اقجازىق قىستاعى ىلە وزەنى اڭعارىنىڭ ورتا بولەگىنە ورنالاسقان، تابيعي جايلىم بايلىعى مول بولىپ، ەرەكشە تۇيە باعىمشىلىعىن دامىتۋعا تاماشا شارت - جاعداي ازىرلەنگەن.
جاقىنعى جىلداردان بەرى، توعىزتاراۋ اۋداندىق اۋىل شارۋاشىلىعى، اۋىل ـ قىستاق مەكەمەسىنىڭ قىستاقتا تۇراتىن قىزمەت اترەتى ەرەكشە كاسىپتىڭ ”تەتىگىن“ مىقتاپ يگەرىپ، قىستاق ”ەكى كوميتەتىمەن“ بىرگە قىستاق تۇرعىندارىنىڭ كەدەيلىكتەن ارىلىپ، اۋقاتتانۋىنا كومەكتەستى. ”پارتيا ياچەيكاسى + كاسىپورىن + كووپەراتيۆ + شارۋا وتباسى“ سىندى كاسىپ سالاسى ارقىلى كەدەيلەردى سۇيەمەلدەۋ ۇلگىسىن قولدانۋ ارقىلى شينجياڭنىڭ جەرگىلىكتى ٴسۇت شارۋاشىلىعى سەرىكتەستىگىن اقجازىق قىستاعىنا ىرگە تەبۋگە باۋراپ، تۇيە باعىمشىلىق سەلبەستىك كووپەراتيۆىن قۇرىپ، وسى قىستاقتاعى 53 كەدەي وتباسىنىڭ 53 تۇيەسىن شوعىرلى باعىپ، تۇيە شارۋاشىلىعىن شالقىتتى.
”قىزمەت گرۋپپاسى كەلگەن سوڭ، تۇيە باعىمشىلىق كووپەراتيۆىن قۇرۋعا كومەكتەستى، قازىر ءبىز تۇيەنى كووپەراتيۆكە باعىمعا بەردىك، قولىمىز بوساپ سىرتقا شىعىپ جۇمىس ىستەپ اقشا تابا الاتىن بولدىق، سونداي - اق ءار جىلى كووپەراتيۆتەن 2000 يۋان تابىس قاراجاتىن الامىز“،-دەدى قىستاق تۇرعىنى ءانزار اسقار قۋانا.
تۇيە باعىمشىلىعىنىڭ ءونىمىن كورگەننەن كەيىن، قىستاق تۇرعىندارى ىركەس - تىركەس بەلسەنە ات سالىستى. قازىرگە دەيىن، اقتوبە قالاشىعىنداعى 88 تۇيەنى تۇگەلدەي كووپەراتيۆكە باعۋعا بەردى، تۇيە باعىمشىلىعى قىستاقتاعى ”ەڭ جاندى“ كاسىپكە اينالدى.
”ءبىزدىڭ فەرما تابيعي باعىمشىلىققا تاباندى بولادى، كەلەسى قادامدا 1000نان استام تۇيە باعۋدى جوسپارلادىق، باعىمشىلىق كولەمىن كەڭەيتىپ، ىلە وزەنى اڭعارىنداعى ەڭ كولەمدى تۇيە باعىمشىلىعى بازاسىن قۇرىپ، شارۋالاردىڭ ەكونوميكالىق كىرىسىن جالعاستى ارتتىرامىز“،- دەدى كووپەراتيۆ جاۋاپتىسى جاۋ جۋساي.
