توتەپ بەرەتىن 6 اترەت قۇردى، جاڭا تيپتى ايدارشا ۆيرۋس وكپە قابىنۋىنىڭ داعدىلى ەمدەۋىمەن ۇشتاستىرىپ، بار كۇشپەن جالپىلىق عىلمي قۇتقارۋ - ەمدەۋ ورىستەتەدى.
ارناۋلى ءبولىم بويىنشا توتەنشە جاعدايعا توتەپ بەرەتىن 6 شاعىن اترەت جۇرەك - قان تامىر اۋرۋلارى، قۇرساق شۇعىل اۋرۋى، جۇڭگوشا شيپاگەرلىك، مي قان تامىرىنىڭ توسىلۋى، سىنىق، تۋبەركۋلەز اۋرۋلارى ۇجىمدارىن قامتيدى.
اۆتونوميالى رايون جاڭا تيپتى ايدارشا ۆيرۋس وكپە قابىنۋ بويىنشا مەديتسينالىق قۇتقارۋ - ەمدەۋگە بەلگىلەگەن شيپاحانانىڭ ورىنباسار باستىعى لۋ چىن بىلاي دەپ تانىستىردى: جاڭا تيپتى ايدارشا ۆيرۋس وكپە قابىنۋىن ءبىرىڭعاي ەمدەۋگە سالىستىرعاندا، جاڭا تيپتى ايدارشا ۆيرۋس وكپە قابىنۋ مەن باسقا شۇعىل اۋرۋلار قوسانجارلانعان ەرەكشە ناۋقاستاردى ەمدەۋدىڭ قيىندىعى ءبىرشاما زور. مەديتسينالىق ارناۋلى ءبولىم بويىنشا توتەنشە جاعدايعا توتەپ بەرەتىن شاعىن اترەت قۇرۋ − جاڭا تيپتى ايدارشا ۆيرۋس وكپە قابىنۋىنان قۇتقارۋ - ەمدەۋدىڭ الدىڭعى كەزەڭدىك قىزمەتتەرىمەن ۇشتاستىرىلىپ شىعارىلعان جاڭاشا قىزمەت ۇلگىسى، بۇل ۋحاندا دا ءبىرشاما جاقسى ونىمدىلىككە قول جەتكىزگەن ءبىر ءتۇرلى قۇتقارۋ - ەمدەۋ ۇلگىسى سانالادى.
ۇعىسۋىمىزشا، مەديتسينالىق ارناۋلى ءبولىم بويىنشا توتەنشە جاعدايعا توتەپ بەرەتىن شاعىن اترەتتىڭ مۇشەلەرىنىڭ بارلىعى اۆتونوميالى رايون جاڭا تيپتى ايدارشا ۆيرۋس وكپە قابىنۋ بويىنشا قۇتقارۋ ەمدەۋگە بەلگىلەگەن شيپاحانادا قۇتقارۋ - ەمدەۋگە قاتىناسقان ءارقايسى تارماق ەمدەۋ اترەتىنەن تاڭدالعان، جالپىلىق حيرۋرگيا، سۇيەك اۋرۋلارى ءبولىمى، جۇرەك - قان تامىر اۋرۋلارى سياقتى ارناۋلى بولىمدەردەگى شيپاگەرلەردى قامتيدى، پسيحولوگيا، ءدارى عىلىمى، كۇتىمدەۋ سياقتى جاقتارداعى ۇزدىك ەمدەۋ - كۇتىمدەۋ قىزمەتكەرلەرىن دە قامتيدى. ولار ادەتتە قالىپتى جاڭا تيپتى ايدارشا ۆيرۋس وكپە قابىنۋى ناۋقاستارىن قۇتقارۋ - ەمدەۋ قىزمەتىن ارقالاۋدان تىس، الدا - جالدا ارناۋلى ءبولىم بويىنشا شۇعىل اۋرۋعا كەزىكسە، لەزدە جينالىپ، وسى ەرەكشە ناۋقاستارعا ارناۋلى قۇتقارۋ - ەمدەۋ جۇرگىزەدى.
لۋ چىن مىنانى ءبىلدىردى: شۇعىل اۋرۋلاردى ءبىر جايلى ەتۋ جۇقپالى اۋرۋلاردى ءبىر جاقتى ەتۋ بارىسىنداعى ولقىلىق پەن ءالسىز تۇس، وسى رەت مەديتسينالىق ارناۋلى ءبولىم بويىنشا توتەنشە جاعدايعا توتەپ بەرەتىن شاعىن اترەت جاڭا تيپتى ايدارشا ۆيرۋس وكپە قابىنۋ ناۋقاستارىنىڭ داعدىلى ەمدەلۋىمەن ۇشتاستىرىپ، جاي نەمەسە جەڭىل ناۋقاستاردىڭ سالماقتى ناۋقاستارعا، سالماقتى ناۋقاستاردىڭ قاتەرلى سالماقتى ناۋقاستارعا اينالۋىنىڭ ءونىمدى تۇردە الدىن الىپ قالماستان، شىن مانىندە ەمدەپ ساۋىقتىرۋ مولشەرىن جوعارىلاتىپ، اۋرۋدان ءولۋ مولشەرىن تومەندەتەدى، سونداي - اق رايونىمىزدىڭ جۇقپالى اۋرۋلاردى ءبىر جاقتى ەتۋىندەگى ءبىر رەتكى جاڭا سىناق سانالادى.
