حابارىن جازعان: شينجياڭ گازەتىنىڭ جالپىلىق اقپارات قۇرالدارى ءتىلشىسى چاۋ جين
سۋرەتىن تۇسىرگەن: گازەتىمىزدىڭ جالپىلىق اقپارات قۇرالدارى ءتىلشىسى شيە لۇڭ
8 - ايدىڭ 12 - كۇنى اۆتونوميالى رايون جاڭا تيپتى ايدارشا ۆيرۋس وكپە قابىنۋ بويىنشا مەديتسينالىق قۇتقارۋ - ەمدەۋگە بەلگىلەگەن شيپاحانانىڭ 4 - عيماراتىنىڭ 9 - ناۋقاستار اۋماعىندا ەمدەۋ - كۇتىمدەۋ قىزمەتكەرلەرى شيپاحانادان شىققان ليۋ اپايدى ليفتكە اپارىپ اتتاندىرىپ قويدى.
8 - ايدىڭ 4 - كۇنى، اۆتونوميالى رايون جاڭا تيپتى ايدارشا ۆيرۋس وكپە قابىنۋ بويىنشا مەديتسينالىق قۇتقارۋ - ەمدەۋگە بەلگىلەگەن شيپاحانانىڭ ICU 2 - ناۋقاستار اۋماعىندا ناۋقاستار اۋماعىنىڭ مەڭگەرۋشىسى، شينجياڭ مەديتسينا داشۋەسىنە قاراستى 1 - شيپاحانانىڭ سالماقتى ناۋقاستار مەديتسينالىق ورتالىعى 3 - ءبولىمىنىڭ ورىنباسار مەڭگەرۋشىسى ما لۇڭ (سولدان 1 - ادام) ليۋ اپايدى ەمدەۋدە.
8 - ايدىڭ 12 - كۇنى ساعات 13 مولشەرىندە ليۋ اپاي ادىمداي باسىپ ناۋقاستاردى اۋاشالاۋ اۋماعىنان شىقتى، ول باسىن كوتەرىپ كۇن شۇعىلاسىنا قاراپ، تەرەڭ تىنىستاعاننان كەيىن: ”شيپاحانادان شىققان قانداي جاقسى ەدى“، - دەدى.
”مەن قورعانۋ كيىمىنىڭ ىشىندەگى سەندەردىڭ بەينەلەرىڭدى كورە الماسام دا، وزىمە ىجداعاتپەن قاراعان ءاربىر بەينەنى ەسىمە بەرىك ساقتايمىن“، - دەپ ليۋ اپاي اۆتوكولىككە وتىرىپ جاتىپ وزىنە 18 كۇن سەرىك بولعان ەمدەۋ - كۇتىمدەۋ قىزمەتكەرلەرىنە قول بۇلعاپ قوش ايتتى.
ليۋ اپايدىڭ 7 - ايدىڭ 26 - كۇنى جاڭا تيپتى ايدارشا ۆيرۋس وكپە قابىنۋ ىندەتىمەن جۇعىمدالعانى انىقتالىپ، اۆتونوميالى رايون جاڭا تيپتى ايدارشا ۆيرۋس وكپە قابىنۋ بويىنشا مەديتسينالىق قۇتقارۋ - ەمدەۋگە بەلگىلەگەن شيپاحاناعا جەتكىزىلدى.
جاسى 60قا كەلگەن ليۋ اپايدىڭ 40 جىلدىق جەل - قۇز سيپاتتى بۋىن قابىنۋ اۋرۋى بار بولاتىن، تاعى جوعارى قان قىسىمى اۋرۋى مەن قانتتى نەسەپ اۋرۋى دا بار ەدى. قابىلداپ - ەمدەۋدىڭ العاشقى مەزگىلىندە 4 - عيمارات 9 - ناۋقاستار اۋماعىنىڭ مەڭگەرۋشىسى، شينجياڭ مەديتسينا داشۋەسىنە قاراستى وسپە اۋرۋلار شيپاحاناسى تىنىس جولى نەرۆ ىشكى اۋرۋلار ءبولىمىنىڭ مەڭگەرۋشىسى لو چين ”قىسىم ەرەكشە اۋىر“ دەپ اشىق ايتقان بولاتىن.
لو چين ليۋ اپايدى سەسترالار پۋنكتىنە ەڭ جاقىن اۋرۋ بولمەسىنە ورنالاستىرىپ، كەزەكشى شيپاگەر مەن سەستراعا ءسات سايىن ونىڭ اۋرۋ جاعدايى وزگەرىسىن قاداعالاپ تۇرۋدى تاپسىردى.
لو چيننىڭ مەجەلەگەنىندەي، ۆيرۋسقا قارسى دارىلەردى بەرۋ، وتتەگىن ءسىمىرتۋ، ەكپەتتەپ جاتقىزۋ، سونداي - اق جۇڭگوشا دارىلەر بەرۋ سياقتىلارمەن بەلسەنە ەمدەگەنمەن ليۋ اپايدىڭ سىرقاتى جاقسارا قويمادى، قىزۋى ورلەۋ، تىنىس الۋى قيىنداپ، قاقىرىعىن تۇكىرە الماي قالدى، CT اسپابىمەن قايتالاي تەكسەرگەندە ەكى وكپەسىندەگى جالقاق اۋرۋ وشاعىنىڭ بۇرىنعىدان كوبەيىپ كەتكەنى كورسەتىلدى، قانداعى وتتەگىنىڭ قانىعۋ دارەجەسى ％85كە تومەندەپ كەتتى. 7 - ايدىڭ 31 - كۇنى لو چين ليۋ اپايدىڭ اۋرۋ جاعدايىنىڭ وزگەرىسىن ماماندار گرۋپپاسىنىڭ تالقىلاۋىنا ۇسىنادى، سول كۇنى ”اۋىر ناۋقاس“ اۋماعىنان ICU 2 - ناۋقاستار اۋماعىنا اپارىپ، باقىلاپ ەمدەدى.
