ءۇرىمجى قالاسىندا دياگنوزى تۇراقتاندىرىلعان تاعى 15 ناۋقاس ساۋىعىپ شيپاحانادان شىقتى
شيپاحانادان شىققان ناۋقاستار مەن مەديتسينالىق باقىلاۋدان بوساتىلعان اۋرۋ بەلگىسى جوق جۇعىمدالۋشىلار جيىنى 1000نان استى
شينجياڭ گازەتىنىڭ جالپىلىق اقپارات قۇرالدارى ءتىلشىسى چاۋ جين 8 - ايدىڭ 31 - كۇنى ۇرىمجىدەن حابارلايدى. مەملەكەتتىك كەڭەستىڭ جاڭا تيپتى ايدارشا ۆيرۋس وكپە قابىنۋ ىندەتىنە توتەپ بەرۋ بويىنشا بىرلەسىپ ساقتانۋ، بىرلەسىپ تىزگىندەۋ مەحانيزمى ماماندار گرۋپپاسى مەن اۆتونوميالى رايونداعى ەمدەۋ - قۇتقارۋ ماماندارىنىڭ بىرلەسىپ دياگنوز قويۋىنان، ساراپتاۋىنان كەيىن، 8 - ايدىڭ 31 - كۇنى، ءۇرىمجى قالاسىندا تاعى دياگنوزى تۇراقتاندىرىلعان 15 ناۋقاس مەملەكەتتىك دەنساۋلىق ساقتاۋ، سالاماتتىق كوميتەتىنىڭ جاڭا تيپتى ايدارشا ۆيرۋس وكپە قابىنۋىنا شالدىعىپ دياگنوزى تۇراقتاندىرىلعان ناۋقاستاردىڭ شيپاحانادان شىعۋ ولشەمىنە ۇيلەسكەندىكتەن، ساۋىعىپ شيپاحانادان شىقتى، اۋرۋ بەلگىسى جوق 6 جۇعىمدالۋشى مەديتسينالىق باقىلاۋدان بوساتىلدى. قازىرگە دەيىن، دياگنوزى تۇراقتاندىرىلعان 792 ناۋقاس ساۋىعىپ شيپاحانادان شىعىپ، اۋرۋ بەلگىسى جوق 224 جۇعىمدالۋشى مەديتسينالىق باقىلاۋدان بوساتىلىپ، جالپى سانى 1016 بولدى.
اۆتونوميالى رايون جاڭا تيپتى ايدارشا ۆيرۋس وكپە قابىنۋى بويىنشا مەديتسينالىق قۇتقارۋ - ەمدەۋگە بەلگىلەگەن شيپاحانانىڭ ورىنباسار باستىعى لۋ چىن بىلاي دەپ تانىستىردى: قازىرگە دەيىن، وسى رەتكى ىندەتتەن ساۋىعىپ شيپاحانادان شىققان ناۋقاستار مەن مەديتسينالىق باقىلاۋدان بوساتىلعان اۋرۋ بەلگىسى جوق جۇعىمدالۋشىلاردىڭ جالپى سانى 1000نان استى، بۇل مەملەكەتتىك كەڭەستىڭ جاڭا تيپتى ايدارشا ۆيرۋس وكپە قابىنۋ ىندەتىنە توتەپ بەرۋ بويىنشا بىرلەسىپ ساقتانۋ، بىرلەسىپ تىزگىندەۋ مەحانيزمى ماماندار گرۋپپاسىنىڭ جەتەكشىلىگىندە، سان مىڭ ەمدەۋ ىستەرى قىزمەتكەرلەرىنىڭ بىرگە قۇلشىنۋىنىڭ ارقاسىندا قول جەتكىزگەن ناتيجە، ءبىزدىڭ العاشقى ءبىر مەزگىلدەگى ەمدەۋىمىزدىڭ بەلسەندى، ءونىمدى بولعانىن دالەلدەيدى، ناۋقاستار دا ءبىزدىڭ قۇتقارۋ - ەمدەۋ قابىلەتىمىزگە تولىق سەنىم ارتىپ وتىر. كەلەسى قادامدا ءبىز ۇزدىكسىز قاتاڭ تۇردە «جاڭا تيپتى ايدارشا ۆيرۋس وكپە قابىنۋىنا دياگنوز قويۋ جانە ونى ەمدەۋ جوباسىنداعى (سىناق رەتىندە اتقارىلاتىن 8 - نۇسقا)» بويىنشا، شيپاحاناداعى ناۋقاستارعا قۇتقارۋ - ەمدەۋ جانە ساۋىقتىرۋ جاتتىعۋىن بەلسەندىلىكپەن ورىستەتەمىز، ءبىزدىڭ ولاردى ويداعىداي ەمدەي الاتىن سەنىمىمىز، قابىلەتىمىز بار، ولاردىڭ ەرتەرەك ساۋىعۋىنا تىلەكتەسپىز.
