”جاڭزاگۋ“ حوشۇتقا تامىر تارتتى
تارى ۇلكەن كاسىپ سالاسىنا اينالدى
شينجياڭ گازەتىنىڭ بايىنعولين تىلشىلەر پۋنكتىنەن جوۋ حايشيا
جاڭزاگۋ
بىر ءتۇيىر ءداندى داقىل ءبىر وڭىرگە قانشالىق ۇلكەن وزگەرىس اكەلەدى؟
”جاڭزاگۋ“ حوشۇت اۋدانىندا جالپىلاستىرىلىپ ەگىلگەن 8 جىلدان بەرى، وسى ءداندى داقىل كىلەڭ ەگۋ نىسانىنان جەرگىلىكتى ورىنداعى ەگىنشى - مالشىلاردىڭ كەدەيلىكتەن ارىلىپ، كىرىستەرىن ارتتىرۋداعى تىرەكتى كاسىپ سالاسىنا اينالدى.
جاڭجياكوۋدان حوشۇتقا ىرگە تەپتى
7 - ايدىڭ 20 - كۇنى حوشۇت اۋدانى چۇيحۇي قالاشىعى دۇڭدىقۇدىق قىستاعىنىڭ كەڭ كوسىلگەن ەگىنجايىندا ”جاڭزاگۋ“ ءدان الا باستادى، قىستاق تۇرعىنى ليۋ ياميڭ اۋىرلىعىنان باسىن كوتەرە الماي ءيىلىپ كەتكەن سارى التىنداي داندەرگە قاراپ: ”بيىلعى ءتۇسىم ايتارلىقتاي بولادى“، - دەدى.
حىبەيدەن شينجياڭعا كومەككە كەلگەن كادرلاردىڭ جەتەكشىلىگىندە ليۋ ياميڭ 2013 - جىلدان باستاپ ”جاڭزاگۋ“ ەگە باستادى، العاشقى جىلى 60 مۋ جەرگە ەگىپ، 60 مىڭ يۋان كىرىس كىرگىزدى، بيىل ەگىلگەن جەر اۋدانىن 2100 نەشە مۋعا كەڭەيتتى.
2011 - جىلدىڭ باسىندا جاڭجياكوۋ قالاسىنان 1 - توپتا شينجياڭعا كومەككە كەلگەن كادرلار حوشۇتقا بارعاندا جەرگىلىكتى ورىندا توپىراقتىڭ قۇمايتتانۋىنىڭ اۋىر، سونداي - اق قۋاڭ، سۋ تاپشى، ەگىن شارۋاشىلىعى كىرىسىنىڭ جوعارى ەمەس ەكەندىگىن بايقايدى. شينجياڭعا كومەككە كەلگەن كادرلار مامانداردى ۇسىنىس ەتىپ، ەڭ سوڭىندا جاڭجياكوۋ قالالىق اۋىل شارۋاشىلىعى عىلىم اكادەمياسىنىڭ عىلمي جولمەن سۇرىپتاپ جەتىلدىرگەن قۋاڭشىلىققا ءتوزىمدى، سۋ ۇنەمدەيتىن، ءتۇسىمى جوعارى، توزىمدىلىگى كۇشتى ”جاڭزاگۋدى“ جەرگىلىكتى ورىندا جالپىلاستىرىپ ەگۋگە تاڭداپ تۇراقتاندىرادى.
2012 - جىلى حوشۇت اۋدانى سولتۇستىك تاۋلى وڭىردەگى 50 مۋ جەردە ”جاڭزاگۋدى“ سىناق رەتىندە ەكتى، سول جىلدىڭ وزىندە مۋ باسىندىق ءتۇسىمى 200 كيلوگرامعا جەتىپ، العاشقى ادىمدا تابىسقا جەتەدى.
ەگۋ سىناعىنان كورسەتىلگەندەي، حوشۇت اۋدانىندا ءبىر مۋ جەردەگى ءبيدايدى تامشىلاتىپ سۋارۋعا 500 تەكشەمەتر سۋ جۇمسالادى، ال ”جاڭزاگۋدىڭ“ ءتۇسىمىن تابيعي جاۋىن - شاشىنمەن - اق ارتتىرۋعا بولادى. قۋاڭ جەرگە ەگىلگەن ”جاڭزاگۋدىڭ“ مۋ باسىندىق ءتۇسىمى 200 كيلوگرام، ەگەردە ءار مۋ جەر 100 تەكشەمەتر سۋمەن سۋارىلسا، مۋ باسىندىق ءتۇسىمى 400 نەشە كيلوگرامعا جەتۋى مۇمكىن. سونىمەن بىرگە، ”جاڭزاگۋدىڭ“ ساباعىن جەم - شوپكە پايدالانىپ، سيىر، قوي سياقتى مالداردى باعۋعا بولادى.
