شينجياڭ گازەتىنىڭ جالپىلىق اقپارات قۇرالدارى تىلشىلەرى ياڭ شۋحان، جاڭ جىلي، ۋاڭ جىن، ان شىيۇي، جانبولات ماناربەك
8 - ايدىڭ 1 - كۇنى تۇستەن بۇرىن تولتىرا شاعىل تاس تيەگەن توڭكەرىلمەلى ماشينا G575 جەلىسىندەگى تىزگىندەۋ سيپاتتى ينجەنەريا − شىعىس تيانشان تۋنەلىنەن شىقتى. قازىر وسى جالپى ۇزىندىعى 11.77 كيلومەتر كەلەتىن شىعىس تيانشان تۋنەلىنىڭ 8.9 كيلومەترى قازىلىپ بولدى.
سوڭعى جىلدارى رايونىمىزدىڭ تاس جول، تەمىر جول، حالىقتىق اۆياتسيا ءتۇيىندى قۇرىلىس نىساندارىنىڭ اياق الىسى جەدەلدەپ، ءبىر - بىرلەگەن نىساندار قۇرىلىس باستاپ جانە قۇرىلىسىن ءساتتى اياقتاپ، ”شينجياڭ ىشىندە اينالما قالىپتاستىرۋ، شينجياڭعا كىرىپ - شىعۋدى تەزدەتۋ“ نىساناسى جەدەل جۇزەگە استى.
وزەكتى رايون قۇرىلىسىندا قاتىناس الدىمەن جۇرگىزىلۋى كەرەك
3 ساعات − بۇل ءۇرىمجى - لوپنۇر جوعارى قارقىندى تاس جولىندا اۆتوكولىك قاتىناعان سوڭ، ۇرىمجىدەن كورلاعا ماشينامەن باراتىن ۋاقىت. كورلا قالاسىندا ساۋدا ىستەيتىن ءۇرىمجى قالاسىنىڭ تۇرعىنى لي شىچياڭ بۇنى اسىعا كۇتۋدە، ”اۆتوكولىك قاتىناعان سوڭ اپتانىڭ بەسىندە ۇيگە قايتىپ، اپتا سوڭىنداعى دەمالىستى وتكىزىپ قايتا الامىن“.
قازىر اۆتونوميالى رايوننىڭ ”13 - بەسجىلدىق“ جوباسىنداعى ”التى ەندىك، التى بويلىق باعىتتاعى“ تاس جول تورىنىڭ نەگىزگى جۇلگەسىنىڭ ماڭىزدى قۇرامداس بولىگى سانالاتىن ءۇرىمجى - لوپنۇر جوعارى قارقىندى تاس جولىنىڭ تىزگىندەۋ سيپاتتى ينجەنەرياسى − تيانشان جەڭىس تۋنەلىندە قازىر قاۋىرت قۇرىلىس جۇرگىزىلىپ، قازۋ ماشيناسى توقتاۋسىز جۇمىس ىستەۋدە.
شينجياڭنىڭ جەرى كەڭ، وڭتۇستىك - سولتۇستىك شينجياڭدى ۇلاستىرۋ مەن شىعىسپەن جالعاسىپ، باتىسقا شىعۋ قابىلەتى ەكونوميكالىق، قوعامدىق دامۋ ۇدەرىسىنە ىقپال ەتۋدە، بايلىقتى شوعىرلاندىرىپ، لايىقتى پايدالانۋدا ىركىلىسسىز قاتىناس العى شارت سانالادى.
پارتيا 18 - قۇرىلتايىنان بەرى، رايونىمىز قاتىناس نەگىزدىك قۇرىلعى قۇرىلىسىنىڭ سەرپىنىن ارتتىردى، 2019 - جىلدىڭ سوڭىنا دەيىن اۆتونوميالى رايوندا اۆتوكولىك قاتىناعان تاس جولداردىڭ جالپى ۇزىندىعى 194 مىڭ كيلومەترگە جەتتى. بارلىق اۋىل - قالاشىقتار مەن شارت - جاعدايى بار قۇرىلىمدىق قىستاقتاردا اسفالت جول جەتكىزىلۋ، اۆتوبۋز جۇرگىزۋ مەجەدەن ءبىر جىل بۇرىن ％100 جۇزەگە استى؛ ىرگەلەس 8 مەملەكەتتىڭ بەسەۋىنە حالىقارالىق جول تاسىمال جەلىسىنەن 111ىن اشىپ، بۇل كورسەتكىشتە بۇكىل ەل بويىنشا 1 - ورىندى يەلەدى. G7 بەيجيڭ - شينجياڭ جوعارى قارقىندى تاس جولى، G3012 قاشقار (جاڭاءشار) − قاعىلىق − قاراقاش جوعارى قارقىندى تاس جولىنىڭ 2 - مەرزىمدىك ينجەنەرياسى سياقتى نىساندار سالىنىپ ءبىتىپ، اۆتوكولىك قاتىنادى. لانجوۋ - شينجياڭ جوعارى قارقىندى تەمىر جولى، قارامايلى - شاۋەشەك تەمىر جولى سياقتىلاردا پويەز قاتىنادى. چارقىلىق، ياركەن سياقتى اۋەجايلار پايدالانۋعا بەرىلدى، ءۇرىمجى حالىقارالىق تاس جول مەن تەمىر جولدا بىرلەسىپ جولاۋشى تاسىمالداۋ اۆتوكولىك بەكەتى، ءۇرىمجى اۋەجايى جولاۋشى تاسىمال كەشەندى توراپ بەكەتى سياقتى 12 جولاۋشى، جۇك تاسىمال تورابى نىسانى سالىنىپ ءبىتىپ، ىسكە قوسىلدى.
