چيڭحى جولى الەۋمەتتىك اۋماعى ەرىكتىلەر اۆتوكولىك اترەتىنىڭ ءبىرتۇتاس بەلگىسى.
تيانشان تورىنىڭ حابارى (سۋرەتىن ءتۇسىرىپ حابارىن جازعان تىلشىلەر سۇن فاڭتيڭ، ۋاڭ جوۋ). 8 - ايدىڭ 13 - كۇنى ءۇرىمجىنىڭ ەڭ جوعارى تەمپەراتۋراسى 31 سەلتسي گرادۋسقا جەتىپ، تىمىرسىق ىستىق بولدى، ليۋ يادۇڭ جەل وتپەيتىن ساقتانۋ - قورعانۋ كيىمىن، قولعابىن كيىپ، اۆتوكولىكتى زارارسىزداندىرعاننان كەيىن، الەۋمەتتىك اۋماق كادرلارىمەن بىرگە قاراستى اۋماقتاعى قايتالاي تەكسەرىلەتىن ناۋقاستاردى شيپاحاناعا اپاردى.
ىندەت باستالعاندا، وزدەرى تۇرعان چيڭحى جولى الەۋمەتتىك اۋماعىنىڭ ۇندەۋىندە، ليۋ يادۇڭ سايباق رايونى پيڭديڭشان اۋماعى چيڭحى جولى الەۋمەتتىك اۋماعىنىڭ ”مىندەتتى ەرىكتىلەر اۆتوكولىك اترەتىنە“ قوسىلادى، باسقا 21 ەرىكتىمەن بىرگە، تاۋلىك بويى ارناۋلى تۇردە ەمدەلۋ قاجەتى بار تۇرعىندارعا قولايلىلىق جاراتتى.
ليۋ يادۇڭ قورعانۋ قولعابىن كيۋدە.
اۆتوكولىك اترەتىنىڭ ەرىكتىلەرى ادەتتە ۇيدە بولادى، الدا - جالدا جۇمىس بولا قالسا، الەۋمەتتىك اۋماق ۋيشين توبى جانە تەلەفون ارقىلى ەرىكتىلەرگە حابارلاسادى. ليۋ يادۇڭنىڭ ۋيشينىندە، ”چيڭحى جولى الەۋمەتتىك اۋماعى مىندەتتى ەرىكتىلەر اۆتوكولىك اترەتى“ بىردەن -ءبىر ەڭ كورنەكتى ورىندا تۇراتىن ۋيشين توبى.
”ماعان كەشتە ’تاپسىرىس‘ كوپ كەلەدى، مەن اۆتوكولىك اترەتىندەگى ەڭ جاسىمىن، باسقا ەرىكتىلەردىڭ دەنىنىڭ بالا-شاعاسى بار، مەن جالعىز تۇرامىن، كەشتە ادەتتە تاڭعى ۇشكە دەيىن كۇتىپ، ۋيشين توبىندا مىندەت جوق بولسا بارىپ ۇيىقتايمىن“،-دەدى ليۋ يادۇڭ.
ءار رەت شىققاندا شاعىن اۋماق پەن شيپاحانانىڭ اراسىندا عانا قاتىناعانىمەن، باستابىندا ليۋ يادۇڭدا ازدى-كوپتى پسيحيكالىق قىسىم بولدى. بىرتىندەپ، مۇنداي ەرىكتى قىزمەت وتەۋگە ۇيلەسىپ كەتتى، ءار كۇنى اۆتوكولىگىن زارارسىزداندىرىپ تۇرادى.
8 - ايدىڭ 1 - كۇنى تۇنگى ساعات 2دەن 18 مينۋت وتكەندە، الەۋمەتتىك اۋماق كادرى چىن سىچاۋ ۋيشين توبىندا ءالى دەمالماعان ەرىكتى بار - جوقتىعىن سۇراعاندا، ليۋ يادۇڭ دەرەۋ جاۋاپ قايتاردى ءارى ساقتانۋ - قورعانۋ جابدىقتارىمەن قامدانىپ عيماراتتان ءتۇستى.
”70 تەن اسقان ءبىر قارتتىڭ كەشتە قان قىسىمى كەنەت 220عا كوتەرىلدى، الەۋمەتتىك اۋماق كادرى ەكەۋىمىز شيپاحاناعا اپارا جاتقان جولدا، قارت قايتا - قايتا اۆتوكولىكتى توقتاتىپ قۇستى، تاعى ەكى رەت اۆتوكولىك ىشىنە قۇستى، قارتتىڭ قينالعان بەينەسىن كورىپ، مەن دە قاتتى قينالدىم“،-دەدى ليۋ يادۇڭ ەسكە الىپ، ول شيپاحانادا تۇنگى ساعات 3تەن تاڭعى ساعات 7گە دەيىن كۇتىپ، قارتتىڭ ەمدەلۋى اقىرلاستىرعاننان كەيىن بارىپ كوڭىلى ورنىعىپ، قارتتى ۇيىنە جەتكىزىپ قويدى.