حىبەي ولكەسىنەن شينجياڭعا كومەككە كەلگەن كادر، بايىنعولين موڭعۇل اۆتونوميالى وبلىستىق عىلىم - تەحنيكا مەكەمەسىنىڭ ورىنباسار باستىعى لي يان بىلاي دەدى: مال شارۋاشىلىعىنداعى ۇلكەن رايون ەسەبىندەگى شينجياڭنىڭ پايدالانۋعا بولاتىن جايلىم اۋماعى شەكتى، ساپالى جەم - شوپپەن قامداۋ جەتكىلىكسىز، ”جاڭزاگۋ“ ەگۋ ءارى ونىڭ ساباعىن جەم - شوپكە پايدالانۋدى جالپىلاستىرىپ، ءبىر جولدا 2 جۇمىس تىندىرىپ، جاسىل اينالمالى دامۋدى جۇزەگە اسىردى.
ءارجاق كۇش ۇيىستىرىپ، كاسىپ سالاسىن قالىپتاستىردى
2013 - جىلى حوشۇت اۋدانى چۇيحۇي قالاشىعىنىڭ ديقانى چىن شۋەلياڭ حوشۇت شىڭحى ”جاڭزاگۋ“ ەگىمشىلىك شارۋالار كاسىپتىك سەلبەستىك كووپەراتيۆىن قۇرىپ، ەگىس اۋماعىن 500 مۋعا كەڭەيتىپ، ءشول دالاداعى قۇنارسىز جەردەن ورتاشا مۋ باسىندىق ءتۇسىمىن 360 كيلوگرامعا، ساتىلىم سوماسىن 990 مىڭ يۋانعا جەتكىزدى، بۇل ناتيجە توڭىرەكتەگى كوپتەگەن ەگىنشى - مالشىلاردى سەلبەستىك كووپەراتيۆىنە مۇشە بولۋعا باۋرادى.
32 جاستاعى ماحاجى چۇيحۇي قالاشىعى كونەءشار قىستاعىنىڭ تۇرعىنى. ونىڭ وتباسى جەرىن سەلبەستىك كووپەراتيۆىنە اينالىمعا بەردى، جىلدىق كىرىسى 5000 يۋان، ءوزى ”جاڭزاگۋ“ مانەرلەۋ زاۆودىندا قىزمەت ىستەيدى، ايلىق ەڭبەكاقىسى 3000 يۋان. ”كۇيەۋىنىڭ سىرتتا جۇمىس ىستەپ تاپقان اقشاسىن قوسقاندا، وتباسىنىڭ جىلدىق كىرىسى 70 مىڭ يۋانعا بارادى“.
سوڭعى جىلدارى حوشۇت اۋدانىندا ”جاڭزاگۋ“ ەگۋ ءۇشىن، 4000 مۋدان استام جەردى اينالىمعا سالىپ، 200 نەشە ەگىنشى وتباسىنا تيىمدىلىك جەتكىزدى، جەردەن قولى بوساعان ەگىنشىلەر سەلبەستىك كووپەراتيۆىندە جۇمىس ىستەپ نەمەسە زاۆودتا جۇمىسقا تۇرىپ، وتباسى كىرىستەرىن ورتاشا ەسەپپەن 2000 يۋاننىڭ ۇستىندە اسىردى.
”ءبىز ’باستاماشى كاسىپورىندار جەتەكتەۋ + بازادا ۇلگى كورسەتۋ + ەگىنشى وتباسىلارىن قامتۋ‘ سىندى دامۋ وي جەلىسى بويىنشا سەلبەستىك كووپەراتيۆىن قۇرىپ، ’كاسىپورىن + بازا + ەگىنشى وتباسى + بازار‘ سىندى كاسىپ سالاسىن دامىتۋ ۇلگىسىن قالىپتاستىردىق“، - دەدى چىن شۋەلياڭ.
تاراپتاردىڭ كۇشى ”جاڭزاگۋعا“ شوعىرلاندى: سەلبەستىك كووپەراتيۆى جىلدىق ءوندىرىس قۋاتى 5000 توننالىق مانەرلەۋ زاۆودىن قۇرىپ، تارى مانەرلەۋ قۋاتىن جوعارىلاتتى؛ ”جاڭزاگۋدىڭ“ جاڭا سورتىن ەنگىزىپ، ءونىمنىڭ ءدامى مەن ءتۇسىن كورنەكتى جاقسارتتى؛ قارجىنى ءبىر تۇتاس جوسپارلاپ باۋلاۋ ماشيناسىن ساتىپ الدى، ءار مۋدىڭ جالپىلىق تابىسىن 60 يۋان ارتتىرىپ، اينالمالى ەگىن شارۋاشىلىعىنىڭ دامۋىن جەبەدى...
ساتىلىمنىڭ جاقسى بولۋى كەڭ كولەمدە ەگۋگە جەبەدى
”جاڭزاگۋدىڭ“ وراسان كومەسكى كۇشىن قايتكەندە اشۋعا بولادى؟ جاڭجياكوۋ قالاسىنىڭ شينجياڭعا كومەكتەسۋ بولىمشە قولباسشىلىق شتابى مەن حوشۇت اۋدانى ”جاڭزاگۋدىڭ“ ۇستەمە قۇنىن، بازار ونىمدىلىگىن جانە كەدەيلەردى سۇيەمەلدەۋ قۋاتىن جوعارىلاتۋدى، ت. ب كوزدە ۇستاپ، ”جاڭزاگۋدىڭ“ سوڭعى جەلىدەگى كاسىپ سالاسىنىڭ دامۋىن ىلگەرىلەتتى.
