ولشەمدەندىرىپ باعىپ، كاسىپ تىزبەگىن ۇزارتتى
رايونىمىز وسى زامانعى مال شارۋاشىلىعىنىڭ جاسىل دامۋىن ىلگەرىلەتتى
شينجياڭ گازەتىنىڭ جالپىلىق اقپارات قۇرالدارى ءتىلشىسى حي حۇڭۋي 8 - ايدىڭ 23 - كۇنى ۇرىمجىدەن حابارلايدى. 8 - ايدىڭ 12 - كۇنى سانجى قالاسى بينحۋ قالاشىعىنداعى شينجياڭ لاڭچيڭ مال شارۋاشىلىق شەكتى سەرىكتەستىگىنىڭ وسىزاماندانعان سيىر قوراسىندا ساۋىن سيىرلار كەنەۋى مول ”جىلجىمالى ازىقتان“ ازىقتانۋدا.
”بۇل جاي سيىر قورا ەمەس، ءبىز ساۋىن سيىردىڭ تەزەگى مەن جاپاسىن ءبولىپ مانەرلەپ ءبىر جاقتى ەتۋ ارقىلى ورگانيكالى تىڭايتقىشقا اينالدىرىپ، مال فەرماسىندا جەمىس، كوكونىس ەگۋگە پايدالانىپ، اينالمالى اۋىل شارۋاشىلىق كاسىپ تىزبەگىن قالىپتاستىردىق“. ساتۋ ديرەكتورى جوۋ لياڭنىڭ تانىستىرۋىنشا، سەرىكتەستىك مال فەرماسىن تايانىش ەتىپ، كاسىپ تىزبەگىن ۇزدىكسىز ۇزارتىپ، ولشەمدى ەگىمشىلىك، باعىمشىلىق ءوندىرىسى، ءسۇت ونىمدەرىن مانەرلەۋ، اۋىل شارۋاشىلىق سەيىل - سەرۋەن ساياحاتى، عىلىم جالپىلاستىرۋ تاربيەسى، ينتەرنەت جەلىسىندە ساتۋ سياقتىلار ءبىر تۇلعالانعان، 1 -، 2 -، 3 - كاسىپتەر توعىسىپ دامىعان كاسىپورىن تۇلعالاعان.
تيانشاننىڭ وڭتۇستىگى مەن سولتۇستىگىنە كوز جىبەرسەڭىز، لاڭچيڭ مال شارۋاشىلىق سەرىكتەستىگى سياقتى زەردەلىلەنگەن، ولشەمدەنگەن باعىمشىلىق فەرمالارىنىڭ بارعان سايىن كوبەيگەنىن بايقايسىز. بيىل رايونىمىز ءداستۇرلى سويىس سيىر، سويىس قوي، ساۋىن سيىر سياقتى مال تۇرلەرىن نەگىز ەتە وتىرىپ، سويىس كەپتەر، سويىس ەسەك، جىلقى، بال اراسى سياقتى تۇرلەردى ولشەمدەندىرۋدەن ۇلگى كورسەتۋ فەرماسىن قۇرۋعا ءوتىنىش ەتىپ، باعىمشىلىقتا ولشەمدەندىرىپ وندىرۋدەن ۇلگى كورسەتۋدىڭ جەتەكشىلىك رولىن ساۋلەلەندىرۋدى كوزدەدى.