ICU 2 - ناۋقاستار اۋماعىنىڭ مەڭگەرۋشىسى، شينجياڭ مەديتسينا داشۋەسىنە قاراستى 1 - شيپاحانانىڭ سالماقتى ناۋقاستار مەديتسينا ورتالىعى 3 - ءبولىمىنىڭ ورىنباسار مەڭگەرۋشىسى ما لۇڭ ساندى كورسەتكىشتەرگە تالداۋ جاساعاننان كەيىن، دەرەۋ ليۋ اپايعا مۇرىننان كوپ مولشەردە وتتەگىن بەرىپ جانە قاتىستى دارىلەرمەن ەمدەدى. ليۋ اپاي دا ءار كۇنى ون نەشە ساعات ەكپەتتەپ جاتىپ اۋا جىبەرۋگە توتەنشە سايكەستى.
ءبىر اپتادان كەيىن ليۋ اپايدىڭ قانىنداعى وتتەگىنىڭ قانىعۋ دارەجەسى جوعارىلاپ ％93تەن استى، ەكى وكپەسىندەگى سىرقات تا بىرتىندەپ جاقسارىپ، ول تاعى ادەتتەگى ناۋقاستار اۋماعىنا اپارىلدى.
ليۋ اپايدىڭ ICUدان قايتىپ كەلگەن حابارى شاعىن ناۋقاستار اۋماعىن قۋانىشقا بولەدى. شيپاگەرلەر مەن سەسترالار كەزەكتەسە ونى كەرەمەت ەكەنسىز دەپ ماقتادى، ناۋقاستار دا ونى ىندەتتى جەڭۋدىڭ ۇلگىسى دەپ ەسەپتەدى.
استانا مەديتسينا داشۋەسىنە قاراستى بەيجيڭ جۇڭگوشا شيپاگەرلىك شيپاحاناسى تىنىس جولى اۋرۋلارى ءبولىمىنىڭ مەڭگەرۋشىسى ۋاڭ يۇيگۋاڭ كوپ رەت ليۋ اپايعا سالەمدەسىپ، بارلىق جاعدايىن سۇراپ ۇعىسىپ، وكپەنى تازالاپ، ىستىقتى ايدايتىن، باۋىر مەن اسقازاندى تازالايتىن قايناتىلعان دارىلەردى ناۋقاسىنا قاراي بەردى، 3 رەت ىشكەننەن كەيىن ليۋ اپايدىڭ جايسىزدانعان اۋرۋ بەلگىلەرى كورنەكتى جاقسارا باستادى.
دەنساۋلىعى كۇننەن - كۇنگە جاقسارعان ليۋ اپايدىڭ كوڭىل كۇيى دە شاتتانىپ سالا بەردى، ەكى رەتتەن استام نۋكلەين قىشقىلىن تەكسەرۋدىڭ ناتيجەسى بولىمسىز بولدى، ”ليۋ اپاي، ءسىز ەرتەڭ شيپاحانادان شىقساڭىز بولادى!“. لو چين وسى قۋانىشتى حاباردى وعان ايتقان كەزدە، ليۋ اپاي قۋانىشتان ءتۇن بويى كوز ىلمەي شىقتى. 8 - ايدىڭ 12 - كۇنى تاڭەرتەڭ ليۋ اپاي كەرەك - جاراقتارىن جيناستىرىپ، ءوزى ۇناتاتىن ۇساق قىزىل گۇلدى جەيدەسىن كيدى. ەمدەۋ - كۇتىمدەۋ قىزمەتكەرلەرى ليۋ اپايعا سيىر ءسۇتىن جانە وزدەرى تۇنىمەن جاساعان كىشكەنتاي كارتچكانى اپارىپ بەردى، كارتچكانىڭ بەتىنە ”ءبىز شۋاقتى كۇلكىمىزبەن وسى ادال دوستىقتى ەستەلىككە الامىز“، - دەپ جازىلعان.
”ليۋ اپاي، مەنىڭ اتىم لو چين، لوبى دەگەندەگى لو، چينساي دەگەندەگى چين، ەسىڭىزگە ساقتاي الاسىز با؟ قايتقاننان كەيىن ۇيلەسىمدى دەنە شىنىقتىرىپ تۇرىڭىز، دارىلەرىڭىزدى ۋاقىتىندا ءىشىڭىز، تەلەفون ءنومىرىمدى بەرەيىن، ماسەلە بولسا كەز كەلگەن ۋاقىتتا ءبىزدى ىزدەڭىز، ءبىز ءسىزدىڭ ماڭگىلىك شيپاگەرىڭىز بەن سەستراڭىزبىز“. كەتەرىندە لو چين وعان ىجداعاتپەن قاداعالاي تاپسىردى.
” مۇنداي جۇقا كيسەم دە، كۇنى بويى ىستىقتاپ تەرلەيمىن، سەندەرگە جانىم اشيدى!“، - دەدى ليۋ اپاي، - ”ىندەتتىڭ ەرتەرەك اياقتالۋىن تىلەيمىن، سوندا سەندەر قورعانۋ كيىمىن شەشكەن بولار ەدىڭدەر دە، مەن سەندەردىڭ ەڭ تاماشا بەينەلەرىڭدى كورەتىن ەدىم“.