2017 - جىلى حوشۇت اۋدانى ”جاڭشو“ ماركاسىن تابىسپەن ءوتىنىش ەتىپ تىركەۋگە الدىردى، 2019 - جىلى جاسىل ازىق - تۇلىك كۋالىگىن الدى، قازىر ”تيانشان تارىسى“ اۋەلگى وندىرىلگەن جەر جاعراپيالىق بەلگىسىنە جانە اۆتونوميالى رايوننىڭ اۋىل شارۋاشىلىعى ونىمدەرى جاسىل كۋالىك بەلگىسىنە ءوتىنىش بەرۋدە.
”ساتىلىمىن ونان ارى ارتتىرىپ، ەگىنشى وتباسىلارىنىڭ كىرىستەرىن ارتتىرۋ ارناسىن كەڭەيتۋ ءۇشىن، ’جاڭزاگۋدى‘ جەلىدەن تىسقارى ساتۋدان سىرت، تاعى ءىشىنارا تور دۇكەندەرىمەن سەلبەستىك جاساستى، ەلەكتروندى ساۋدانىڭ ساتۋ ەرەكشەلىگىنە نەگىزدەلىپ، قازىر كوپ ءتۇرلى قوراپتالعان ءونىم تۇرلەرىن اشتى“، - دەدى حوشۇت اۋداندىق اۋىل شارۋاشىلىعى، اۋىل - قىستاق مەكەمەسىنىڭ باستىعى چىن پەيچي.
بۇگىنگى تاڭدا اۋاسىز قوراپتالعان ’جاڭزاگۋ‘چينحۋاڭداۋ، شىنجىن سياقتى جەرلەردىڭ ەرەن بازارلارىنا شىعارىلدى، سونداي - اق جيڭدۇڭ سياقتى ايگىلى ەلەكتروندى ساۋدا كاسىپورىندارىمەن قامداۋ - ساتۋ توقتامىنا قول قويىپ، ىشكى وڭىرلەرگە ساتىلاتىن جاسىل ارنا اشتى.
”جارىق، جىلۋ بايلىعىنىڭ تيىمدىلىگىنەن، حوشۇتتا ەگىلگەن ’جاڭزاگۋ‘ تارىسىنىڭ ماي قۇرامى، سەلەن قۇرامى جوعارى، قورەكتىگى مول، ءدامدى دە جابىسقاق بولىپ، ىشكى وڭىرلەردەگى تۇتىنۋشىلاردىڭ جاپپاي قارسى الۋىنا بولەندى، ساتىلىمنىڭ جاقسى بولۋى ەگۋ اۋماعىنىڭ كەڭەيۋىن جەبەدى. قازىر حوشۇتتا 20 مىڭ مۋ جەرگە ’جاڭزاگۋ‘ ەگىلدى، مۋ باسىندىق ءتۇسىمى 500 كيلوگرام، جالپى ءونىم قۇنى 44 ميلليون يۋان بولىپ، 500دەي ەگىنشى وتباسى يگىلىككە كەنەلدى“، - دەدى چىن پەيچي.
【جالعاپ وقۋ】
تارى ەرتەدە ”سوك“ دەپ اتالعان، ”بەس ءتۇرلى داقىلدىڭ اراسىندا ەڭ الدا تۇرادى“.’جاڭزاگۋ‘ − جاڭجياكوۋ قالالىق اۋىل شارۋاشىلىعى عىلىم اكادەمياسىنىڭ عىلىم - تەحنيكا قىزمەتكەرلەرى جەتىلدىرىپ شىققان قۋاڭشىلىققا ءتوزىمدى، سۋ ۇنەمدەيتىن، دەرت - دەربەزگە، جاپىرىلۋعا قارسىلىق قۋاتى كۇشتى، توزىمدىلىك، ۇيلەسكىشتىك قۋاتى كۇشتى جەلىلەس بۋدانداستىرىلعان تارىنىڭ جاڭا سورتى، ءتۇسىمى جوعارى، قۋاڭشىلىققا ءتوزىمدى، ساپالى، توزىمدىلىك قۋاتى كۇشتى بولۋداي ەرەكشەلىككە يە. قازىر ’جاڭزاگۋ‘ الدەقاشان حوشۇتتا تامىر تارتتى، سونداي - اق توڭىرەگىندەگى بۇگۇر، حىجيڭ سياقتى اۋدانداردى 5000 نەشە مۋ جەرگە ەگۋگە جەتەكتەپ، ايتارلىقتاي ەكونوميكالىق، قوعامدىق جانە ەكولوگيالىق ونىمدىلىك جاراتتى.