وڭتۇستىك، سولتۇستىك شينجياڭ اراسىنداعى، شينجياڭعا كىرىپ - شىعاتىن، شەكارادان شىعاتىن قاتىناس اناعۇرلىم قولايلى بولا ءتۇستى. شار تاراپپەن جالعاسىپ جاتقان قاتىناس مەملەكەتتىڭ قاتىناس تورىنىڭ ”سوڭعى ۇشىندا“ تۇرعان شينجياڭدى بىرتىندەپ ازيا - ەۆروپا قاتىناس تورابى ورتالىعىنا اينالدىرىپ، جىبەك جولى ەكونوميكالىق بەلدەۋى وزەكتى رايونىنىڭ قاتىناس تورابى ورتالىعىنىڭ قالىپتاسۋىن جەدەل ىلگەرىلەتتى.
جىلدامدىققا ءمان بەرۋ كەرەك، ونان دا ماڭىزدىسى، جوعارى ساپالى بولۋ كەرەك
بيىل بۇكىل رايوننىڭ جەر - جەرىندە قاتىناس قۇرىلىس نىساندارى تۇس - تۇستان قۇرىلىس جۇرگىزىپ، قۇرىلىسشىلار قۇرىلىس ۋاقىتىن ۇتۋعا قارمانىپ، قۇرىلىس اياق الىسى كورنەكتى جەدەلدەدى.
7 - ايدىڭ 24 - كۇنى شاڭقيعان كۇن استىندا لوپ اۋدانى حوتان - چارقىلىق تەمىر جولى S1 بەلگى بولىگى نىسان قۇرىلىسى جۇمىس باسىندا جۇمىسشىلار جول تاعانىنىڭ ەكى جاعىنداعى قورعاعىش كولبەۋ بەتكە شاعىل جاتقىزىپ جاتىر ەكەن.
”زايا كەتكەن ۋاقىتتى قايتا تولىقتاپ الۋمەن بىرگە، ونان دا ماڭىزدىسى، مىندەتتى جوعارى ساپامەن ورىندايمىز!“، - دەدى جۇڭگو تەمىر جولى بەيجيڭ ينجەنەريا مەكەمەسى حوتان - چارقىلىق تەمىر جولى S1 بەلگى بولىگى نىسانىنىڭ ورىنباسار ديرەكتورى سۋ جاۋۋي تىلشىگە: قازىر بۇل نىسان جالپى تۇلعالىق جاقتان قوسالقى ينجەنەريالاردى جۇرگىزۋگە قاراي ويىسىپتى.
حوتان - چارقىلىق تەمىر جولىنىڭ جالپى ۇزىندىعى 820 نەشە كيلومەتر، مۇنىڭ حوتانداعى بولىگى 400 كيلومەتردەن اسادى. نىسان سالىنىپ بىتكەن سوڭ، لوپ، شەريا، كەريا، نيە، چەرشەن سياقتى 5 اۋدانعا پويەز قاتىناماۋ تاريحىن اياقتاتادى، جەرگىلىكتى بۇقارا شينجياڭنان شىعۋ ءۇشىن تۇرپاندى نەمەسە ءۇرىمجىنى اينالىپ جۇرمەيدى، ءسويتىپ، شينجياڭنان شىعاتىن ساپار جولى 1000 كيلومەتردەن استام قىسقارادى.
تەك بۇل عانا ەمەس، حوتان - چارقىلىق تەمىر جولى سالىنىپ بىتكەن سوڭ، قاشقار − حوتان (قاشقاردان حوتانعا دەيىنگى) تەمىر جولىمەن، گولمۋد - كورلا (چيڭحاي گولمۋد - شينجياڭ كورلا) تەمىر جولىمەن جالعاسىپ، تارىم ويپاتىن اينالاتىن تەمىر جولدىڭ ”ەڭ سوڭعى ءبىر كيلومەترىن“ تۇتاستىرىپ، وڭتۇستىك شينجياڭنىڭ شينجياڭنان شىعاتىن تەمىر جول ارناسىن قالىپتاستىرادى، شىعىستا ىشكى وڭىرلەرگە بارۋ بولسىن، الدە باتىستا ورتا ازياعا جانە ەۆروپاعا بارۋ بولسىن، شينجياڭ تەمىر جولى حاۋىپسىز، جىلدام، قولايلى ارنا رولىن اتقارىپ، شينجياڭ ەكونوميكاسىنىڭ جەدەل دامۋىنا جاڭا ومىرشەڭدىك كۇش ۇستەيدى.
