شينجياڭ گازەتىنىڭ جالپىلىق اقپارات قۇرالدارى ءتىلشىسى ما ينيڭ، ەرىكتى ءتىلشى چى جيە 8 - ايدىڭ 23 - كۇنى ۇرىمجىدەن حابارلايدى. 8 - ايدىڭ 22 - كۇنى ساعات 9دان 15 مينۋت وتكەندە، 124 وقۋشى وتىرعان جۇڭگو وڭتۇستىك اۆياتسيا جارنا شەكتى سەرىكتەستىگىنىڭ CZ2395 كەزەكشى ۇشاعى شاۋەشەكتەن جىڭجوۋعا ۇشتى، بۇل ۇرىمجىدە جاڭا تيپتى ايدارشا ۆيرۋس وكپە قابىنۋ ىندەتى قايتا تۋىلعاننان كەيىن وڭتۇستىك اۆياتسيا سەرىكتەستىگىنىڭ وقۋدى قالپىنا كەلتىرۋ بويىنشا العاش ۇشىرعان جالدامالى ۇشاعى. سول كۇنى تاعى 295 وقۋشى جەكە - جەكە شاۋەشەكتەن جانە التايدان شي - انعا ۇشىپ، مەكتەپكە قايتۋ ساپارىن باستادى.
كەزەكتە بۇكىل ەلدىڭ جەر - جەرىندەگى جوعارى مەكتەپتەر وقۋ باستاۋ الدىندا تۇر، وقۋدى قالپىنا كەلتىرۋدى قامتاماسىز ەتۋدى ويداعىداي ىستەۋ ءۇشىن، وڭتۇستىك اۆياتسيا شينجياڭ بولىمشە سەرىكتەستىگى مەكتەپكە قايتاتىن جولاۋشىلاردىڭ قاتىناۋ سۇرانىسىنا ءجىتى نازار اۋدارىپ، مەكتەپكە قايتاتىن توپتارعا ارنالعان ۇشاق كاسىبىن اشىپ، ينفورماتسيا جيناۋ، تىركەلۋ ءتارتىبى جانە قامتاماسىز ەتۋدىڭ جاي - جاپسارى سياقتى جاقتاردان دايىندىق قىزمەتتەردى الدىن الا ويداعىداي ىستەدى.
8 - ايدىڭ 16 - كۇنى وڭتۇستىك اۆياتسيا سەرىكتەستىگىنىڭ التايدا تۇراتىن جۇمىس باسقارماسى بەيتۇن قالاسىندا ىشكى وڭىرلەردەگى جوعارى مەكتەپتەردە، ورتا تەحنيكۋمداردا وقيتىن 500 وقۋشىنىڭ مەكتەپكە قايتۋعا ءزارۋ بولىپ وتىرعاندىعىنان حابار تابادى. تىزىمدەگى مەكتەپتەر تۇراتىن ولكە، قالالاردىڭ سالىستىرماسىنا تالداۋ جاساعان سوڭ، ەڭ كوپ ادام باراتىن جەردىڭ شي - ان قالاسى ەكەنىن بايقايدى. جەرگىلىكتى ورىنمەن سويلەسۋدەن كەيىن، وڭتۇستىك اۆياتسيا سەرىكتەستىگى التاي − شي - ان توتە ۇشۋ جەلىسىن اشۋدى ۇيعارىپ، وقۋشىلار شي - انعا جەتكەن سوڭ باسقا ۇشاققا نەمەسە تەمىر جول قاتىناسىنا اۋىسۋ تاسىلىمەن كەيىنگى ساپارلارىن جالعاستىراتىن بولدى. 8 - ايدىڭ 22 - كۇنى تۇستەن بۇرىن جۇمىس باسقارماسى سول جەردەگى اۋەجايمەن سايكەسۋ ارقىلى ”شينجياڭنان شىعاتىن وقۋشىلار ارناۋلى تەكشەسىن“ ورنالاستىرىپ، مەكتەپكە قايتۋ بويىنشا جەدەلدەتىلگەن قىزمەت وتەۋ جاسىل ارناسى سياقتى جەلىلىك قىزمەت وتەۋلەر اشتى.