مال شارۋاشىلىعىنىڭ قامداۋ جاعىنداعى قۇرىلىمدىق رەفورماسىن ىلگەرىلەتىپ، ” ءتورتتى اسىلداندىرۋ، ءبىردى ولشەمدەندىرۋ“ كەشەندى سايكەستى شارالارىن جالپىلاستىرۋ ارقىلى، رايونىمىز ولشەمدەنگەن جەمدەۋ، ءوسىرۋ، باعۋ قاتارلى جۇيەلەردى باستاپقى ادىمدا قالىپتاستىردى. ەگىن شارۋاشىلىق وڭىرلەرىندە، رايونىمىز مال شارۋاشىلىعىن گۇلدەندىرۋ ارەكەتىن اتقارۋدى باس تۇتقا ەتىپ، ”ولشەمدەنگەن، كولەمدەنگەن باعىمشىلىق مولشەرىن ارتتىرۋ، كاسىپ سالالاندىرىپ شوعىرلى دامىتىپ، ساپاسىن جوعارىلاتۋ، ماركالاندىرىپ بازاردى كەڭەيتىپ، ونىمدىلىكتى ارتتىرۋ“ جولىمەن ءجۇرىپ، كاسىپ سالاسىنىڭ دەڭگەيىنىڭ جوعارىلاپ، دارەجەسىنىڭ ارتۋىن جەبەدى؛ مال شارۋاشىلىق وڭىرلەرىندە، ەكولوگيالىق وركەنيەت قۇرىلىسىن ىلگەرىلەتۋدى، ەكونوميكانىڭ دامۋى مەن گۇلدەنۋىن، ورنىقتىلىعىن جەبەۋدى توڭىرەكتەي وتىرىپ، ”ەكولوگيالىق ورتانى ويداعىداي قورعاپ، دامىتىپ، مولشەردى ورنىقتىرىپ، ونىمدىلىكتى ارتتىرۋ، ۇزدىكسىز دامىتۋ“ جولىمەن ءجۇرىپ، شينجياڭنىڭ جاسىل مال شارۋاشىلىق ونىمدەرىن ءوندىرۋ بازاسىن تۇلعالاپ، جايلىمى جاسىل، مال شارۋاشىلىعى ورنىقتى، ساياحات گۇلدەنگەن، كاسىپ الۋەتتەنگەن، مالشىلار بايىعان نىسانانى جۇزەگە اسىردى.
مال شارۋاشىلىعىنىڭ جاسىل دامۋىن جۇزەگە اسىرۋدا، مال مەن قۇستىڭ جاراقسىز زاتتارىن بايلىققا اينالدىرىپ پايدالانۋدى ىلگەرىلەتۋ − ءتۇيىن. اۆتونوميالى رايوندىق مال شارۋاشىلىعى، مال شيپاگەرلىگى مەكەمەسىنىڭ قاتىستى جاۋاپتىسى تانىستىرىپ بىلاي دەدى: رايونىمىز تاعى دا 3 جىل ۋاقىت جۇمساپ، بۇكىل رايونداعى مال مەن قۇستىڭ دايراق، لاس زاتتارىن بايلىققا اينالدىرىپ پايدالانىلۋ مولشەرىن ％80تەن اسىرىپ، اۋىرىپ ولگەن مال مەن قۇستى زالالسىزداندىرىپ ءبىر جاقتى ەتۋدى جەدەل اتقارىپ، سيىر، قوي، ءۇي قۇستارى سياقتىلاردى اۋىرىپ ولگەن مال مەن قۇستى زالالسىزداندىرىپ ءبىر جاقتى ەتۋ جاردەماقىسى ساياساتىنىڭ كولەمىنە بىرتىندەپ ەنگىزىپ، زالالسىزداندىرىپ ءبىر جاقتى ەتۋ مەن قامسىزداندىرۋدىڭ قوسىلا ارەكەت ەتۋ مەحانيزمىن كەمەلدەندىرۋدى جوسپارلادى.
رايونىمىز وسى زامانعى مال شارۋاشىلىعىنىڭ جاسىل دامۋىنىڭ دارەجەسى جوعارىلاتىلعان ءتۇرىن تۇلعالاۋدا، مال مەن قۇس سورتتارىنىڭ وڭىرلىك ورنالاسۋىن ىشكەرىلەي جاقسارتىپ، مال مەن قۇس ءوندىرىس بازاسىن ۇلعايتىپ، مال شارۋاشىلىعى ءوندىرىسى قۇرىلىمىن جاقسارتىپ، دارەجەسىن جوعارىلاتىپ، وسى زامانعى مال شارۋاشىلىعىن دامىتۋدىڭ جاسىل، باياندى جولىنا بىرتىندەپ تۇسۋدە.