ەرەكشە ونىمدەر سىرتقا تاسىلدى، ساياحاتشىلار كەلدى
بۇرىن جاڭا ۇزىلگەن كىشكەنە اق ورىكتى ىشكى وڭىرلەر ارقىلى تاسىپ، شىعىس بولىك وڭىرلەرگە جەتكىزۋ ءۇشىن شامامەن 15 كۇن كەتەتىن، ال قازىر اۆياتسيالىق سۋىق تىزبەك تاسىمالى بار، كۇشاردىڭ كىشكەنە اق ورىگى اۋە تاسىمالىمەن بۇكىل ەلدەگى 40 نەشە قالاعا 24 ساعات ىشىندە تاسىپ جەتكىزىلەدى. ءپايزاۋات اۋدانىندا تولىسىپ پىسقان شينمەيدى ىشكى وڭىرلەرگە جىبەرۋدە تاڭەرتەڭ جونەلتىلىپ، كەشكە جەتكىزىلۋ جۇزەگە اسىرىلعان.
سوڭعى جىلدارى شينجياڭداعى اۋەجايلار سانى ۇزدىكسىز كوبەيىپ، اۋە جەلىلەرى بارعان سايىن ءجيى، تىعىز تارتىلۋدا، بىلتىر جىل سوڭىنا دەيىن شينجياڭ اۋەجاي توبىنىڭ ۇشاق ۇشاتىن اۋە جەلىلەرى 230عا، شينجياڭ ىشىندەگى تارماق جەلى اۋەجايلارىنىڭ ءبىر - بىرىنە قاتىنايتىن اۋە جەلىسى 36عا جەتتى. بۇل دا شينجياڭ اۋىل شارۋاشىلىق قوسىمشا ونىمدەرىنىڭ شينجياڭنان شىعۋ جىلدامدىعىن تەزدەتە ءتۇستى.
7 - ايدىڭ 24 - كۇنى كەريا اۋەجايى ينجەنەريا قۇرىلىسى قولباسشىلىق شتابىنىڭ قولباسشىسى لي يگاڭ بىلاي دەدى: بۇل اۋەجاي جىلىنا 180 مىڭ جولاۋشى (رەت)، 400 توننا پوچتا جولدامالارىن جونەلتەدى دەپ جوبالانعان، سالىنىپ بىتكەن سوڭ كەريا، شەريا، نيە سياقتى جەرلەرگە اۋە تاسىمالىنان قىزمەت وتەي الادى.
شينجياڭ تاۋارلارىنىڭ ”سىرتقا شىعۋ“ قادامىنىڭ جەدەلدەۋىنە بايلانىستى، ”شينجياڭعا كەلەتىن“ ادامدار قاتارى دا مولايا تۇسۋدە. 2019 - جىلى شينجياڭ قابىلداعان ساياحاتشىلار سانى تۇڭعىش رەت 200 ميلليون ادامنان (رەت) اسىپ، ساياحاتشىلار سانى مەن ساياحات كىرىسىنىڭ ەكەۋى دە سايكەس مەزگىلدەگىدەن ％40تىڭ ۇستىندە ارتتى.
بيىل رايونىمىزدا 14 تاس جول نىسانىندا قۇرىلىس ءبىتىپ، اۆتوكولىك قاتىنايدى نەمەسە نەگىزگى تۇلعالىق قۇرىلىسى بىتەدى، بۇكىل رايونداعى جوعارى قارقىندى تاس جولدىڭ جالپى ۇزىندىعى 5500 كيلومەتردەن اسادى دەپ مەجەلەنۋدە؛ گولمۋد - كورلا تەمىر جولى، التاي - كوكتوعاي - جۇندۇڭ تەمىر جولى تۇتاس جەلى بويىنشا ىسكە قوسىلادى، حوتان - چارقىلىق تەمىر جولىندا دا كەلەر جىلى پويەز قاتىنايدى، وڭتۇستىك - سولتۇستىك شينجياڭ تەمىر جولىنىڭ اينالما جەلىسى تۇلعالانۋ الدىندا تۇر، بۇل رايونىمىزدىڭ ەكونوميكاسىنىڭ، قوعامىنىڭ ورنىقتىلىعى مەن دامۋىنا مىعىم قاتىناس نەگىزىن ازىرلەيدى.