”كەيىن وتباسىن كوتەرمەگە الۋشى كادر ماعان وسى رەتكى ەمدەۋدەن سوڭ قارتتىڭ قان قىسىمى ورنىقتى بولعاندىعىن ايتقاندا، ىشتەي قاتتى قۋاندىم“،-دەدى ليۋ يادۇڭ.
ليۋ يادۇڭمەن ءبىر ۋاقىتتا ”مىندەتتى ەرىكتىلەر اۆتوكولىك اترەتىنە“ كىرگەن پارتيا مۇشەسى فان شياۋچياڭ 2 - ايدا دا ەرىكتىلەر اۆتوكولىك اترەتىنە قاتىناسقان.
”ىندەتكە قارسى اتتانۋ جولىندا، پارتيا مۇشەلەرى ىندەتتەن ساقتانۋدىڭ قامالىن قۇرىپ، ولاردىڭ حاۋىپسىزدىگىن قورعاۋىمىز كەرەك“،-دەدى فان شياۋچياڭ.
فان شياۋچياڭ اۆتوكولىك ءىشىن زارارسىزداندىرۋدا.
56 جاستاعى جاڭ يشين فان شياۋچياڭنىڭ اۆتوكولىگىنە وتىرىپ شيپاحاناعا حيميالىق جولمەن ەمدەلۋگە بارعاندا ونىمەن تانىسقان، كۇن ارالاتىپ شيپاحاناعا بارىپ حيميالىق جولمەن ەمدەلەدى، جولدا فان شياۋچياڭ ۇنەمى جاڭ يشينمەن اڭگىمەلەسىپ، ونىڭ كوڭىل كۇيىن سەرگىتەدى.
8 - ايدىڭ 13 -كۇنى ساعات 19دا، فان شياۋچياڭ جاڭ يشيندى شاعىن اۋماققا اكەلىپ قويادى، اۆتوكولىكتەن تۇسكەن فان شياۋچياڭ داعدى بويىنشا ونى زارارسىزداندىرعاننان كەيىن، وتباسىن كوتەرەگە العان كادر ونى ۇيىنە جەتكىزىپ قويادى، ءبىراق وسى رەت جاڭ يشين جالت بۇرىلىپ فان شياۋچياڭنىڭ بىلەگىنەن تارتادى، فان شياۋچياڭ دىمدانعان كوز قالقانىنان جاڭ يشيننىڭ جىلاعانىن كوردى.
”شىن كوڭىلىمنەن ساعان العىس ايتامىن، ءار جولى مەنى شيپاحانانىڭ سىرتىندا كۇتىپ تۇرعانىڭدا، مەنىڭ كوڭىلىم دە ورنىعادى“،-دەدى جاڭ يشين قىستىعا، كوز جاسى ماسكىسىن سۋلاندىردى. فان شياۋچياڭ دا تەبىرەنىپ: ”ەشتەڭە ەتپەيدى، تەك دەنساۋلىعىڭىز جاقسارسا بولدى، بارىنەن ماڭىزدىسى سول“،-دەدى.
امالياتتا، چيڭحى جولى الەۋمەتتىك اۋماعى ”مىندەتتى ەرىكتىلەر اۆتوكولىك اترەتىندەگى“ ءاربىر مۇشەنىڭ ىقىلاستى قىزمەت وتەۋ حيكاياسى بار، ولار ىندەت جويىلمايىنشا، مىندەتتى ەرىكتىلەر اۆتوكولىك اترەتىنىڭ تارامايتىندىعىن ءبىلدىردى.
ءۇرىمجى قالالىق 3 - ورتا مەكتەپتىڭ سايباق رايونى پيڭديڭشان اۋماعى چيڭحى جولى الەۋمەتتىك اۋماعىندا تۇراتىن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتىنىڭ باستىعى گاۋ يىڭ بىلاي دەدى: 7 - ايدىڭ 17 - كۇنىنەن 8 - ايدىڭ 13 - كۇنىنە دەيىن، چيڭحى جولى الەۋمەتتىك اۋماعى ”مىندەتتى ەرىكتىلەر اۆتوكولىك اترەتى“ جالپى 320 رەت تۇرعىنداردى اپارىپ - اكەلىپ، 1787 وتباسى، 5342 تۇرعىننىڭ ەمدەلۋ قاجەتىن بار كۇشپەن قامتاماسىزداندىردى.
بۇدان سىرت، ءتىلشىنىڭ سايباق رايوندىق پارتكوم ۇگىت بولىمىنەن ۇعىسۋىنشا، بۇنداي ەرىكتىلەر اۆتوكولىك اترەتىنەن سايباق رايونىندا جالپى 180ى بار بولىپ، بۇل اۆتوكولىك اترەتتەرى ادام مەن اۆتوكولىكتىڭ ىندەتتەن ساقتانۋ شاراسىن ويداعىداي ىستەۋ نەگىزىندە، ءارقايسى شاعىن اۋماقتاعى تۇرعىندار مەن ىندەتتەن ساقتانۋ قىزمەتكەرلەرىن اقىسىز اپارىپ - اكەلۋ، ەمدەلۋ، تۇرعىندارعا ءدارى - دارمەك، تۇرمىستىق زاتتار ساتىپ الۋ قىزمەتىن وتەگەن.
