شينجياڭ گازەتىنىڭ جالپىلىق اقپارات قۇرالدارى تىلشىلەرى جاۋ چۇنحۋا، لي چۇنشيا 8 - ايدىڭ 14 - كۇنى ۇرىمجىدەن حابارلايدى. ءۇرىمجى قالاسىندا تۋىلعان وسى رەتكى ىندەت بارىسىندا، كەيبىر ناۋقاستاردىڭ الدىڭعى 2 رەتكى نۋكلەين قىشقىلىن تەكسەرۋ ناتيجەسى تۇگەلدەي بولىمسىز بولىپ، 3 - رەتكىسى عانا بولىمدى بولىپ شىقتى ءارى دياگنوزى تۇراقتاندىرىلعان ناۋقاس دەپ دياگنوز قويىلدى. 8 - ايدىڭ 14 - كۇنى ءۇرىمجى قالالىق اۋرۋدىڭ الدىن الۋ، تىزگىندەۋ ورتالىعىنىڭ ورىنباسار مەڭگەرۋشىسى ۋىن گوشين بۇل تۋرالى تۇسىنىك جاسادى.
ۋىن گوشين تالداۋ جاساپ بىلاي دەدى: ءبىر جاعىنان، مۇنداي جاعداي ۇرىمجىدەگى ىندەتتىڭ كۇردەلىلىگىن تۇسىندىرەدى، وسى رەتكى ىندەتتىڭ تارالۋ جىلدامدىعى تەز، ءبىرىنشى 14 كۇن ىشىندە، دياگنوزى تۇراقتاندىرىلعان ناۋقاستار مەن اۋرۋ بەلگىسى جوق جۇعىمدالۋشىلاردىڭ سانىنىڭ ارتۋى ءبىرشاما تەز بولدى؛ سونىمەن بىرگە، جەڭىل ناۋقاستار مەن اۋرۋ بەلگىسى جوق جۇعىمدالۋشىلار كوپ، ءبىر ءبولىم ناۋقاستاردىڭ ۆيرۋستى ىعىستىرىپ شىعارۋى ءبىرشاما جاي بولادى، بۇلاردىڭ ءبارى ساقتانۋ - تىزگىندەۋ قىزمەتىنە اناعۇرلىم زور قيىندىقتار الا كەلدى.
”جاڭا تيپتى ايدارشا ۆيرۋستىڭ جاسىرىن مەزگىلى ادەتتە 3 كۇننەن 7 كۇنگە دەيىن بولادى، بۇل باسىم كوپ ادامداردا ۆيرۋسپەن جۇعىمدالعاننان كەيىن 3 كۇننەن 7 كۇنگە دەيىن اۋرۋ تۋىلادى دەگەندى كورسەتەدى، تاعى ءبىر ءبولىم ادامداردىكى 3 كۇننەن از بولادى، كەيبىر ادامداردىكى 7 كۇننەن كوپ بولادى، ءبىراق، نەگىزىنەن تۇگەلدەي 14 كۇن جاسىرىن مەزگىل ىشىندە بولادى دا، قايتا - قايتا تەكسەرگەندە عانا بايقاۋعا بولادى“، - دەدى ۋىن گوشين.
تاعى ءبىر جاعىنان، نۋكلەين قىشقىلىن تەكسەرۋدىڭ ناتيجەسى كوپ ءتۇرلى فاكتوردىڭ ىقپالىنا ۇشىرايدى. نۋكلەين قىشقىلىن تەكسەرۋ ناتيجەسىنىڭ بولىمدى بولۋى ۇلگى الىنعان ورىندا ۆيرۋستى نۋكلەين قىشقىلى بار ەكەندىگىن، جۇعىمدالۋ جاعدايىندا تۇرعاندىعىن كورسەتەدى. ءۇرتىس 2 رەت نۋكلەين قىشقىلىنىڭ ناتيجەسى تۇگەلدەي بولىمسىز بولۋىندا مىناداي باستى 2 سەبەپ بار: ءبىرىنشى، جاڭا تيپتى ايدارشا ۆيرۋسپەن جۇعىمدالعاننان كەيىن، ۆيرۋس نەگىزىنەن وكپە بولىمىندە بولىپ، ودان تۋىنداعان قابىنۋ وكپە بولىمىندەگى تىنىس الۋ جولدارىن بىتەپ، ۆيرۋستى ىعىستىرىپ شىعارا المايدى، مۇرىن، كەڭىردەك بولىمىندە ۆيرۋس تىم از بولاتىندىقتان، ۆيرۋستى الۋ قيىنعا سوعادى. ەكىنشى، اۋرۋ جاعدايىنىڭ وزگەرىسى مەن ۇلگى الۋ ۋاقىتى ماسەلەسى، ناۋقاستاردىڭ اۋرۋ قوزۋىنىڭ جىلدام - باياۋلىعى بىردەي ەمەس، ۇلگى الۋ ۋاقىتى جانە ۋاقىت پارقى دا تەكسەرۋدىڭ ناتيجەسىنە ىقپال جەتكىزىپ، جالعان بولمىسىز بولۋدى تۋدىرادى. سونىمەن بىرگە، نۋكلەين قىشقىلىن تەكسەرۋ ناتيجەسى دە ۇلگى الۋ جۇمىسىن ىستەۋ دەڭگەيىمەن دە، ۇلگى سىنامامەن دە قاتىستى بولادى.
«جاڭا تيپتى ايدارشا ۆيرۋس وكپە قابىنۋىنا دياگنوز قويۋ جانە ونى ەمدەۋ جوباسىنا (سىناق رەتىندە اتقارىلاتىن 7 - نۇسقانىڭ تۇزەتىلگەن نۇسقاسى)» ساي، نۋكلەين قىشقىلى ناتيجەسىن تۇسىندىرگەندە، تەك تاجىريبەحانانىڭ ناتيجەسىنە عانا سۇيەنۋگە بولمايدى، ءسوزسىز، ەپيدەميولوگيالىق اۋرۋ تاريحى مەن كلينيكالىق بەينەسى سياقتىلارمەن بىرلەستىرىپ جالپىلىق تۇجىرىم جاساۋ كەرەك. ەگەر ايقىن ەپيدەميولوگيالىق اۋرۋ تۋىلۋ تاريحى بار بولسا، سونىمەن قابات كلينيكالىق اۋرۋ بەلگىسى بولسا، نۋكلەين قىشقىلىن تەكسەرۋ ناتيجەسى ءبىر رەت نەمەسە 2 رەت بولىمسىز بولسا دا، جۇعىمدالماعان دەپ جەڭىل - جەلپى قورىتىندى شىعارا سالۋعا بولمايدى، ول جالعان بولىمسىز بولۋى مۇمكىن، قايتا - قايتا ۇلگى الىپ تەكسەرۋدى قاجەت ەتەدى. ەگەر جاڭا تيپتى ايدارشا ۆيرۋس وكپە قابىنۋى تارالعان قاتەرلى وڭىرگە بارماعان بولسا، جۇعىمدالۋشىلارمەن جاناسۋ تاريحى جوققا شىعارىلسا، سونداي - اق دەنە قىزۋ، جۇتقىنشاق اۋرۋ سياقتى كلينيكالىق بەينەسى جوق بولسا، نۋكلەين قىشقىلىن تەكسەرۋ ناتيجەسىنىڭ بولىمسىز بولۋىن جالعان بولىمسىزدىق دەپ الاڭداۋدىڭ قاجەتى جوق.
